የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

ተንሥኡ ለንባብ

“አስቀድሜ በአጭሩ እንደ ጻፍሁ፥ ይህን ምሥጢር በመግለጥ አስታወቀኝ ፤ ይህንም ስታነቡ የክርስቶስን ምሥጢር እንዴት እንደማስተውል ልትመለከቱ ትችላላችሁ ፤” ኤፌ. 3፡3-4 ።

ሐዋርያው በአካል ተገኝቶ ለመሠረተው ፣ በቃል ላስተማረበት የኤፌሶን ቤተ ክርስቲያን አሁን ደግሞ ይጽፍላቸዋል ። በቃል ያለ ይረሳልና ይኸው በመጽሐፍ ያለውን ወረስነው ። ሐዋርያው የሚጽፉ እጆች ሲኖሩት የኤፌሶን ምእመናን ደግሞ የሚያነቡ ዓይኖች ነበሩአቸው ። በጽሑፍ የሚለዋወጡት ደግሞ የክርስቶስን ምሥጢር ነው ። መንግሥታዊ የሆነ ደብዳቤ ፣ ጥብቅ ምሥጢር የሆነ መልእክት ፣ ነገር ግን ሁሉ እንዲያነበው የተፈቀደ ጦማር ነገረ ክርስቶስ ነው ። ረጅም መልእክት እስኪጽፍ ድረስ በአጭሩ ይጽፍላቸው ነበር ። ጊዜ ሲገኝ ረጅሙን መልእክት መጻፍ ፣ ዛሬ ግን በአጭሩ መጻፍ ይገባል ። አጫጭሩ ጽሑፍ ሲቀጣጠል ትልቅ መጽሐፍ ይወጣዋል ። “በአፍሪካ የአንድ ሽማግሌ ሞት የአንድ ትልቅ ቤተ መጻሕፍት መቃጠል ነው” ይባላል ። ምክንያቱም እውቀቱን በጽሑፍ አያስቀርምና ። ከብዙ እውቀታቸው ጋር መቃብር የወረዱ ስንት ሊቃውንትና አባቶችን እናውቃለን ። ቅዱስ ጳውሎስ የዓይን ሕመሙ ሲታገሥለት ራሱ እየጻፈ ፣ ሕመም ሲጸናበት ጸሐፊ አስቀምጦ እያጻፈ ፣ በመጨረሻ ላይ ይፈርምበትና ይልክ ነበር ።

“እንግዲህ መቃብር ጠንክረህ ተማር ፣
ድጓ ተሸክሞ መጣልህ መምህር፤” ተብሏል ። መቃብር ግን አይማርም ፣ ሙትም አያነብም ። በአካል ተገኝቶ ቤተ ክርስቲያን መትከል ፣ በቃል ማስተማር የመሠረት ሥራ ነው ። ሕንፃው እስኪያድግ ድረስ በደብዳቤ መልእክትን ማስተላለፍ የአንድ መንፈሳዊ አባት ድርሻ ነው ። ሁልጊዜ በአካል መገናኘት አይቻልም ። ደብዳቤ ግን አካላዊ ግንኙነትን ወክሎ ልብ ለልብ ለመተያየት ያበቃል ። በደብዳቤ ላይ የጸሐፊው ውጫዊ መልክ የለም ። ውስጣዊ አሳቡ ግን አለ ። አንድን መጽሐፍ ስናነብ የጸሐፊውን ልቡን እያየን ነው ። የቀረን ትንሹ ይኸውም መልኩ ነው ። በዛሬ ዘመን የሃይማኖት አባቶች በርቀት ሁነው ለምእመናን የማጽናኛ ደብዳቤ ፣ የፍቅር መልእክት ፣ የሃይማኖት ትምህርት ይልኩ ይሆን ወይ ? ብለን ስንጠይቅ መልሳችን አጠራጣሪ ነው ። ደብዳቤ አለመረሳሳትን ያሳያል ። ደብዳቤ እስኪገናኙ መቆያ ይሆናል ። ደብዳቤ ፍቅርን ሕያው አድርጎ ይጠብቃል ። ደብዳቤ መላልሰው የሚያነቡት ነውና አሳብን ለማስረጽ ይረዳል ። ደብዳቤ ከተጨመቀ ልብ የወጣ ፣ አሳብ የገዘፈበት ነውና በክብር ሊያዝ ይገባዋል ። መንፈሳውያን አባቶችም ከቅዳሴ በኋላ ፣ ከጉባዔ በፊት ይህን ደብዳቤ አንብቡልኝ ብለው ቢልኩ ትልቅ የፍቅር መግለጫ ፣ የደስታ መነሻ ይሆን ነበር ። ወልዶ መጣልና መካድ በመንፈሳዊ ዓለም እንዳይበዛ ደግመን ማሰብ ያስፈልገናል ።

