የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

በኅብረት ተቀመጡ (1)

“ወንድሞች በኅብረት ቢቀመጡ፥ እነሆ፥ መልካም ነው፥ እነሆም፥ ያማረ ነው።” መዝ. 132 ፡ 1።

እግዚአብሔርን የሚያገለግሉ ካህናት ወደ ቤተ መቅደስ ሲጓዙ ከሚዘምሯቸው ዝማሬዎች አንዱ፡- “ወንድሞች በኅብረት ቢቀመጡ ፥ እነሆ ፥ መልካም ነው ፥ እነሆም ፥ ያማረ ነው” የሚለው ነው ። ሁሉም ሰው በግሉ በቤቱ መጸለይ ይችላል ። ቤተ መቅደስ ግን የተዘጋጀው በኅብረት ለመጸለይ ነው ። ወደ ቤተ ክርስቲያን የምንሄደው እግዚአብሔርን ብቻ ሳይሆን ሰዎችንም ለማግኘት ነው ። አዎ ሰዎችን ለማግኘት ነው ፤ ይህ ሊሰመርበት የሚገባ አሳብ ነው ። ለመሳሳም ፣ ሰላምታ ለመሰጣጠት ፣ ለመወያየት ፣ በአንድነት የምሕረት ደጅን ለማንኳኳት ነው ። መሳሳም ፣ ሰላምታ መለዋወጥ የቅዳሴው አካል እንደሆነ ኦርቶዶክሳዊት ቤተ ክርስቲያን ታስተምራለች ፣ ትፈጽማለች ። ክርስትና ከእግዚአብሔርና ከሰዎች ጋር ኅብረት ማድረግ ነው ። ክርስቶስም ያስታረቀው ሕዝብና አሕዛብን ነው ።

ወንድምነት ብዙ መገናኛዎች አሉት ። ነቢዩ “ወንድሞች” የሚለው በተፈጥሮ እኛን የሚመስሉትን ሁሉ ነው ። አንድ ዓይነት ማኅተም ያረፈባቸው ንብረቶች ዋጋቸው እኩል እንደሆነ ፣ በአንዱ እግዚአብሔር እጅ የተሠሩ የሰው ልጆች እኩል ናቸው ። ወንድምነት የእኩያነት ግንኙነት ነው ። እኩያነቱን የሚያመጣው ግን መልክና ችሎታ ሳይሆን ከአንድ አባት መወለድ ነው ። ከአንድ አባት የተወለዱ ባይተዋወቁም ወንድማማች ናቸው ። ወንድምነት የተፈጥሮ ማሰሪያ ነው ። ይህን ማሰሪያ እንቁረጥህ ባልን ቍጥር አደጋዎች ይፈጠራሉ ። እግዚአብሔር የሰጠን ተፈጥሮ በኅብረት የሚከወን በመሆኑ ግለኝነት እየጎዳን ይመጣል ። የሚገርመው ብዙዎቻችን መንግሥተ ሰማያትን እንመኛለን ፣ መንግሥተ ሰማያት ግን ከእኛ ዘመን በፊትና ኋላ ያሉ አእላፋት ያሉባት ስፍራ ናት ። የምንጠላውን ሰው በመንግሥተ ሰማያት ባላገኘሁ ብለን እንፈራ ይሆናል ። የጥላቻ ሰው ግን መንግሥተ ሰማያትን መውረስ አይችልም ። የፍቅርን ዓለም የፍቅር ሰው ብቻ ይወርሳታል ።

ወንድም የሚባል ብዙ ነው ። የሥጋ ዘመድ ፣ የአገር ልጅ ፣ የመከራ ጓድ ፣ ጽኑ ወዳጅ ፣ አብሮ የኖረ ፣ አብሮ ያደገ ፣ የሃይማኖት ቤተሰብ ፣ የአሳብ ተስማሚ … ይህ ሁሉ ወንድም ይባላል ። ጌታችን አብረውት ያደጉት ወንድሞቹ ተብለው ተጠርተዋል ። እርሱ ወንድሞቼ ሲላቸው ባያፍርባቸውም እነርሱ ግን ልካቸውን አውቀው ጌታ ብለው ጠርተውታል ፣ ራሳቸውንም “የኢየሱስ ክርስቶስ ባሪያ” ብለው ሰይመዋል ። ቅዱስነት ራስን ማወቅ ነውና ። (ያዕ. 1፡1፤ ይሁዳ ቁ. 1)። ከሥጋ ዘመድም የአሳብ ዘመድ ይበልጣል ። እመቤታችን ብዙ የሥጋ ዘመዶች ሳሉዋት ፣ መስቀሉ ሥርም እኅትዋና የእኅትዋ ባል ቀለዮጳ ሳሉ ጌታችን አደራ የሰጣት ለሚወደው ደቀ መዝሙር ለዮሐንስ ነው ። (ዮሐ. 19፡25-26)።

ይቀጥላል

ዕለተ ብርሃን 12

ዲያቆን አሸናፊ መኰንን

መስከረም 23 ቀን 2016 ዓ.ም.

ያጋሩ

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።