የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

የመቀመጥ ምሥጢር

“ኢየሱስም፦ ሰዎቹን እንዲቀመጡ አድርጉ አለ ። በዚያም ስፍራ ብዙ ሣር ነበረበት ። ወንዶችም ተቀመጡ ቍጥራቸውም አምስት ሺህ የሚያህል ነበር ።” ዮሐ. 6 ፡ 10 ።
ከሐዋርያው ፊልጶስና ከሐዋርያው እንድርያስ ንግግር በኋላ ጌታችን የእጁን ተአምራት ለመግለጥ ተነሣ ። እነዚህ ሁለት ደቀ መዛሙርት ከጌታቸው ጋር በፍቅር ተባብረዋል ። ይህን ሁሉ መመገብ የእኛ ግዴታ አይደለም አላሉም ። አይሆንም የሚል አሳብ ሳይሆን አይበቃም የሚል አሳብ አቀረቡ ። አይሆንም ጥላቻ ፣ አይበቃም ስሌት ነው ። ከጥላቻ ስሌት የተሻለ ነው ። ጌታ እምነት ያደርገዋል ። አቅምን ማየት ማንም ሥጋዊ ፍጡር ሊያንጸባርቀው የሚችለው ሐቅ ነው ። ፍላጎት እያለ አቅም ካነሰ የጎደለው ትንሽ ነው ። ፍላጎት አቅምን ያመጣል ፣ አቅም ግን ፍላጎትን አያመጣም ። ፊልጶስ ያለንን አሟጠን ብንጠቀም የሚል አሳብ ሲያቀርብ ፣ እንድርያስ ደግሞ በመካከላችን ትንሽ አለ ፣ እርሱ የሚበቃን አይደለም አለ ። ጌታ የእንድርያስን አሳብ መነሻ ፣ ትንሹንም ነገር እንደ እርሾ አደረገው ። በመካከል ያለው ትንሽ ነገር ይሻላል ። ካልተጨበጠ ትልቅ የተጨበጠ ትንሽ ይሻላል ። “ብልህ ልጅ የሰጡትን ይዞ ያለቅሳል” ይባላል ። ማልቀሻ የምትሆነዋን ትንሽ እግዚአብሔር የዘመናት ትንግርት ያደርጋታል ። በመካከላችን ያለው ምንድነው ? ትንሽ ነገር ብቻ ሳይሆን ትንሽ የሚባሉ ብላቴናዎችስ የያዙት ምንድነው ? እያንዳንዱ ሰው ወደ ዓለም የመጣው ከእግዚአብሔር መልእክት ጨብጦ ነው ። ያንን መልእክት የምናገኘው ያን ሰው ስናከብረውና ስንጠብቀው ብቻ ነው ። ይህን ካስተዋልን እያንዳንዱ ሰው በረከታችን ነው ።

ጌታችን ሰዎቹ እንዲቀመጡ አዘዘ ። የእግዚአብሔርን በረከት ለማግኘት መቀመጥ ያስፈልጋል ። ያ ሕዝብ ምን እንደ ተመከረለት አላወቀም ። ከእርሱ ግን የሚጠበቀው አንድ ነገር ብቻ ነው ። መቀመጥ ። መቀመጥ ብዙ ዓይነት ፍቺ አለው ፡-
·        መንገድን ማቆም ነው ፡- ሰው የእግዚአብሔርን በረከት ለማየትና ለማግኘት መንገዱን ማቆም አለበት ። እግዚአብሔር ይሠራል ፣ የእኛን መንገድ እስክንጨርስ ዝም ይላል ። የራሳችንና የአገራችንን በረከት የምናዘገየው ባለ መቀመጥ ነው ። መቀመጥ ተራ መቀመጥ ሳይሆን የራስን መንገድ ጨርሶ ለእግዚአብሔር መንገድ መልቀቅ ፣ የሚሠራውን ማየት ነው ።
