የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

ነቢይ በአገሩ አይከበርም

“ከሁለቱ ቀኖችም በኋላ ከዚያ ወጥቶ ወደ ገሊላ ሄደ ። ነቢይ በገዛ አገሩ እንዳይከበር ኢየሱስ ራሱ መስክሮአልና ። ወደ ገሊላም በመጣ ጊዜ፥ የገሊላ ሰዎች ራሳቸው ደግሞ ለበዓል መጥተው ነበርና በበዓል በኢየሩሳሌም ያደረገውን ሁሉ ስላዩ ተቀበሉት” /ዮሐ. 4፥43-45/ ።
ጌታችን ለሳምራዊቷ ሴትና ለሰማርያ ሰዎች ድኅነትን ከፈጸመ በኋላ ወደ አደገበት ወደ ገሊላ መጣ ። ወደ አደጉበት አገር ተልእኮ ይዞ መሄድ ከባድ ነው ። ምክንያቱም አብሮ አደጎች የተለያየ ጠባይ አላቸው ። ነቢይ ወደ ትውልድ አገሩ ሲሄድ የሚከሰቱ ነገሮች አሉ ፡-
1-  ሲያስተምር የሚያዩት አብሮ አደጎች ይህንን እውቀትና ጥበብ ከየት አመጣው ? በማለት ከመስማት ይልቅ የትመጡን መመርመር ይቀናቸዋል።
2-  እኛ እዚህ ተቀምጠን ምን አገኘን ። እርሱ ጎበዝ ነው ፣ ይህን ሕዝብ ይንገሥበት በማለት ሥጋዊ ትርጉም ይሰጡታል ።
3-  ትልልቆቹም እገሌ አድጎ ማስተማር ጀመረ በማለት ከትምህርቱ ይልቅ የልጅነት ረብሻውን ማስታወስ ይጀምራሉ ።
ጌታችን ነቢይ በገዛ አገሩ አይከብርም ማለቱ ለዚህ ነው ። የተፈተነ ቃል ነው። በሌላው አገር አባ ፣ መምህር የሚባሉ ወዳጉበት ሲሄዱ በድሮ የጠባይ ስማቸው ሲጠሯቸውና ቀልል አድርገው ሲያዩአቸው አብረዋቸው የሄዱ ተከታዮቻቸው ይደነግጣሉ ፣ ይቆጣሉ ። አብሮ አደጎች ነቢይን የማያከብሩበት ምክንያት ምንድነው ?
1-  ስለዚያ ሰው ያላቸው ውስን እውቀት ይይዛቸዋል ። እነርሱ የሚያውቁት የዚያን ሰው ማንነት ነው ። እግዚአብሔር በእርሱ ላይ ያለውን ዓላማ ግን አያውቁም ።
2-  እኛ እያለን በየት በኩል አልፎ ጥበብ ነካው ? በማለት መቀበል ይከብዳቸዋል።
3-  ቅንዓትም ፈተና ስለሚሆንባቸው ማጣጣል ብሎም ስም ማጥፋት ይጀምራሉ ። ያ ሰው የያዘው የማይሰረቅ ሀብት መሆኑን አይረዱም ። ገንዘብ ፣ ሹመት ፣ ሥልጣን ፣ ዝና ሊወሰድ ይችላል ። ጸጋ እግዚአብሔር ግን አይሰረቅም ። የማያውቅ ሲያከብር የሚያውቀው የሚንቀው በቅንዓትም ነው ። ቅንዓት ስሙን መጥራት እንፈራዋለን እንጂ የብዙ ሰው ፈተና ነው ። ከዘወትር ጸሎታችን ሊለይ የማይገባው ነገር፡- ጌታ ሆይ በወንድሜ መልካም ዕድል እንዳልበሳጭ እርዳኝ የሚል ሊሆን ይገባዋል ።
በገዛ አገራቸው ያልተከበሩ ስንት አሉ ? ሰውዬው መጋቢት 5 ቀን አቡዬን ለማክበር ከሩቅ ቦታ መጥቷል ። በአቅራቢያው ያለው አንድ ገበሬ ደግሞ በዓሉን ትቶ ያርሳል ። ይህ የሩቅ ሰውም ተገርሞ፡- “አቦን የሩቅ ያከብራቸዋል ፣ የቅርብ ይሽራቸዋል” አለ ይባላል ። የሩቁን ማክበር የቅርቡ መሻር የተለመደ ነው ። የሩቁ የሚሰማቸውን ሰዎች ትዳራቸው ግን የማይሰማቸው አያሌ ናቸው ። አገርን የገዙ ሚስታቸውን መግዛት ግን አልቻሉም ። ሕዝብን የሚያስተምሩ ልጆቻቸው ግን እንቢ ሲሏቸው ማየት የተለመደ ነው ። ብዙ ፀሐፍት