የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

የትውልድ መጽሐፍ

“የዳዊት ልጅ የአብርሃም ልጅ የኢየሱስ ክርስቶስ ትውልድ መጽሐፍ” /ማቴ. 1፡1 /
የማቴዎስ ወንጌል ምዕራፍ አንድ ከብሉይ ኪዳን መጻሕፍት ግማሽ ያህሉን የሚጠቅስ ነው ። የማቴዎስ ወንጌል ምዕራፍ አንድን በትክክል ማጥናት ከኦሪት ዘፍጥረት እስከ መጽሐፈ ዕዝራ ያሉትን ታሪኮች ማወቅ ነው ። የማቴዎስ ወንጌል ከምርኮ በፊትና ከምርኮ በኋላ ያሉትን ታሪኮች ስለሚያነሣ አሁንም በጥልቀት ሲጠና መላው ብሉይ ኪዳንን ይጠቅሳል ማለት ነው ። ብሉይ ኪዳን ከዘፍጥረት እስከ መጽሐፈ አስቴር ያለው ታሪኩ ሲሆን ከመጽሐፈ ኢዮብ እስከ ትንቢተ ሚልክያስ ያለው ደግሞ በውስጡ የተፈጸሙ ታሪኮች ፣ ጥበብና ትንቢት ያሉበት የመጻሕፍት መዝገብ ነው ። በዚህ አካሄድ ስናየው የማቴዎስ ወንጌል ምዕራፍ አንድ መላው ብሉይ ኪዳንን ይተርካል ማለት ነው ።
ቅዱስ ማቴዎስ ወንጌሉን መጻፍ ሲጀምር፡- “የዳዊት ልጅ የአብርሃም ልጅ የኢየሱስ ክርስቶስ ትውልድ መጽሐፍ” በማለት ነው ። ይህ ሦስት ነገሮችን ያስገነዝበናል ። የመጀመሪያ እግዚአብሔር መጻሕፍትን ያከብራል ። የአገራችን ሊቃውንትም “በቃል ያለ ይረሳል ፣ በመጽሐፍ ያለ ይወረሳል” ይላሉ ። መጽሐፍ እውቀትን ቋሚ ያደርጋል ፣ ደግሞም የሰውን የመርሳት ጠባይ ያግዛል ፣ ከዚህ በላይ ለትውልድ ማውረስ የሚገባን መጽሐፍን ነው ። ሁለተኛው ቅዱስ ማቴዎስ ወንጌሉን እንዲህ ብሎ መጀመሩ ጌታችን በሰው የትውልድ ሐረግ ውስጥ ገብቶ መቆጠሩን የአይሁድም የሮማውያንም የሕዝብ ቆጠራ መጽሐፍ እንዳወቀው ያስረዳል ። ሉቃስ በሮማውያን የዓለም አቀፍ መዝገብ ላይ ጌታችን እንደ ተቆጠረ ሲገልጥ ማቴዎስ ደግሞ በአይሁዳውያን የእምነት መዝገብ ላይ እንደ ተቆጠረ ያስረዳል ። ታሪካችን ውስጥ ክርስቶስ በመግባቱ  በአዳም ረክሶ የነበረው ታሪካችን እንደገና ተቀደሰ ። ቅዱስ ማቴዎስ ከአብርሃም መጀመር ሲገባው የዳዊት ልጅ ብሎ መጀመሩ ሌላው አስደናቂ ነገር ነው ። ጻድቁ አብርሃም ከዳዊት ስምንት መቶ ዓመት ርቆ የነበረ ነው ። ማቴዎስ ግን የዳዊት ልጅ የአብርሃም ልጅ በማለት መጻፍ ጀመረ ።
