የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

ትውልድ ሆይ ንቃ !

“ጸጋውንም በጥበብና በአእምሮ ሁሉ አበዛልን ።” ኤፌ. 1፡8 ።

እግዚአብሔር ሰውን በመልኩ ፈጠረው ስንል በእውቀት ፈጠረው ማለታችንም ነው ። ይህ እውቀትም እግዚአብሔርንና ተግባሩን ተረድቶ ማመስገን ነው ። ይህ እውቀትም ከእግዚአብሔር ጋር በጽድቅ ፣ ከሰዎች ጋር በሰላም መኖር ነው ። ከእንስሳት እውቀት ፣ የሰዎች እውቀት ፣ ከሰዎች እውቀትም የመላእክት እውቀት ይበልጣል ። እውቀቱ ፍጹም የሆነ እግዚአብሔር ብቻ ነው ። “ማስተዋሉ አይመረመርም” ተብሎ እንደ ተጻፈ ። ሰው ምድራዊ ሳለ ሰማያዊ ፣ እንጀራ ብቻ ሳይሆን አምልኮትን ፈላጊ የሆነው የእግዚአብሔርን መልክ ስለተሸከመ ነው ። የሰው ልጅ በበደል ምክንያት ካጣቸው ጸጋዎች አንዱ እውቀት ነው ። ነቢዩ ዳዊት እውቀት በማጣቱ ሰው እንስሳትን እንደ መሰለ ተናግሯል ። “አእምሮ የሌለው ክቡር ሰው እንደሚጠፋ እንስሶች መሰለ።” መዝ. 48፡20። የሰው ልጅ ከእንስሳት በላይ ነውና እንስሳት ወደ እርሱ እየመጡ እርሱም በአለቅነቱ ስም ያወጣላቸው ነበር ። ኋላ ተፈጥሮ ለእንስሳት ስም ማውጣቱ ባለቤትነቱን ያመለክታል ። ከአፈር በመገኘቱ ፣ በመብላት በመጠጣቱ ፣ በመዋለድ ሥርዓቱ እንስሳትን ይመስላል ። ፈጽመን እንስሳ እንዳንለው ደግሞ መልአካዊ ፍላጎት አለው ።

በበደል ምክንያት ግን አሳቡ ምድራዊ ፣ ግቡ ቁሳዊ ሲሆን እንስሳትን መሰለ ። እንስሳት ሳሉ ብቻ የሚኖሩ ፣ ከመሬት ተገኝተው መሬት ውስጥ የሚያበቁ ናቸው ። ሰውን ሰው የሚያደርገው ከሞት በኋላ ማየት መቻሉ ነው ። በዚህ ምክንያት ሰው እንስሳትን መሰለ ። እንስሳት አይጸጸቱም ፣ አራዊት ለመኖር ብለው በመግደላቸው የሚጠየቁበት ሕግ የለም ። የሰው ኑሮ በሌላው ሞት ላይ በመመሥረቱ እንስሳትን መሰለ ተባለ ።

ነቢዩ ኢሳይያስ ደግሞ ከነቢዩ ዳዊት ርቆ በመሄድ ሰው ከእንስሳትንም እንዳነሰ ይናገራል ። “በሬ የገዢውን አህያም የጌታውን ጋጣ አወቀ እስራኤል ግን አላወቀም ፥ ሕዝቤም አላስተዋለም ።” ኢሳ. 1፡3 ። እንስሳት ጌታቸውንና የጌታቸውን ቤት ያውቃሉ ። ሰው ግን እግዚአብሔርን የማያውቅ ፣ ማወቅም ያሳስታል ብሎ የሚያምን ፣ በሰንበት ወደ እግዚአብሔር ቤት ከመሄድ ጀርባው እስኪላጥ የሚተኛ በመሆኑ ከእንስሳት አነሰ ተባለ ።

በበደል ምክንያት እውቀቱ ቢጨልምም የሰው ልጅ መልኩ ፈጽሞ የጠፋ አልነበረም ። አዳም ነቢይ ፣ ካህንና ንጉሥ ሁኖ በሦስት ማዕረጋት ከብሮ ተፈጥሯል ። ይህ ማዕረግ ጨርሶ እንዳልጠፋ እንደ ነቢይ ከእግዚአብሔር ጋር የሚነጋገሩ ቅዱሳን ፣ እንደ ካህን የተገለጡ መልከ ጼዴቆች ፣ አራዊትን የገዙ ፣ ፍጥረትን ያዘዙ ሙሴያውያን ታይተዋል ።

