የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

በምስጋና እንደ ገና መኖር

“ኢየሱስም እንጀራውን ያዘ ፥ አመስግኖም ለደቀ መዛሙርቱ ሰጠ ፥ ደቀ መዛሙርቱም ለተቀመጡት ሰዎች ሰጡአቸው እንዲሁም ከዓሣው በፈለጉት መጠን ።” ዮሐ. 6 ፡ 11 ።
የቆሙ አምስት ሺህ ሰዎችን በትክክል ማስቀመጥ ለደቀ መዛሙርቱ ትልቅ ሥራ ነው ። ጌታችን ተአምራት ማድረግ ብቻ ሳይሆን ለሁሉም በልኩ መስጠትን እያለማመዳቸው ነው ። አሁን ደጋሹ ጌታ ነው ፣ አጋፋሪዎችና አሳላፊዎች ግን ደቀ መዛሙርት ናቸው ። አጋፋሪ የሚያስፈልገው ትልቅ ነገር ትዕግሥትና ፊት አይቶ አለማድላት ነው ። ጌታው የሰጠውን እርሱ እንዳያስቀር መጠንቀቅ ያስፈልገዋል ። ለሌላ ድግስ እንዲታመን ለዛሬው ሁሉን መታገሥና ለሁሉ እንደ ተደገሰለት መጠን መስጠት ይገባዋል ። ጌታችን ደቀ መዛሙርቱን በአምስት ሺህ ሰዎች አለማመዳቸው ። ነገ ዓለሙን ሁሉ ለማገልገል ይህ የመስክ ጣቢያ ነው ። ማስቀመጥ ቀላል አይደለም ፣ ተቀመጥ ሲባል ምክንያቱን የሚጠይቅ ፣ በትዕቢት የሚተናነቅ አለ ። የጌታን ግብዣ ለማግኘት ግን መቀመጥ ያስፈልጋል ፣ ደቀ መዛሙርት በትክክል እንዲያስተናብሩ መቀመጥ ያስፈልጋል ፣ በልካቸው እንዲጠግቡ መቀመጥ ያስፈልጋል ። ዛሬ ብዙ ልቦች ቆመዋል ። መሬት መቀመጥን የጠሉ ዙፋን ላይ የሚጋደሉ ብዙ የቆሙ ወገኖች ይታያሉ ። እነዚህ ሰዎች ካልተቀመጡ ፡-
·        ለራሳቸውና ለወገናቸው የመጣ የእግዚአብሔር ግብዣ  ያልፋቸዋል ።
·        ሌሎች እንዳያገለግሉ መሰናክል ይሆናሉ ።
·        በልካቸው መጠን ሳይጠግቡ ይቀራሉ ።
ሁሉም ራሱን አጽድቆ ሌላውን ከኰነነ ፣ ራሱን ቀብቶ የሌላውን መዐርግ ከገፈፈ፣ ራሱን ሊቅ ብሎ ሌላውን ካደነቆረ የእግዚአብሔር በረከት አይመጣም ። እግዚአብሔር በረከትን የሚያመጣው ላንተ ቀጥሎ ባንተ በኩል ለወገንህ ነውና ወገንህን ከገፋህ በረከቱ አይመጣም ።
ጌታችን ጋበዘ ለመባል አይደለም እንጀራ ያበረከተው ። አምስት ሺህ ጎበዝን እስከ ልኩ አጥግቦ የእጁን ተአምራት አሳየ ። ሴቶች ትንሽ በልተዋል ፣ ሕጻናትም መጠነኛ ጎርሰዋል ። አምስት ሺህ ሰዎች ግን በታወቀ ሆቴል ከተሠራው የተለየ ዋጋ የማይተመንለት ማዕድ ቀርቦላቸዋል ። ሁለት ዓሣና አምስት እንጀራ የያዘው ብላቴና እርሱ አልተቆጠረም ። ለተቆጠሩት ግን ምክንያት ነበረ ። ሳይቆጠሩ የሚያስቆጥሩ አሉ ። የእኛን ገበታ እኛ የምንመገበው በመጠኑ ነው ። ሌሎች ግን ብዙ ሊመገቡ ይችላሉ ። ለራሳችን ከምናደርገው ለልጆቻችን የምናደርገው ይበልጣል ። እኛ ከምንበላው መጠን ሠራተኞቻችን የሚበሉት ይበልጣል ። አንድ ቅዱስ ፓትርያርክ ድግስ ደግሳችሁ አምጡ ይላሉ ። ብዙ ሰው ይጠሩና ሌላው ሲበላ እርሳቸው ያያሉ። “ቅዱስ አባታችን እርስዎ ላይበሉ ነው ወይ አምጡ የሚሉት” ሲሏቸው ፡- የእኔ ሆድ እነዚህ ናቸው እነርሱ ሲበሉ እጠግባለሁ ይሉ ነበር ። አዎ ሌሎች የእኛን ገበታ ሲበሉ ልንደሰት ይገባል ። ታማኝ ሰጪ ካልሆንን ተቀባይ ልንሆን እንችላለን ። እግዚአብሔር ዕለታዊ ተግባሩ ቦታ ማለዋወጥ መሆኑን ተወዳጅዋ እናት እመቤታችን ድንግል ማርያም ተናግራለች ፡- “በክንዱ ኃይል አድርጎአል፤ ትዕቢተኞችን በልባቸው አሳብ በትኖአል፤ ገዥዎችን ከዙፋናቸው አዋርዶአል፤ ትሑታንንም ከፍ አድርጎአል፤ የተራቡትን በበጎ ነገር አጥግቦአል፤ ባለ ጠጎችንም ባዶአቸውን ሰዶአቸዋል።” /ጸሎተ እግዝእትነ ማርያም/ ።
ጌታችን ሁለቱን ዓሣና አምስቱን እንጀራ ያዘ ፣ አመስግኖም ለአሳላፊዎቹ ለደቀ መዛሙር ሰጠ ። ደቀ መዛሙርትም ለሕዝቡ ሰጡ ። ይህ ተዋረድ ሁልጊዜም ይኖራል ። ጌታ ለአገልጋዮቹ ፣ አገልጋዮቹም ለሕዝቡ ያድላሉ ። ነገር ግን ለተቀመጡ ሕዝብ ያድላሉ ። ቆመው ቁመት እንለካካ ለሚሉ አይታደልም ። ለትሑታን ፣ እስከ መሬት ዝቅ ላሉት ግን ይታደላል። “የንጉሥ ካህናት ነን” ይላል ቃሉ ስለዚህ ሁላችንም እኩል ነን ። 1ጴጥ. 2 ፡9። ካህን የሚባል የለም ፣ ስያሜውም ስህተት ነው የሚሉ ወገኖች አሉ ። ካህን ከዕብራይስጥ የመጣ ስያሜ ሲሆን አገልጋይ ማለት ነው ። በክርስቶስ ያመኑ ሁሉ “የንጉሥ ካህናት” ተብለዋል ። አዎ ልክ ነው ተብለዋል ። ከግብጽ ምድር የወጡ የእስራኤል ልጆችም የካህናት መንግሥት ተብለዋል ። “እናንተም የካህናት መንግሥት የተቀደሰም ሕዝብ ትሆኑልኛላችሁ ።” ዘጸ. 19 ፡ 6 ። ሕዝቡ ሁሉ ካህናት ከተባሉ በኋላ እግዚአብሔር ሙሴን ፣ አሮንና ልጆቹን ለክህነት ጥራልኝ ብሎታል ። ዘጸ. 28 ፡1 ። የተዋጀ ሕዝብ ሁሉ ካህን /አገልጋይ ነው ። በልዩ ጥሪ ደግሞ የሚያገለግሉ በብሉይ ኪዳን ሌዋውያን በአዲስ ኪዳን ዲያቆናት ፣ ቀሳውስትና ጳጳሳት አሉ ። አንድ መንግሥት ሕዝቡ ሁሉ ለአገሩ ዘብ መቆም አለበት ሲል ሠራዊት ይበትናል ማለት አይደለም ። እንዲሁም የተዋጁት ሁሉ አገልጋይ ናቸው ሲባል ሙሉ ዘመናቸውን የሰጡ አገልጋዮች የሉም ማለት አይደለም ።
ትንሹን ብዙ ፣ እፍኙን እልፍ የሚያደርገው ምስጋና ነው ። በምስጋና ውስጥ ኃይል አለ ። ምስጋና በዘመናት ሁሉ የማይቻሉ ነገሮች የተቻሉበት መንፈሳዊ ኃይል ነው ። ምስጋና ከእውነተኛ ደስታና ከልባዊ ፍቅር የሚመነጭ ነው ። ምስጋና ተባባሪ የሚፈልግ ፣ ሌላውን የሚጠራ መንፈሳዊ ግብዣ ነው ። ምስጋና የሁለት ቃላት ጥምረት እንደሆነ ይነገራል ። ማሰብና መቍጠር ። ማሰብና መቍጠር ካልቻልን ምስጋና ሊኖር አይችልም ። ምስጋና ጨለማውን ብርሃን ፣ ተራራውን ሜዳ ፣ ደካማውን ብርቱ የማድረግ አቅም አለው ።
በምስጋና፡-
·        ኢዮሳፍጥ ሳይዋጋ ድል አገኘ ። 2ዜና . 20 ፡ 20 – 23 ።
·        ጳውሎስና ሲላስ ከእስር ቤት ወጡ ። የሐዋ. 16 ፡ 25 – 34 ።
·        በሁለት ዓሣና በአምስት እንጀራ ፣ አምስት ሺህ ሰዎች ጠገቡ ። ዮሐ. 6 ፡ 13 ።
