የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

የአሳብ ውጊያ/9

6- ያለ መፈለግ ስሜት

የአሳብ ውጊያ ከሚያመጡ ነገሮች አንዱ ያለ መፈለግ ስሜት ነው ። ያለ መፈለግ ስሜት በተለያየ መንገድ ሊመጣ ይችላል ። አንዳንድ ሰዎች ከመሬት ተነሥተው “ሁሉ ሰው አይወደኝም ፣ ማንም አይፈልገኝም” የሚል ስሜት ውስጥ ይገባሉ ። እነዚህ ሰዎች የመሰላቸውን ነገር ከእውነቱ ለመለየት ጊዜ ያጣሉ ። ለራስ በማዘን ራሳቸውን የተንከባከቡ ይመስላቸዋል ፤ ለራስ ማዘን ደስ የሚል ስሜት ያለው ሲሆን ቆይቶ ግን ባዶነት እንዲወረን ያደርጋል ። አንዳንድ ሰዎችም የሌሎችን ኀዘኔታ በመናፈቅ ወላጅ እያላቸው የለኝም ፣ ወገን እያላቸው ምንም ዘመድ የለኝም በማለት ይናገራሉ ። ብዙ ጊዜ ስለሚናገሩት ይህን ነገር እያመኑት ይመጣሉ ። ይልቁንም በቤተሰቤ አድልኦ ተደርጎብኛል ብለው የሚያስቡ ሰዎች በዚህ ንግግር ይጠመዳሉ ።

ያለ መፈለግ ስሜት በሚያምኗቸው ሰዎች በመከዳት የሚመጣ ነው ። በሕይወት ውስጥ ዛሬ አብረውን ያሉ ሰዎች ነገ ባሻገር ቆመው ሊተኩሱ ይችላሉና ያንን መጠበቅ መልካም ነው ። የዓለም መልኳ ፍቅር ብቻ ሳይሆን ጥላቻም ነው ። የሰው ልጅ በኃጢአት ወደቀ ስንል ከፍቅር ወደቀ ማለታችን ነውና ከዚያን ጊዜ ጀምሮ የወረት ባሪያ ሁኗል ። ወረት ያልበደሉንን ሰዎች መሸሽ ነው ። ወረተኞች ሌላውን የሚጎዱ ብቻ ሳይሆን ራሳቸውም ይጎዳሉ ። የሚፈልገንን የምንሸሽበት ዓለም ቢሆንም የፈለግነውም የሚሸሸን ዓለም ውስጥ ነን ። እዚያ የምናጭደው እዚህ የዘራነውን ነው ። አንዳንድ ሰው በመጀመሪያ ትዳሩ የዘራውን በሁለተኛው ትዳሩ ያጭደዋል ። ሰው ቅድሚያ መውደድ የነበረበት የሚወደውን ሰው ነው ። የጨበጠውን ጥሎ የሄደውን ነፋስ ለመጨበጥ ይሮጣል ።

ያለ መፈለግ ስሜት የትዳር ጓደኛ ሌላ ኑሮ ሲጀምር የሚጫጫን ስሜት ነው ። ቃል ኪዳኑን ውኃ ሲበላው ፣ በድህነት የቆየው ፍቅር በበረከት ሲፈርስ ብዙዎች ግራ ይጋባሉ ። አንዳንድ ዘማ የሆኑ ሰዎች ቤቱን ጥለው ይሄዳሉ ። ሌሎቹ ግን በቤት ውስጥ ያለውን የትዳር ጓድ እንደሌለ ቆጥረው በድፍረት ዘማነታቸውን ይቀጥላሉ ። ቤት የያዘውን ምሥጢር እግዚአብሔርና የሃይማኖት አባቶች ከድነውት እንጂ ብዙ ዘግናኝ ታሪክ አለ ። ያለ መፈለግ ስሜት የትዳር ጓዶችን ካለመረዳት ይመጣል ። በትዳር ውስጥ የሚታየው የጠባይ ለውጥ ሁልጊዜ ወረት አይደለም ፣ የአእምሮ ጭንቀትም ይሆናል ። የትዳር አንድነት ግላዊ ማንነትን የሚያስቀር አይደለም ። ያ ሰው ትዳሩ ጥሩ ቢሆንም ሕይወት ግን ለእርሱ ጦርነት ሁናበት ይሆናል ። ትዳር ፣ የትዳር ጥያቄ መልስ እንጂ የሁሉም ነገሮች መልስ አይደለም ። ራሱን ማራቅ ፣ መነጫነጭ ፣ መቆጣት የጀመረ የትዳር አካል ካለ እኔ ስላልተፈለግሁ ነው ከማለት ያልተፈታ ጠብ ወይም የሚያልፍበት የሕይወት ውጣ ውረድ እንዳለ ማሰብ ተገቢ ነው ። ምንጩ ካልተገኘ ፈውሱ ይዘገያል ።

