የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

ውስጣዊ ቍጣ / ክፍል 2

ውስጣዊ ቍጣ የተለያዩ መነሻዎች አሉት ።

1- ያለመፈለግ ስሜት

ስልካቸው ቀኑን በሙሉ ባለ መጥራቱ “የሚፈልገኝ የለም” በሚል ስሜት ውስጣዊ ቍጣ ውስጥ የሚገቡ ሰዎች ብዙዎች ናቸው ። በዚህች ምክንያት ብቻ አእምሮአቸው የተቃወሰ ፣ ለምን እኖራለሁ ? ብለው ሕይወታቸውን የጠሉ ሰዎች ብዙ ናቸው ። እጮኛቸው ጋር ሊቀጥሉ ባለ መቻላቸው ያለ መፈለግ ስሜት ውስጥ የገቡ ፣ ለእኔ ያልሆነ ለማንም አይሁን ብለው አደጋ የሚያደርሱ አያሌ ናቸው ። እጮኝነት መጠናናት በመሆኑ ሊቀጥልም ሊቆምም የሚችል ነጻ ቀጠና ነው ። ሰዎች መቀጠል አልችልም የሚሉት እኛ ተፈጥሮአዊና ሞራላዊ ጉድለት ስላለብን ብቻ ሳይሆን የእኛን ፍቅር ፣ ፍቅር አልባው ልባቸው መሸከም ስላቃተው ሊሆን ይችላል ። ያለ መፈለግ ስሜት ውስጥ የገቡ ሰዎች ዛሬ ተዋውቀውት ነገ ካልደወለላቸው በዚያ ሰው ላይ ቍጠኛ ይሆናሉ ። ያለ መፈለግ ስሜት ለአገር ለወገን ደክመው ሲረሱ ፣ ከደከሙበት መንግሥት ጡረታ ሲነፈጉ የሚመጣ ነው ። ዕድሜ ዝቅም ከፍም ሲል ይህ ስሜት ይኖራል ። ወጣቶች ሌላው ላይ መኩራት ደስ ሲላቸው ሲኮሩባቸው ግን ይረበሻሉ ። ሽማግሌዎችም የገዛ አካላቸው እንኳ እየከዳቸው ነውና ሁሉ እንደ ረሳቸው ሊሰማቸው ይችላል ።

ወላጆች የልጆቻቸውን ድምፅ ሲያጡ ፣ ቀድሞ የሞቀው ቤት አሁን የሰው ረሀብ ሲገባበት ያለ መፈለግ ስሜት ይሰማቸዋል ። ያለ መፈለግ ስሜት ቍጣንና የእልህ ተግባርን እንዲፈጽሙ ያደርጋል ። ልጆቼ አይፈልጉኝም ብሎ አንድ አባት ትልቅ ቦታና ንብረቱን ሸጦ ለቤት ሠራተኛና በቅርብ ለረዱት ሰጥቶ ፣ ለራሱ መናኛ ቦታ ላይ ወድቆ በጥቂት ቀናት ውስጥ ሲሞት አውቃለሁ ። ውስጣዊ ቍጣ የእልህ ተግባር ያስፈጽማል ። ሰው የሚያጠፋው እንደ አቅሙ ነውና የአገር መሪዎችም ሁሉም ጠላት የሆነባቸው ሲመስላቸው ውስጠዊ ቍጣ ላይ ይወድቃሉ ። በአገራችንና በቤተ ክርስቲያን የእልህ ተግባራት ያመጡት ዕዳ ትውልድ የሚከፍለው ሁኗል ። አገራችን የዓለም ባንክ ዕዳ ብቻ ሳይሆን የቀደሙት ትተውት የሄዱት የእልህ ዕዳም አለባት ።

