የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

መግለጥ አለመቻል

አንድ የሚነገር አባባል አለ፡- “ምንጊዜም አንተን የሚያበሳጭህ ሰው አንተን ወዶህ ፍቅሩን በትክክል መግለጥ የማይችል ሰው ነው ።”

በዚህ ዓለም ላይ ከልባቸው ወድደው ፍቅራቸው መግለጥ ያልቻሉ ሰዎችና ሳይወዱ እንደሚወዱ የሚመስሉ ሰዎችን እናገኛለን ። ከልባቸው ወድደው ፍቅራቸውን መግለጥ የማይችሉ ሰዎች የተለያዩ ምክንያቶችን ያነሣሉ ።

ባልወድ ኖሮ አብሬ መኖር አልችልምና መውደዴን በቃል መግለጥ አስፈላጊዬ አይደለም ።

መውደዴን የምወደው ሰው ሊያውቀው ይገባዋል ።

የቤት ወጪዬን አላጓደልኩምና መውደዴ ምን ጥርጥር አለው ?

የተሻሉ ሰዎችን ትቼ ይህን ኑሮ እየኖርሁ ነውና የከፈልኩት መሥዋዕትነት ፍቅሬን ስለሚገልጥ መውደዴን መናገር አስፈላጊዬ አይደለም ።

ብዙ የውጭ ዕድሎቼን የሰረዝኩት ይህን ፍቅር በማክበሬ ነውና ፍቅሬን በሌላ መንገድ መግለጥ አስፈላጊዬ አይደለም ይላሉ ። 

እነዚህ ሰዎች አብሮ መኖር ማለት ፍቅር ብቻ አለመሆኑን አልተረዱም ። ሰው ከጎረቤቱ ፣ ከዘበኛውና ከቤት ሠራተኛውም ጋር አብሮ ይኖራል ። ይህ ግን ፍቅር ላይሆን ይችላል ። የምንወደው ሰውም ግንኙነቱ ከአንደበታችን ጋር እንጂ የልባችንን ላያውቅ ይችላልና በራሱ ማወቅ አለበት ብሎ ማሰብ አይገባም ። የቤት ወጪ ማሟላትም የፍቅር መገለጫ መሆን አይችልም ። ከሠራተኞች ጋር የሚኖሩም ያሟላሉ ። የትላንት መሥዋዕትነትም የዛሬን ፍቅር ሊገልጥ አይችልም ። ትላንት የከፈልነው ዋጋ ለትላንት ስሜታችን ትክክል ነበረ ፣ ያንን ግን ሁልጊዜ እያወሩ መውደዴ ይታወቅልኝ ማለት ትክክል አይደለም ። 

ከልባቸው ፍቅር ሳይኖር ወደድሁ የሚሉ ሰዎች አሉ ። እነዚህ ሰዎች የጠጡ ወይም ሳይጠጡ በገንዘብ ፍቅር የሰከሩ ናቸው ። ምንም ተግባር የላቸውም በአፍ ቁልምጫና በጣፈጠ ጨዋታ መውደዳቸውን ያወራሉ ። ቀልደኞችም ይጫወታሉ ፣ ስለሚወዱን ሳይሆን ቀልደው ስለሚኖሩ ነው ። የሚያቆላምጡንም የሚወዱን ላይሆኑ ይችላሉ ፣ ልምድ ስለሆነባቸውም ነው ። እውነት ተኝታ ውሸት ዓለምን ዞራ እንደምትመለስ ልክ እንደዚሁ ከልባቸው የሚወዱ ተረጋግተው ሳሉ ሐሰተኛ አፍቃሪዎች ግን የቃላት ዝናብ ሲያዘንቡ ይውላሉ ። እውነተኛ ፍቅር በልብ ሲኖር ባለቤቱን ደስ ያሰኛል ፣ በአፍ ሲገለጥ ተወዳጁን ያስደስታል ፣ በተግባር ሲገለጥ ሁለቱም ያንጻል ። በፍቅር ውስጥ ያለው ሕንጸት እንጂ ጊዜ መግፋት አይደለም ። የሚያንጽ ፍቅር በልብ ፣ በቃልና በተግባር ሕያው መሆን አለበት ። ራሳችንን ከፍቅር ጎድለን ስናገኘው ፣ ትላንት የምንወደውን ሰው ዛሬ መውደድ ሲያቅተን ከመጨነቅ መጸለይ መልካም ነው ። ምክንያቱም እግዚአብሔር ካልረዳን ራሳችንንም መውደድ አንችልም ። ፍቅር የባሕርያችን ሳይሆን ከእግዚአብሔር የምንካፈለው ጠባይ ነውና እንደገና እንዲሞላን መለመን ያስፈልገናል ። 

