የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

ቀራጩ ማቴዎስ

/ማቴ. 9፡9-13/
ቀረጡን ለመክፈል እጁን የዘረጋው እስራኤላዊ ማቴዎስን እንዲህ አለው፡- “በአጭሩ የተቀጨው የመቄዶንያው ጀግና ፣ የእስክንድር መንግሥት ቀጣይ የሆነው በአካል ሳይሆን ልቡናን በሚገዛው የግሪክ ጥበብ ነበር ። ዓለም ተረኛ ታላቅ እንጂ ቋሚ ታላቅ የላትምና የሮም መንግሥት ተተካ ። የሮም መንግሥትም ሰላምን በማስፈኑ ፣ ፍርድን በመስጠቱ ፣ በመላው ዓለም የመዘዋወር መብትን በማስከበሩ ፣ ሰላምን በሚመለከት ለሃይማኖቶች ሥልጣን በመስጠቱ ተወዳጅ ሁኖ ነበር ። እስራኤልም የመጣው ኃይለኛ አገዛዝ አላለፋትም ነበር ። ኢየሩሳሌምን ሳይዙ ትልቅነት የሚያገኙ የማይመስላቸው ብዙ ኃያላን ገዝተዋታል ። የግብጽ ፣ የአሦር ፣ የባቢሎን ፣ የፋርስና ሜዶን ጥምር መንግሥት ፣ የፋርስ ፣ የግሪክ ፣ የሮም የአገዛዝ ቀንበር አላለፋትም ነበር ። ለመከራ የተጻፈች ይመስል እስራኤል ብዙ የመከራ ዓመታትን አሳልፋለች በእግዚአብሔር መወደድ ማለት መከራ የሌለው ሕይወት ማግኘት አይደለም ፣ በእቶን ውስጥ ተፈትኖ ማለፍ ነው ። አጥፊው ሳያጠፋት እስራኤል ዛሬም አለች ።”

ማቴዎስም በጽሞና አዳመጠ ፣ ትዕግሥቱ እውቀት ያለው ስለነበር ውስጡ አይጎዳም ። አስገባሪው የሮም መንግሥት ግብር አነሰብኝ እያለ ይነዘንዘዋል ፣ ግብር የሚከፍሉ እስራኤላውያን በሁለት ወገን በተሳለ የሰይፍ በንግግር ይቆራርጡታል ። ወዲህ ግብሩ በዛ ፣ ወዲህ እንዴት ለሮም መንግሥት ቀረጥ ሰብሳቢ ትሆናለህ ? ይሉታል ።
እልፍዮስ ልጁን በአገር ፍቅር ስሜት ያሳደገ ሰው ነው ። በጣም የሚወዱት ልጅ ብዙ ስም አለውና አንድ ጊዜ “ማቴዎስ” ይለዋል ። ሌላ ጊዜም “ሌዊ” ይለዋል ። የደጅ ሰዎችም “የእልፍዮስ ልጅ” እያሉ ይጠሩታል ። አሁን ግን “ቀራጩ ማቴዎስ” ተብሎ ሲጠራ እልፍዮስ በሰማ ቊጥር ያዝናል ። ልጁ ቅን ቢሆንም ቅንነቱ ከሕዝብ ነቀፋ ነጻ አላደረገውም ። ማቴዎስ ሁሉን በቅንነት የሚያይ ፣ ለነገሮች በጎ ትርጉም በመስጠት የሚደሰት ሰው ቢሆንም ለሮማ መንግሥት ግብር ሰብሳቢ በመሆኑ ወዲህ እንደ አገር ሻጭ/ባንዳ ወዲህ ገንዘብ አምጡ ባይ በመሆኑ የተጠላ ነበር ። እንኳን ለጠላት መንግሥት ይቅርና ለራስ መንግሥትም ግብር የሚሰበስቡ የተወደዱ አይደሉም ። እልፍዮስም ማኅበራዊ ተቀባይነትን እንዳያጣ ልጁን ቢመክርም ልጁ ግን ከቀራጭነት ሥራው መላቀቅ ፈቃደኛ አልነበረም ። በአንዳንድ ወጣቶች ዘንድ የሮማውያን ወዳጅ መሆን እንደ መሰልጠን ይታይ ነበር ። ይህ ብቻ አይደለም ። ከሰባ ዓመት በላይ የሆነውን የሮማ መንግሥት አገዛዝ እነርሱ ሥራ አንሠራም በማለት እንደማይጥሉት ያስቡና ወደ ቀራጭነት ሥራ ይሰማሩ ነበር ። ገንዘብ አምጡ ሲባል ጠላት እንኩ ሲባል ወዳጅ የሚያፈራ ነው ። ቀራጮች አምጡ የሚሉ ነበሩና ተወዳጅ አልነበሩም ። ኃጢአተኛ ለማለትም ሌላኛው መጠሪያ “ቀራጭ” የሚል ነው ። “አምላኬ ሆይ ቀራጭ ስላላደረግኸኝ አመሰግንሃለሁ” የሚል ጸሎት ከእስራኤል ምድር ወደ ሰማይ መንበር በየዕለቱ በአእላፋት ይላክ ነበር ። ማቴዎስ ግን ለዘብተኛ ሁኖ ኑሮውን ይኖራል ። እርሱ ይተኛል ሰዎች ግን በእርሱ ሥራ እንቅልፍ አጥተው ነበር ። እልፍዮስም ልጁ ማቴዎስ ምክሩን እንቢ ባለ ጊዜ ሁለት ነገር ከማጣት ልጁን ልጄ ብሎ ለመኖር ወስኖ ነበር ።
