የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

የቤተ ክርስቲያን ታሪክ

ታሪክ ምንድነው ?
የነገሮች መጀመሪያ በኦሪት ዘፍጥረት ፣ የነገሮች ፍጻሜ በዮሐንስ ራእይ ተገልጧል መጽሐፍ ቅዱስ ፍጥረት ጅማሬና ፍጻሜ እንዳለው ሲናገር ፈጣሪ ግን ጅማሬና ፍጻሜ የሌለው መሆኑን ይናገራል ለሁሉም ነገር ጅማሬና ፍጻሜ የሰጠው እግዚአብሔር ነው ። በጅማሬና በፍጻሜ መካከል ያለው ታሪክ ይባላል ። ብዙ ጊዜ ሲነገር እንደምንሰማው “የታሪክ ባለቤት ሕዝብ ነው” ይባላል ፣ የታሪክ ባለቤት ግን እግዚአብሔር ነው ። በዚህ ዓለም ላይ ታሪክ የሌለው ማንም የለም ። ግለሰቦች ፣ ማኅበራት ፣ ቤተሰብ የራሳቸው የሆነ ታሪክ አላቸው ። በቀደመው ዘመን ወላጆች ለልጆቻቸው የዘር ሐረጋቸውን ጽፈው ይሰጡ ፣ በቃል ያስጠኑ ነበር ። ትልቅም ይሁን ትንሽ ሁሉም ሰው የራሱ ታሪክ እንዳለው ያሳያል ። በርግጥ “የዓለም ታሪክ የጥቂት አባገነኖች ታሪክ ነው” ተብሎ በምሬት ይገለጻል ። ታሪክ ግን የቤተ መንግሥትን ውሎ ማጥኛ ብቻ ሳይሆን በዚያ ዘመን የነበረውን ማኅበራዊ መስተጋብር ፣ ሥልጣኔና የሕዝቡን የአኗኗር ሁኔታ ማንሣት አለበት ። የታሪክ ሙሉ ሥዕል ያለውም በዚህ ነው ።

“ታሪክ ላይ መቆየት አመድ ላይ መንከባለል ነው” ተብሎም ሲነገር ይሰማል ። ታሪክ ለዛሬ ያለውን አስተዋጽዖ ማየት ካልቻልንም አታላይ ሁኖ ዛሬን እንዳንኖር ያደርገናል ። ግሪኮች አሁን ያሉበት የኢኮኖሚ ውድቀት ላይ የደረሱት “መላው አውሮፓ ጫካ በሚኖርበት ዘመን ዲሞክራሲንና ፍልስፍናን ለዓለም ያስጠናን እኛ ነን” በሚል ትምክሕት ስለተቀመጡ ነው ። ታሪክ ቁጭት ፈጥሮ የበለጠ ካላሠራ በርግጥም አመድ ላይ መንከባከብ ነው ። ታሪክን ስናጠና መታወስ ያለበት ነገር ሁላችንም በታሪክ ፊት መሆናችንን ነው። ዛሬም ታሪክ ናት ። እኛም አንድ ቀን ታሪክ እንሆናለን ። በሌላ አገላለጽ የዛሬ ሰው ፣ የነገ ታሪክ ነን ። ትላንት ባጎደሉት የምንወቅሳቸው ባለታሪኮች አሉ ፣ እኛም ካልሠራን ነገ ላይ እንዲህ እንወቀሳለን ማለት ነው ። በርግጥ ታሪኬ እንዲያምር ብሎ የሚሠራ ሰው ተዋናይ እንጂ እውነተኛ አይደለም ። መሥራት ያለብን ለእግዚአብሔር ክብር ፣ ለወገናችን ጥቅምና ለኅሊና እርካታ ብቻ ነው ። ዛሬ የሠራነው ለነገ ተርፎ ታሪክ ከሆነ መልካም ነው ። ሥራችን ግን በእግዚአብሔር ፊት ይታወሳልና ደመወዝን ከእርሱ ብቻ እያሰብን መሥራት ይገባናል ።
“የቤተ ክርስቲያንን ታሪክ የማያነብ ሰው በታሪክ ውስጥ የተፈጸሙትን ስህተቶች ለመድገም የተፈረደበት ነው” ይባላል ። ከታሪክ የማይማር ሰው ከጉዳቱ የሚማር ልፋተኛ ሰው ነው ። የቤተ ክርስቲያንን ታሪክ ማጥናት ለጥቂት ሰዎች የሚያስፈልግ ብቻ ሳይሆን ክርስቲያን የሆነ ሁሉ ሊያውቀው የሚገባ ሐቅ ነው ። ክርስትናን በተከፈለለት ዋጋ ልክ ለመያዝ ታሪክን ማወቅ ያስፈልጋል ። የችግሮችን ምንጭ አውቆ መፍትሔ ለማፈላለግ ታሪክን ማወቅ ወሳኝ ነው ። ታሪክ ትላንትን የምናይበት መስተዋት ነው ። ታሪክን ወደ ኋላ መልሰን ማረም ባንችልም ታሪክ ከጥፋቱም ከልማቱም ጋር የሚጠቅመን ስንማርበት ብቻ ነው ። ትላንት የሌለው ዛሬ ፣ ነገ የሌለውም ዛሬ የለም ። ትላንት የሌለው ዛሬ ዓለምን ዛሬ የጀመረ ያስመስለዋል ። አምባገነኖች የሁሉም ነገር መነሻ እኛ ነን ስለሚሉ ትላንት የሌለውን ዛሬ በመፍጠር የተካኑ ናቸው ። ራሳቸውን እግዜር ስለሚያደርጉም አምባገነኖችና አግም አደጎች ለነገ ታሪክ አይጨነቁም ። ዓለም የምታልፈው እኔ ያልፍኩ ቀን ነው ብለው ያስባሉና ። ዛሬ ታሪክ እናጠናለን ፣ ነገ ታሪክ ሁነን እንጠናለን ። ታሪክ አንድ ታላቅ ተቆጣጣሪ እንዳለው እንረዳለን ፣ እርሱም የዘመናት አምላክ እግዚአብሔር ነው ።
ነጋድራስ ገብረ ሕይወት ባይከዳኝ ስለ ታሪክ አጻጻፍ የተናገሩትን ማንሣት ጠቃሚ ነው፡-
1-  ታሪክን መማር ለሰው ሁሉ ይበጃል ። ለቤተ መንግሥት መኰንን ይበልጥ ይበጃል ።
2-  የታሪክ ትምህርት የሚጠቅመው እውነተኛ ሲሆን ነው ይላሉ ። በመቀጠል  እውነተኛ ታሪክ ለመጻፍ ሦስት ነገሮች ያስፈልጋሉ ይላሉ፡-
2.1- ተመልካች ልቡና
2.2- የማያደላ አእምሮ
2.3- የጠራ የቋንቋ አገባብ ።
ነጋድራስን እንዲህ እንዲናገሩ ያደረጋቸው አንዱን ባለ ታሪክ ክንፍ ቀረሽ መልአክ ፣ ሌላውን ጭራቅ አድርጎ የመጻፍ አባዜ ስላለና ስላሳዘናቸው ነው ። ሰው ደግ ብቻ ፣ ሰው ክፉ ብቻም አይደለምና ታሪክ ሚዛናዊ መሆን አለበት ። ወገናዊነት ታሪክን ያበላሻል ። ወገናዊነት ጥላቻን በትውልድ መካከል ይፈጥራል ።
ይቀጥላል
ሐምሌ 2 ቀን 2011 ዓ.ም.
ዲአመ

ያጋሩ

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።