ከልባቸው የሚወዱ ሰዎች ፍቅራቸውን መግለጥ አለመቻላቸው ብቻ ሳይሆን ፍቅራቸውን በተሳሳተ መንገድም ሊገልጡት ይችላሉ ። የሚያበሳጩ ነገር ግን እየወደዱ ያሉ ሰዎች አሉ ። የሚወድ ሰው እንዴት ያበሳጫል ? ከተባለ እነዚህ ሰዎች ፍቅራቸው መግለጥ ስላቻሉ ነው ። በጣም ከተጎዳን በኋላ ሊነቁ ይችላሉ ፣ እነርሱ ግን እንደሚወዱን ብቻ በማሰብ የሚያጠፉትን ጥፋት የሚያውኩትን ስሜት አይረዱም ። ብዙ ልጆች ወላጆቻቸውን በሽተኛ ያደረጉት በዚህ መንገድ ነው ። ልጆቹ የሚነቁት ግን ወላጆቻቸው ካለፉ በኋላ ነው ። ፍቅራቸውን በስድብ የሚገልጡም አሉ ። ፍቅር ቅዱስና አክባሪ ነው ። እነዚህ ሰዎች ግን መውደድ የሚገለጠው በዚህ መንገድ ስለመሰላቸው ሊገልጡት ይችላሉ ። ብሰድበውም የእኔ ስለሆነ አይቀየመኝም በማለት ሊሆን ይችላል ። ሰው ራሱን ሲሰድብ ቢውል ራሱ እንደማይቀየመው እንደ ራሳቸው ያዩትን ሰውም መስደብ የሚፈልጉ ሰዎች አሉ ። ማኩረፍንም የፍቅር መግለጫ የሚደርጉ ሰዎች አሉ ። ማኩረፍ ሰላምን የሚያናጋ ነገር ነው ። የሚያኮርፉ ሰዎች የሚወዱት ሰው እንዲያባብላቸው ፈልገው ሊሆን ይችላል ። አሊያም የሚወዱትን ሰው እንደ መልአክ በማየት ትንሽ ስህተቱን መታገሥ አለመቻል ነው ። ኩርፊያ ልብን ብቻ ሳይሆን መልክንም የሚያበላሽ ፣ የበራውን ቤት የሚያጨልም ነው ። የአንዳንድ ሰዎች ኩርፊያ ቤቱ የአስቸኳይ ጊዜ አዋጅ ውስጥ ያለ ያስመስለዋል ። እስከ ዓመት የሚያኮርፉ ሰዎች አሉ ። እነዚህ ሰዎች ያለፈውንና ወደፊት የሚፈልጉትን ነገር ማስፈጸም የሚፈልጉት በኩርፊያ አስገዳጅነት ነው ። መወያየት ማድመጥ አይችሉም ። ኩርፊያ በእልህ አሊያም ፍቅርን ገለጥሁ በሚል ስሜት ሊከሰት ይችላል ። 

ፍቅራቸውን በመምታት የሚገልጡ ሰዎችም አሉ ። እንኳን ሰው እንስሳ በማይመታበት ዘመን እንዲህ ማሰብ ከባድ ነው ። ነገር ግን ሰው የማኅበረሰቡ ውጤት ነውና ከማኅበረሰቡ ያየውን ነገር ተግባራዊ ለማድረግ ፍቅሩን በዱላ የሚገልጥ ሰው አለ ። “ሚስትህን በአበባም ቢሆን አትምታት” የሚል የሂንዱ አባባል አለ ። አበባ ቢሆንም የታሰበበት አሳብ ግን ክፉ ነው ። አንዳንድ ሴቶች ባሌ ካልመታኝ እንደሚወደኝ በምን አውቃለሁ ? ይላሉ ። ይህ በሽታ ነውና መታከም ያስፈልጋቸዋል ። ዱላ የሚሰነዝሩ አፍቃሪዎች በዕድሜአቸው መጨረሻ ላይ አቅማቸው ሲደክም የተመታው ሰው እየጠላቸውና እያስታወሰ ያንገበግባቸዋል ። ደግሞም ለእርሱ ሚስቱ ብትሆንም ለልጆቹ ግን እናት ናትና የልጆቹን ጥላቻ እንደሚያተርፍ ማሰብ ያስፈልጋል ። ብዙ ዓይነት የፍቅር መግለጫ እያለ ዱላን የፍቅር መግለጫ ማድረግ ተገቢ አይደለም ። 

