የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

ለምናውቀው እንሰግዳለን

“እናንተስ ለማታውቁት ትሰግዳላችሁ፤ እኛ መዳን ከአይሁድ ነውና ለምናውቀው እንሰግዳለን” /ዮሐ. 4፥22/ ።
ጌታችን ለሳምራዊቷ ሴት ጥያቄ መልስ እየሰጠ ነው ። ስግደትን ብቁ የሚያደርገው ደብረ ገሪዛን ወይም ኢየሩሳሌም ሳይሆን አዳኙን በማወቅ ሲቀርብ ነው ። ጌታችን ለማታውቁት ትሰግዳላችሁ አላት ። ለባዕድ አምልኮ ትሰግዳላችሁ ማለቱ አይደለም ። የሰማይን አምላክ ልታውቁት በሚገባችሁ መጠን አላወቃችሁትም ማለቱ ነው ። ካላወቃችሁት ማን ብላችሁ ታመልኩታላችሁ ? ማለቱ ነው ። እነዚህ ሳምራውያን ብሉይ ኪዳንን በሙሉነት አይቀበሉም ። ስለዚህ ስለ እግዚአብሔርና ስለ መሢሑ ያላቸው እውቀት የተሟላ አይደለም ። ለአይሁዳውያን ጥላቻ ቢኖራቸውም መሢሑ ግን የሚመጣው ከአይሁድ ወገን ወይም ከይሁዳ ነገድ መሆኑን ነገራት ። ለአይሁዳውያን ያላቸው ጥላቻ መሢሑን እንዳይቀበሉ እንቅፋት እንዳይሆን አስጠነቀቃት ። ከአይሁድ ከሆነ ምንም አንቀበልም የሚል አሳብ ውስጥ ከገቡ መዳናቸውን እንደሚያጡ ነገራት ። ለመቀበል የተዘጋጀነው ከምንወዳቸው የሚመጣውን ብቻ ከሆነ የሚያመልጡን ብዙ ነገሮች አሉ ። ከምንጠላቸው ውስጥም ለእኛ የሚሆን ብዙ ክቡር ነገር አለ ። አንድን ሰው ማክበር እግዚአብሔር በእርሱ ውስጥ ያስቀመጠውን ጸጋ ማክበር ነው ። ከጸጋ የመከነ ባዶ ፣ ከቸርነትንም የነጠፈ ደረቅ የለም ። ሙሉ በሙሉ ደግ የለም መልአክ ካልሆነ ፣ ሙሉ በሙሉ ክፉ የለም ሰይጣን ካልሆነ ።
የእግዚአብሔርን ቃል ማንበብ የእግዚአብሔርን ቃል ማወቅ አይደለም። የእግዚአብሔርን ቃል በማንበብ ብቻ እናስተምራለን ማለት አይደለም ።የእግዚአብሔርን ቃል ከብሉይ ከአዲስ በሙሉነት ካላወቅን አስተማሪ መሆኑ ከባድ ሊሆን ይችላል ። አሊያ ቀጣይ ዘመናችንን የምናባክነው እኛው ያበላሸነውን ስናስተካከል ነው ። ለእርሱም ዕድሜአችን ከበቃን መልካም ነው። በዚህ ምክንያት እግዚአብሔር በእኛ ውስጥ ያስቀመጠውን ከግብ ሳናደርስ እንቀራለን ። ስንሳሳት የደገፈን ሕዝብ ስንታረም ሊጠላን ይችላል ። መሳሳታችንን የታገሠ ማወቃችንን መቃወም ይጀምራል ። የዚህ ችግሩ መሠረትን ሳያጠብቁ የአገልግሎትን ሕንጻ መገንባት ነው ። አስፈሪ ዘመን ማለት ሊቅ የበዛበትና ሁሉም ካልተናገረ የሚሞት የመሰለው ዘመን ነው ። ዘመነ ጆሮ ቀርቶ ዘመነ አፍ ብቻ ከሆነ ስህተት እየበዛ ይመጣል ። ምነው ሁላችንም ዝም ብለን እግዚአብሔር