የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

ድብቅ በረከት አለው

ድብቅ በረከት አለው
“ራሱ ሊያደርግ ያለውን ያውቅ ነበርና ሊፈትነው ይህን ተናገረ።”  /ዮሐ. 6፥6/ ።
ጌታችን ኢየሱስ ክርስቶስ ፊልጶስን፡- “እነዚህ እንዲበሉ እንጀራ ከወዴት እንገዛለን ?” በማለት ጠይቆታል ። ከተራራው ግርጌ ያሉትና ወደ እርሱ እየተመሙ የሚመጡትን ሕዝብ ጌታ እያየ የተናገረው ነው ። ሳያዩት የሚያይ ፣ ሳይሰሙት የሚሰማ ፣ ለእያንዳንዱ ሰው እቅድ ያለው አምላክ ነው። ጌታ አስቦ እንዲያስብላቸው ፣ አዝኖ እንዲያዝንላቸው ፊልጶስን እየቀሰቀሰው ነው ። ወዳጅ የሚሰጠን ወዳጅ የሆነው እግዚአብሔር ነው ። አባት የሚሰጠን አባትነት የሚሰየምበት እርሱ አማኑኤል ነው ። ጌታ እርሱ ብቻ አስቦ መቅረት አልወደደም ፣ ፊልጶስም እንዲያስብ ቀሰቀሰው ። የምንወዳቸውን ሰዎች ውደዷቸው ተብለን በጌታ ታዝዘን ነው ። የሚወዱንም የእግዚአብሔር ስጦታዎች ናቸው ። በርግጠም ፊልጶስ የእርሱ የጌታው ደቀ መዝሙር ነው ። እነዚህን ሁሉ ሕዝብ የመመገብ ግዴታ የለብንም አላለውም። ማስላት ጀመረ ። እግዚአብሔር ርኅሩኅ ልብ ይወዳል ። ሰው በልቡ ሲራራ እግዚአብሔር ተአምራትን ያደርጋል ። ቀና ልብ ሲኖረን እምነትን እናገኛለን ፣ እምነትም ተአምራትን ያለማምደናል ። የቀድሞው ሳኦል የኋላው ጳውሎስ ተግባሩ ክፉ ነበረ ፣ ልቡ ግን ቀና ነበረ ። ምንም ይሁን በእውነት አምላክን የሚፈልጉ ፣ ለአምላክም የሚቀኑ ወደ እውነቱ መድረሳቸው አይቀርም ። እግዚአብሔር በራድ ከሆኑ ሃይማኖተኞች ይልቅ ትኩስ የሆኑትን ቀናተኞች ከሁሉ ስፍራ ለመንግሥቱ ይሰበስባል ። እኛ የሚሰሙንን ብቻ እንወዳለን ፣ የሚቃወሙን ምናልባት እውነትን የሚፈልጉ ሊሆኑ ይችላሉ ።

ለማናውቃቸውና ለሚበዙት ሕዝብ ያለንን አመለካከት እግዚአብሔር ያያል ። የእኔ በምንላቸው አጥር ውስጥ ብቻ መሆናችንን አይወደውም ። እግዚአብሔር ለፈጠረው ሰው በሙሉ አዘኔታ እንዲኖረን ይፈልጋል ። ከአምስት ጣት የትኛው ይበልጣል ? እናት ዘጠኝ ወልዳ ለማን ታዳላለች ? እግዚአብሔር ፍጥረቱን በእኩል ዓይን የሚያይ አምላክ ነው ። የእግዚአብሔር ዓይን ያስፈልገናል ። ጌታችን ወደ ተራራው እየወጡ ያሉቱን ወገኖች ውስጣቸውን እንዳየ እርግጠኛ ነን ። እርሱ ልብና ኩላሊትን የሚመረምር አምላክ ነውና ። በበሽታ እንደ ዛሉ ፣ ራብ እንዳጠቃቸው ፣ ተስፋቸው እንደላላባቸው ፣ ወዴት ልሂድ ብለው ግራ እንደ ገባቸው እያየ ነው ። የቸርነቱንና የፍቅሩን ሥራ ሊሠራላቸው ፈለገ ። እርሱ ብቻ የልብ አዋቂ ነው ። የልባችንን እርሱ ብቻ በማወቁም ልናመሰግን ይገባናል ። በሰላም የምንኖረው