የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

እንዲህ ቢሆንስ …? /7/

“የትዳሬ የወደፊት ሁኔታ ያጠራጥረኛል ፣ በርግጥ ባለቤቴ ጤናዋ የተሟላ አይደለም ፣ ውጤቱ ምን ይሆን ? እላለሁ ፤ የበሽታው ይሁን ወይም ያሰበችው አለመሳካቱ አላውቅም ብቻ በእኔ ደስተኛ አትመስለኝም ። ብዙ ነገሮችን ሳስብ የነገው ኑሮዬ ያሰጋኛል” እያልህ ይሆን ?
ትዳር ከእግዚአብሔር ነው ። የእግዚአብሔርን ድምፅ ሰምተህ የገባህበት ከሆነ ጥያቄ አይኖርህም ። ከጊዜያዊ ችግሮች ለማምለጥ ብለህ ፣ ቃሉን ገሸሽ አድርገህ ፣ የጠንቋይና የደላሎችን ንግርት ሰምተህ የገባህበት ከሆነ የምትማርበት ነው ። በዘመናት እግዚአብሔር የእገሌ ሚስት እገሊት ነች ብሎ አያውቅም ። ትዳር በሕይወት መንገድ ላይ የሚገኝ ፣ መርሕን የሚያከብር ጸጋ ነው ። ቀጥ ያለ ኑሮ እንኳን ከሰው ጋር ፣ ብቻህን ብትሆንም ሊኖር አይችልም ። ሕይወት ከፍና ዝቅ ያለ መንገድ ነው ። ተራራውን ስትጨርስ መስክ ታገኛለህ ፣ መስኩን ስትጨርስ ተራራ ይገጥምሃል ። ሁልጊዜ ተራራ የለምና አትጨነቅ ፤ ሁልጊዜም መስክ የለምና አትቦርቅ ። ደስታንም ኀዘንንም የምትሸከምበት ትዕግሥት ከእግዚአብሔር ለምን ። ወደ ትዳር የገባኸው ኪስህን ተማምነህ ከሆነ አደገኛ ነው ። ገንዘብ የሚመልሰው የገንዘብ ጥያቄን ብቻ ነው ። ለትዳር አቅም አስፈላጊ ነው ፤ በአቅም ብቻ ግን ትዳር አይመራም ። ያ ቢሆንማ የባለጠጎችና የባለሥልጣናት ትዳር የቀና በሆነ ነበር ። ትዳርን ኃላፊነት ብለኸው ቢያስደስትህ ወጉ ነው ፤ ደስታ ብቻ ነው ብለህ ከገባህ ግን ኃላፊነትንም እንደ ዕዳ ትቆጥረዋለህ ። ድምፅዋ ደስ ስላለኝ ነው ብለህ ብትገባ በዜማ የዛሬው ቁርስ አይታለፍም ። መመዘኛህ የላቀ ካልሆነ የምትኖረው ዝቅ ያለ ነው ። ነገሮችን በጣም መንፈሳዊ ለማድረግ አትሞክር ፣ ተመጻዳቂ ትሆናለህ ። የተበደርከውን ለመክፈል ጌታ ተናግሮኛል አትበል ፤ መመለስ ግዴታህ ነው ። ቤትህንም በግጥምጥሞሽ አትምራ ፤ የእኔ ስም ሰይፈ ሥላሴ ነው ፣ የእርስዋ ሥርጉተ ሥላሴ ነው ፤ ለእኔ እንደ ተፈጠረች ምልክቱ ይህ ነው አትበል ። ይህ የወፍ በረሮች መራቀቅ ነው ።
