የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

ወዳጄ ሆይ

መጮህ ሳይያዙ ነው ፣ ከተያዙ በኋላ መጮህ ቀባሪ ለመፈለግ ነው ። ዛሬ ስለ እውነትና ስለ ፍቅር ካልጮህን ነገ እየሞትን እንጮኻለን ። ደካሞችን ለማጥቃት ብርቱ አትሁን ። የሚያንሰውን ረግጦ ጀግና የተባለ ማንም የለም ። እሳት ቆስቋሹን ፣ ወሬም አራጋቢውን ይፈልጋል ። የኑሮ ጥያቄ ሳይመለስ የመኖር ጥያቄ እንዳይመጣ ጸልይ ። ጠባይህ የሚከብደው እንጂ መኖርህ የሚከብደው ከጠላትም በላይ ነው ። አውሬ ከጠገበ አይገድልም ፣ ክፉዎች ግን የሰውን ሥጋ በልተው አይጠግቡም ። አውሬ የሚገድለው ሊበላ ነው ፣ ሰው ግን የማይበላውን ይገድላል ።

ወዳጄ ሆይ
ነቅተህ የምትሞቀው እሳት ስትተኛ ያቃጥልሃል ። ትላንት ለጆሮ የከበደህ ዛሬ ለዓይንህ ይቀልሃል ። ሲታሰብ ያልተገሠጸ ፣ ሲነገር ያልታረመ ክፉ ነገር ሲደረግ ይቀላል ። በዓለም ላይ ከባዱ ማድረግ ሳይሆን ማሰብ ነው ። ሰውን ሰው የሚያሰኘው እንዴት እኔ ይህን አስባለሁ ? ብሎ ክፋትን ሲጸየፍ ነው ።
ወዳጄ ሆይ
ዓለምን ገነትም ሲዖልም የሚያደርጋት የእኛው ምርጫ ነው ። ትዕግሥት ተስፋን ሲያሳጣ ትዕግሥት መሆኑ ይቀራል ። ፖለቲከኛ መሆን ማለት በዓይን እያለቀሱ በልብ መሳቅ ነው ። ቁልፍ በራሱ ላይ ሲቆልፍ በር ይሰበራል ፣ ወንድም ወንድሙን ሲገድል አገር ይደፈራል ። ያልበደለውን የገደለ የበደለውን ምን ሊያደርግ ነው ? እውነተኛ ዱርዬ ባለበት ዓለም እውነተኛ ጨዋ መጥፋቱ ፣ ክፋት የምትጓደደውን ያህል ደግነት መድረሻ ማጣቱ ያሳዝናል ። የፖለቲካ ጆሮ የተገጠመለት የሚሰማው የሚያስበውን ነው ። የሚጨሱ ነገሮች ማለቃቸው ፣ የሚያጨሱ ሰዎች ማልቀሳቸው አይቀርም ።
ወዳጄ ሆይ
በግድ የገባ ቤቱን ያፈርሳል ። ዝምታን የመረጠውን በግድ ተናገር ስትለው ያዋርድሃል ። አጥንት አጥንትን ይሰብራል ፣ በክፉ ቀንም ያሳደጉት ይገድላል  ። የሩቅ ጠላትን የሚገዛው የቅርብ ወዳጅ ነው ። ደግም መካሱ ክፉም ማልቀሱ አይቀርም ። ውስጥህ የሌለውን ለመሆን መሞከር ቲያትር ነው ። የተከፈተለት የሚዘጋ ፣ ይቅር የተባለ የሚበቀል ፣ የዳነ የሚገድል መሆን የለበትም ። እሳቱ መከራ ፣ ድስቱ ምድር ፣ የምትበስለው አንተ ነህ ። እሾህ ሲቃጠል እንጀራ ይጋግራል ፣ የሚያደሙ ሲቀጡ በረከት ይመጣል ።
ወዳጄ ሆይ
ፈረሱ ጠፍቶ ኮርቻን መፈለግ ከንቱ ነው ። ክብር ጠፍቶ በረከት መሻት ልፋት ነው ። ሰነፍ በጉልበቱ ለግሞ በአፉ ይሠራል ። ሥራውን የፈጸመ መኖርን ይጠግባል ። ያልደረስከው ልቅሶ ሁልጊዜ ትኩስ ነው ፣ ያልገለጥከው ኀዘንም ሲያቃጥልህ የሚኖር ነው ። ያልገዛኸው ስሜት ይገዛሃል ። የስሜት ሎሌ ጌታ ሳይሆን ይሞታል ። ተኝተህ ለሚያዙህ ቁመህ አትሙትላቸው ።  ሌቦች ሐቀኛ ለመምሰል የሚያጠልቁት ጭንብል መኮሳተር ነው ። መጎዳትህን ከሚነግርህ የሚረዳህ እርሱ ወዳጅህ ነው ።
ወዳጄ ሆይ
የሚያውቅህ ሲደፍርህ የማያውቅህ ያከብርሃል ። ዓለም ስድብ ላይ በነበረችበት ዘመን ቤተ ክርስቲያን ጸሎት ላይ ነበረች ፤ ቤተ ክርስቲያን አውጋዥ ስትሆን ዓለም መግደል ላይ ደረሰች ። እኛ ስንደፍር ዓለሙ በእጥፍ ይደፍራል ። መጻሕፍት ሲቃጠሉ ቀጥሎ ሰው ይቃጠላል ። ወንጌል ካልተሰበከ ወንጀል ሥራ ይሆናል ። ወንዝ የሚወስደው ሰው የተዘረጋውን እጅ ሁሉ ይይዛል ፣ የተቸገረም ትውልድ አሳብ አይመርጥም ። በእግዚአብሔር ልብ ያለህን ስፍራ ስታውቅ የሰዎች ንቀት አያስፈራህም ። ገመናን መክደን የሚገባት አገር ስትገልጥ እየፈረሰች መሆኑን አስተውል ። እግዚአብሔር አንድ ነገር አያውቅም ፣ የፈጠረውን ትንሽ ሰው ።
ወዳጄ ሆይ
የናቁት ያስረግዛል ፣ ሞኝም ባናት ይመጣል ፣ ጨካኝም ካሰበው ይደርሳልና ማንንም አትናቅ ። ሲያገኝ የማያመሰግን ሲያጣ ለማማረር ሞራል የለውም ።መራብን እንደ ጠላኸው መጥገብንም ጥላው ። ለሰው ልጅ በሕይወቱም በሞቱም የሚሰጠው አበባ ነው ። ብዙ የሚሠራ እጅ ብዙ ያፈርሳልና እጅህን ቀድስ ።
ምክር /22/

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።