የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

አዝምቶ መመለስ

“ጡሩንባ ነፊ ቀብር አይወጣም” ይባላል ። በአገራችን የትልቅ ማኅበራዊ ኑሮ መገለጫ የሆነው ዕድር ነው ። በዕድር ውስጥ ካሉ ነገሮች አንዱ ጡሩንባ ነፊ ነው። ጡሩንባ ነፊው ብዙ ጊዜ ምስኪን ድሃ ነው ። በብዙ ክፍለ አገር እንዳየሁትም መጠጥ የሚያበዛ ነው ። ታዲያ በሰላሙ ቀን በመንደሩ አለፍ ሲል እናቶች ይጠሩትና፡- “ለእኔ ጊዜ በደንብ አድርገህ ጡሩንባውን እንድትነፋ” በማለት ለማያዩት ቀን ቃል ያስገቡታል ። በርግጥም ሰው ዋና ፣ ዋና ቀኑን አያየውም ። ሲወለድ እንዴት እንደነበረ አላየም አላወቀም ። ሲሞትም እንዴት እንደሆነና ማን እንደሚገኝ አያውቅም ። ባለ ማወቅ የተሞላ ሕይወት ውስጥ የሚኖር ነውና ሰው ሁልጊዜ ራሱን ለእግዚአብሔር መስጠት አለበት ። ታዲያ ያ ጡሩንባ ነፊ አንዳንዴ በመንደር ሰዎች ይሰደባል ። ለሞታቸው ቀን እቅድ የሚያወጡ እናቶች ከገጠሙት ደግሞ ጥሩ ምሳ ይበላል ። ጡሩንባ ነፊ የሚፈለግበት ሰዓት ምሽት እቤቱ እንደገባ ሊሆን ይችላል ። አሊያ ከሌሊቱ 10 ሰዓት ላይ ሊሆን ይችላል ። በአንዱ ቤት ልቅሶ በአንዱ ቤት እንቅልፍ ነውና ጡሩንባ ነፊው ጣልቃ ይገባና ይዳኛል ። አቶ እገሌ ወይም ወይዘሮ እገሌ አርፈዋልና ቀብር በዚህ ሰዓት ነው ይላል ። አቶ እገሌ መታመማቸውን የሰማ “አረፉ ?” ይላል ። ያልሰማ መኝታው ላይ ከሚጣፍጠው የንጋት እንቅልፍ ላይ ይሰማል ። ለነገሩ ንጋት ላይ ትልልቅ ሰዎች አይተኙም ። ዕድሜ በገፋ ቊጥር እንቅልፍ ይቀንሳልና ለአራትና አምስት ሰዓት ከተኙ በኋላ ይነቃሉ ። ያንን ልቅሶ ሲሰሙ በቀን አራት ጊዜ ይሄዳሉ ። የመጀመሪያው እርማቸውን ለማውጣት ፣ ሁለተኛው ሥራ ለመሥራት ፣ ሦስተኛ ቀብር ለመሄድ ፣ አራተኛ ከቀብር መልስ በረታችሁ ወይ ? ለማለት ይመለሳሉ ።