የዳዊት ልጅ በማለት መጻፍ የጀመረው ለምንድነው ስንል የማቴዎስ ወንጌል ስለ ክርስቶስ ዘላለማዊ መንግሥት የሚናገር መጽሐፍ ነው ። በዚህም የአንድ ንጉሥ መገለጫዎች በእያንዳንዱ ምዕራፍ ተጠቅሷል ። አንድ ንጉሥ ትውልደ ሐረገ አለው ። ጌታችንም ትውልደ ሐረጉ ተጠቅሷል ። የይሁዳ ነገድ ንጉሥ የሚወጣበት ዘር ነው ። ጌታችንም ከይሁዳ ነገድ ተወልዷል ። ንጉሥ ሲወለድ ነገሥታት ደስታቸውን ይገልጻሉ ፤ ጌታችን ሲወለድ ሰብአ ሰገል ደስታቸውን ለመግለጥ መጥተዋል ። ንጉሥ መንገድ ጠራጊ አለው ፤ መጥምቁ ዮሐንስም የጌታችን መንገድ ጠራጊ ነው ። ንጉሥ አዋጅ አለው ፣ የሸፈተን በሰላም ግባ ይላል ፤ ጌታችንም ንስሐ ግቡ ብሎ የኃጢአት ሽፍቶችን ጠርቷል ። ንጉሥ ሕገ መንግሥት አለው ። ጌታችንም በተራራው ስብከቱን የመንግሥቱን መርሕ ገልጧል ። ንጉሥ እስረኞችን ይፈታል ። ጌታችንም በደዌና በአጋንንት እንዲሁም በኃጢአት የታሰሩትን ፈትቷል ። … ንጉሥ ተተኪውን ያሳውቃል ፣ ጌታም ደቀ መዛሙርትን ሹሟል ። ስለዚህ ስለ ንጉሡና ስለ መንግሥቱ ጠባይዐት የሚናገረው የማቴዎስ ወንጌል የዳዊት ልጅ በማለት መጀመሩ ትክክል ነው ።
የትውልድ መጽሐፉ ብዙ ስሞችን ዘርዝሮ ክርስቶስን ሲያገኝ ያበቃል ። ክርስቶስ የመላው ብሉይ ኪዳን ፍለጋ ማብቂያ ነው ። የእርካታም ጥጉ ነው ። በትውልድ መጽሐፉ ውስጥ ብዙ ስህተት የፈጸሙ ሰዎች ተጠቅሰዋል ። ለምሳሌ ዳዊት ከቤርሳቤህ ሰሎሞንን ወለደ ይላል ። ይህ የዳዊት የውድቀት ታሪኩ ነው ። እነዚህ ሁሉ ድካሞች ቢኖሩም ክርስቶስ ግን ሁሉን ይቀድሳል ። የትውልድ መጽሐፉ ውስጥ ጻድቃን ፣ ደካሞች ፣ ጸጋ የጋረዳቸው ሰዎች አሉ ። ከሁሉ በላይ ግን ሁሉን የሚቀድሰው ክርስቶስ ተወስቷል ።
የትውልድ መጽሐፍ መልካምም ክፉም ያደረገ ይሰፍርበታል ። ደጉም ሆነ ክፉው ታሪክ ትምህርት እንጂ መብል አይሆንም ። ታሪክ በደግነቱም በክፋቱም ያስተምራል ። ታሪክ ላይ ቆይቶ መጣላት ግን አመድ ላይ መንከባለል ነው ። እኛም በታሪክ ፊት ነንና በጎ ልንሠራ ይገባናል ። የታሪክ ባለቤት ሕዝብ ነው እንላለን ፣ የታሪክ ባለቤት ግን እግዚአብሔር እንደሆነ ማቴዎስ ይነግረናል ።
ዛሬም እየተጓዘ ያለው የትውልድ ሐረግ ክርስቶስ ዳግመኛ ሲመጣ ይቆማል ። በሰማይም ዝና ፣ ባለጠግነት ፣ ዘር ፣ ጎሣ አይቀጥልም ። በሰማይ የሚቀጥለው በሥላሴ ማመን ብቻ ነው ።
አቤቱ የልቡና ጆሮአችንን ክፈትልን አንተን ብቻ እንሰማ ዘንድ ።

ያጋሩ

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።