·        ማረፍ ነው ፡- መቀመጥ ማረፍ ነው ። ሰው እንደ ሄደ ቢቀር ይወድቅ ነበር ። መቀመጥ ግን መታደስ ነው ። አንዳንድ የድካም ቀኖችን አስታውሱ ። ከባድ ዝለትና ማረፍን የተመኘንባቸው ብቻ ሳይሆኑ እንደገና የምንበረታ አልመሰለንም ነበር ። ትንሽ ስንቀመጥ ግን ድካሙ ሄዶ ብርታት እንሞላለን ። ተንቀሳቃሽ ስልካችንን አጥፍተን ኃይል እንሞላዋለን ፣ መኪና ሞተሩ ጠፍቶ ነዳጅ ይሞላል ፣ አውሮፕላን አርፎ ጎማው ነፋስ ያገኛል ። ለመሞላት ማረፍ ግድ ነው ። የጸሎት ፣ የንባብ ጊዜዎች ኃይልን የምንሞላባቸው እንደሆኑ በተደጋጋሚ ሰምተናል፣ በተደጋጋሚ ግን ማድረግ አልቻልንም ።
·        መንገድ መልቀቅ ነው ። ከእኛ ይልቅ ለበረቱ ፣ ጊዜው ለሚረዳቸው ስፍራ መልቀቅ መቀመጥ ይባላል ። ያለፈውን ድካማችንን የምናስከብረው በመቀመጥ ነው ። እንደ ቆምኩ ወይም እንደ ሄድሁ እኖራለሁ ካልን መንገድ የዘጋንበት ትውልድ ይጠልፈናል ። ዛሬ ከትላንት ይልቅ የዛሬዎቹ ናት ። ከወደዱ ለምክር ይጥሩን ፣ እኛ ግን የትላንቱን ልፋታችንን አስከብረን በክብር መቀመጥ ይገባናል ። በእስር ቤት የተቀመጡ ሰዎች ቀድመው ያልተቀመጡና ተተኪውን ያላሰናዱ ናቸው ። ከሁሉ በላይ በድካም ዘመናችን ራሳችንን ፍጹም ለእግዚአብሔር መስጠት ይገባናል ።
·        ማየት ነው ፡- መቀመጥ መሥራት ሳይሆን ማየት ነው ። የምናየው የራሳችንን ጉድለትና ከእኛ የተሻለ ተሰጥኦ ያላቸውን ጎበዞች ነው ። እነዚህ ጎበዞች እኛን አርአያ አድርገው ማመን ፣ ባለ ራእይ መሆን ፣ መታገል ፣ አገርን መውደድ የጀመሩ ሊሆኑ ይችላሉ ። ልጆቻችን የሚሠሩትን ለማየት መቀመጥ ያስፈልገናል ። ስንቀመጥ ፍጹም የነበርን መስሎን ራሳችንን አታለነው ከነበረ ፈጽሞ እንዳንኮራ ይረዳናል ። ጊዜ ለባለ ጊዜዎች ነው ።
·        ለቀጣዩ የመሰናዶ ቦታ ነው ። መቀመጥ ተቀምጦ ለመቅረት ላይሆን ይችላል ። ለቀጣዩ መንገድ ብዙ ልምድ የምንቀስምበት ነው ። ምናልባት በግፍ ተግዘን ፣ በጉቦ ተወግዘን ፣ ቀን ባበረታቸው ስፍራ ለቀን ይሆናል ። እግዚአብሔር ሠርቶን ሊሠራብን አስቀምጦን ይሆናልና ደስ ሊለን ይገባል ። ሶምሶን አንድ ጊዜ አስበኝ በማለት ከሕይወቱ ይልቅ በሞቱ ብዙ ጠላት ደምስሷል ።
·        ለታላቅ ትንሣኤ መሠረት ነው ፡- ነቢዩ ዳዊት፡- “እግዚአብሔርም ከእንቅልፍ እንደሚነቃ ተነሣ ፥ የወይን ስካር እንደ ተወው እንደ ኃያልም ሰው” ይላል ። መዝ. 77 ፡ 65 ። ይህ ስለ ጌታችን ትንሣኤ የተነገረ ትንቢት ነው ። የወይን ስካር ይዞት የጠላቶቹ መዘባበቻ የሆነ ኃያል ሰው ፣ ደግሞም የተኛ ጎበዝ ሊለቀው እዚህ ቦታ ምን እሠራለሁ ? ቦታዬ አይደለም ብሎ በኃይል ይነሣል ። የሚዘባበቱበትም አሁን ነቅቷልና እንደ ጢስ ይበናሉ ። መቀመጥ የትንሣኤ ዋዜማ ነው ። እንደ ተቀመጡ መቅረት የለም ፣ እንነሣለን ። የተዘባበቱብንን እንበትናለን ።
