የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

ወዳጄ ሆይ

ከሰው ላለመለየት ብለህ ግፍ አትሥራ ። ጊዜ ይልፋል ፣ ትዝብትና ጸጸት ግን ይኖራሉ ። ከሰው መለየትን የሚፈራ ከእግዚአብሔር መለየትን አለመፍራቱ ይገርማል ። ከሰዎች ጋር አብረህ ብትሮጥ በትግሉ ተስማምተህ ግቡ ላይ ትጣላለህ ። “ሌባ ሲሰርቅ ይስማማ ፣ ሲካፈል ይጣላ” እንዲሉ ። የሌሎችን ዝና ቀምተህ ዝነኛ ስትሆን ደቀ መዛሙርትህ ያንተን ዝና መንጠቅ እንዲችሉ ድፍረት እየሰጠሃቸው ነው ። መድረሻህን እግዚአብሔር ካላደረግህ የዚህ ዓለም መድረሻዎች ሁሉ ሲደርሱባቸው የማያሳርፉ ናቸው ።
ወዳጄ ሆይ
ሰዎች ያደረጉብህን ሳይሆን ያደረጉልህን ብቻ አስብ ። ሰዎች አንድ ጊዜ ይወጉሃል ፣ ራስህን በቂም የምትመርዘው ግን አንተ ነህ ። ሰዎች ገንዘብህን እንጂ ጊዜህን እንዲሰርቁብህ አትፍቀድላቸው ። ታውከህ ካልጠበቅኸው የሚያውክህ የለም ። ጠላትህን የገደልከው ዝም ያልከው ጊዜና የረሳኸው እንደሆነ ነው ። ከሰዎች ጋር ተጉዞ የጨረሰ የሚመስለው እንደገና መጀመሩ አይቀርም ። ያለ እግዚአብሔር ከሚኖሩ በእግዚአብሔር አምነው የሚሞቱ ይሻላሉ ። ሰማዕትነት በደጅህ ነውና ክርስቲያን ሆይ እርስ በርስህ አትባላ ።
ወዳጄ ሆይ
ካለህ ስጥ ፣ ከሌለህ አትሰጥምና ። ካለህ አታባክን ፣ ከሌለህ አታባክንምና   ። ካለህ ስጥ ፣ ሞተህ አትሰጥምና ። መድረሻህ ሲጠፋህ ወደ ተነሣህበት ተመለስ ። ፖለቲካ አምላክህ ከሆነ ዕድሜህ አጭር ነው ። እንስሳ ከቅጣቱ ይማራልና ከትላንት የማይማር እጅግ ደካማ ነው  ። የነገ ተስፋ የሌለው እምነቱን የጣለ ነው ። ፈጣሪህ አንተን አልካደህምና አንተ እንዳትክደው ተጠንቀቅ ። መጸጸት የሰው ልክ ነውና በክፉ ሥራህ ልበ ደንዳና አትሁን ። ጽድቅ አስበህ ኃጢአት ብትረግጥ እንደገና ሞክር ፤ ኃጢአት አስበህ ጽድቅ ላይ ራስህን ብታገኝ እንደ ጳውሎስ እግዚአብሔርን አመስግን ።
ወዳጄ ሆይ
እነዚያ ቀኖች ተመልሰው አይመጡምና የመጣውን ቀን በክፉ ትዝታ አትረብሸው ። ሲጸጸቱ መኖር የሰይጣን የዘፈን ባንድ መሆን ነው ። ካሰብህበት ባትደርስም እግዚአብሔር ካሰበልህ ደርሰሃልና ደስ ይበልህ ። አለመሆኑ ሳይሆን ለምን አለመሆኑ ሲረብሽህ ፤ አለመሆንም መሆን ነው ፣ ለምን አልሆነም ማለትም የማይፈታ ቅኔ ነው ።
ወዳጄ ሆይ
መሮጥ ካቃተህ በእውነት መንገድ ላይ ተራመድ ፤ መራመድ ካቃተህ ዳዴ በል ፣ ዳዴ ማለት ቢያቅትህ ተኛ ፤ ክርስቶስ በዚያ መንገድ ሲመጣ ተሸክሞህ ይሄዳል ። ከድንዛዜህ ንቃ ፣ ሞት ጦሩን ስሏልና ። ኃጢአት ሳታቆም መዓት እንዲቆም አትሻ ። አገር በኑዛዜ እንጂ በፖለቲካ ትንታኔ አትድንም ። ያንዣበበ መዓት በታላቅ ንስሐ ይመለሳል ። ሰዎች ያጎደሉትን ሳይሆን አንተ ልትሠራው ሲገባህ ያልሠራኸውን አስብ ።
ወዳጄ ሆይ
ጸሎት ከሌለበት ማሰብ ብቻውን ድንጋይ ከመፍለጥ በላይ ያደክማል ። እውነት ከሌለበት ብዙ ማውራት ያስንቃል ። ፍቅር ከሌለበት ተግባር ከንቱ ልፋት ነው ።
ወዳጄ ሆይ
ነገር እያሰብህ አትተኛ ፣ እሾህ ከሥርህ ማንጠፍ ነውና ። ነገር እያሰብህ መንገድ አትሂድ ፣ ከቆመ ነገር ጋር ትጋጫለህና ። ነገር እያሰብህ አትብላ ፣ በትንታ ትሞታለህና ። ነገር እያሰብህ አትናገር ፣ መራራ ትሆናለህና ። ነገር እያሰብህ ወዳጅህን አታዋራ ፣ ገጽህ ይለወጣልና ። ነገር እያሰብህ አታቅድ ፣ ግብህ ይከፋልና ። ሁሉን ለእግዚአብሔር ተውለት ። እርሱን አልፎ የሚነካህ የለምና ።
ወዳጄ ሆይ
የጀመርከው ቢበላሽም እንደገና ጀምር ። ሁልጊዜ ዝራ የትኛው እንደሚበቅል አታውቅምና ። ትላንት የዘራኸውን ዛሬ እየበላህ ነው ፤ ዛሬ የምትዘራውንም በጎ ነገር ነገ ትበላዋለህ ። ያልዘራ የሚያጭደው የለም ።
ደስ ብሎህ ዋል  
ምክር/ 21
ጥቅምት 13 ቀን 2012 ዓ.ም.

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።