ጌታ ሆይ የምንጠብቀው የሚጠብቀን ካንተ በቀር ማነው ?
ቸር ሆይ! ያለንን ሁሉ እየተነጠቅን የሌለንን የምንናፍቀው ምስኪኖች ካንተ በቀር ሰጪአችን ማነው?
ወጋገን አየን ስንል የሚጨልምብን ፣ ከእህል ረሀብ ወደ ፍቅር ረሀብ የተሸጋገርን ካንተ በቀር ተስፋችን ማነው ?
ፍቅር ጌታ ሆይ ! የማልቀሻ ስፍራችን ፣ ሸክም የምናራግፍባት ደጀ ሰላማችን ፣ ደምን በይቅርታ ፣ በደልን በፍቅር የምንለውጥባት አንድ ዓይናችን የሆነች ቤተ ክርስቲያን ስትጎዳ ካንተ በቀር የሚያድናት ማነው ?
ገዳይም ሟችም እኛው ሁነን ፣ ፉከራም ልቅሶም ሲጠፋብን ካንተ በቀር ወደ ሕሊናችን የሚመልሰን ማነው?
አንዲት ቤተ ክርስቲያን አንድ እንድትሆን ፣ ሕመምና ልቅሶአችን ዳርቻ እንዲያገኝ እንማጸንሃለን! አማኑኤል ሆይ! በክንፍህ መዘርጋት አንተ ጋርደን ። ከልቅሶም ልቅሶ አለውና የቤተ ክርስቲያን ደጆች በምሕረት ይከፈቱልን ። እውነተኛው አዳኝ ክርስቶስ ሆይ ! አደባባይ የቆምህላት ቤተ ክርስቲያን አደባባይ ቆማለችና አንተ አስባት ! ለዘላለሙ አሜን !
ዲያቆን አሸናፊ መኮንን