ማቴዎስ የፈካ ፊት አይቶ አያውቅም ። ወዲህ ሮማውያንን ያገኙ የሚመስላቸው ሰዎች ክፉ ፊት ያሳዩታል ፣ ግብር አይገባንምና በዛብን የሚሉም ይገላምጡታል ። ነገር ግን አስገድዶ ግብር ያስከፍላል ። መንግሥት ያለ ግብር ድሀ ነው ። አገር የሚያለማው ፣ ሠራዊት የሚቀልበው ፣ ሰላም የሚያስከብረው በግብር አማካይነት ነው ። ሕዝቡ ግን ሊበሉት ግብር የምከፍለው እያለ ሌቦችን እያሰበ ሌባ ይሆን ነበር ። ግብር ቅድመ ሁኔታ የሚጠየቅበት ሳይሆን ግዴታ ነው ። ይልቁንም የእግዚአብሔርን ለእግዚአብሔር ፣ ለመንግሥትን ለመንግሥት መስጠት የሁለት ዓለም ዜጋ መሆንን የሚገልጥ ነው ። ለእግዚአብሔርም ለመንግሥትም አልገብርም የሚል የሁለት ዓለም ስደተኛ ነው ። አማኝ መልካም ዜጋ መሆንም ይገባዋል ። የመንግሥት ሥርዓት የእግዚአብሔር ሥርዓት ነውና ግብርን መክፈል እግዚአብሔርን ማክበር ነው ። ማቴዎስ በዚህ ሁሉ አሳብ ልቡ ይንገላታ ነበር ። አሳቡን መቅዘፍ ሲያቅተው በረጅሙ ተንፍሶ ወደ ሌላ አሳብ ይሻገራል ።
ጌታ ኢየሱስ ክርስቶስ ወደ ማቴዎስ እየተቃረበ ሲመጣ ማቴዎስ አላየውም ነበር ። ምንጊዜም በማየት ቀዳሚው እግዚአብሔር ነውና ቀድሞ አየው ። ጴጥሮስም ወደ ቀራጩ ማቴዎስ የሚደረገውን ጉዞ ሲያይ ከቀናት በፊት ከማቴዎስ ጋር በዓሣ ቀረጥ ጉዳይ ያደረገውን ጭቅጭቅ አሰበ ። “ጌታ አጥማጁንም ቀራጩንም ከማረከ የቀረው መንግሥቱ ነው” አለ ። “ትላንት በምድራዊ ኑሮአችን ግብ ግብ ውስጥ የነበርነውን አሁን ሊያወዳጀን ነው” በማለት ልቡ በደስታ ዘለለ ። ይህ ስብስብም ከጥቂት ጊዜ በኋላ የሮማን መንግሥት ገልብጦ መሢሑ የእስራኤል ገዥ እንደሚሆን ሲያስብ ጴጥሮስ በደስታ ዘለለ ። ቀናተኛው ስምዖን የኋላው ናትናኤልም ማቴዎስን ለመጥራት የሚደረገውን ጉዞ በትንግርት ማየት ጀመረ ። እርሱ እስራኤልን ነጻ ለማውጣት ብቸኛው መንገድ የትጥቅ ትግል ነው ብሎ የሚያምን ሰው ነበር ።ማቴዎስም ለሮማ መንግሥት በማደሩ ከሮማውያን በላይ ይጠላው ነበር ። አሁን ግን በጌታ ጥላ ፣ ሁሉን በሚችለው አምላክ ክንፎች በታች ሊያድሩ ነው ። በክርስቶስ ሁሉ አዲስ ነው ። አሮጌው ነገር አልፏል ።
ማቴዎስ ከነአጀቡ ወደ እርሱ እየመጣ ያለውን ክርስቶስን አላየውም ። በነቀፋ ፣ በጥላቻ ውስጥ የማለፉን ነገር እያሰበ “ለምን ?” በሚል ሙግት ተወጥሮ ነበር ። “ለምን ?” የሚለው ጥያቄ እንደ ገደል ማሚቱ የራስን ድምፅ መልሶ ከመስማት ውጭ ምንም ፋይዳ የለውም ። ክፉ ነገር ባንፈልገውም እንደ ጥላ ይከተለናል ። ባለንበት አለ ። ይህን ዓለም ሳይሰናበቱ ከክፉ መላቀቅ አይቻልም ። ዓለሙ ትጥቅን አጠር አድርጎ የሚዋጉበት ሜዳ እንጂ በዘርፋፋ ቀሚስ የሚዝናኑበት መስክ አይደለም ። የልቡናን ወገን ማጠንከር ፣ የእምነትን መጫሚያ ማጥለቅ ይጠይቃል ። ጌታ ኑሮ አልሞላ ያለውን ጴጥሮስን ብቻ ሳይሆን ሆዱ ሞልቶ ልቡ የጎደለውን ማቴዎስንም ይፈልግ ነበር ። ጉድለቱ ለየራስ ቢሆንም ሁሉን በመልሱ የሚያሳርፈው ግን አንድ አምላክ ብቻ ነው ።
