ክርስቶስ ይበልጣል

                                              /ዮሐ. 4፥12/ ።

ሳምራዊቷ ሴት፡- “ጌታ ሆይ፥ መቅጃ የለህም ጕድጓዱም ጥልቅ ነው፤ እንግዲህ የሕይወት ውኃ ከወዴት ታገኛለህ?” ካለችው በኋላ “በእውኑ አንተ ይህን ጕድጓድ ከሰጠን ከአባታችን ከያዕቆብ ትበልጣለህን ?” አለችው ። በርግጥም ጕድጓዱ ጥልቅ ነው ። ወደ ጥልቁ ጕድጓድ ረጅም ገመድ ቢያንስ 32 ሜትር ገመድ መወርወር ይጠይቃል ። ገመዱ ጫፍ ላይ መጎተት እንደሚችለው ሰው አቅም መጠን መቅጃ ይታሰራል ። ገመዱ ባጠረ ቊጥር የሚቀዳው ሰው በርከክ ብሎ ግማሽ አካሉን ወይም እስከ ወገቡ ወደ ጕድጓዱ ገብቶ መቅዳት አለበት ። መቅጃው ሦስት ሊትር የሚይዝ ከሆነ ሃያ ሊትር ለሚይዘው እንስራ ሰባት ጊዜ መመላለስ ይጠይቃል ። ከዚያም የጕድጓዱን አፍ በትልቅ ድንጋይ ገጥሞ መሄድ ያስፈልጋል ። የጕድጓድ ውኃ አድካሚ ፣ አስፈሪ ነው ። ብዙ ጊዜ መቅጃው እዚያው ጕድጓዱ አጠገብ የሚቀመጥ የጋራ ንብረት ነው ። በኅብረት ከቀዱ በኋላ ይዘውት ሊሄዱም ይችላሉ ። ስለዚህ ሳምራዊቷ ሴት መቅጃ የለህም ስትለው ሳምራውያን ከሚጠቀሙበት ከዚህ መቅጃ ለመጠቀም እንዴት ትችላለህ ? ዘር የለየንን ውኃ እንዴት አንድ ያደርገናል ? የሚል አስተሳሰብ የያዘች ይመስላል ። መቅጃው የእርስዋ ከሆነ ደግሞ እኔ ሳምራዊ በመሆኔ ከአይሁዳውያን ፣ የተገፋሁ በመሆኑ ከሳምራውያን በእኔ ዕቃ የሚጠቀም የለም አንተ እንዴት ጠየቅከኝ ? የሚል አስተሳሰብ ሳትይዝ አልቀረችም ። ጌታችን ግን ከጕድጓዱ ውኃ ወደ ሕይወት ውኃ ፣ ከሆድ ውኃ ወደ ነፍስ ውኃ ፣ ከግዙፍ ውኃ ወደ መንፈሳዊ ውኃ ከፍ ሊያደርጋት ፈለገ ። የረካች ነፍስ ያልረካች ሥጋን መሸከም ትችላለችና ። እርሱ መቅጃ አያስፈልገውም ። ራሱ የሕይወት ውኃ ነው ። እርሱ ግን የጕድጓድ ውኃ ሳይሆን የምንጭ ውኃ ነው ።

የጕድጓድ ውኃ የሰው መልካምነት ምሳሌ ነው ፣ የምንጩ ውኃ ግን የክርስቶስ ሕይወትነት ምሳሌ ነው ።

  አዎ እርሱ የምንጩ ውኃ ነው ። መቅጃ የማያስፈልገው ራሱ እርካታ ነው ። ሰው ባጠለቀው የማያጠልቅ የራሱ ፈቃድ ያለው አምላክ ነው ። የያዕቆብ ውኃ መልሶ ያስጠማልና ነገ በዚህ ሰዓት መመለስ ያሻል ፣ የአሮን መሥዋዕት ኃጢአትን ቢያዳፍን እንጂ አያጠፋምና ለሚቀጥለው ዓመትም ቀጠሮ ይያዛል ። ክርስቶስ ግን አንድ ጊዜ ለሁሌውም የሚበቃ ነው ። እርሱ አንድ የአብ ልጅ ፣ አንድ የማርያም ልጅ ፣ አንድ የነቢያት ተስፋ ፣ አንድ የሐዋርያት ስብከት ፣ አንድ የሰማዕታት መዓዛ ፣ አንድ የሕይወት ውኃ ፣ አንድ መሥዋዕት  ነው ።

