የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

የገበታ ወዳጆች

ጌታችን ኢየሱስ ክርስቶስ ተአምራት ወዳደረገበት ወደ ቃና ዘገሊላ እንደገና እንደ መጣ ሁለተኛም ምልክት እንዳደረገ ማየት ጀምረናል ። ታሪኩ በዮሐንስ ወንጌል ምዕራፍ 4፥46-54 ተጽፎልናል ። ከንጉሥ ቤት የሆነ ሹም ልጅ ታመመበት ። ይህ ሰው ጌታችን በቃና ዘገሊላ ያደረገውን ሳይሰማ አይቀርም ። የቃና ዘገሊላ ሰርገኞችን ከሐፍረት ያዳነ ጌታ እርሱንም ከሐፍረት አደባባይ ከመቆም ያድነው ዘንድ ለመነው ። ቢያጠፋም ባያጠፋም ሹም መሆን በራሱ ብዙ ጠላት ያመጣል ። እንዳለበት ከፍታ ጥቂት ስህተቱ ትጎላለች ። በዚህ ዓለም ላይ ተገዝቶ እንደ መኖር ያለ ሰላም የለም ።
የቃና ዘገሊላን ክስተትና ይህንን ክስተት አንድ የሚያደርገው ሁለቱም ክስተቶች ላይ ከጉዳዩ ባሻገር ያሉ የሚያቀርቡት ምልጃ አለ ። እመቤታችን ስለ ሰርገኞቹ ሐፍረት ትለምናለች ። ይህ ሹምም ስለ ልጁ መታመም ይለምናል። እግዚአብሔር ከሚወደው ነገር አንዱ ስለ ሌሎች የሚቀርበውን ልመና ነው ። በምልጃ ውስጥ ያለው ፍቅር ብቻ ነው ። የሰውዬው ችግር ካልተሰማን በቀር ወደ እግዚአብሔር አንጸልይም ። ምልጃ ሁለንተናው ፍቅር ነው ። አንድን ጸሎት ሙሉ የሚያደርገው በውስጡ ምልጃን ያዘለ ሲሆን ነው። እግዚአብሔር ስለ እኛ ጉዳይ እንዲሰማው ስለ ሌሎች ጉዳት ምን ያህል እንደ ተሰማን ማወቅ ይፈልጋል።
የልጅ ሕመም አደባባይ ያወጣል ። ይህንን በዚህ ሹም ብቻ ሳይሆን በዚያች በከነናዊት ሴትም አይተናል /ማቴ. 15፥21-28/ ። ጌታችንም በአደባባይ የተሰቀለው ልጁ አዳም በኃጢአት በሽታ ታሞበት ነው ። በኋላ የተወለደ ልጅ ቀድሞ ሊሄድ መቻኮሉ ቤተሰብን ያሳስባል ። ይልቁንም ከታማሚ ያስታማሚ በሽታው ይበረታልና ይህ ሰው እጅግ ተጨንቆ እንደ ነበር ፣ ከመንግሥታዊ ሥራ ጋር የልጅን ሕመም መሸከም ከብዶት ነበር ። የሚታወቀው በስፍራው ሁኖ ሲለመን ፣ ደጅ ሲጠኑት ነበር ። ዛሬ ደግሞ ለትልቁ ንጉሥ ለክርስቶስ እጅ ሲነሣና ደጅ ሲጠና ይታያል ። ክርስቶስም ለለመኑት ቸር ነውና ፣ ታሪክን ሳያገናዝብ ለጸሎት መልስ ይሰጣልና ተለመነው ።
ይህ ሰው ልጁ የሞት አፋፍ ላይ ደርሶ ነበር ። ጌታችንንም ልጄን መጥተህ ፈውስልኝ አለው ። በክርስቶስ ፈዋሽነት ፍጹም እምነት ነበረው ። ሹማምንት ሲያምኑ ብዙ ነገሮች ይለወጣሉ ። ጸሎታቸውም ተሰሚ ነው ። ብዙዎችን ወክለው ይኖራሉና እግዚአብሔር ድካማቸውንም በልዩ ያየዋል ። የሚቀጡትም ከተገዢው ሕዝብ ጋር ሳይሆን የሚዳኙበት ልዩ ችሎት አለ ። ያ ሹም ወደ ጌታችን ከፍና ዝቅ እያለ በአደባባይ ልመናውን እያሰማ መጣ ። ችግር ከመጠጥ በላይ ያሰክራል ። ይሉኝታን ያሳጣል ። እንዳበደ ሰው ያስጮኻል ። ጌታችን ግን የሰጠው ምላሽ የቊጣ ይመስላል ። በጣም ደግና ሩኅሩኅ የሆኑ ሰዎች አንድ ነገር ስንለምናቸው የቊጣ የሚመስል ድምፅ ያሰማሉ ። ልመናችን ሆዳቸውን እያራራው ስለሆነ ከዚያ ስሜት ለመውጣት ይቆጣሉ ። ሰከንዶች ስንታገሥ ያ ደግነት ይፈስሳል ። ጌታችንም በጣም ደግ ነውና ስንለምነው ከፍቅሩ የሚወጣ ቊጣ መሳይ ድምፅ ይሰማል ። እርሱ ጉዳያችንን ከመሥራቱ በፊት እኛን ለመሥራት ይፈልጋል ።
“ስለዚህም ኢየሱስ፦ ምልክትና ድንቅ ነገር ካላያችሁ ከቶ አታምኑም አለው” /ዮሐ. 4፥48/ ። ጌታችን የቃሉን ወዳጆች እንጂ የተአምራት አፍቃሪዎችን አይፈልግም ። ተአምራት ስላዩ እግዚአብሔርን የሚከተሉ የበለጠ ካሳያቸው ሰይጣንን ይከተላሉ ። ተአምራት አፍቃሪዎች የበለጠ ካገኙ የያዙትን ለመተው በጨረታው አይገደዱም ። ጌታችን ከሰውዬው ልመና በላይ የሰውዬውን እምነት ሊጠግን ፈለገ ። የእምነት መሠረቱ እውነት ነው ። በጊዜውም ያለ ጊዜውም ለመጽናት እምነትን እውነት ላይ መመሥረት ይገባል ። በዓለም ላይ ትልቅ ውሸት ሁኖ የሚዘገበው ተአምራት ፈላጊዎች አንድ ቦታ ጸኑ ተብሎ ሲወራ ነው ። ብዙዎቹ ኑሮአቸው ይፈርሳል ። ተአምረኛ ነን ለሚሉ ሰዎችም አገልጋይ ሁነው ይቀራሉ ። የብዙ ባሕታውያን ተከታዮች ሰውን የተከተሉበትን መጠን ክርስቶስን መከተል አቅቷቸው በቤተ ክርስቲያን የስድብ መምህራን ሁነው ቀርተዋል ። አስተማሪ የሌለው ምእመን የሙት ልጅ ነው ። ለቤተ ክርስቲያን የጎን ውጋቶች ተአምር ፈላጊዎች ናቸው ። ተአምር አድራጊ መጣ ሲባል ዓመት ሙሉ ሲማሩት የነበረውን ገበታ በአንድ ቀን ለውጠው ፣ ያመኑትን ክደው ያድራሉ ። የከረሙትን አባቶች አንኳሰው አዲሱን ተአምረኛ አግንነው ይናገራሉ ። አዲሱን ባል በደንብ ሳያጣጥሙት ከቆየው ይፋታሉ ። “የወረት ውሻ ስሟ ወለተ ጴጥሮስ ነው” ይባላል ።
 የምዕራቡ ዓለም ለዛሬው ክህደት የተዳረገው አማኝ በሚመስሉ ተአምራት አድራጊዎች ነው ። ያ በሩቅ የታየው ቅርብ እየሆነ ነው ። ሳሙና ግዙ ፣ ብራችሁ ላይ ይጸለይ ዶላር ይሆንላችኋል የሚል ድምፅ እየተሰማ ነው። አሳሳቢው ከቤተ ክርስቲያን ሰዎች መውጣታቸው ብቻ ሳይሆን ነገ ከሃዲ ሁነው የክርስትና ጠላት መሆናቸውም ነው ። የተጸለየበት መጽሐፍ ቅዱስ በሁለት መቶ ሺህ ብር ጨረታ ሲሸጥ በቴሌቭዥን መስኮት እያየን ነው ። መጽሐፍ ቅዱስ ላይ ይጸለያል ወይ ? የሚጸለየውስ ለምንድነው ? ይህ በሽታ ወደ ቤታችን እንዳይገባ ፍጹም ያሰጋል ። ብዙ የጓዳ ልምምዶች እንዳሉ የታወቀ ነው ።