ቅናትን የፍቅር መግለጫ የሚያደርጉ ሰዎች አሉ ። እነዚህ ሰዎች ከዛር ለሚከፋው ቅናት ራሳቸውን አሳልፈው የሰጡት የፍቅር መግለጫ ስለመሰላቸውም ነው ። ቅናትን የሚወልድ የበታችነት ስሜት ነው ። ያ ሰው ዛሬም የምንወደውን እኛን ትቶ ሌላ ፈልጎ ከሄደ በሰላም መሸኘት ይገባል ። ሰው አብሮ መኖር ያለበት ከሚወደው ጋር ነው ። ቅናት ግን ያንን ሰው ላጣው እችላለሁ እያለ በቤት አስሮ ፣ አካል አጉድሎ ፣ ከሰው ለይቶ ያኖራል ። በጣም የሚቀኑ ሰዎች በልጆቻቸው ሳይቀር እየቀኑ ልጆችሽ አጠገብሽ አይቀመጡ እያሉ ሲበሳጩ እናውቃለን ። ቅናት የፍቅር መግለጫ ሳይሆን በሽታ ነው ። የተቀናባቸው ሰዎችም ራሳቸውን ከማዋደድ አንድ ቀን ሞት ሊያመጣብኝ ይችላል በማለት ማስጣል አለባቸው ።

የአሠርቱ ትእዛዛት ሁለተኛው ክፍል ፍቅረ ቢጽ ወይም ወንድምን መውደድ ነው ። በዚህ ክፍል ውስጥ አክብሮት አለ ። የምንወደውን ሰው ወንዱን እንደ ወንድም ፣ ሴቷን እንደ እህት ማክበር ይገባል ። አክብሮት የፍቅር መገለጫ ነው ። አክብሮት ማለትም መረዳዳት ነውና የፍቅር መገለጫው መረዳዳት ነው ። የወንድምን ሕይወትና ጤና መጠበቅም “አትግደል” በሚለው ትእዛዝ ተገልጧል ። ሁለተኛው የፍቅር መግለጫ የወንድምህን ሕይወት መንከባከብ ነው ። “አታመንዝር” የሚለው ትእዛዝም ሦስተኛው የፍቅር መግለጫ በቃል ኪዳን መጽናትን የሚያመለክት ነው ። “አትስረቅ” የሚለውም የወዳጅን ንብረቱን መጠበቅ እንደሚገባ የሚገልጥ ነው ። አንድን ሰው ስንወደው ሕይወቱን ብቻ ሳይሆን የእርሱ የሆነውን ንብረትም እንጠብቃለን ። “በሐሰት አትመስክር” የሚለውም የወዳጅን ስም መጠበቅ እንደሚገባ የሚገልጥ ነው ። አንድን ሰው ስንወደው ስሙን እንጠብቃለን ። “የባልንጀራህን ቤት አትመኝ” ይላል ። የባልንጀራን ትዳር መቀማት ፣ ሎሌውን ማስኮብለል ፣ ሀብቱን ማጥፋት ብቻ ሳይሆን ይህን መመኘት እንኳ አይገባም ። አንድን ሰው ስንወደው ትዳሩን አጥብቆ እንዲይዝ እንመክረዋለን ፣ ሎሌዎቹንም አግዙት እንላለን ። ማረሻ በሬውን ወይም ሥራውን ፣ መጓጓዣ አህያውን ወይም መኪናውን አንመኝም ። የእርሱ የእኔ ነው ብለን በደስታው ደስ ይለናል ። የእርሱ የሆነውን ከተመኘን ግን እርሱን መጥላት እንጀምራለን ። 

ፍቅራችንን የምንገልጥበት ብዙ መልካም ነገሮች አሉ ። ፍቅራቸውን በመልካም መንገድ መግለጥ ያልቻሉትንም ልናውቅላቸውና ልናግዛቸው  ይገባል ። ፍቅር ለሚወደው መንገድ ያሳያል ።

ፍጻሜ የሌላት የእግዚአብሔር በረከት በሁላችን ላይ አድራ ትኑር ! አቤቱ ፍቅርን ከነመግለጫው ስጠን !

ዲያቆን አሸናፊ መኰንን

ነሐሴ 30 ቀን 2012 ዓ.ም.

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።