የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

እውነተኛ አምልኮ

“ነገር ግን በእውነት የሚሰግዱ ለአብ በመንፈስና በእውነት የሚሰግዱበት ጊዜ ይመጣል አሁንም ሆኖአል፤ አብ ሊሰግዱለት እንደ እነዚህ ያሉትን ይሻልና” /ዮሐ. 4፥23/ ።
በደብረ ገሪዛንም ሆነ በኢየሩሳሌም ይቀርብ የነበረው ስግደት እውነተኛነት ይጎድለው ነበር ። ለእግዚአብሔር ልባቸውን ደብቀው መሥዋዕት የሚያቀርቡበት ፣ ፍቅርን ጥለው ወደ ፍቅር አምላክ የሚጸልዩበት ነበር ። አምልኮትን ከእውነት የሚለዩ ብዙ ነገሮች አሉ ። አምልኮ እውነተኛ ካልሆነ ለእውነተኛው አምላክ ሊቀርብ አይችልም ። እግዚአብሔር እውነተኛ ነውና እውነተኞችን ይወዳል ። እግዚአብሔር የሚወደው እውነት ኃጢአትን ያለመሥራት እውነት ብቻ ሳይሆን ኃጢአትን የማመን እውነትንም ነው ። እርሱ የሰውን ድካም የሚያውቅ አምላክ ነው ። ሰዎች ያለ እርሱ እርዳታ ደካሞች ፣ ሥጋቸውም ወደ ገዛ አገሩ ወደ ምድር የሚስባቸው እንደሆነ ያውቃል ። ኃጢአታቸውን አምነው የቅዱስ መንፈሱን እገዛ እንዲለምኑ ግን ይፈልጋል ። እውነትነት የሌለው አምልኮ ምን ዓይነት ነው ?
ያለ ፍቅር የሚደረግ አምልኮ
 እግዚአብሔር በፍቅራችን ደስ የሚለውን ያህል በመሥዋዕታችን ደስ አይለውም ። ፍቅርም ያለ እንቅፋት የሚጓዝ አይደለም ። መንገድን የሚያስረዝመው ድልድይ ነውና ፍቅርንም ቀጣይ የሚያደርገው ይቅርታ ነው። ስለዚህ ስንበድል ይቅርታ መጠየቅ ፣ ሲበድሉን ይቅርታ መስጠት ትልቅ አምልኮ ነው ። ሌሎች በእኛ ላይ ያላቸው ቅሬታ የአምልኮ መንገዳችንን ይዘጋል /ማቴ. 5፡23-25/ ። የምንጸልየውም ወደ ተዘጋ ሰማይ ነው ። ሰዎቹን ትንንሽ ብለን የምንንቃቸው ሊሆኑ ይችላሉ ። ትንንሾቹ ግን ትልቅ አምላክ እንዳላቸው ማወቅ አለብን ። እግዚአብሔር ለደካሞች ይዋጋል ፣ ለምስኪኖችም ይሟገታል ። ሰዎችን መንካት እግዚአብሔርን መንካት ነው።
ቅሬታውንም ትንሽ ነው ብለን ልንንቀው እንችላለን ። ሰዎቹን ካሳዘነ ግን ትልቅ ነው ። ቅሬታን መለካት ያለብን በእኛ ጥንካሬ መጠን ሳይሆን በሰዎቹ ጥንካሬ መጠን ነው ። ምናልባት የተናገርነውና ያደረግነው መልካም ነገር ክፉ መስሎአቸው ቅር ሊሰኙ ይችላሉ ። ያንንም አስረድተን ይቅርታ መጠየቅ ይገባል ። ለዓይንና ለፍቅር ትንሽ ይበቃዋል የሚባለውን ማሰብ አለብን ። ሰዎች ሲወዱን እንደ ፍጹም ሰው ያዩናል ። ስለዚህ መሳሳት አይችሉም ብለው ስለደመደሙ ትንሹ ስህተታችን ይጎላባቸዋል ። “አታስለምድ አታስቀር” ይባላል ። በአንዳንድ አገር ለሰዎቹ አንድ ነገር ካስለመድን ያንን የለመዱትን ሲያጡ ይጣሉናል ። ታዲያ ተጣላኝ ተብሎ ፖሊስ ጋ ሲኬድ ያስለመድከውን አድርግለት ብሎ ይመልሳል ። ምክንያቱም ያስለመድከውን በአንድ ጊዜ ስታቆም ጠብ ይመጣል ማለታቸው ነው ። ደግሞም በፈቃድህ ያስለመድከውን እንደ መብቱ ስላየው ነው የሚል ትርጉም ይሰጣሉ ። ወዳጅ ሲያረጅ በጓሮ ይሄዳል የሚባለው ለዚህ ነው ። ቅሬታን ከሚያስነሡ ነገሮች አንዱ ያስለመድነውን ማስቀረት ነው ። ደረጃ ያለው ግንኙነት ከጠብ ያድናል ።
   ይልቁንም በአንድነታችን የጋራ አምልኮ እናደርጋለን ። ቅዳሴ እናሳርጋለን ። ዝማሬ እናቀርባለን ። ምህላ እናደርሳለን ። ሥጋወደሙ እንቀበላለን ። እነዚህ ሁሉ ያለ ፍቅር ቅድመ እግዚአብሔር የሚደርሱ አይደሉም ። የማይዋሸውን አምላክ ለመዋሸት የሚደረጉ ጥረቶች ናቸው ። እግዚአብሔር ምን አደረጋችሁ ? ከማለት በፍቅር አደረጋችሁት ወይ ? ይለናል ። ይልቁንም የአዋጅ ጾም ስናደርግ ሦስት ነገሮችን ማድረግ ይገባናል።
1-  ርእስ መያዝ
2-  ይቅር መባባል
3-  ንስሐ መግባት
 ለአንድ አዋጅ ጾም ከሚያስፈልጉት ሦስት ነገሮች ሁለቱ ይቅርታ ናቸው ። ይልቁንም የማይቆጠረውን ኃጢአታችንን እግዚአብሔር ይቅር እያለ እኛ የሰዎችን የሚቆጠር ኃጢአት ይቅር ለማለት መቸገር የለብንም ። እግዚአብሔር በየቀኑ ይቅር እያለን እኛ ግን የሰዎችን ስህተት በሕይወት ዘመናችን አንድ ጊዜ ይቅር ለማለት እንቸገራለን ። ይቅርታ ማጣት ሰላማችንን ይጎዳል ። አምልኮአችንን ከንቱ ያደርገዋል ። በብዙ ችግር ውስጥ ሁነን መጸለይ እንችላለን ። በትንሽ ቅሬታ ውስጥ ሁነን ግን መጸለይ አንችልም ። ይቅርታ በማጣት በረከታችን ይያዛል ። የማገልገል ጉልበታችን ፣ የመስጠት እጃችን እየታሰረ ይመጣል ። ፍቅር የሌለው ማንኛውም መንፈሳዊ ተግባር ባዶ መሣሪያ እንደ መደገን ነው ። ባዶ መሣሪያ የደገነ ራሱም ይፈራል ። ምክንያቱም የደገነበት ሰው ቢይዘኝ የሚል ድንጋጤ አለው፤ የተደገነበትም ይፈራል ፣ ቢገድለኝስ የሚል ድንጋጤ ውስጥ ይገባል። ሁለቱም ግን ባዶ ናቸው ። ፍቅር የሌለበት የአገልግሎት ትጋት ፣ የጾም ጽናት ፣ የጸሎት ቁመት ዋጋው ያነሰ ነው ። እየጸለይን መልስ ፣ እየጾምን ምሕረት የማናገኘው በዚህ ችግር ነው ። በየቀኑ ስለ ዝሙትና ስርቆት አንወቀስም ። በየዕለቱ ይህ ስህተት አይገዛንምና ። በየዕለቱ ግን ከፍቅር ሳንጎድል አንቀርም ። አምልኮችንን ከመፈጸማችን በፊት ፍቅር እንዳለን ራሳችንን እንመርምር ። የበደልናቸውን ፣ ይጥፉ ብለን አዋጅ ያስነገርንባቸውን ይቅርታ መጠየቅ ያስፈልገናል ። ምክንያቱም መንፈሳዊ ነገር በመንፈሳዊነት እንጂ በጉልበት የሚፈጸም አይደለምና ። እግዚአብሔር ሊምረን ተሰናድቷል ። የምሕረት ደጁን መጽፋት ሲገባን የእኛን ደንዳና ልብ እርሱ እየጸፋ ነው ። ሊምረን ደጃችንን የሚያንኳኳ ፣ ሊፈውሰን ክፈቱልኝ የሚለው አምላክ ቀርቦአልና በፍቅርና በይቅርታ ልናመልከው ይገባናል ። ፍቅር የሚለውን ቃል ፊደሉን እንኳ ብንተነትነው የፍቅርን ባሕርይ ያሳየናል።