አዎ ጌታችን ማስተማር ከጀመረ ብዙ ጊዜ ነው ። ይህ ሹም አንድም ቀን ጌታን አልፈለገውም ። ዛሬም ቢሆን ለልጁ እንጂ ለራሱ እግዚአብሔርን አልፈለገም ። ብዙ ወላጆች ለልጆቻውም ጨዋነት መንፈሳዊ ሕይወትን ይመርጣሉ ። ለራሳቸው ግን አይፈልጉትም ። ክርስትናን እንደ ጠባይ ማረሚያ ማየት የቆየ ልማድ ይመስላል ። ልጆች ወላጆቻቸው ሲከተሉ ያዩትን እንጂ ወላጆቻቸው የመረጡላቸውን ብዙ ጊዜ አይከተሉም ። ልጆች ከደጅ መምህራን በቃል ይማራሉ ። ከወላጆቻቸው ደግሞ በተግባር ይማራሉ።
“ሳያዩ የሚያምኑ ብፁዓን ናቸው” የሚለው ቃል እግዚአብሔርን ለመከተል ተአምራትን እንደ ቅድመ ሁኔታ የማያስቀምጡ አማንያንን ይመለከታል ። በተጨባጭ ነገር ላይ የሚመሠረት እምነት አይደለም ። እምነት ማለት የማያዩትን ከሚያዩት በላይ ማመንና በዚያም መደሰት ነው ። ተአምራት የሌለበት አገልግሎት ሙሉ አይደለም የሚል አስተሳሰብ እየተዛመተ ነው ። ተአምራት ግን የአሕዛብን ልብ ወከክ ለማድረግ እንጂ ለአማኝ አይደለም /1ቆሮ. 14፥22/። ጌታችን ያዳነን በተአምራት ሳይሆን ፍትሕና ፍቅርን ባሟላው ሞቱ ነው ። ለመዳን ተአምራት ሳይሆን ፍትሕና ቤዛነት አስፈላጊ ሁኗል ። ክርስቲያኖች ሁልጊዜ ሊያተኩሩ የሚገባው መስቀሉ ላይ ነው ። ስለ ድኅነተ ነፍስ ሲያስቡ እንኳ መዳንን ከነገረ ሥጋዌና ከነገረ መስቀሉ ለይተው ማየት አይገባቸውም ። ከነገረ መስቀሉ የተለየ ነገረ ድኅነት ዋጋው ቀላል ሁኖ ይታያል ። ተአምራት የማያደርጉ አገልጋዮች ሙሉ አይደሉም የሚሉ ትምህርቶች እየተስፋፉ ይገኛሉ ። ይህ ግን መጽሐፋዊ አይደለም ። ሁለት የመጽሐፍ ቅዱስ ጥቅሶች እንመልከት ። ተአምራት ማድረግ የመንፈስ ቅዱስ ጸጋ ከሆነ ሁሉ ተአምራት ያደርጋሉን ? ሐዋርያው ፡- “ሁሉ ሐዋርያት ናቸውን? ሁሉስ ነቢያት ናቸውን? ሁሉስ አስተማሪዎች ናቸውን? ሁሉስ ተአምራትን ይሠራሉን? ሁሉስ የመፈወስ ስጦታ አላቸውን? ሁሉስ በልሳኖች ይናገራሉን? ሁሉስ ይተረጉማሉን?” ብሏል /1ቆሮ. 12፥30/። ሐዋርያው እንደውም ሰዎች ሊያስሱት የሚገባውን በአንድ ጊዜ ጸጋና ፍሬ የሆነውን ፍቅርን መፈለግ እንዳለባቸው ሲጠቅስ እንዲህ ይላል፡- “ነገር ግን የሚበልጠውን የጸጋ ስጦታ በብርቱ ፈልጉ። ደግሞም ከሁሉ የሚበልጥ መንገድ አሳያችኋለሁ” /1ቆሮ. 12፥31/።