እንዲናገር ፣ አባቶች እንዲናገሩ ዕድል በሰጠን ። በዚሁ ከቀጠልን እግዚአብሔር ያዘጋጀልንን ነጻ የትምህርት ዕድል እያበላሸን በክፍያ እንማራለን ። የሃይማኖት ነጻነት ባልነበረበት በደርግ ዘመን ሁለትና ሦስት እየሆኑ መጽሐፍ ቅዱስን ያጠኑ የነበሩ ሳያውቁት የየራሳቸውን ዶክትሪን በጓዳ መሥርተው ነበርና ነጻነት መጥቶ ሁሉም ወደ ደጅ ሲወጣ ይህ ሁሉ እምነት ተመሠረተ ። ቅዱስ ያዕቆብ ፡- “ወንድሞቼ ሆይ፥ ከእናንተ ብዙዎቹ አስተማሪዎች አይሁኑ፥ የባሰውን ፍርድ እንድንቀበል ታውቃላችሁና” ያለው ለዚህ ነው /ያዕ. 3፥1/ ። ዛሬ ማረም እስኪከብድ የኑፋቄ ትምህርት እንዲሁም ሐሰተኛ አሠራር እየሠለጠነ የመጣው በዚህ ምክንያት ነው ። እንኳን ሃይማኖቱ ፖለቲካውና ባሕላዊ እሴቱ ኦርቶዶክሳዊ ቅኝት ያስፈልገዋል ። ኦርቶዶክሳዊ የእውቀት ጎዳና አንድን አሳብ ከብሉይ ከአዲስ ፣ ከታሪክ ከዓለም አቀፍ ጉባዔያት ፣ እንዲሁም ጌታችን ብሉይን ከተረጎመበት ከወንጌል ፣ የጌታችንን ቃል ካብራሩት ከሐዋርያት መልእክታት ፣ የሐዋርያትን መልእክታት ከተረዱበት ሐዋርያነ አበው አስተምሮ በመነሣት የሚተረጉም ነው ። በዚህም እያንዳንዱ ጥቅስ ነገረ መለኮታዊ ፋይዳና ጥበቃ ያገኛል ። ከእግዚአብሔር ህልውናና ክብር ጋር ይዛመዳል ። የአባቶችን ዐሠረ ፍኖት ይከተላል ። ኦርቶዶክሳዊ እውቀት ማለት የእግዚአብሔርን ቃል በቋንቋ ፣ በባሕል ፣ በማኅበራዊ ግንኙነት መተርጎምና ማግዘፍ ነው ። በራሳቸው ሮጠው የደከማቸው ሁሉ ወደዚህ አስተሳሰብ እየመጡ እንደሆነ በመላው ዓለም እያየን ነው ። በእውነት ከመጠምጠም ትምህርት ይቅደም የተባለው ትክክል ነው ። አንድ አባትም ፡- “ላልተማረ ሰው ሥልጣን መስጠት ለእብድ ሰይፍ መስጠት ነው” ብለዋል ።
እግዚአብሔርን ለማምለክ እውቀት አስፈላጊ ነው ። እውቀት በመንፈሳዊ ዓለም መሠረት ነው ። በራሱ ፍጻሜ ባይሆንም የፍጻሜ መልካም መነሻ ነው ። እውቀት ለእምነት አስፈላጊ ነው ። ምክንያቱም እምነት የሚመጣው የእግዚአብሔርን ቃል ሰምቶ ምላሽ በመስጠት ነውና /ሮሜ. 10፥17/ ። እውቀት ከዘላለም ሕይወት ጋርም የተያያዘ ነው /ዮሐ. 17፥3/ ። እውነተኛ አምላክ የሆነውን አብን የላከውንም ልጁን ኢየሱስ ክርስቶስን ማወቅ እርሱ የዘላለም ሕይወት ነው ። ለእግዚአብሔር እውነተኛ ስግደትን ለማቅረብም እውቀት አስፈላጊ ነው /ዮሐ. 4፥22/ ። ለአምልኮ እውቀት አስፈላጊ ከሆነ ለመስበክና ቤተ ክርስቲያንን ለማስተዳደር የበለጠ እውቀት አስፈላጊ ነው ። ሰው በግሉ ለሚፈጽመው ስግደት እውቀት አስፈላጊ ከሆነ ሌሎችን ለመምራት የበለጠ ያስፈልገዋል ። እውቀትን በሚጠሉና እውቀትን መጨረሻ ባደረጉ ወገኖች ይህች ዓለም ተረብሻለች ። እንደ ጥንቱ ዛሬም በሰዱቃውያንና በፈሪሳውያን የእግዚአብሔር መንግሥት ትሞገታለች ። ፈሪሳውያን ሥርዓትን ያለ ፍቅር የያዙ ፣ ሰዱቃውያን ፍቅርን ያለ ሥርዓት የያዙ ናቸው ። ፈሪሳውያን ወግ አጥባቂ ናቸው ፣ ሰዱቃውያን ደግሞ ዘመናውያን ናቸው ። ፈሪሳውያን ንባብ ላይ ያተኩራሉ ፣ ሰዱቃውያን ሌሎችን መርዳት ላይ ጊዜ ይሰጣሉ ። ዓለም በአክራሪዎችና በንዝህላሎች ተጨንቃለች ። እውቀት ግን ከሁለቱም መልካሙን በመውሰድ ለእግዚአብሔር ክብር ያውለዋል ። የንጉሥ መንገድ ከመሐሉ ነውና።
አለቃ ለማ ኃይሉ ትልቅ ሊቅ ናቸው ። ትዝታቸውን ያሰፈረው ልጃቸው “ትዝታ ዘአለቃ ለማ” በሚለው መጽሐፍ የእውቀትን አስፈላጊነትና እውቀትን የሚጠሉ ሰዎችን ጉዳት እንዲህ ገልጸውታል ።
“ደጃች ኃይሉ የሸደሆ ገዥ ፣ ደጃች ወንዴ ደግሞ የመቄት ገዥ ነበሩ ። ደጃች ኃይሉ የተማሩ ሲሆኑ ደጃች ወንዴ ግን አልተማሩም ነበር ። ደጃሽ ከጣቢሽ የተባሉት ደግሞ ሁለቱንም ግዛቶች በአንድነት ይገዙ ስለነበር የሁለቱም ደጃቾች የበላይ ነበሩ ። ሁለቱ ደጃቾች ወደ ደጃች ከጣቢሽ ይሄዳሉ ። ቤተ ክርስቲያኑ ጊዮርጊስ ነው ። ሁለቱም በቤተ ክርስቲያን ተገኝተው ይጸልያሉ ። ደጃች ኃይሉ ዳዊት አውጥተው ይደግማሉ ። መልኩንና ይህን የመሰለውን ሁሉ በመጽሐፍ ይደግማሉ። ደጃች ወንዴ ደግሞ ትምህርት የሌላቸው ናቸውና “ቅዱስ ጊዮርጊስ የአባቴ አምላክ ! ፈጥረህ የት ትጥለኛለህ? እያሉ ያለ መጽሐፍ በቃል ይጸልያሉ ። በኋላ ሁለቱም ተያይዘው ደጃች ከጣቢሽ ወዳሉበት ይወጣሉ ። ከዚያ ደጃች ወንዴ ፡- “ደጃች ኃይሉ፣ መማር ለምን ይበጃል? “አሉ ። ተንኮለኛ ነህ ለማለት ነው ። ደጃች ኃይሉም፡- “ቅዱስ ጊዮርጊስ ፈጣሪዬ! ከማለት ያድናል” ሲሉ መለሱላቸው ይባላል።
 እውቀት እንደሚያሳስት ተደርጎ ይታሰባል ። በርግጥ ያልተማሩ ማለት የማያነቡ የማይጽፉ ማለት አይደለም ። መሐይም የሚባሉ መማር የማይፈልጉና አለማወቃቸውን ሳያፍሩበት እንደ እውቀት የሚናገሩ ናቸው ። ሰው በትክክል ሲያውቅ ለእግዚአብሔር ክብር ይሰጣል ። ብዙ ጊዜ እንደምናየው በጣም የተማሩ ሰዎች ዝቅ የሚሉ ትሑታን ናቸው ። ምክንያቱም በጣም ባወቁ ቊጥር የማያውቁት እየበዛባቸው ይመጣልና እውቀታቸው ሰበር ያደርጋቸዋል ። ፍሬ ያለው አገዳ ዘንበል ይላል ። ቀጥ ብሎ የሚቆመው ፍሬ የሌለው አገዳ ብቻ ነው ።