·        የመጣንበትን ለማሰብም ነው ፡- ንጉሥ ዳዊት የመከራው ዘመን አለፈ ። ለእረኝነት ነጻነት ያጣ አሁን የተረጋጋ ንጉሥ ሆነ ። እርሱ ደግሞ በተራው ኦርዮንን ማስበርገግ ብሎም ለመግደል መጨከን ጀመረ ። የሠራዊት አለቆች ፣ የሕዝብ አእላፋት ከሥራው ጋር ቢተባበሩም እግዚአብሔር ግን ከዳዊት ጋር አልተባበረም ። ነቢዩን ልኮ ከተናገራቸው ነገሮች አንዱ፡- “በእስራኤል ላይ ንጉሥ ልትሆን ቀባሁህ ፥ ከሳኦልም እጅ አዳንሁህ የጌታህንም ቤት ሰጠሁህ ፥ የጌታህንም ሚስቶች በብብትህ ጣልሁልህ የእስራኤልንና የይሁዳን ቤት ሰጠሁህ ይህም አንሶ ቢሆን ኖሮ ከዚህ የበለጠ እጨምርልህ ነበር ።”  የሚል ነው። 2ሳሙ. 12 ፡ 7 – 8 ። እግዚአብሔር መንገድ ለጠፋው ንጉሥ የመጣበትን አስታወሰው ። “የምትሄድበት እንዳይጠፋህ የመጣህበትን አስታውስ” የሚባለው ለዚህ ነው ። መቀመጥ የመጣንበትን ለማስታወስ ይረዳል ።
·        ለመታከም ያግዛል ፡- ሐኪም በቁም አያክምም ። በሩጫም መድኃኒት አያዝዝም ። መቀመጥ ያስፈልጋል ። የማይቀመጥ ሰው በሽታው ላይታከም ይችላል ።
·        ለመመገብ አስፈላጊ ነው ፡- ምግብ አራት ነገሮች አሉት ። መልክ ፣ ጣዕም ፣ መዓዛ ፣ ጥቅም ። ምግብ እነዚህ አራት ነገሮች ካላስተባበረ መመገብ ከባድ ነው ። መልክ ሲያጣ ዓይን ለአፍንጫ ሪፖርት ያደርጋል ፣ አፍንጫም የራሱን ግምገማ ካደረገ በኋላ ለምላስ አሳልፎ ይሰጣል ። ምላስ ካሳለፈ በኋላ ጥቅም ይሆናል ። ለማየት ፣ ለማሽተት ፣ ለማጣጣም ማረፍ ያስፈልጋል ። በየትኛውም ዓለም የምግብ ሰዓት የተከበረ ነው ።
·        የጌታን በረከት ለመቀበል ግዴታ ነው ፡- ጌታችን በረከቱን ይሰጠናል ፣ መቀመጥ ግን ይገባናል ። ይህ መቀመጥ በእምነት ማረፍ ነው ።
 በነቢዩ በዳዊትና በነቢዩ በኢሳይያስ የተነገረውን አስታውሱ ። “ዕረፉ ፥ እኔም አምላክ እንደ ሆንሁ እወቁ በአሕዛብ ዘንድ ከፍ ከፍ እላለሁ ፥ በምድርም ላይ ከፍ ከፍ እላለሁ ።” ይላል ። መዝ. 45 ፡ 10 ። የእግዚአብሔርን ክብርና ተአምራት ለማየት ማረፍ ያስፈልጋል ። ብዙ ጊዜ የጭንቀት ጸሎታችን ተሰሚነቱ ይዘገያል ። ምክንያቱም ከእግዚአብሔር ይልቅ ችግራችን ትልቅ ስላደረግን ፣ እምነት የጎደለው ጸሎት ስለሆነ ነው ። እግዚአብሔር እየተረበሽንና እየበረገግን እንድንጸልይ አይፈልግም ። አንድ አባት ልጆ ሮጦ እቅፉ ከገባ በኋላ እንዲፈራ አይፈቅድም ። አለሁ ችግርህን ንረገኝ ፣ ማነው የመታህ ይላል ። ልጁ ከአባቱ ይልቅ ያባረረውን እኩያውን ትልቅ ካደረገ አባቱ ይበሳጫል ። እግዚአብሔር ፈጣሪ ነው ። ዓለምና  ሰዎች ፍጡራን ናቸውና እግዚአብሔር ሲያባብለን መንቀጥቀጥ የለብንም ። የእምነት ጸሎት ማቅረብ አለብን ። ብዙ ነገሮች ልባችን ሲነሣሣ ሳይሆን ስንተዋቸው ተፈጽመዋል ። በራሳቸው ሳይሆን ስናርፍ እግዚአብሔር ስለፈጸማቸው ነው ።