በአእምሮው የሚያስብ ወንድ ልጅ ጥቂት ነው ። አብዛኛው የሚያስበው በኪሱ ነው ። በራሱ የማይተማመን ወንድ በገንዘብ ለመግዛት ስለሚያስብ ሌባ ይሆናል ። በሌብነት የመጣ ኑሮም ሚስትን በሽተኛ ፣ ልጆችን ዓመፀኛ ያደርጋል ። ወንድ ልጅ ለትዳሩ የሚያስፈልገው ዋና ነገር የመጀመሪያው ፍቅር ፤ ሁለተኛው፡- ማዳመጥ ፤ ሦስተኛው፡- በጋራ መወሰን ነው ። ፍቅር ለማዳመጥና በጋራ ለመወሰን አስፈላጊ ነው ። ምክንያቱም ፍቅር የሚወደውን ሰው ይሰማልና ፤ ዳግመኛም ከእኔ የተሻለ አሳብ አለው ብሎ ስለሚያከብር በጋራ ይወስናል ። ብዙ ወንድ ልጆች የእኔ የሚሉትን ሰው በስስት ስለሚይዙ የዚያን ሰው ትንሽ ችግር መሸከም አይችሉም ። ማንኛውንም ወጪ አውጥተው ችግሩን ለመቅረፍ ያስባሉ ። ስለዚህ የማዳመጥ አቅም ያንሳቸዋል። ወንዶች ነፍሰ ገዳይ የሚሆኑት ብዙ ጊዜ ረጅም ሰዓት የማሳመንና የመታገሥ አቅም ስለሚያጡ ነው ። ሚስትህ ግን ከሁሉም በላይ መደመጥ ትፈልጋለች ። አንተ ርእስ ብቻ ተናግረህ ዝም ትላለህ ፣ እርሷ ግን ዝርዝሩን ተናግራ ማስረዳትና መታመን ትፈልጋለች ። ስለዚህ ማዳመጥ ይገባሃል ። ብዙ ዱርዬ ወንዶች ሴቶችን በጆሮ ያዳምጣሉ ፣ በውሸት ያሞግሳሉ ፣ ያጫውታሉ ። ብዙ የዋህ ሴቶች የሚታለሉት እውነተኛ ወዳጆቻቸው እነዚህ ስለሚመስሉአቸው ነው ። በትዳር አጠገብ የሚያደቡ ጨካኞች አሉና ተጠንቀቅ ።
ሚስትህ ከእጮኝነት ጊዜ ወደ ትዳር ስትገባ የመፈለግ ጊዜዋ ያቆመ ይመስላታል ። ስለዚህ ራሷን ትጥላለች ። አንተ ግን እንደ ቀድሞ ራሷን እንድትጠብቅና በእጮኝነት ጊዜያችሁ ወደምትዝናኑበት መልካም ቦታ ይዘሃት የመሄድ ልምድ ሊኖርህ ይገባል ። ስትወልድም ከፍተኛ ጭንቀት ውስጥ ትገባለች ። በአገራችን አራስን አትለዩ የሚባለው ለዚህ ነው ። ስትወልድ የጥፋተኝነት ስሜት ፣ በጣም ስጉነትና ልጇን የማጣት ፍርሃት ይከባታል ። በዚህ ወቅትም አለመለየት በጣም ወሳኝ ነው ። በአጠቃላይ ትዳር የሚጸናው ጊዜ በመስጠት ነው ። አሊያ ፎቁን ሠርተህ ስትጨርስ ቤትህ ሊፈርስ ይችላል ።
ሚስትህ በሌለችበትና ከሚስትህ እውቅና ውጭ ከጓደኞችዋ ጋር ማሳለፍን በጥንቃቄ ማየት ይገባሃል ። እንደውም እርሷ ስላልተመቻት ቀጠሮው መሰረዙን ማብሰር አለብህ ። የኑሮው ጫና ፣ የመውለድም ድካም ስለሚጫናት ጤናዋን መከታተል ይገባሃል ። ክርስቶስ ቤተ ክርስቲያንን የወደዳት እስከ ሞት ነውና አንተም የትዳር አጋርህን እስከ ሞት መውደድ አለብህ ። ጉድለት መቊጠር ከጀመርህ ፍቅርህ እየቀነሰ ነውና እንደገና ፍቅርን ይሰጥህ ዘንድ እግዚአብሔርን ለምነው ።