ዳግመኛም ከሴቶች ከተወለዱ ከዮሐንስ መጥምቅ የሚበልጥ የለም በማለት ጌታችን የተናገረለት ዮሐንስ በዘመኑ አንድ ተአምራት በእጁ አልተደረገም ። “ብዙ ሰዎችም ወደ እርሱ መጥተው፡- ዮሐንስ አንድ ምልክት ስንኳ አላደረገም፥ ነገር ግን ዮሐንስ ስለዚህ ሰው የተናገረው ሁሉ እውነት ነበረ አሉ” /ዮሐ. 10፥41/። ዮሐንስ አንድ ስንኳ ምልክት አላደረገም ፣ ዮሐንስ ግን በሕዝብና በመንግሥት የተፈራ ፣ በአይሁድ ቤተ ክህነትም ገናና ስም የነበረው ከሁሉ በላይ ጌታችን የመሰከረለት ክቡር ሰው ነው ። ስለዚህ አገልጋዮች ለመክበር ያልተሰጣችሁን አደርጋለሁ ብትሉ ውጤቱ ውርደት ነው። መንፈስ ቅዱስ ጸጋውን እንዳሻው ይሰጣል እንጂ ማንም እጅ ጠምዝዞ አይወስድበትም ። ጸጋም ጸጋ እንጂ ልምምድ አይደለም ። ዛሬ በተአምራት ስም ንግድ ሲካሄድ ማታወቂያ ሲሠራ እያየን ነው ። አጋንንትም ስበኩ እየተባሉ ንግግር ሲያደርጉ ፣ የሐሰት አባት ከተባለው ሰይጣንም እውነትን ሲፈልጉ ማየት ምን ያህል እንደ ተቀጨን ማሳያ ነው ። አጋንንት ስለ እኔ እንዲህ ብሎ መስክሯል በማለት በትዕቢት የሚንጠራሩ ፣ ጉባዔ በጩኸት ካልተናጋ እግዚአብሔር አልተገኘም ብለው የሚያስቡ ሰዎችን እያፈራን ይመስላል ። በዚያ ጉባዔ እግዚአብሔር እንዳለ ምልክቱ አጋንንትን ቅጥሩን አልፎ አለመግባቱ ነው ። በዚህ የኑሮ ጭንቀት በበዛበት አገር ላይ የሚጮኸው ሁሉ በአጋንንት ነውን ? አንዱ አንተ የሐሰት አባት እያለ ሰይጣንን ስርየት የሌለው ማናዘዝ ያናዝዘዋል ። ሰይጣኑም፡- “ታዲያ እናንተን ሁሉ ወልጄ አባት መሆን አይገባኝም ወይ?” አለው ሲሉ ሰምቻለሁ። አዎ ለቃሉ የሚተኙ ለተአምራት ግን የሚነቁ እንደገና ክርስትናቸውን መመርመር ይገባቸዋል ። በዛር ውላጅ ቤት ያደጉ ሰዎች ሲሰሙ የኖሩት ይደረግልሃል የሚል ድምፅ ነውና ይህንን በቤተ ክርስቲያን ይናፍቃሉ ። የኖሩበትን ሲያጡ አባቶችን ይነቅፋሉ ። የስማቸውን ትርጉም በትክክል የማያውቁ ሰዎች አባቶችንና ቤተ ክርስቲያንን ሲነቅፉ መስማት ይገርማል ።
ጌታችን ያንን ሹም መከረው ። ሹሙ ለልጁ ያስባል ፣ ጌታ ደግሞ ለእርሱ ያስብለታል ። “ልጄ ለልጅዋ ታስብ” ይባላል ። እኔ ለልጄ አስባለሁ ማለት ነው ። ጌታ አሰበለት ። ልጁ በሥጋ ታሟል ፣ ያ ሹም ደግሞ በነፍሱ ዕረፍት ያስፈልገዋል ። ልጄን አሞብኛል ሲለው አንተስ መች ጤንነትህ ተሟላ እያለው ይመስላል ። ከሥጋ በሽታ የነፍስ በሽታ ይልቃልና ። አዎ ጌታችን መስቀል ሲመጣ የሚሸሹት ብዙ የተአምራት ወዳጆች አሉት ። ተአምራት በሌለበትም ያመኑ ብቻ እነርሱ የመስቀል ወዳጆች ናቸው ። የገበታ ወዳጅ ሞልቷል ። መከራውን የሚካፈል ግን ጠፍቷል ።

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።