የራሳቸውን ቢጽፉ አንባቢ ስለሌላቸው የሌሎችን ሥራ ይተረጉማሉ ። የራሱን ፀሐፊ የሚንቀው ወገን የፈረንጅን ትርጉም ይሻማበታል ። በዚህም ስንት ፀሐፊያንን ፣ ደግሞም አገር በቀል እውቀትን ገድለናል ። ያለ ልካችን የተሰፋውን የፈረንጅ ሥነ ጽሑፍ ግን ተሸክመናል ። እገሌ የሚያነበው የእንግሊዝኛ መጻሕፍትን ነው እንዲባል የአማርኛ መጽሐፍ ይዘው የማያውቁ ብዙ ሰዎች አሉ ። የአማርኛ መጽሐፍ ሲያነቡ ይህ የተከለከለ ነው ፣ የመናፍቅ ነው እያሉ ከእጅ የሚያስጥሉ ሰዎች ፣ የእንግሊዝኛ ከሆነ የሌሎች ሃይማኖቶችን መያዝ ብቻ አይደለም እየጠቀሱ ያስተምራሉ ። መናፍቁ ቋንቋው ነው ወይስ አሳቡ ? የሚለው ገና መልስ አላገኘም ። ከውጭ አገር ለሚመጡ መምህራን ከፍተኛ ደመወዝ ሲከፈል ለአገር ውስጥ መምህራን ግን የወደቀ ገንዘብ መክፈል የተለመደና ያልተፈወስንበት ነው ። በቤተ ክህነት ኬንያ ደርሶ የመጣ ሰው ካለ አባ ኬንያ ተብሎ አንድ ደብር ይሰጠው ይባላል ። ለማንኛውም አንድ አገር ደርሶ መምጣት ክብር ያሰጣል ። ሱዳንም ፣ ሩዋንዳም ብቻ ወጣ ብሎ መግባት ለመከበር ወሳኝ ነው ። ስለ አገሩ የሚያውቅ ግን በየሀብታም ቤት ዘበኛ ሁኗል ። ብዙ የቅኔና የመጻሕፍት መምህራን የሀብታም ቤት ዘበኛ ሁነው አይቻለሁ ። ማንበብ እንኳ የማይችሉ መስሎን ስንንቃቸው የምንሠራውን ሁሉ ይታዘቡ ነበር ።
አዎ ነቢይ በገዛ አገሩ አይከበርም ። ይህ ቃል ከእኛ አገር በላይ የት ይሠራል ? የራሳችን ሊቃውንት ቢሰድቡን እንኳ አንቀን ይዘን መጠቀም ሲገባን የሚያማክሩንና የሚተቹልን ፈረንጆችን ግን በሚሊየን ብሮች እያስመጣን እንዳክራለን ። በአገሩ በሬ ካልሆነ የአገሩ እርሻ አይዘለቅም ። የገዛ አባባላቸውን ሰው ስለማይሰማላቸው ሪቻርድ የተባለ ኢማኑኤል የተባለ ፈረንጅ እንደ ተናገረው እያሉ የሚጽፉ ተወዳጅ የሆኑ አያሌ ናቸው ። በሕይወት ካለው የአገር ልጅ የሌለው ሪቻርድ ሲከበር ማየት በጣም ይገርማል። ስማቸውን ዮሐንስ ከማለት ጆን ፣ ማርቆስ ከማለት ማርክ፣ ጳውሎስ ከማለት ፖል የሚሉ የአገራችን ልጆች ብዙ ናቸው ። አካላችን ቅኝ ባይገዛም የመንፈስ ቅኝ ግዛት ውስጥ ገብተናል ። ቀዳማዊ ኃይለ ሥላሴ አገሪቱን ለፈረንጆች ክፍት በማድረጋቸው መሳፍንቱና መኳንንቱ “ተፈሪ የፈረንጅን ጎረምሳ ከነንፍጡ ሳመው” እያሉ ይተቹ ነበር ። አዎ ከሌሎች የሚወሰደውንና የሚቀረውን አለመለየት ትልቅ ድንቁርና ነው ።
“የቅርብ ጠበል ልጥ መንከሪያ ይሆናል” ይባላል ። የቅርብ አገልጋይ ይናቃል ። ቢያውቅም የሚያውቅ አይመስለንም ። የምናጣውና የሚያጎድለንም አይመስለንም ። ነገር ግን አንድን አምባሳደር መናቅ መንግሥቱን መናቅ እንደሆነ አገልጋዩንም መናቅ እግዚአብሔርን መናቅ ነው። በቤታቸው ያሉትን አገልጋዮች እየናቁ ሌላ ቦታ ሄደው የሚሰሙ ብዙ ናቸው። የእነርሱ የሥጋ አባት የሆነው ያስተማረውን ሰው የሚሰሙ ፣ አባታቸውን ግን የማይሰሙ ብዙ ገጥመውኛል ። የቄስና የፓስተር ልጅ ጨዋነት ብዙ ጊዜ የሚያንሰው ለምንድነው ? የመጀመሪያው ታሰድበኛለህ እያሉ ለልጁ ሳይሆን ለክብራቸው ስለሚያስተምሩት ነው ። ሁለተኛው ግን ነቢይ በገዛ አገሩ ስለማይከብር ነው ።