– ፍትሕ
– ቅንነት
– ርኅራኄ
ፍቅር ፍትሕ አላት ። ፍትሕ በራስም መፍረድ ነው ። እገሌን በድያለሁ ፣ ለጥቅሜ አድልቼ ወይም ይህን ላጣ እችላለሁ ብዬ ባልተጨበጠ ስህተት የተጨበጠ በቀል አድርሻለሁ ይቅርታ መጠየቅ አለብኝ ማለት ነው ። ለበረታ ጎበዝ ፣ ጊዜ ለሰጠው ደፋር ሳይሆን ለተጎዳ መፍረድም ከክርስቲያን የሚጠበቅ ነው ። እውነትን እውነት በማለት ብቻ ምድርን ከስቃይ እናተርፋለን ።
ፍቅር ቅንነት አላት ። ቅንነት ማለት አክሞ መስማት ፣ ነገሮችን በበጎ ማየት ፣ ከችግሩ ወራጅ ችግሩን የወለደውን ምንጭ ማጥናትና መፍትሔ ማፈላለግ ነው ። ሰውዬው ያንን ክፉ ነገር ለማድረግ አስተዳደጉ ፣ ትምህርቱ ፣ ሃይማኖቱ ፣ ልማዱ ያደረሱበት ተጽእኖ ምንድነው ? ብሎ ማሰብ እርሱ ቅንነት ነው ። ምክንያቱም ሰው ብቻውን በጎ ነገር ብቻውን ክፉ ነገር አይሠራምና ። አብረውት አስተዳደጉ ፣ ትምህርቱ ፣ ሃይማኖቱ ፣ ልማዱ አንዳንዴም ቅዱስ መንፈስና ርኩስ መንፈስ አብረውት አሉ ። ፍቅር ይህንን ታከናውናለች ።
ፍቅር ርኅራኄ አላት ። ሌሎችን ይቅር ለማለት ትፈልጋለች ። መንፈሳቸው በጠኔ የተያዙ ወይም ይቅርታ የተነፈጋቸው ራሳቸውንም የሚቀጡ አያሌ ወገኖች አሉ ። ፍቅር ታዝናለችና እነዚህን ሰዎች ይቅር ትላለች ፣ ይቅር ታስብላለች ። ፍቅር ጠባይዋ ማዋረድ ሳይሆን መሸፈን ነው። ፍቅር የኃጢአትን ብዛት የምትሸፍነው በፍትሕ ፣ በቅንነትና በርኅራኄ ነው /1ጴጥ. 4፥8/ ። ይኸው ስለ ፍቅር ስንናገር እንኳ ውስጣችን ደስ ይለዋል ። ፍቅር ሲያደርጉት ብቻ ሳይሆን ሲሰሙትም ደስ ያሰኛል ። የጎደለን ፍቅር ነው ። ቅዱስ አውግስጢኖስ ፡- “ፍቅር ልብህን ይግዛው ከዚያ በኋላ የወደድከውን ማድረግ ትችላለህ” ይላል ። እውነተኛ ፍቅር በውስጣችን ካለ ሐሰተኛ ተግባር ሊኖረን አይችልም ። ያለ ሕግጋት ዝርዝር ፍቅር ሕግጋትን ትጠብቃለች ። እውነተኛ ፍቅር እስከሌለን አምልኮአችን ልባዊና ሙሉ መሆን አይችልም ። ጸሎታችንን ቆም ፣ ምህላችንን ገታ አድርገን እስቲ አሁን ይቅር እንባባል ። ያን ጊዜ የእግዚአብሔርን ምሕረት ማየት እንችላለን።
