ሐሙስ፣ መጋቢት 13 2004 ዓ.ም.
ደግ ሰው አልቆ ጉብዝናም ሠሎ
መተማመን ክብርዋ ጎድሎ
ፍቅር ቀዝቅዛ
ጽድቅ አዘቅዝቃ
እውነት ጠንዝቶ
በረከት ጠፍቶ
ስለተፈታ ያ አንድነቱ
ና ትልሃለች ሙሽራይቱ።
በከሳቾች ጩኸት
በሥጋ ደም ምክር
በጅብ እርሻ ፍቅር
ጀርባችን ጎብጦብን
ልባችን ርዶብን
ሰልችቶናልና ተስፋ የፍጥረቱ
ናልን በምሕረት በቶሎ አቤቱ።
የጨለማ ጮራ
አጉርሶ ካራ
የቀኑ ድቅድቅ
ፍትፍትና ምርቅ
አፍቅሮ ከሳሽ
ቀድሶ አርካሽ
የማንጨበጥ ሙልጭልጭ ድንጋይ
ሆነናልና ቅዱስ አዶናይ
ና ና ሰብስበን በየፈርጃችን
መንፈሱ እና ሙሽራይቱ ና ና ይሉሃል ና ናፍቆታችን።
ሙሽራይቱ ና ትልሃለች
በውብ አጊጣ ደጅ እየጠናች
ና ና ይልሃል መንፈስ ቅዱስም
በብዙ ደስታ የተዋቡትን
የበጉን ልጆች በክብር እንድትሾም።