ዐጼ ቴዎድሮስ እቴጌ ተዋበች ከሞቱ በኋላ ያገቡአቸው ሁለተኛ ሚስታቸው እቴጌ ጥሩ ወርቅ ነበሩ ። እቴጌ ጥሩ ወርቅ የሰሜኑ ገዥ የደጃች ውቤ ልጅ ናቸው ። ንጉሡ እቴጌ ጥሩ ወርቅን ያገቡት አባታቸውንና ሁለት ወንድሞቻቸውን አስረው ነው። በቤተሰባቸው ላይ በወረደው መከራ ዓለምን ንቀው መመነን የሚፈልጉት እቴጌ ጥሩ ወርቅ በግድ የዐጼ ቴዎድሮስ ሚስት ሆኑ ። እቴጌም ደስተኛ ስላልነበሩ ለንጉሡ ደስታን መስጠት አልቻሉም ። ንጉሡንም ከማክበር ወደ መናቅ ደርሰው ነበር ። አንድ ቀን ከደጅ ሲመጡ እቴጌ ዳዊታቸውን ይዘው እንደሚያነብ በመምሰል ከመቀመጫቸው ሳይነሡ ቀሩ ። ንጉሡም እንዴት አትቀበይኝም  ? ቢሏቸው “እርስዎ ከሚበልጥ ንጉሥና ከሚሻል ሰው ጋር ጉዳይ ይዣለሁ” በማለት መልሰዋል ። የንግሥቲቱ ሁኔታ ዕለት ዕለት እየጨመረ መጣ ። አንድ ቀን ባለሟላቸው ተከፍቶ ሲጠይቅ ንጉሡ ፈገግ ብለው ፡- “አንተ የምታውቀኝ ታጥቄ ፣ እርስዋ የምታውቀኝ አውልቄ ነው” በማለት የክብሩንና የንቀቱን ምክንያት ተናግረዋል።
ነቢይ በገዛ አገሩ ቢከበር ነገሥታት ለክፉ ውሳኔ አይዳረጉም ነበር ። ከነገሥታት ውሳኔ ጀርባ እቴጌዎች አሉ ። አገልጋዮችም በዘበት አያገለግሉም ነበር ። ጳጳሳትም የእልህ ሥራ ሠርተው አይሄዱም ነበር ። አለማክበር አለመከበርን ይወልዳል ። የተላኩልን ነቢያት ነገሥታት ይሁኑ ጳጳሳት ፣ ቀሳውስት ይሁኑ ምሁራን ከምንሰጣቸው ክብር የሚሰጡን ክብር ይበልጣል ። የተላኩልንን መልእክተኞች በክብር ስንቀበል ከላኪው አካል ሌላ በረከት ይላካል ። አሊያ መልእክተኛው ሲታሠር ንጉሡ ጦር ይልካል ። የእግዚአብሔር ቃል አይለወጥም፡- “የቀባኋቸውን አትዳስሱ፥ በነቢያቴም ክፉ አታድርጉ ብሎ፥ ሰው ግፍ ያደርግባቸው ዘንድ አልፈቀደም፥ ስለ እነርሱም ነገሥታትን ገሠጸ። በምድር ላይ ራብን ጠራ፥ የእህልን ኃይል ሁሉ ሰበረ” /መዝ. 104፥14-15/።
ጌታችን ኢየሱስ ክርስቶስ ወደ ገዛ አገሩ ወደ ገሊላ በሄደ ጊዜ ብዙ ጊዜ የንቀት ድምፅ አሰምተውበታል ። “ወደ ገዛ አገሩም መጥቶ እስኪገረሙ ድረስ በምኩራባቸው ያስተምራቸው ነበር፤ እንዲህም አሉ። ይህን ጥበብና ተአምራት ይህ ከወዴት አገኘው?…” /ማቴ. 13፥53-58/። ቢሆንም ጌታችን እነርሱን ለማስተማር አልታከተም ። ዛሬ ከአገር ርቃችሁ ያላችሁ ፣ ክብሬ ተደፈረ ፣ ሞገሴ ተገፈፈ ብላችሁ ያኮረፋችሁ የምታስፈልጉት ለተላካችሁበት አገር ነውና መለስ በሉ ። እግዚአብሔር እናንተን በዚህች ምድር ላይ ሲፈጥር ፣ኢትዮጵያዊ አባትና እናት ሲሰጣችሁ አልተሳሳተም ። የሰው አገር በቁም ቢያከብር ሲሞቱ ይረሳል ። አገር ግን በቁም ቢያዋርድም የሞቱ ቀን ሲያስብ ይኖራል ።

ያጋሩ

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።