አንድ እናት ከልጆቻቸው ጋር በሀብት ምክንያት ትልቅ ረብሻ ተፈጠረባቸው ። ልጆቻቸውም እናትነታቸውን ለመካድ ትንሽ ቀራቸው ። እናቲቱም ብቸኛ ሆነው ቆሙ ። ነገር ግን ከመጀመሪያ ልጅ ጀምሮ መንፈቅ ባልሞላ ጊዜ ሦስት ልጆች ሞቱ ። በአራተኛዋ ልጅ ልቅሶ ላይ በአደባባይ ቆመው ፡- “ወገኖቼ አታልቅሱብኝ ። እኛ የሞትነው ከፍቅር ገንዘብን ያስቀደምን ቀን ነው ። ለሚያልፍ ንብረት ይኸው ከልጆቼ ጋር እንጣላለን ። አራት ልጆች ሸኘሁ” አሉና ወደ ቀሩትና ልባቸውን ወዳደነደኑት ልጆቻቸው ዘወር ብለው ፡- “የቆመው ሳይዋደድ ለሞተው መናደድ ከንቱ ነው ። እኛ እንስማማ” ብለው እግር ላይ ሲወድቁ ልጆቹ በልቅሶ ተመለሱ ። ከዚያ ጊዜ በኋላ ሞትም ሰይፉን ወደ ሰገባው እስከ ጊዜው አስገባ ። ዛሬም ላለፈው ትተን ቀጣዩን ለመዋጀት ፍቅርን ገንዘብ ማድረግ ይገባናል ። በአገር በቤተ ክርስቲያን የመጣውን ክፉ ነገር የምንመልሰው በፍቅር ብቻ ነው ። የመጣብን ባዕድ የለም ። እርስ በርሳችን መጨቋቆናችን ይገርማል ።
ሐዋርያው ፡- “በሰዎችና በመላእክት ልሳን ብናገር ፍቅር ግን ከሌለኝ እንደሚጮኽ ናስ ወይም እንደሚንሽዋሽዋ ጸናጽል ሆኜአለሁ ። ትንቢትም ቢኖረኝ ምሥጢርንም ሁሉና እውቀትን ሁሉ ባውቅ ፥ ተራሮችንም እስካፈልስ ድረስ እምነት ሁሉ ቢኖረኝ ፍቅር ግን ከሌለኝ ከንቱ ነኝ ። ድሆችንም ልመግብ ያለኝን ሁሉ ባካፍል ፥ ሥጋዬንም ለእሳት መቃጠል አሳልፌ ብሰጥ ፍቅር ግን ከሌለኝ ምንም አይጠቅመኝም” ብሏል /1ቆሮ. 13፥1-3/ ።
ሐዋርያው በዚህ ክፍል ላይ ትልልቅ ዋጋ የሚሰጣቸውን ነገሮች ያነሣል፡-
1-  የንግግር ችሎታ
2-  ስለወደፊቱ መተንበይ
3-  እውቀት
4-  ሃይማኖት
5-  በጎ አድራጎት
6-  ሰማዕትነት
እነዚህ ነገሮች በዓለም ላይ ትልቅ ዋጋ አላቸው ። እነዚህ ነገሮች ግን ያለ ፍቅር ከንቱ ናቸው ። ፍቅር የሌለው የንግግር ብቃት ይማርካል እንጂ አያሳርፍም ። ዛሬ ማድረግ ያለብንን ጥለን ስለ ነገ ትንቢት መናገርም ከንቱ ነው ። ነቢይነት ለዘመኑ ሰፊውን አገልግሎት ይሰጣል ። ሌሎችን የማያስብ እውቀትም ጨለማ ነው ። ለዓለም መፍትሔ መሆን ሲገባው ስጋት የሆነ ሃይማኖትም ጥቅም የለውም ። ፍቅር የሌለበት ምጽዋትም ከስድብ አይተናነስም ። ከሰማዕትነትም ፍቅር ይበልጣል ። እውነተኛ ሰማዕትነት ጥላቻንና ራስ ወዳድነትን መጣል ነው ። በየቀኑ ሰማዕት የምንሆነውም ፍቅርን ስንመርጥ ነው ። ፍቅር አቀበት ነው ። አንዳንዴ እየዳሁ የሚወጡበት ተራራ ነው ። የነፍስ ግን ቀለቧ ነው ። አምልኮ እውነተኛ የሚሆነው በፍቅር ነው ።
ጌታችን በእውነት የሚሰግዱ በማለት ተናገረ ። በእውነት መስገድ ከቻልን ከቦታና ከጊዜ በላይ ሁነን እንሰግዳለን ። አንተ ሳምራዊ ፣ አንተ አይሁዳዊ መባባል ያለበት ፤ የዘር ጽዋ ስካር የወለደበት አምልኮ ቅድመ እግዚአብሔር አይደርስም ። እኛስ ፍቅር አለን ?

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።