የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

መስፈርት ይኑረን

 “እንግዲህ ኤጲስ ቆጶስ እንዲህ ሊሆን ይገባዋል ፤ የማይነቀፍ” 1ጢሞ. 3፡2
አንድ አባት፡- “መስፈርት ከሌለው አገርና ዘመን አድነኝ ብለህ ጸልይ” ብለውኛል ። ይህ ምክር ከአሥራ አራት ዓመት በላይ ይሆነዋል ። እኚህ አባት በመቀጠል፡- “መስፈርት ቢኖር ኖሮ እኛ ተቀምጠን እውነተኞች አይባረሩም ነበር” ብለዋል ። መስፈርት የሌለው ሕይወት ከባድ ነው ። መስፈርት የሌላቸው ርግቦቹን ሸኝተው ነጣቂዎቹን ይዘው ተቀምጠዋል ። የሚወዷቸውን ገፍተው ከሚጠሉአቸው ጋር ተጣብቀዋል ። መስፈርት የሌላቸው ከማን ጋር መዋል እንዳለባቸው አላወቁምና ገንዘባቸውን ፣ ክብራቸውን ፣ ሰላማቸውን አጥተዋል ። መስፈርት የሌላቸው ወላጆች ልጆቻቸውን እግዚአብሔር ላለው ሰው ሳይሆን ገንዘብ ላለው ሰው ሸጠዋል ። እግዚአብሔር ላለው ይሰጣል ፣ ገንዘብ ላለው ይሸጣልና ። እነዚህ ወገኖች ትልቅ ቤት ትልቅ ጉድ እንዳለበት አላወቁም ። መስፈርት የሌላቸው ማኅበራት ሃይማኖት ትልቅ ርእስ ፣ ሰማይና ምድር የማይችለው ትልቅ አሳብ ያለበት መሆኑን ሳያውቁ የነጠላ ቁጨት ውስጥ ከትተውታል ። መስፈርት ከሌለ ዶግማና ቀኖናን መለየት ያቅታል ። ዶግማውን እንደ ቀኖና ፣ ቀኖናውን እንደ ዶግማ ፤ የፈቃዱን እንደ ግድ ፣ የግዱን እንደ ፈቃድ መያዝ ይጀመራል ። መስፈርት የሌላት ቤተ ክርስቲያን ወንጌል የያዙትን ገፍታ ሽጉጥ የያዙትን ታስቀራለች ። ሐዋርያው ወጥቶ ካድሬው ይሰነብታል ። አስተማሪው ወጥቶ ሕዝብ አጫዋች ይቀራል ። መስፈርት በሌላት አገር ሚኒስትሩን ካድሬ ያዘዋል ። ሊቁ ተሳዳቢ ተብሎ እንደ እብድ ይቆጠራል ፣  በተቃራኒ አዝማሪ ይገናል ። መስፈርት የሌላት አገር ልጆችዋ ላይ በር ቆልፋ ባዕዳንን ታቅፋለች ። መስፈርት የሌለው ዘመን ደፋርን ሊቅ ፣ ለፍላፊን ፖለቲከኛ ያደርጋል ። መስፈርት የሌለው አገልጋይ ጸሎተኞቹን ምእመናን ገፍቶ ባለጠጎችን ያቅፋል ። መስፈርት የሌለው ምእመን ዋጋ የሚከፍሉለትን አገልጋዮች ንቆ ቆዳውን በቁሙ የሚገሸልጡትን አራጆች ይከተላል ።