የሃይማኖት ብቻ ሳይሆን የኪነ ሕንፃ ፣ የሥነ ጽሑፍ ፣ የንግግር ክህሎት ፣ የባሕል ፣ የሥርዓት ፣ የሕግ መገኛው የእግዚአብሔር ቤት ነው ። ይህም የእውቀትን ከፍታና የጥበብን ዐውድ ያሳየናል ። ከቤተ ክርስቲያን ያልተኮረጀ ኪነ ሕንፃ ፣ ዘማሪ ያልነበረ እውቅ ዘፋኝ ፣ ቅኔ ቤት ያላለፈ ጎበዝ ገጣሚ ፣ ደጀ ሰላም ያልረገጠ ጥሩ አጫዋች ማነው ብለን መጠየቅ ብቻውን በቂ ነው ። የሰሎሞን መቅደስ ፣ መጽሐፍ ቅዱስ የተጻፈበት የዕብራይስጥ ፊደል ፣ በአደባባይ ቆመው ንግግር ያደርጉ የነበሩ ነቢያት ፣ የአገር አንድነትን የጠበቁ ካህናት ፣ አምስት መቶ ዓመታትን ዘመነ ካህናት ብለው ያሰየሙ ፣ መሪ ሲጠፋ መሪ የሆኑ መቅደሳውያን ፤ ዜማውን ከነምልክቱ ያወረሱትን ሃይማኖታውያን ስናስብ የእግዚአብሔር ቤት የእውቀት ራስ መሆኑን ይነግረናል ። ሰው አእምሮው የሚጨልመው ከእግዚአብሔር ቤት ሲርቅ ነው ። ከእግዚአብሔር ቤት የራቁ ፍልስፍ የሚሉ ሰዎች በሱስ ጉቦ ቀኑን የሚገፉ ፣ መጨረሻቸው የማያምር ምስኪኖች ናቸው ። በዓለም ላይ ያለው የወንጀለኛ መቅጫና የፍትሐ ብሔር ሕግ ከዐሥርቱ ትእዛዛት የተቀዳ ነው ። የዚህች ዓለም መሠረት የእግዚአብሔር ቤት ነው ።

ቤተ ክርስቲያን ዓለም ናት ። በዓለም ካለው በላይ በቤተ ክርስቲያን ያለው ይበልጣል ። ሌላ ዓለም የማያምረን ቤተ ክርስቲያን ራስዋ ዓለም ስለሆነች ነው ። የግጥም ምሽት እንዳንፈልግ የከበረ ቅዱስ ቅኔ እንደ ጅረት ይፈስሳል ። ዘፈን እንዳንሻ አዲስ ዜማ በየዕለቱ ይፈልቃል ። ኪነ ሕንፃ እንዳናስስ ዓለም ወደ እኛ የሚመጣበት ብዙ ጥበበኛ መቅደሶች አሉን ። ሌላ ባሕል እንዳያምረን ለሺህ ዓመታት የዘለቀ ሥርዓትና አለባበስ በቤተ ክርስቲያን ይታያል ። ቤተ ክርስቲያን በማውገዝ ሳይሆን ሁሉን በማቅረብ ትውልድን ከዓለም የመነጠል አሠራር አላት ። ይህን አውቀው የሚያሳውቁ ከሌሉ ግን ትውልድ የቤተ ክርስቲያን ጠላት ይሆናል ።

እውቀት እጅግ አስፈላጊ መሆኑን ሃይማኖት ያምናል ። ዛሬ በዓለማችን ላይ የታወቁ ዩኒቨርሲቲዎች ትላንት ገዳም የነበሩ ናቸው ። ገዳማውያን ገዳማቸውን ለተማሪዎች መልቀቃቸው ፣ ተማሪዎቹ ሲመረቁ የሚለብሱት ልብስም የመነኮሳት ልብስ መሆኑ ቤተ ክርስቲያን ለእውቀት ያላትን ዋጋ ያሳያል ። የመድኃኒት ቅመማውን ሥር መማስ ፣ ቅጠል መበጠስ በማለት አቃለልነው ፣ የሥነ ከዋክብት ምርምሩን ኮከብ ቆጠራ ፣ ጥንቆላ ፣ የዜማውን ጥበብ ጩኸት ፣ የቃል ትምህርቱን ድግምት አልነው ። ያልተማረ ሁሉን ያረክስ እንዲሉ ። የገዛ ስልክ ቍጥሩን በቃሉ የማያውቅ ትውልድ ብሉይና ሐዲስን በቃላቸው የሚያውቁ አባቶችን ሲንቅ ማየት በጣም ይገርማል ። የራሳችንን እንድንጠላ የሚያደርጉን ሃይማኖት የሚመስሉ የባሕል ወረራዎች አያሌ ናቸውና ትውልድ ሆይ ንቃ !!!

የኤፌሶን መልእክት ትርጓሜ /18

ዲያቆን አሸናፊ መኰንን
መጋቢት 1 ቀን 2014 ዓ.ም.

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።