ጸሐፊው ቢጽፍ ምእመናን ካላነበቡ ድካሙ ከንቱ ሁኖ ይቀራል ። መጽሐፍ አለማንበብ ጸሐፊዎችን ለማጥፋት የሚደረግ አረመኔያዊ ድርጊት ነው ። የማያነቡ ሰዎች የአሳብ ጠላቶች ናቸው ። በምድር የተነሡ ክፉ ነገሥታት መጽሐፍን የማይወዱ ፣ ጸሐፊዎችን የሚያሰቃዩ ፣ የተጻፈውንም የሚያቃጥሉ ነበሩ ። የተለያዩ ዘመኖች የሳንሱር ሕጎች ፣ ለመጽሐፍ ድጎማ እንዳይደረግ መከልከል የአምባገነን መሪዎች ጠባይ ነው ። የአልኮል መጠጦች በቀላሉ በሚገቡበት አገር ፣ ወረቀት ግን በቀላሉ ካልገባ አሳብን ለማጥፋት ፣ ትውልድን እንደ ሄሮድስ ለመፍጀት ማቀድ ነው ። የማያነብ ሰውም ግላዊ አምባገነን ፣ የአሳብ ባላጋራ ነው ። በራሱ ላይ መብራት አጥፍቶ የተቀመጠ ነው ። መጽሐፍ ጨርሶ ማየት የማይፈልጉ ጽኑ ሕሙማን አሉ ። የቀልድ እንኳ መጽሐፍን መጠየቅ አይፈልጉም ። አዲስ ፋሽንና አዲስ ምግብ ቤት የሚያሳድዱ ለመንፈሳቸው ምግብ እንዲሆን መጽሐፍ የማይገዙ አያሌ ናቸው ። የሺህ ብር ሥጋ እየቆረጡ የአምሳ ብር መጽሐፍ ተወደደ የሚሉ በዚህ ዘመን ብዙዎች ናቸው ። በውጭ አገር አንድ ስፍራ ላይ ሰልፍ ከታየ አዲስ መጽሐፍ ወጥቷል ማለት ነው ። እኛ ጋ ሰልፍ ከታየ አዲስ ምግብ ቤት ተከፍቷል ወይም በዘንድሮ ሁኔታችን ዘይት መጥቷል ማለት ነው ። መጽሐፍ ገዝተው ደግሞ የማያነቡ ሰዎች አሉ ። እነዚህ ሰዎች ጓደኛን እቤታቸው ጋብዘው የሚያኮርፉ ናቸው ። ሃያ አራት ሰዓት ማኅበራዊ ሚድያ ላይ ሲውሉ ዓይናቸው ጤነኛ ነው ። መጽሐፍ ለማንበብ ሲጠየቁ ግን ዓይኔን እያመመኝ ይላሉ ። ለማንበብ የሚያስችል እውቀትና ዓይን ይዘው የማያነቡ ከሆነ ያልተማሩትና ማንበብ የማይችሉት ደግሞም የዓይን ብርሃን የሌላቸው እንዴት ይታዘቡአቸው ይሆን ? አንብበው ደግሞ ምላሰኛ የሚሆኑ ንባብን ለማውራት ብቃት የሚጠቀሙበት አሉ ። በእነዚህ ሁሉ መጽሐፍ ጥቃት ሲደርስበት አንብበው ራሳቸውን በሚያዩ ሰዎች ደግሞ መጽሐፍ ይከብራል ።

የምንጽፈው ምንድነው ? የምናነበውስ ምንድነው ? ብለን ራሳችንን መጠየቅ አለብን ። መጽሐፍ ምሥጢር ማስተላለፊያ ነው ። መጽሐፍ የአሳብ ቦይ ነው ። መጽሐፍ የጽንሰት ፣ የእርግዝና ፣ የምጥና የልደት ዘመን አለው ። የወለድነው ነፋስ ነው ወይስ ልጅ ነው ? ብለን መጠየቅ ያስፈልገናል ። ቂምና በቀልን የሚጽፉ ፣ ነውርና ውድቀትን የሚከትቡ ኃጢአታቸውን በዓለት ላይ የሚቀርጹ ናቸው ። እነርሱ ሊመለሱ ይችላሉ ፣ የረጩት መርዝ ግን ሊሰበሰብ አይችልም ። የምናነበውስ ምንድነው  ብለን መጠየቅ ያስፈልጋል ። ሐዋርያው የክርስቶስን ምሥጢር እጽፋለሁ አለ ። በዚህም በልቤ ውስጥ ያለውን ጌታ ታስተውሉታላችሁ እያለ ነው ። ኢትዮጵያዊው ጃንደረባ መከራ መስቀሉን ያነብ ነበር ። ታማኝ አንባቢ ጥሩ ተርጓሚ ይላክለታል ። ቅዱሳት መጻሕፍትን በማንበብ ብቻ ቅዱሳን መላእክት አብረውን ይሆናሉ ። መንፈሰ እግዚአብሔርም ያለመልመናል ። በማንበብ ብቻ ሰማያዊ ዋጋ እናገኛለን ። “የትንቢቱን ቃል የሚሰሙትና በውስጡ የተጻፈውን የሚጠብቁት ብፁዓን ናቸው።” ራእ. 1 ፡ 3 ። በማንበብ ብፅዕናን ለማግኘት ተነሡ ። ተንሥኡ ለጸሎት ብቻ ሳይሆን ተንሥኡ ለንባብ መታወጅ አለበት ። የሚገርመው የማይጽፉ ሰዎች የሚጽፉትን ሲተቹ ነው ። መጽሐፍን ጸንሶ ለመውለድ ያለውን ጭንቅ ጸሐፊው ብቻ ያውቀዋል ። መጽሐፍ ስትገዙ ለወረቀቱ ሒሳብ ከፈላችሁ እንጂ ለአሳቡ የከፈላችሁ መስሎ እንዳይሰማችሁ አደራ እንላለን ። አሳብ ከዋጋ በላይ ነውና ።

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።