የልባችንን ስለማንተዋወቅ ነው ። እግዚአብሔር ገና ያልታጨደውን አሳባችንን ከልባችን ማሳ ላይ ያየዋል ። ገና ያልተወቃውን ምኞታችንን ከነፍሳችን ውድማ ላይ ያየዋል ። ገና እንክርዳድና ገለባው ያልተለየውን ማንነታችንን ያየዋል ። እንደ ገለባ የምንቀልበት ፣ እንደ እንክርዳድ የምናሰክርበት አሳባችንን ፣ ልብ በሚባል ጽኑ በር ስለቆለፈልን ስሙ የተመሰገነ ይሁን ።
ዛሬም እየመጣ ያለው ሕዝብ በነፍስ በሥጋ የዛለ ሕዝብ ነው ። የነፍሱ አለማረፍ ሥጋውን እያዛለበትም ነው ። ይህ ሁሉ የሚጮኸው ወገን ተጨንቆ ነው ። እነ ማይክል ጃክሰን ሲዘፍኑ ብዙ ሰው የሚወድቀው ድምፅና የሙዚቃ ስልት አብሮ ስለሚጨመር ነው ። ድምፅ ከባድና ለመቋቋም አቅም ይጠይቃል ። በድምፅ ጥበብ ሰውን የሚያስጮኹ አሉ ፣ ይህ ስልት እንጂ እምነት አይደለም ። ጌታ እንዴት ላሳርፈው የሚለውን ሕዝብ እኛ እንዴት ላውከው ካልን አስቸጋሪ ነው ። እየመጣ ያለው ሕዝብ ጥላቻን አይደለም ከባድ ድምፅም መቋቋም የማይችል ፣ ምስጥ እንደ በላው ዛፍ ተገዝግዞ የቆመ ነው ። ልንራራለት ይገባል።
እግዚአብሔር በተአምራቱ የሚያስደንቅ አምላክ ነው ። ፊልጶስን ሊያስገርመው ፈልጓል ። እርሱ በምድረ በዳ ላይ ማዕድን ማሰናዳት የሚችል አምላክ ነው ። ጌታ ራሱ ሊያደርግ ያለውን ያውቅ ነበር ። ብቻውን ሊያደርግ ያለውን ፊልጶስ አላወቀም ነበር ። ጌታ ሳምራዊቷን ሴት ሲያናግር ምግብ እንዲገዙ ልኳቸው ነበር ። ዛሬ ግን ምግብ እንዲገዙ አይልካቸውም ። በጥንት ዘመን የተደረገውን ሊደግምላቸውና ሕያውነቱን ሊያረጋግጥላቸው ይፈልጋል። እርሱ ተአምራቱን የሚያደርገው እኛን ለመርዳት እንጂ ችሎታውን ለማሳየት አይደለም ። እግዚአብሔር በክብሩ ስጋት የለበትምና ። የሚያደርገውን ያውቃልና አይታወክም ። የትኛውም ስፍራና ጊዜ ምቹ ባይሆንም እርሱ መሥራት ይችላል ። ከጊዜና ከቦታ ክልል ውጭ ነው ። ምቹ ቦታ አያግዘውም ፣ መጥፎ ጊዜም አይመልሰውም ። እግዚአብሔር ሲባል ከሦስት ተጽእኖዎች ያለፈ ነው ። ከቦታ ፣ ከጊዜና ከሁኔታ ።
የምናደርገውን አውቀን መፈተን በጣም ደስ የሚል ነገር ነው ። የሰውዬውን ምላሽ መስማት በጣም የሚያጓጓ ነው ። በዘመናዊው ዓለም ሰርፕራይዝ የሚባለው በደስታ ድርቅ የሚያደርግ ነው ። አይሆንም የሚባለውን ነገር ጨርሶ ጌታ ይጠይቀናል ። ምላሻችንን ሳንጨርስ መጋረጃውን ሲገልጠው ተስፋ የቆረጥንበት ጸሎት አካል ነሥቶ ፊት ለፊታችን ቆሟል ። በዚህ አስገራሚነቱ ብዙዎችን ሲያፍነከንክ የኖረው እግዚአብሔር ዛሬም ሕያው ነው ። የምናደርገውን አውቀን መፈተን በጣም የምንወደው ሰው ላይ የምንፈጽመው ነው ። ጌታ የሚሰጥ ብቻ ሳይሆን በፍቅር የሚሰጥ ነው ። ያለ ፍቅርም ሰጥቶ አያውቅም ። የጌታ ስጦታ በፍቅር የረጠበ ስጦታ ነው ። ተአምራት በእግዚአብሔር ችሎታና ፍቅር ብቻ የሚፈጸም ነው ። የእኛ እገዛ ካለበት ተአምራት መሆኑ ይቀራል ። እግዚአብሔር የተአምራት አምላክ ነው ። ሌሊቱን ቀን ፣ ቀኑን ሌሊት የሚያደርገው ተአምራቱ በየቀኑ ለሰው ሁሉ የሚደረግ ነው ። ሲመሽና ሲነጋ ያለውን የጌታችንን ተአምራት ማድነቅ ካልቻልን በምንም መደነቅ አንችልም።
የሚያደርገውን የሚያውቀው ጌታ እየፈተነን ይሆን ? በእምነት ወይስ በስሌት እንደምንኖር እያየን ይሆን ? እየመጣ ላለው ሕዝብ ፣ እየመጣ ላለው ትውልድ ያለንን ልብ ማየት ይፈልጋል ። አቅሙ የእርሱ ነው ። አንዳንድ ጉዳዮች ፈተናዎች ሊሆኑ ይችላሉ ።
እግዚአብሔር በከፍታ ላይ የሚያስቀምጠን እየመጣ ያለውን ትውልድ ማየት እንድንችል እንጂ የድንጋይ ናዳ እንድንለቅበት አይደለም ። እየመጣ ያለውን ትውልድ በሚመለከት የተለያዩ ዝግጅቶች በተለያዩ ተቋማት ይደረጋሉ ። እየመጣ ያለውን ትውልድ እንደ በረከት እንጂ እንደ አደገኛ ክስተት ማየት በራሱ ችግር አለው ። እየመጣ ያለው ትውልድ የራሱን አገር ቋንቋ የማያውቅ ፣ ቴክኖሎጂ ላይ ጥገኛ የሆነ ፣ ሁሉን ነገር በሳይንሳዊ መንገድ ማረጋገጥ የሚፈልግ ፣ ራስ ተኮር የሆነ ፣ ጥያቄ የሚያበዛ ፣ ያለ አመክንዮ የማይቀበል ፣ እሺ ብሎ ተደልሎ የማያልፍ ፣ ገደቡን ሲነኩበት የማይወድ ፣ ስለ ዓለም አቀፋዊነት የሚያቀነቅን ፣ በአገሩ ተቀምጦ በልቡ ግን የሄደ ፣ በባዕድ ምድር ላይ በሰው ባሕል የተዋጠ ፣ በመልካምና በስህተት መካከል ያለውን ድንበር መለየት ያልቻለ ፣ ኃጢአትን የሚፈታበት መዝገበ ቃላት እንኳ የሌለው ፣ እውነት አንጻራዊ ነው ብሎ የሚያምን ፣ … ሊሆን ይችላል ። ይህን ትውልድ በሚመለከት የሚያስፈልጉን ነገሮች በዓለም አቀፋዊ ቋንቋዎች ትምህርት ማዘጋጀት ፣ ዘመናዊ ቀሳውስትን ማሰልጠን ፣ ፍልስፍናን የሚያውቁ ተማሪዎችን ማብቃት … በማለት እየተዘጋጀን ይሆናል። ይህ መጠነኛ መልካምነት ሊኖረው ይችላል ። ለዘለቄታው ግን መፍትሔ መሆን የሚችል አይደለም ። ለዘለቄታው መፍትሔ የሚሆነው መንፈሳዊነትና ጸሎት እንዲሁም የስብከተ ወንጌል ጠንካራ አቅም ነው ።
እየመጣ ያለውን ትውልድ በሚመለከት የምድር ገዥዎች ፍጥነቱን ለተልእኮ ፣ ወጣትነቱን ለአገር ዕድገት ከመጠቀም ይልቅ በልዩ ልዩ ሱስ እንዲጠመድ እያደረጉት ነው ። ፊልሙ ፣ ኳሱ ፣ ፈቃድ እያገኙ የመጡት አደንዛዥ ዕፆች ነገሥታት ሬሳ ለመምራት የሚሄዱበት መንገድ ነው ። እነርሱን የማያይ ትውልድ ለመፍጠር በሱስ የተወጠረ ማኅበረሰብ እየገነቡ ነው ። ዙፋናቸውን የሚያመልኩ የጥንት ነገሥታት ሲወቀሱ ነበር ። የኮንትራት ዙፋን