የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

የቤተ ልሔሙ ሕፃን

ሰብአ ሰገል ሀብታቸው ድንጋይ ሁኖባቸው የፈለጉህ ፣ የጥበብ ሰዎች እውቀታቸው ኀዘን ሁኖባቸው ያሰሱህ ፣ እንደ ዛሬው የተባበሩት መንግሥታት ሳይመሠረት የምሥራቅ ነገሥታት ተባብረው ወዴት ነው ? ያሉህ የቤተ ልሔሙ ኢየሱስ ሰላም እልሃለሁ ። ሀብት ካላሳረፈ እውነተኛው ሀብት አንተ ነህ ። ጥበብ ብስጭት ከሆነ እውነተኛው ተድላ አንተ ነህ ። ንግሥና ጭስ አልባ ቃጠሎ ከሆነ እውነተኛው ክብር አንተ ነህ ። በአገራቸው ተገኝተህ የጠራሃቸው ፣ በቤተ ልሔም የተቀበልሃቸው ፣ በልባቸው ናፍቆት ፣ በዓይናቸው ጥጋብ የሆንህ አንተ አማኑኤል ነህ ። የምድር ኃያላን የሚፈልጉህ በበረት የወደቅህ ፣ የምድር ጠቢባን የሚከጅሉህ በእናትህ እቅፍ ሁነህ ጡት የምትለምን ፤ አንተ የዘላለሙ አባት ፣ አንተ የቤተ ልሔሙ ሕፃን ፤ አንተ የአብ ልጅ ፣ አንተ የድንግል ልጅ ባለ መለየት አምላክም ሰውም ለሁንከው ሰላም እላለሁ !

የሆነውን ነገር ማንም ሊናገረው አይችልም ። እንደ ቅድስት እናትህ በአርምሞ ከመግለጥ ውጭ ምንም አይባልም ። ልጅ በመውለድዋ እናት እንጂ ቅድስት የተባለች ሴት የለችም ። ቅድስት እናትህ ግን በመውለድም እንደገና ቅድስት ተባለች ። ሰማይ ሰማይ ነበረ ፣ ሰማይ ምድር ሆነ ፤ ይህችውም እናትህ ናት ። ከዳግሚት ሰማይ ከድንግል የወጣኸው ፀሐይ አንተ ነህ ። ድሀ አይወድም እንዳይሉህ እረኞችን ጠራህ ፣ ባለጠጋ አይሻም እንዳይሉህ ሰብአ ሰገልን ጋበዝህ ። አንተ የሁሉ ወዳጅ ነህ ። ቦታ ሳይገድብህ ለሁሉ ትደርሳለህ ። ልደትህም የሁሉ የምሥራች ነው ።

ያቀረቡልህን እጅ መንሻ ተቀበልህ ። የሰጡህ ወርቅ ብቻ ሳይሆን የሰጡበት እጅም ያንተ ነው ። ያንተን ያንተ ከሆነው እጅ የተቀበልህ ፣ የሕፃንነት ዓይንህ እየተንከራተተ ፣ በመንበርህ ሁነህ ደግሞ ግብራቸውን ትቀበል ነበር ። አንተ ስትወለድ ሰማያውያንና ምድራውያን ጉባዔ አደረጉ ፣ ይህም የመንግሥተ ሰማያትን ዘመን ያስታውሳል ። አንተ ስትወለድ ኑሮ ያራራቃቸው ነገሥታትና እረኞች አብረው ሰገዱ ፣ ይህም የቤተ ክርስቲያን መገለጫ ነው ። መንግሥተ ሰማያትንና ቤተ ክርስቲያንን ላየንበት ልደትህ ሰላም እንላለን ።

ባለ መደነቅ ከመዘመር ፣ በመደነቅ ዝም ማለት ይሻላል ። የተደነቀም ዝም ማለት አይችልም ። ለእኔም በልደትህ ምሥጢር መደነቅን ስጠኝ ። አሜን ።

ዲያቆን አሸናፊ መኰንን
ጥር 1 ቀን 2014 ዓ.ም.

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።