2- ወላጅ አባትን ማጣት

ብዙ ወላጅ አባቶች ለልጆቻቸው ክፉ አይደሉም ። አባቶች ግን ክፉ ተደርገው እንዲሳሉ ይደረጋል ። ገንዘባቸው እየጣፈጠ አባትነታቸው ይጠላል ። ልጆችም በልጅነት አእምሮ አባትን እንደ ክፉ ማየት እያዳበሩት ያድጋሉ ። አባቶች ስለመቆጣታቸው እንጂ ለምን እንደ ተቆጡ ልጆች እንደ ገና መመርመር ያስፈልጋቸዋል ። የሚሰሙ ጩኸቶች የማይሰሙ ቁንጥጫዎች ውጤት ናቸው ። ሁሉ አባት ደግ ላይሆን ይችላል ፣ ሁሉ አባትም ክፉ አይደለም ። በቤታቸው ሰላም ሲያጡ ጠጪ የሚሆኑ ፣ የማልመጥ ሥራ ሲሠራባቸው ቤቴንም ልጆቼንም ከስሬአለሁ ብለው አጉል ተግባር የሚፈጽሙ አባቶች አሉ ። የተናገረ ሁሉ ትክክል ፣ ዝም ያለ ሁሉ ጥፋተኛ አይደለምና ሊጠና ይገባዋል ። እግዚአብሔር ልጆች በአባትና በእናት እኩል እንክብካቤ እንዲያድጉ ፈቅዷል ። ምክንያቱም ከአባት ጥንካሬን ፣ ከእናት ፍቅርን ስለሚያገኙ ነው ። ይህን ሚዛናዊና የመንፈስ ምግብ የሚያገኙት አባትና እናት በሰላም ሲኖሩ ነው ። አባት እንዲኖርም አገር ሰላም መሆን አለባት ። ብዙ አባቶች የሚሞቱት በጦርነት ነውና ።

እናት ምንም ጎበዝ ብትሆን የአባትን ቦታ መተካት አትችልም ። ልተካ ብትልም በቶሎ ትደክማለችና ልጆችዋ ለመርዳት ሲፈልጓት አትገኝም ። አባታቸውን የማያውቁ ፣ አባታቸውን በሞት የተነጠቁ ፣ አባታቸው የማይፈልጋቸው ልጆች የሰው አባት ባዩ ቍጥር ይቀናሉ ። አባታቸውን ቢያገኙ አሁን ካለው የተሻለ ኑሮ እንደሚኖሩ ያስባሉ ። በዚህ ምክንያት የዝምታ ፍለጋው ፣ የልብ ሩጫው ሲያደክማቸው ውስጣዊ ቍጣ ውስጥ ይገባሉ ። ብስጩዎች ፣ ለእናታቸውና ለአሳዳጊዎች የማይመቹ ፣ የበቀለኝነት ስሜት የሚያዳብሩ ፣ ሰውን ሁሉ የሚጠራጠሩ ሁነው ያድጋሉ ። እግዚአብሔር አባትን ውስዶ እናትን ካስቀረ ጨርሶ አልከፋምና ተመስገን ማለት ይገባል ። አባትም እናትም ሞተው አሳዳጊ ከሰጠም ማመስገንና አሳዳጊዎችን ማክበር ያስፈልጋል ። ትልቁ ቁም ነገር መውለድ ሳይሆን ማሳደግ ነውና ። ደግሞም ይህ ሁሉ ባይኖር እግዚአብሔር አባትነቱ ከአባትም በላይ ነውና በእርሱ መደሰት ይገባል ። አለኝ ለማለት እንጂ የሚሞቱ አባትና እናትን የሰጠ ፣ የማይሞተው አባት እናት እግዚአብሔር ነው ። አባትን ማጣት ውስጣዊ ቍጣ ፣ ውጫዊ ግጭት ይፈጥራል ። የሁሉም ነገር መልስ ያለው ግን ሥላሴ ጋ መሆኑን ማሰብ ያስደስታል ።

ይቀጥላል

ዲያቆን አሸናፊ መኰንን
ታኅሣሥ 27 ቀን 2015 ዓ.ም.

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።