 ሳምራዊቷ ሴት ፡- “በእውኑ አንተ ይህን ጕድጓድ ከሰጠን ከአባታችን ከያዕቆብ ትበልጣለህን? ራሱም ልጆቹም ከብቶቹም ከዚህ ጠጥተዋል አለችው”                                     /ዮሐ. 4፥12/ ። ይህንን የመብለጥ ጥያቄ ያነሣችው ክርስቶስ እሰጣለሁ ያለው ውኃ የዘላለም የሕይወት ውኃ ስለነበረ ነው ። የዘላለም ሕይወት ውኃን ከጕድጓድ ውኃ ለይታ ተገንዝባለች ። በርግጥም ጌታችን ከያዕቆብ ይበልጣል። ያዕቆብ በተስፋ የተጽናናበት የዘላለሙ ጌታ ነው ። ይህች ሴት ክርስቶስን ከያዕቆብ ጋር አነጻጸረችው ። የሚነጻጻር በእኩያነት የሚቆም ነው። ክርስቶስ ግን ከሁሉ በላይ ነው ። ይህ አስተሳሰብ የገላትያ ክርስቲያኖችን እንዲሁም የዕብራውያን ክርስቲያኖችን ገጥሟቸው ነበር ። የገላትያ መልእክት ወንጌል ያለ ኦሪት ፣ ጥምቀት ያለ ግዝረት ፣ ክርስቶስ ያለ ሙሴ ሙሉ አይደለም ለሚሉ ወገኖች የተጻፈ ነው ። የዕብራውያን መልእክት ደግሞ ክርስቶስን ፡- ቃሉ ከመጣላቸው ከነቢያት ፣ ቃሉን ካገለገሉ ከመላእክት ፣ ቃሉን ከሰማ ከሙሴ ፣ ርስትን ካካፈለ ከኢያሱ ፣ መሥዋዕት ካቀረበ ከአሮን ጋር አነጻጽረው ነበርና ክርስቶስ የሁሉ የበላይ መሆኑን ለማስረዳት የተጻፈ ነው ። ብልጫነቱም፡-

 ሳምራዊቷ ሴት ክርስቶስን ከያዕቆብ ጋር አነጻጸረችው ። የገላትያ ሰዎች ክርስቶስ ብቻውን ሙሉ አይደለም አሉ ። የዕብራውያን ሰዎችም ከቃሉ አገልጋዮች ጋር አነጻጸሩት ። አዎ ክርስቶስ ይበልጣል ።

 ዛሬም የራሳቸው ትልቅ ፣ የራሳቸው ጀግና ፣ የራሳቸው የርእዮተ ዓለም አራማጅ … ያላቸው ክርስቶስን ያነጻጽሩታል ። ለእኔ ክርስቶስ ከቼኩቬራ አይበልጥም ብለው የተናገሩ ነበሩ ። በአፋቸው ያቃለሉት ፣ በልባቸውም የሚያቃልሉት አያሌ ቢሆኑም ሁሉን አሳልፎ ነዋሪ የሆነው እርሱ ግን ይበልጣል ።

 ጌታችን ሳምራዊቷ ሴት ትበልጣለህን ? ስትለው አዎን አላላትም ። አዎን ቢላት ምናልባት ዘራፍ ብላ ትሄድ ይሆናል ። መንገድ ላይ በብስጭት እየተናገረች ስትሄድም ለሚጠይቃት ሁሉ ከያዕቆብ እበልጣለሁ አለኝ በማለት ጉድ ባይ ሰዎች ታሰባስብ ነበር ። ጌታ ግን በሚቀጥለው ምላሽ ሸኛት ።