አዎ መስፈርት ቢኖረን ኑሮ የሚያከብሩንን ትሑታን ፣ የሚቆረሱልንን አፍቃሪያን ገፍተን አንሄድም ነበር ። መስፈርት ቢኖረን ኑሮ ጓደኛዬ ማነው? ብለን እኩያ ከመፈለግ ጓደኛ ልሆንለት የሚገባኝ ማን ነው ? ብለን የተጎዱትን እንፈልግ ነበር ። መስፈርት ቢኖረን ኑሮ የልጃችንን ዓለም አጥብበን በዘረኝነት አናሳድገውም ነበር ። መስፈርት ቢኖረን እግዚአብሔር ያለው ሁሉም አለው ብለን የእግዚአብሔርን ሰው እናከብር ነበር ። መስፈርት ቢኖረን ሊቃውንቱን አስቀምጠን እኛ አናወራም ነበር ። የሲኖዶስን ግብር ሰርቀን እኛ አናወግዝም ነበር ። መስፈርት ቢኖረን ከጊዜ ጋር አድመን እውነተኞችን ወኅኒ አንጥልም ነበር ። መስፈርት ቢኖረን ወንጌልን ከወንጀል እንለይ ነበር ። መስፈርት ቢኖረን ለሚያላግጡ እየከፈልን የሚያስተምሩትን አናስርብም ነበር ። መስፈርት ቢኖረን የፈረንጅን ሊቅ እየከፈልን የእኛን ሊቅ የአገሩን በር አንቆልፍበትም ነበር ። መስፈርት ቢኖረን ትሑቱን ልምጥምጥ ፣ አፍቃሪውን ምስኪን ፣ ታጋሹን ፈሪ ፣ ደጉን ሞኝ አንለውም ነበር ። መስፈርት ቢኖረን እንኳን ወንጌል የሥልጣኔ ፀሐይ ያልነካቸው ሰዎች አዋቂ ፣ ነቢይ ፣ ፈዋሽ እንሁን ሲሉን እናስተውል ነበር ። መስፈርት ቢኖረን ከሚያከብሩን መምህራን ወጥተን ፣ ዝናቸውን ለመካብ ዝናችንን ወደሚያፈርሱት ፣ የቪድዮ ነጋዴዎች አንሄድም ነበር ። የመገለጥን አምላክ የማጋለጥ አምላክ ወዳደረጉትን የምንነጕደው መስፈርት ስለሌለን ነው ።
መስፈርት የሌለው ሕይወት ሁልጊዜ ፍለጋ ላይ ነው ። መስፈርት የሌለው ወላጅነት ልጁን ዘመናዊነት አስጨብጦ መንፈሳዊነትን ያራቁታል ። መስፈርት የሌለው ማኅበር የተደባዳቢ ቡድን ይሆናል ። መስፈርት የሌለው አገር ጃርት ያበቅላል ። መስፈርት እስኪኖረን ገና ዋጋ እንከፍላለን ። አገር መለኪያ ከሌላት ወርቁም አይጠቅማት ።
ሐዋርያው ጳውሎስ መስፈርት እያስቀመጠ ነው ። ኤጲስ ቆጶስ የሚሆን ሊኖረው ስለሚገባ ብቃት ይናገራል ። እነዚህም በአጭሩ ለማስተማር እውቀት ፣ ለመምራት ሕይወት ያስፈልገዋል እያለ ነው ። እውቀትም ምግባርም የሌለው ከሆነ ከራሱ አልፎ የእግዚአብሔርን ቤት ያሰድባል ። አንድ አባት ሲናገሩ፡- “ላልተማረ ሰው ክህነት መስጠት ለእብድ ሰይፍ መስጠት ነው” ብለዋል ። ላልተማረ ክህነት ሕዝብን ፍጅ ብሎ ሰይፍ ማቀበል ነው ። “ከመጠምጠም ትምህርት ይቅደም” የሚባለው ለዚህ ነው ። ሐዋርያው ይህ መስፈርት ያስቀመጠው ምእመናን አገልጋዮችን እንዲለኩበት ፣ ይህ ይጎድላቸዋል እያሉ እንዲነቅፉበት አይደለም ። በእግዚአብሔር ቤት ሁሉም የራሱን ግዳጅ መወጣት አለበት ።
የመጀመሪያው መስፈርት የማይነቀፍ መሆን አለበት ። ባለፈው ዘመኑ ያልበደለ ወይም ነቀፋ ያለው ሥራ ያልሠራ ማለት አይደለም ። ያ ከሆነማ ጴጥሮስም ክዷል ፣ ጳውሎስም ቤተ ክርስቲያን አፍርሷል ። ንስሐ የገባና አሁን ባለው ቁመና የሚታይ ግድፈት የሌለበት ማለት ነው ። የማይታማ ማለት አይደለም ። የማይታማ ሰው አይደለም የማይታማ ግንብ የለም ። በርግጥም እንደ ቃሉ ለመኖር የሚጥር ሰው መሆን ይገባዋል ። ምክንያቱም የቤተ ክርስቲያን አስተዳደር ከሙያ ይልቅ ለቅድስና ያደላ ነውና ። በተለያዩ የነገረ መለኮት ትምህርት ቤቶች ብሉያትን ሐዲሳትን በሙያ ደረጃ የሚያስተምሩ ፣ እነርሱ ግን የማያምኑ ሙስሊሞች አሉ ። የቤተ ክርስቲያን አስተዳዳሪ ግን ሕይወቱ የቀና መሆን አለበት ። ያ ካልሆነ ቤተ ክርስቲያን በዓለም ዘንድ ነቀፋ ይደርስባታል ። የምእመናን ህልውናም አደጋ ውስጥ ይወድቃል ።
እግዚአብሔር ያግዘን ።
1ጢሞቴዎስ 34
ጥር 7 ቀን 2012 ዓ.ም.
ዲ.አ.መ.

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።