ጌታችን ፡- “እናንተስ ለማታውቁት ትሰግዳላችሁ፤ እኛ መዳን ከአይሁድ ነውና ለምናውቀው እንሰግዳለን” አለ /ዮሐ. 4፥22/ ። እርሱ አዳኝ የማያስፈልገው አዳኝ ፣ ስግደት ተቀባይ የባሕርይ አምላክ ሳለ ራሱን ዝቅ አድርጎ በሚድኑት ሰልፍ ውስጥ ተቀላቅሎ እኛ መዳን ከአይሁድ ነውና ለምናውቀው እንሰግዳለን አለ ። ራሱን በዚያች ሴት የእውቀት መጠን ዝቅ አድርጎ እያስተማራት ነው ። ሕጻናት ምንናገረውን በትክክል እንዲገነዘቡ ቀመን ልናወራቸው አይገባም ። ተንጠራርተው እያዩን መጨነቅ እንጂ ትምህርት አይዙም ። በርከክ ብለን በእነርሱ ቁመት ልክ ሆነን ስንነነግራቸው ግን ይሰሙናል ። በደረስንበት የእውቀት ቁመት ልክ ቆመን ብንናገር የሚሰማን የለም ። አድማጮቹ ባሉበት የእውቀት መጠን ዝቅ ማለት ያስፈልገናል ። ለምንናገረው ነገር ባዕድ ሳይሆን ተሳታፊ ስንሆን ንግግራችን ጽኑ ይሆናል ። የንግግር ማኅተሙ ተግባር ነውና ።
የብሉይና የአዲስ ትምህርት በምሳሌ ላይ የተመሠረተ ነው ። ምክንያቱም እግዚአብሔር ሰዎች እንዲያውቁት በሰዎች ደረጃ ስለሚያስተምር ነው ። ተረቶችና ምሳሌዎችን ብዙ ሰዎች ይንቃሉ ። በዓለም ላይ ከባዱ ተረት ማዘጋጀት ነው ። በሕጻናት አእምሮ ወርዶ መሥራት ይጠይቃል ። ቅዱስ ማቴዎስ ፡- “በምሳሌ አፌን እከፍታለሁ ፥ ዓለም ከተፈጠረ ጀምሮ የተሰወረውን እናገራለሁ የተባለው ይፈጸም ዘንድ ያለ ምሳሌ አልተናገራቸውም”ይላል /ማቴ. 13፥34/ ። ታዲያ እኛ ከጌታችን እንበልጣለን ወይ ?
በዓለም ላይ ብዙ እውቀቶች አሉ ። አዳኙን ማወቅ ግን ከፍ ያለ እውቀት ነው ። አዳኛችን የኢየሱስ ክርስቶስ ነው ። ገድሎ ሳይሆን ሞቶ ፣ ብርና ወርቅ ከፍሎ ሳይሆን ወርቀ ደሙን አፍስሶ የታደገን እርሱ ነው ። በባሕር ላይ ዘራፊዎች ፣ በበረሃ ሽፍቶች የታገቱ ሰዎች ያለባቸው ሰቆቃ ከባድ ነው ። ሞትን አንድ ጊዜ ሳይሆን ብዙ ጊዜ ያዩታል ። ታዲያ ዓለም አቀፍ አደራዳሪዎች አሉ ። በመንግሥታቱና በሽፍቶቹ መካከል ገብተው የታገቱትን ሰዎች በክፍያ ያስለቅቃሉ ። በሕይወት መንገድ ላይ የታገትነውን ፣ ሽፍታው ሰይጣን የያዘንን ፤ የገዛ የጽድቅ ባሕርዩን አርክቶ ያዳነን ጌታችን ኢየሱስ ክርስቶስ ነው ። እውነተኛ አምልኮ ጌታችን ኢየሱስ ክርስቶስን በማወቅ ይጀምራል ። ጸሎቱ ፣ ምስጋናው ፣ ምልጃው ሁሉ በአሐዱ ወልድከ ማለት በአንድ ልጅህ በኢየሱስ ክርስቶስ የሚል ነው ።

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።