የጎረቤት ሰው ሰላም ሳይለን ቢያልፍ “ልብ አላለኝም” እንላለን ፣ ሲቆጣን “የተናደደበት ነገር ቢኖር ነው” እንላለን ። ጠባዩ ሲለወጥ ኑሮው አልተመቸው ይሆናል ፣ ይለፍለት” ብለን ጊዜ እንሰጠዋለን
። ይህንን ቅንነት ግን ለትዳር ጓዳችን አለማሳየታችን የሚገርም ነው ። ብዙ ኑሮ እየተናጋ ያለው ከምናይበት መነጽር እንጂ የእኛ የትዳር ጓዶች ክፉ ሁነው አይደለም ። እንደውም የተሻሉ ናቸው ።

ያለ መፈለግ ስሜት ልጆች የራሳቸውን ኑሮ መኖር ሲጀምሩ የሚከሰትም ነው ። ልጆች ከቤት ወጥተው ወደ ትምህርት ተቋማት እንደገቡ በገጠማቸው ዓለም ግር በመሰኘት አሊያም አዲሱን ዓለም ባለመጥገብ ወላጆቻቸውን ፍጹም ይረሳሉ ። ወላጆቻቸው ትዝ የሚሏቸው ገንዘባቸው ማለቅ ሲጀምር ነው ። በዚህ ጊዜ ወላጆች “ልጄ እንኳ ተወኝ ፣ አሳድጌ ስልክ ለማንሣት እንኳ ተፈተነ” በሚል ያለ መፈለግ ስሜት ውስጥ ይገባሉ ። “ትምህርትህን ይግለጽልህ” ብለን የመረቅነው ኮሌጅ ሲገባ ፣ “አግባ ፣ አግባ” ያልነው ሲያገባ ታግሦ ማለፍ እንጂ መልሶ መራገም ጥቅም የለውም ። ልጆች የወላጆችን ፍቅር መገንዘብ የሚጀምሩት ወላጆች ለቀቅ ሲያደርጓቸው ነው ። ልጅ ጥላ ነው፣ ሲከተሉት ይሸሻል ፣ ሲሸሹት ይከተላል ። ብዙ ጊዜ የግዴለሽ ልጆች ወላጆቻቸውን በጣም ይወዳሉ ።

ያለ መፈለግ ስሜት ለመጠናናት ብለው የጀመሩት ጓደኝነት ሲፈርስ ሊመጣ ይችላል ። የመጠናናት ወቅት ጊዜን እንጂ ሌላ ነገርን የሚካፈሉበት አይደለም ። በቅጡ ካሳለፉ ሲለያዩም ያን ያህል አይከብድም ። መላመድ ፍቅር እየመሰለ ያደናግራል ። በእጮኝነት ጊዜ የሄደው ሰው ጊዜን አትርፏል ። በትዳር ሰዓት ቢሄድስ ? ብሎ ማሰብ ያጽናናል ። ያለ መፈለግ ስሜት ዕድሜ ሲገፋ ፣ የሞቀው ቤት ጭር ሲል ፣ ጉልበት ሲከዳ ፣ በሽታ ሲያጠቃ የሚመጣም ነው ። ይህ ስሜት ከፍተኛ የሆነ የአሳብ ውጊያ ያመጣል ። ሰዎች ፈልገውን ቢመጡ ቀበሌ አቋርጠው ነው ። ከሰማየ ሰማያት ወርዶ ከድንግል ተወልዶ የፈለገን ወዳጅ አለን ። ሰዎች የከበቡን በመሰለን ሰዓትም የነበረው ፣ ዛሬም ጭር ሲል ያለው አማኑኤል ብቻ ነው ። የስሙ ትርጓሜ እግዚአብሔር ምስሌነ – እግዚአብሔር ከእኛ ጋር ነው የሚል ነው ።

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።