የሆነው የዛሬው ንግሥና ግን ከቀድሞ ይልቅ አየተመለከ ነው ። ወጣቱ ትውልድ በጨከኑ ነገሥታት ብቻ ሳይሆን በጨከኑ የሃይማኖት መሪዎችም እየተጎሳቆለ ነው ። የክርስቶስ በጎች የሆኑትን ምእመናን ሥጋቸውን ለመብል ፣ አጥንታቸውን ለጥንካሬ ፣ ቆዳቸውን ለልብስ የሚፈልጉ ብዙ የሃይማኖት ሰዎች እየተፈጠሩ ነው ። በጉን በቅጡ ሳይሆን በቁሙ ቆዳውን የሚገሸልጡ ፣ በቁሙ ሥጋውን የሚያወራርዱ አንዳንዴም በክፉ መንፈስ በመታገዝ የሚያጎሳቁሉት እየበዙ ነው ። እየመጣ ያለው ትውልድ ፈጽሞ በሃይማኖት ተስፋ ቆርጦ ከሃዲ እንዳናደርገው ማሰብ ያስፈልጋል ። ፈላስፎች ካስካዱት የእኛ ክፋት ያራቀው ትውልድ ይበዛል ። ዛሬ ያላመኑትን ለማሳመን ስናስብ ያመኑትን የሚያስክዱ ጨካኝ አገልጋዮች እየፈሉ ነው ። በእነዚህ ጨካኝ ሰዎች ብዙ ጸጋ ያላቸው ወንድሞችና አባቶች ሳይቀር ተገፍተዋል ። ባለቤቱ እየወጣም ደባሉ ተቀምጧል ። እንደ ትውልዱ በመናገር ትውልዱን ለመማረክ አስበን ከሆነ በጣም እየተናቅን እንመጣለን ። ትውልዱን የምንማርከው በአባታዊ ፍቅር ብቻ ነው ። ቤተ ክርስቲያን ከዘመናዊነት ጋር ትግል ውስጥ አይደለችም ፣ ዘላለማዊውን ይዛለች ። እየጎዳንና እያፈረሰን ያለው ትውልድን ሳይሆን ገንዘብ የመሰብሰብ ፍላጎታችን ፣ ሰው እየፈረሰ ሕንፃ ለማቆም መሮጣችን ነው ። ከአንድ ነጋዴ የተሻለ ካላሰበ አገልጋይ ሊማርክ እንዴት ይችላል ? ከመንግሥት የተሻለ ካላየች ቤተ ክርስቲያን የክርስቶስ እንደራሴነቷን ልታስጠብቅ እንዴት ትችላለች ?
ጌታ ሊያደርገው ያለውን እያወቀ ጠይቆን ይሆን ? ምናልባት ወደ መንግሥቱ ሥራ ፣ ወደ ወይኑ እርሻ ሲጠራን አቅማችንን ሳይሆን አቅሙን አይቶ ነውና አንጨነቅ ። እኛ እሺታችንን እናቅርብ ፣ እርሱ መንፈሱን ይልካል ። ዋናው የሰማነው ድምፅ የእግዚአብሔር ለመሆኑ እርግጠኛ እንሁን። እርሱ ድካማችንን ለብርታቱ ፣ ትንሽነታችንን ለልዑልነቱ መገለጫ ያደርገዋል ። እግዚአብሔር ቀድሞ እንዳንዘገይ ፣ እግዚአብሔር በሌለበትም እንዳንፈጥን ማስተዋል ያስፈልጋል ። አዎ የሚያደርገውን ያውቃል ። በነቢዩ፡- “ለእናንተ የማስባትን አሳብ እኔ አውቃለሁ ፍጻሜና ተስፋ እሰጣችሁ ዘንድ የሰላም አሳብ ነው እንጂ የክፉ ነገር አይደለም” ይለናል /ኤር. 29 ፥ 11/ ።
ነገ በእግዚአብሔር እጅ ከሆነች በእግዚአብሔር እጅ ያለ ክፉ ነገር የለም ። የሚያደርገውን እርሱ ያውቃል ። ከእኛ የሚጠበቀው መቀደስ ነው ። እኛ ስንቀደስ ነገ ድንቅ ነው ። “ነገ እግዚአብሔር በመካከላችሁ ድንቅ ነገር ያደርጋልና ተቀደሱ አለ ” /ኢያ. 3፥5/ ።

ያጋሩ

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።