በነቢዩ በኢሳይያስም፡- “የእስራኤል ቅዱስ ፥ ጌታ እግዚአብሔር እንዲህ ይላልና ፡- በመመለስና በማረፍ ትድናላችሁ በጸጥታና በመታመን ኃይል ይሆንላችኋል እናንተም እንቢ አላችሁ”  ይላል ። ኢሳ. 30 ፡ 15 ። መዳን በንስሐና በእምነት ፣ ኃይልም በጸጥታና በመታመን እንደሆነ ይናገራል ። ጌታም በጥብርያዶስ ዳርቻ ሕዝቡን ተቀመጡ አለ ።
መቼም ለምለም ሣር ላይ ተቀምጠን የበላንበትን ጊዜ አንረሳውም ። ብዙ ትዝታዎች አሉን ። ያ ጊዜም በዕድሜአችን ውስጥ በጣት ለሚቆጠሩ ሁነቶች ያከናወነው ነው ። ከተለመደው ኑሮ ወጣ ብለን ፣ ጉዳይ እንደሌለን ዘና ብለን ፣ ከወዳጆቻችን ጋር ሁነን ፣ የተቋጠረውን ምግብ ፈትተን ፣ ፕሮቶኮልን ጥለን ፣ ሁላችንም በእኩልነት መሬት ላይ ተቀምጠን የበላንበት … ያ የሣር ገበታ ፣ ያ ሰማይን ጣራ ፣ ፀሐይን መብራት ፣ ሕይወት ያላቸውን ፍጥረታት ዘበኛ አድርገን የበላንበትን ጊዜ አንረሳውም ።  የጌታችን ግብዣም ልክ እንደዚህ የማይረሳ ነበር ። እግዚአብሔር የሚሠራልን እንዳይረሳ አድርጎ ነው ። አንዳንዴ የጸሎት መልሳችን የሚዘገየው ልበ ቢስነታችን እስኪወገድ ነው ። ለልበ ቢሶች ምንም አይደረግም ፣ ቢደረግም አያውቁትም ።
የተቀመጡት ሴቶችና ሕጻናት ቢሆኑም የተቆጠሩት ግን ወንዶች ናቸው። አምስት ሺህ ያህል ነበሩ ። ሴቶችና ሕጻናት ለምን አልተቆጠሩም? ብለን መጠየቃችን አይቀርም ። ሴቶች በአደባባይ ለመብላት ይቸገራሉ ። ሕጻናትም ከሚበሉት የሚፈረፍሩት ይበዛል ። ወንዶች ግን በትክክል ይበላሉ። በትክክል የሚመገቡት እንዲቆጠሩ ታዘዘ ። አዎ በእግዚአብሔር መንግሥት ለመቆጠር መሽኮርመም ፣ መፈርፈር ተገቢ አይደለም ። በትክክል ቃሉን መመገብ ያስፈልጋል ።
 በዘመናት መቆጠር ተከናውነዋል ። መቆጠር ግን የራሱ የሆነ መስፈርት ነበረው ።
1-  ከግብጽ ምድር የወጡት ተቆጥረዋል ።
2-  ለወታደርነት የሚወጡት ተቆጥረዋል ።
3-  በትክክል የተመገቡ ተቆጥረዋል ።
 መቆጠር በሰነድ ፣ በመዝገብ መታወቅ ነው ። የተቆጠረ ነገር ከለላ አለው፣ ቢጠፋ ይፈለጋል ። ለመቆጠር ከዓለም ግብር መለየት ፣ ለእግዚአብሔር መንግሥት ለመጋደል መጨከን ፣ ቃሉንና ጸጋውን በትክክል ማክበርና መጠቀም ይገባል ።

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።