ታዲያ ጡሩንባ ነፊው ጨለማና ብርሃን ፍልሚያ ሳይገጥሙ በሌሊት ይነሣል። በዚያ ጭር ባለው ሌሊት ፣ ፍጥረት አሸልቦ የጣመ እንቅልፍ በሚልጥበት ፣ ሌባ ለመስረቅ በሚወጣበት ፣ አእዋፋት ለመዘመር በሚዘጋጁበት ሌሊት ከጨለማው ጋር ተመሳስሎ ፣ ከአራዊት ጋር ተጋፍጦ ጡሩንባ ነፊው ያደበላልቀዋል ። ጡሩንባውን መጀመሪያ አራት ጊዜ በአራቱ አቅጣጫ ይልከዋል ። ተልከስካሹ ሁሉ ይገሰጻል ፣ ፀጥታው ጓደኛ ያገኛል ። ብርሃን ለመውጣት ይዳዳል ፣ ወፎች ዝማሬ ያሰማሉ ። በየቤቱ የተኛው የዛሬ ልቅሶ ሰሚ የነገ ሟች ፣ ጆሮውን ይገትራል ። ገና በስመ አብ ሳይል የወዳጁን ወይም የዕድርተኛውን ልቅሶ ይሰማል ። የጠላቱንም ልቅሶ ሲሰማ እንኳን ሞተ አይልም ። “አይ ለማይቀረው ዓለም እንዲያ ስንባላ አረፈው ?” ይላል ። “ሙት አይከሰስ ድንጋይ አይነከስ” “ሙት መውቀስ ድንጋይ መንከስ ነው” ይላሉ ። ሃይማኖት የነበረው የአገራችን ሰው ። ዛሬ ከሞቱ መቶዎች ዓመታት የሆናቸውን እንወቅሳለን ።
ቀልድ ይሁን እውነት ካዛንቺስ ላይ የሚነገር አንድ ነገር አለ ። በደርግ ዘመን የካዛንቺስ ጡሩንባ ነፊ የኩባው መሪ ፊደል ካስትሮ ይመጣሉ ተብሎ ሰው ሁሉ ወጥቶ እንዲቀበል ጥብቅ ማስጠንቀቂያ ተሰጥቶት ጡሩንባ ለመንፋት ወጣ ። ፊደል ካስትሮ ለማለት ተቸግሮ ፡- “አቶ ፍየል ታስሮ ወደ አገራችን ስለሚመጡ ሁላችሁም ወጥታችሁ ተቀበሉ ተብሏል ። የቀራችሁ ከሆነ እኔ የለሁትም ቱ ብያለሁ” እያለ ምራቁን ይተፋ ነበር ። ይህን የሰሙ ሽማግሌ ነግረውኛል ።
  
ጡሩንባ ነፊው ለመላው ቀበሌ ፣ ለሺህ ዕድርተኛ ይነፋል ። ታሞ ሳለ ለመጠየቅ ጊዜ ያጣው የቊርጡ ቀን ግን ጊዜ አያጣም ። ዛሬ ከተመቸው ያኔም ይመቸው ነበር ። ታዲያ የዕድሩን ጡሩንባ የሰሙ እናቶችና አባቶች “ለካ ውሻው ሲያላዝን የከረመው ለዚህ ነበር ?” ይላሉ ። ውሻ ሲያላዝን “ሰው ሊሞት ነው” ይባላል ። “እኔ ልሞት ነው” የሚል ግን የለም ። ራሳችንን ከሰው ክልል ውጭ አውጥተን መኖራችን የሚታወቀው የሚሞቱትን እያየን እሞታለሁ ብለን በጎ አለማድረጋችን ነው ። ሰው እሞታለሁ ብሎ ሞቱን አምኖ ዕድር ይገባል ። እሞታለሁ ብሎ ግን ለምን ንስሐ አይገባም ? ብዙዎች “ሞቼ የት እቀበራለሁ ?” የሚለው ያሳስባቸዋል ። “ሞቼ በነፍሴ የት እገባለሁ ?” የሚለው ግን አያሳስባቸውም ። ይህ ከሕይወት ይልቅ ሞትን ማክበር አይደለምን ?