ሚስትህን በሚመለከት ከሐኪም የሰማኸው ብርቱ በሽታ ካለ አትስጋ ። ሰው የሚሞተው በጥሪ እንጂ በበሽታ አይደለም ። “እግረ ቀጭን ይሞታል ሲሉ እግረ ደንዳና” የሚባለው ለዚህ ነው ። ራቁትህን ተወልደህ ራቁትህን ትሄዳለህና ካንተ በኋላ መጥቶ ካንተ በፊት ለሚሄደው ገንዘብ ሰስተህ ኋላ እንዳትጸጸት አስፈላጊውን ሁሉ አድርግ ። ጸጸት አለመሞከር እንጂ አለመሳካት አይደለም ። ይልቁንም የሚስትህን በሽታና ችግር እግዚአብሔር እምነትህን ሊፈትን ያመጣው ሊሆን ይችላልና በታማኝነት ተወጣው ። የአንዳንድ ሰው አገልግሎቱ የቅርብ ሰዎችን ማስታመም ሊሆን ይችላል ። ይህን እያዩ ብዙዎች እውነተኛ ፍቅርን ይማራሉ ። ከአርባ ዓመት በላይ ሚስታቸውን የሚያስታምሙ ወንዶችን አውቃለሁ ። ይህን የሚሰማ ሁሉ ይመርቃቸው እላለሁ ።
ሚስትህ ብትማር ፣ ብታገኝ ፣ ሥልጣን ላይ ብትወጣ የበታችነት ስሜት ተሰምቶህ እንቅፋት ልትሆናት አይገባም ። ራስህን መቀበል ካቃተህ ሚስትህም አትቀበልህም ። ዓለምን እያመሰ ያለው የበታችነት ስሜት ነው ።ያንተ የሆነ ሰው በማደጉ ደስ ሊልህ ይገባል ። ስለዚህ በሥራ ዓለም ያገኛሃትን ሚስት ልጅ አሳዳጊ አድርገህ ያለ ፈቃዷ ልትቆልፍባት አይገባህም። በመንፈሳዊ አገልግሎት አግኝተሃት አሁን ቤተ ክርስቲያን ልትከለክላት መብት የለህም ። ሰው ፍላጎቱን ተከልክሎ አብሮህ ሊኖር ይችላል ። ሰላም ግን ሊሰጥህ አይችልም ። ፍላጎቱን የተከለከለ ሰው ጋር መኖር በድን ታቅፎ እንደ መኖር ነው ።
እግዚአብሔር የቤቱ ራስ አድርጎሃልና ለአካልህ ተጠንቀቅ ። ቤትህንም በትክክል መምራት ብዙ ነገሮች ወደ መምራት ብቃት ያሳድግሃል ። ቤትህ ትንሹ አገር ነውና ። ሚስትህ ደጋግማ የምታነሣውን የከረመ ችግር በይቅርታ ዝጋው ። የሞተ ታሪክ የዛሬውን አዲስ ቀን እንዲረብሽ አትፍቀድ ። የስህተትህ እስረኛ እንዳትሆን አጠፋህ በተባልከው ነገር ይቅርታ ጠይቅ ። የይቅርታ ተቀባይ ሚስትህ ሳትሆን የሠራዊት ጌታ ነውና ክብርህ ነው ። በዓለም ላይ “ይቅርታ” እንደሚለው ቃል የሚጣፍጥ የለም ። ለአላዋቆች ደግሞ ይቅርታ መራራ ነው ።
ተገቢውንና እግዚአብሔር የሚደሰትበትን ነገር አድርግ እንጂ ሰውን ለማስደሰት አትሞክር ። ሰውን ላስደስትህ ስትለው የበለጠ እየተከፋብህ ይሄዳል ። እግዚአብሔርን ስታስደስት ግን እርሱን የሚያውቅ ሰው ይደሰትብሃል። ትዳርህን ወደ ዘላለማዊነት ካስጠጋኸው በሰማይም የክርስቶስ ሙሽራ ሆናችሁ ትቀጥላላችሁ ። የምድሩ ምሳሌ ነው ፣ አማናዊው በሰማይ ነው ። ምሳሌው ቢጎድል ወጉ ነው ። በሰማይ ግን ትልቅ ሰርግ ይጠብቀናል።
ወደ ክርስቶስ መገስገስ 12
ተጻፈ አዲስ አበባ
ጥቅምት 7 ቀን 2011 ዓ.ም.

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።