ማቴዎስም አጠገቡ ቁሞ በታላቅ ፍቅርና ስስት የሚያየውን ጌታ ባየ ጊዜ ነፍስ አልቀረለትም ። እንዲህ ባለ ፈገግታ የተቀበለው ሰው ከዚህ በፊት አልነበረም ። ያለበት ድረስ የፈለገው ፣ የመቅረጫው ወንበር ድረስ መጥቶ ያገኘው ክርስቶስ ብቻ ነበር ። ጀማው ስለ እርሱ በሚያወራው ብዙም ያልተደነቀው ፣ በሰው ሚዛን ያልመዘነው እውነተኛ ወዳጁ ክርስቶስ ነበር ። የሰው ዓለም ይሙት ሲባል ይሙት ይላል ፣ ይሾም ሲባል ይሾም ይላል ። ጌታ ግን ከሰው ማኅበር ልዩ ነው ። ታሪክን አጥንቶ ፣ አቅምን ለክቶ ሳይሆን እንዲሁ ወድዶ የሚያስከትል ነው ። ጌታም ብዙ ቃል አልተናገረውም ። ብዙ ፍቅር ያለው ብዙ ወሬ የለውም ። መውደድ የሚችል ሰው ብዙ የፍቅር ቃላትን መደርደር አይፈልግም ። ፍቅር ከቃላት በላይ ነው ። ፍቅር ስሜት ሳይሆን ተግባር ነው ። ፍቅር በራስ ሚዛን መውደድ እንጂ ዙሪያውን አዳምጦ መውደድ አይደለም ። ፍቅር አይቶ እንጂ ሰምቶ የሚያምን አይደለም ። ፍቅር ቀራጩን ለንስሐ ፣ ዘማዊውን ለንጽሕና ይጋብዛል እንጂ ከጻድቃን ጋር ብቻ ጽዋ አይጠጣም ። ጌታችን አጭር መልእክት አስተላለፈለት፡- “ተከተለኝ!”
“ተከተለኝ” አንቀጽም አንድ መስመርም የማይሞላ የአምስት ፊደላት ውቅር ነው ። ይህ ቃል ግን ታንኳን አስጥሎ ተስፋን ያስጨበጠ ፣ አባትን አስትቶ ሰማያዊ አባትን ያስመረጠ ፣ የሚመጣውን አሳስቦ ያለውን ያስናቀ ፣ ከመንግሥት ሥራ አውጥቶ ደቀ መዝሙር ያደረገ ፣ ቀናተኛውን በትዕግሥት ያስጌጠ  ነው ። “ተከተለኝ” እኔን ያዘኝ ማለት ነው ። እንደ ዓይነ ሥውር ፣ እንደሚጠፋ ሕጻን ፣ ከተማን እንደማያውቅ ባላገር እኔን ያዘኝ ፣ የሙጥኝ በለኝ ማለት ነው ። “ተከተለኝ” በራስህ ማስተዋል አትደገፍ ፣ ትንሽ እውቀትህን አታምልክ ፣ ፈቃዴን ድል ነሺ አድርገህ እመን ማለት ነው ። “ተከተለኝ” ያልሁት ብቻ ይሁን ማለትን ተው ፣ የጨበጥከውን ሳይሆን የሚመጣውን እመን ማለት ነው ። “ተከተለኝ” መረጃን ሳይሆን ቃሉን ፣ ማስረጃን ሳይሆን ስርየተ ኃጢአትን እመን ማለት ነው ። “ተከተለኝ” እኔ በቀደምሁበት ውጣ ፣ በሌለሁበትም ጉልበት አታባክን ማለት ነው ። “ተከተለኝ” ከዚህ በኋላ ለምድራዊ መንግሥት ሳይሆን ለሰማያዊ መንግሥት ታድራለህ ማለት ነው ። “ተከተለኝ” ስፍራህን ልቀቅ ፣ የከበበህን የጥላቻ ድምፅ ትተህ በአዲስ ዓለም ለመኖር ተነሥ ማለት ነው ። “ተከተለኝ” ማቄን ጨርቄን ሳትል መንን ፣ ውጤቱን ሳታስብ አምነኸኝ ውጣ ማለት ነው ።
ይቀጥላል

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።