ጡሩንባ ነፊው እንደ ዘመድ ቀድሞ የሚነገረው ፣ ልቅሶ ካለ ብቻ የሚታወስ ከዚያ ውጭ እንዳለ እንኳ የማይታሰብ በቁሙ የተረሳ ሰው ነው ። ታዲያ ድንኳኑ ሲተካከል ዳር ቁሞ አየት ፣ አየት ያደርጋል ። እርሱ የሌሊት ወዳጅ ነውና ማለዳ የመጡት ላይ በትዝብት ይንጎማለላል ። ሬሳው ከቤት ሊወጣ ሲል አንድ ጊዜ ጡሩንባውን ያጮህና በቀጥታ ወደ መጠጥ ቤት ይሄዳል ። አዳሜ እያለቀሰ ፣ እንባውን እያፈሰሰ ወደ ቀብር ቦታ ሲሄድ እርሱ ደግሞ ጠጁን ፈሰስ ለማድረግ ስያሜ ወደ ተሰጣቸው ጠጅ ቤቶች ወደ “ውሻ ገደል” ፣ “ወደ ጥርሰ በረዶ” ፣ ወደ “ዝጉበት” ይሄዳል ። እነዚህ ሁሉ የጠጅ ቤት ስሞች ናቸው ። ጠጅ ቤት ከስያሜው ጀምሮ አቀማመጡ ስልታዊ ነው ። ዳገት ላይ አይሆንም ፣ ሰክሮ የወጣው ሰው ባናቱ ይተከላል ። ገደል ውስጥ የሆነ እንደሆነ ቧጥጦ ይወጣል ። በጣም ካቃተው ገደሉን ደግፈው የሚያወጡ ነገር ግን ከአንድ ብር እስከ አምስት ብር የሚያስከፍሉ ወጣቶች አሉ ።
ሬሳው ከቤት ከወጣ በኋላ ጥሩንባ ነፊው ሌላ ሟች እስኪመጣ ፍጹም ይረሳል። የሰበሰበው ፣ የሟችን መሞት ለዓለም ያወጀው ፣ ጥንታዊው የሬዲዮ ጣቢያ ፣ ጥንታዊው ፌስቡክ ፣ አካላዊው ወዳጅ ያ ጡሩንባ ነፊ ይረሳል ።
ታዲያ ከቀብር ሲመለሱ እርሱ በቢጫ ሰረገላው ላይ ሁኖ እያየ ይስቃል ። አለቃ ገብረ ሃና ከቤታቸው አጠገብ በጣም ድሃና በቊስል የተወረረ ሰው ነበረ። በድህነቱ ሁሉ ርቆት ይኖራል ። ጠዋት ወጥተው የነበሩት አለቃ ወደ ቤታቸው ሲመለሱ ሰፈሩ በግርግር ደምቋል ። ምንድነው ? ብለው ሲጠይቁ ከቤታቸው አጠገብ የነበረው ድሃ መሞቱን ሰሙ ። እርሳቸው ግን “ተኖረና ተሞተ” አሉ ይባላል ። ጡሩንባ ነፊውም ተርቦ ለሞተው ድሃ ቀብሩ ላይ በሬ ሲጣልለት ብዙ ጊዜ አይቷል ። ያ ችግረኛ ሞተ ተብሎ ሲለቀስም “ተኖረና ተሞተ” ማለቱ አይቀርም ። በጣም የምንንቃቸው ሰዎች በጣም ያውቁናል ። ምክንያቱም በእነርሱ ዘንድ ስለማንጠነቀቅ የእኛ ምሥጢር ያለው እነርሱ ጋ ነው ። መንግሥታት እንኳ ሰላይ የሚቀጥሩት ከእነዚህ ሰዎች ነው ።በአገራችን የቤት ሠራተኞችን ብዙ ለማክበር አልታደልንም ። እነርሱ መከበር ይጨንቃቸዋል ። ታዲያ ሴትዬዋ “ንስሐ አባት ይዘዋል ወይ ?” ቢባሉ “የቤት ሠራተኞቼ እያሉ ንስሐ አባት አያስፈልገኝም” አሉ ይባላል ። ንስሐዬ እነርሱ ጋ አለ ማለታቸው ነው ። ጡሩንባ ነፊውም ይንቁት ይሆናል ፣ እርሱም ይንቃቸዋል ። በጣም የሚያስፈልገንን ሥራ የሚሠሩልን የምንንቃቸው ሰዎች መሆናቸው ይገርማል ። የቤታችንን ቆሻሻ የሚያነሡት ፣ ሬሳችንን የሚሸከሙት ፣ መቃብራችንን የሚቆፍሩት ባናከብራቸውም እንደ እነርሱ የሚረዳን የለም ።
