ከታደሉት የታደልሽ ነሽ ። የታደልሽ ሆነሽ ድሀ መሆን ፣ የታደልሽ ሆነሽ በበረት መውለድ ፣ የታደልሽ ሆነሽ በግብጽ መሰደድ ፣ የታደልሽ ሆነሽ በታላቅ ኀዘን ማለፍ ምሥጢሩ ምን ይሆን ? ለካ ባለጠጋ የሚባለው ገንዘብ ያለው ሳይሆን እግዚአብሔር ያለው ነው ። የታደለም ዝና ያለው ሳይሆን ዜና ሥላሴን የሚያውቅ ነው ። እኛ አምላክን በሕልም አየን ብለን “አትንኩኝ የሹም ዶሮ ነኝ” እንላለን ። አንቺ ቡርክት ሆይ ፣ የአምላክ እናት ሆነሽ መከራን በደስታ ትቀበያለሽ ። ጸጋ ሲበዛ መከራ ይበዛል ፣ መከራ ሲበዛም ጸጋ ይበዛል ። ልጅሽ የሕማም ሰው ነው ፣ ባንቺም በነፍስሽ ሰይፍ አለፈ ። ከሐዋርያት በፊት መስቀሉን ተሸከምሽ ፣ ከአማንያን ቀድመሽ ልጅሽን ተከተልሽ ። አዛኝቱ ሆይ ሰላምታ ይገባሻል !

የክርስቶስ የመስቀል ጉዞ የተጀመረው ገና በተፀነሰ ቀን ነው ። በሄደበት ሁሉ ተከተልሽው ። ልጅሽ ባለ መስቀል እንጂ መስቀል አልባ አይደለም ። አንቺ ስለ ልጅሽ ኖርሽ ፣ እርሱ ስለ ዓለሙ ሁሉ ሕይወቱን ሰጠ ። የመሥዋዕቱን በግ የተንከባከብሽ ፣ እንደ እናት እያለቀስሽ ፣ እንደ አማኝ በልጅሽ ሞት ያመንሽ ቡርክት ሆይ ደስ ይበልሽ ! እናትነትን ከአማኝነት ማስተባበር ፣ ለመስቀል አጋር እንጂ እንቅፋት አለመሆን ይደንቃል ! የወደደው ጴጥሮስ እንኳ ፍኖተ መስቀሉን ሊያስተጓጉል ተነሣ ፣ የወለድሽው አንቺ ግን አንድም ቀን መስቀሉን አልተጋፋሽም ። በቃና ዘገሊላ በተወደደ ምልጃሽ ውኃው ወደ ወይን ጠጅ በተቀየረ ጊዜ መስቀሉ እንደሚፋጠን ታውቂ ነበር ። ቃና ዘገሊላና ቀራንዮ ይሳሳባሉ ። በቀራንዮ ሙሽራው ክርስቶስ ፣ በደም ማጫ ቤተ ክርስቲያንን የራሱ አደረጋት ። በቃና ዘገሊላ ተአምር ፣ በቀራንዮ ቤዛነት ሆነ ። በቃና ቻይነቱ ፣ በቀራንዮ ቤዛነቱ ተገለጠ ። በቃና ለሰርገኞቹ አዘንሽ ፣ በቀራንዮ ለልጅሽ አዘንሽ ። መስቀል የተለየውን ክርስቶስን ሳይሆን ባለ መስቀሉን ኢየሱስ አገለገልሽ ። ቡርክት ሆይ አንቺ ከሴቶች ሁሉ የተለየሽ ነሽ ።

የያዕቆብና የዮሐንስ እናት ለልጆችዋ ሹመትን ለመነች ። አንቺ ግን ልጅሽ ቤዛ እንደሚሆን እያወቅሽ እያለቀስሽ ትደሰቺ ነበር ። ልቅሶው የእናትነት ፣ ደስታው የአማኝነት ነው ። አዳምን የሠሩ እጆች ካልተቸነከሩ አዳም አይድንምና ። እንደ ለመንሽ ተጽፏል ። እርሱም ለራስሽ ሳይሆን ለሌሎች ነው ። በደጅ ስታድሪ ቤትን ፣ ስትሰደጂ አገርን ፣ ስታዝኚ ሞትን አለመንሽም ። የተመሰገነው ትዕግሥትሽ ለልጅሽ የማዳን ሥራ ምቹ ነበር ። ቡርክት አንቲ እምአንስት በማለት ሰማይ አድንቆሻል ። ከሴቶች ሁሉ ሳይሆን ከነሣራ ፣ ከነርብቃ ተነጻጽረሽ አንቺ ልዩ ነሽ ። ሣራ ብትወልድ ይስሐቅን ፣ ኤልሳቤጥ ብትወልድ ዮሐንስን ነው ። አንቺ ግን የወለድሽው ንጉሠ ነገሥት ፣ አምላከ አማልክት ኢየሱስ ክርስቶስን ነው ። ከሴቶች ተለይተሸ የታደልሽ ነሽ ።

ልጅ ሁሉ መኖርን ዓላማ አድርጎ በዓለም ይወለዳል ፣ ያንቺ ልጅ መሞትን ዓላማ አድርጎ ተወለደ ። የበጉ እናት ፣ የመሥዋዕቱ አገልጋይ ሆይ ቡርክት አንቺ እምአንስት ነሽና ደስ ይበልሽ። መስቀልን ከደስታ ፣ ደስታን ከመስቀል ጋር አስተባብረሻልና ። ብርሃን በመስተዋት ቢያልፍ መስተዋቱ አይሰበርም ፣ ወዝ ቢወጣ ቆዳ አይቀደድም ። አንቺም በኅቱም ድንግልና ወልደሻል ፣ ድኅረ ወሊድም ለዘላለም ድንግል ሆነሽ ትኖሪያለሽ ። እናትነትና ድንግልና የታረቁብሽ ሆይ ተፈሥሒ !

ይቀጥላል
ዲያቆን አሸናፊ መኰንን
ታኅሣሥ 30 ቀን 2016 ዓ.ም.