በውስጤም በዙሪያዬም ካለው አየር ይልቅ ለእኔ የቀረብከው እግዚአብሔር አመሰግንሃለሁ ። በነፍስ ግስጋሴ የምትገኘው ፣ መድረሻን ውብ የምታደርገው ፣ ለደከመው አዲስ ኃይል የምትሰጠው ቡሩክ ተስፋ ሆይ አመሰግንሃለሁ ። የናቅሁት ስህተት ሲበረታብኝ ፣ ሰው እንዴት በዚህ ይወድቃል ያልሁበት ገዥ ሁኖ ሲመጣብኝ ፣ ራሴን በድካም ፣ አንተን በመምህርነትህ አለማወቄ ነውና ይቅር በለኝ ። የናቁት ያደርጋል ዕራቁት የተባለው ደርሶብኛልና አቤቱ አስበኝ ። ክፋትን አንድ ጊዜ ፣ ደግነትን ሁለት ጊዜ አይ ዘንድ ዓይኖቼን ክፈት ። ክፋትን አንድ ጊዜ ማየቴ ለመጠንቀቅ ፣ ደግነትን ሁለት ጊዜ ማየቴ ለመልካሙ ዋጋ ለመስጠት ይሁንልኝ ። እንደ መርማሪ ፖሊስ የሰውን ንስሐ የምቀበል ካህን ፣ አማክራለሁ እያልሁ ያለ ፈቃዱ የሰውን ውስጥ የምበረብር አካሚ እንዳልሆን ፣ ከሁሉ በላይ አድምጡኝ ለሚሉ ጆሮዬን እንዳውስ እባክህ እርዳኝ ።

ከሐሰት ይልቅ እውነት ፈታኝ ስትሆንብኝ ፣ ከመልካም ቃል ይልቅ የጥመት ቃል ሲቀለኝ እየሰጠምሁ ነውና እባክህ እንደ ጴጥሮስ አድነኝ ። በሚያወያየው ርእስ መጣላት ፣ በሚያከባብረው ጉዳይ መገዳደልን ከእኔ አርቅ ። እኔ ተጠቅሜበት ቀፎ ያደረግሁትን ፣ ሰዎች ተጠቅመውበት የጣሉትን ማንነቴን አንተ የክብር ዕቃ አድርገህ ተጠቀምበት ። ፍጡርን የሚያከብር ፈጣሪው ፣ ሥራን የሚያውቅ ሠሪው ነውና ካልፈጠሩኝ ክብርን መጠበቅ ከእኔ አርቅ ። ለክፋት የተነሣሡ አእምሮዎች ለሥራ እንዲነሣሡ ፣ በግድ የሚሠሩ እጆች ሐውልት እንዲሆንላቸው በውዴታ አንድ በጎ ነገር እንዲሠሩ አንቃን ። እውነት የደቦ ፍርድ ሳትሆን ያንተ ሚዛን እንድትሆን አግዘን ። ብዙኃን ከተስማሙበት ውሸት አድነን ።

ጌታ ሆይ ውዝግብ ውስጥ ስገባ የቀኙን አድራሽ መንገድ ፣ በነቀፌታ ውስጥ ሳልፍ “ኑ እናንተ የአባቴ ቡሩካን” የሚለውን ምስጋናህን እንዳስብ እለምንሃለሁ ። በዘለፋ ውስጥ “ልጄ” የሚለው ያንተ ድምፅ ፣ በሐሜት ውስጥ “አንተ ጎበዝ ተነሥ” የሚለው ሬሳን ጎበዝ ባይ አፍቃሪነትህ ፣ በማንቀላፋት ውስጥ በርኅራኄ የሚቀሰቅሰው እጅህ ከእኔ ጋር ይሁን ። አሜን ።

ዲያቆን አሸናፊ መኰንን
ታኅሣሥ 20 ቀን 2014 ዓ.ም.