“ጡሩንባ ነፊ ቀብር አይወጣም” ይባላል ። እርሱ በጠዋቱ ግዴታውን ስለተወጣ ስለመቅበር አይጨነቅም ። ባለመቅበሩም የሚቀየመው የለም ። ከሰው ሁሉ በፊት ሰምቶ ከሰው ሁሉ ኋላ ይቀራል ። ሞቱን አርድቶ እርሱ ግን ማልቀስ ይቸገራል ። ለቀስተኞቹ አልነጋ ብሏቸው ልቅሶአቸውን አፍነው ሳለ እርሱ ለዓለም ያውጃል ። ይህን ሁሉ አድርጎ ግን ቀብር አይወጣም ። ይህ ቃል ትዝ ያለኝ ዛሬ በሌሊት ስልክ አነቃኝና አናገርሁ ። አንድ ወዳጄ ከውጭ አገር መጥቶ ገና ከአውሮፕላን መውረዱ ነው ። “በዚሁ ለሱባዔ ልሄድ ነው ፣ መግባቴን እወቀው ብዬ ነው” አለ ። ከአገር ከወጣ ብዙ ጊዜው ነው ። ቤተሰብ ቤተ ዘመድ ይጠብቀዋል ። ግን ከእግዚአብሔር ጋር ጉዳይ አለኝ ፣ እርሱን ሳልጨርስ ሰው አላገኝም ያለ ይመስላል ። ስለ ጽሞና ፣ በእግዚአብሔር ፊት ስለ መሆን ብዙ ጊዜ አስተምረናል ። ይህም ወጣት የዚህ ትምህርት ተካፋይ ነው ። እርሱ ተግባራዊ ለማድረግ ከሩቅ ሲመጣ እኔ ግን በመኝታዬ ሆኜ ገና ለመጸለይ እንኳ አልተሰናዳሁም ። ራሴን ወቀስኩ ። “ጡሩንባ ነፊ ቀብር አይወጣም” ብዬ ማንነቴን ዘለፍኩት ።
እኛ ያስተማርናቸውን ስናፈርስ ያለ ይሉኝታ የሚገስጹን እነማን ናቸው ? አባቶች ናቸው ? ወዳጆች ናቸው ? አይደሉም ። ሕጻናት ናቸው ። ሕጻናት እየኖሩት እኛ ግን ማድረግ አቅቶናል ። ምክንያቱም ጡሩንባ ነፊ ቀብር አይወጣማ ! ዛሬ መንፈሳዊ ሳይሆን ዘመናዊ ልጅ ለማሳደግ ነው ጥረታችን ። “ሶሪ” በል እያልን ስለ ይቅርታ እናስተምረዋለን ። እኛ ግን ይቅር አንልም ። ወይም ሶሪ አናውቅም ። ለነገሩ ልጆቹም የአማርኛውን “ይቅርታ” አይሉም ። ትንሽ የእንግሊዝኛው ይቀላቸዋል ። የሰው ተፈጥሮ “ይቅርታ” ለማለት ይቸገራል። በብዙ ነገር ወደ ኋላ ቀርተናልና ለእኛ ለአገልጋዮች ብርታት ይስጠን ።
በመካከለኛው ምሥራቅ እረኛው ከፊት እየሄደ ፣ ድምፁን ሲያሰማ በጎቹ ከኋላው ይከተሉታል ። ከፊት ስለሚሄድ ጠላታቸውን ከሩቅ ያየዋል ። እርሱ ለሞት ደረቱን ሰጥቶ በጎቹን ጋርዶ ይከተላል ። በእስራኤል አገር ይህን እረኝነት አይቻለሁ ። በአገራችን ደግሞ በጎች ከፊት እረኛው ከኋላ ነው ። ስለዚህ ይነዳቸዋል እንጂ አይመራቸውም ። እረኞች ዘመኑንና ትውልዱን መቅደም ካልቻሉ ማዳን አይችሉም ። መቅደም ታዲያ ፌስቡክ መጠቀም እየመሰላቸው ብዙዎች ይታለላሉ ። እርሱ ጥሩ ነው ። መቅደም በመንፈሳዊነት ፣ በእውቀትና የሌሎችን ድካም በርኅራኄ በማየት መሆን ይገባዋል ።
ጌታ ሆይ እባክህን በጠዋት ተነሥተን ፣ ሌሎችን ለልቅሶ ቀስቅሰን እኛ ግን የሳቅ ኮክቴል እንዳያምረን እርዳን ። ጸልዩ እያልን እኛ ግን ፊልም ላይ እንዳንጣድ ፣ መጽውቱ እያልን እኛ ግን ገንዘብ እንዳናሯሩጥ ጌታ ሆይ አንተ የመረጥከው አገልጋይ ዓይነት አድርገህ ሥራን ። አዝምቶ መመለስ ከእኛ ይራቅ ።
ታማኙ እግዚአብሔር ነፍሳችሁን ከመባዘን ይጠብቅ !!
ተጻፈ በአዲስ አበባ
ሰኞ ሚያዝያ 22/2010 ዓ.ም.

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።