·        አልዓዛር ከሞት ተነሣ ። ዮሐ. 11 ፡ 41 ።
·        ኅብስቱ ሥጋ አምላክ ፣ ወይኑ ደመ አምላክ ሆነ ። ሉቃ. 22 ፡19።
ከላይ ባየናቸው የተቀደሱ ታሪኮችና ክስተቶች ከድርጊት በኋላ ምስጋና እንደ ቀረበ አናነብም ። ከመደረጉ በፊት የቀረበ ምስጋና ነው ። ከድርጊት በፊትና በኋላ የሚቀርቡ ምስጋናዎች ልዩነት አላቸው ።
ከድርጊት በፊት ማመስገን
ከድርጊት በኋላ ማመስገን
1
በሚያደርገው አምላክ ማመን
በተደረገው ማመን
2
በራሱ በጌታ መደሰት
በሥራው መደሰት
3
በእምነት መቀበል
ተቀብሎ ማመን
4
እንደሚደረግ ማመን
በተደረገው ማመን
5
እንደሚችል ማመን
በቻይነቱ ማመን
6
ያለ ጸሎት መልስ መደሰት
በጸሎት መልስ መደሰት
ጌታችን ኢየሱስ ክርስቶስ ሁለት ዓሣና አምስት እንጀራን ከማበርከቱ በፊት አመሰገነ ። ይህ ከእኛ ልምድ ፍጹም ተቃራኒ ነው ። እኛ ከጸሎት መልስ በኋላ እናመሰግናለን ። ምስጋናችንም እንደማበረታቻና ለቀጣይ ቀብድ እንደ መክፈያ ይመስላል ። በሚሰጠው አምላክ ካላረፍን በስጦታው ማረፍ አንችልም ። ምስጋና ፡-
·        ባያድነንም ፣ እግዚአብሔር አዳኝ ስለሆነ የሚቀርብ የእምነት ፍሬ ነው ። ሠለስቱ ደቂቅ /ሦስቱ ወጣቶች/ እግዚአብሔርን የሚያምኑት እርሱ እግዚአብሔር ስለሆነ እንጂ ስለሚያደርገው ነገር አለመሆኑን መስክረዋል ። “የምናመልከው አምላካችን ከሚነድደው ከእሳቱ እቶን ያድነን ዘንድ ይችላል ከእጅህም ያድነናል ፥ ንጉሥ ሆይ ! ነገር ግን ፥ ንጉሥ ሆይ ፥ እርሱ ባያድነን ፥ አማልክትህን እንዳናመልክ ላቆምኸውም ለወርቁ ምስል እንዳንሰግድለት እወቅ አሉት ።” ዳን. 3 ፡17 ።
·        ባልገባን ነገር ላይ ምሥጢሩ ለእግዚአብሔር ነው ብለን አክብሮትን መስጠት ነው ። ሙሴ ከአርባ ዓመት አገልግሎቱ ከ120 ዓመታት የኑሮ ልምዱ በኋላም እግዚአብሔርን በሙሉነት ማወቅ አልቻለምና በመጨረሻው ሰዓት እንዲህ አለ ፡- “ምሥጢሩ ለአምላካችን ለእግዚአብሔር ነው የተገለጠው ግን የዚህን ሕግ ቃሎች ሁሉ እናደርግ ዘንድ ለእኛ ለዘላለምም ለልጆቻችን ነው”  ዘዳ. 29 ፡ 29 ።
በምስጋና ፡-
·        የደስታ ብርሃን ይፈነጥል ። ምክንያቱም ምስጋና የእግዚአብሔርን ውበት የማየት ውጤት ነውና ።
·        የሞት ጠረን ይለቃል ። ምክንያቱም ምስጋና ሕያውን አምላክ ማግኘት ነውና ።
·        ጠላት በርግጎ ይጠፋል ፣ እግዚአብሔርም ስለ እኛ ይዋጋል ። ምክንያቱም ምስጋና እግዚአብሔርን ከጉዳያችን በላይ ማላቅ ነውና ።
·        የሚነደውን እሳት ያጠፋል ፣ አሊያም እሳቱ እያለ በደህና ያሻግረናል ።
·        የወኅኒውን ደጃፍ ይከፍታል ።
·        ትንሹን ብዙ ያደርጋል ።
·        ነገርን ሁሉ ይለውጣል ።
ጸሎት ጉዳያችንን ለእግዚአብሔር ማሳወቅ ሲሆን ፣ ምስጋና ግን እግዚአብሔርን ለጉዳያችን ማሳወቅ ነው ። በምስጋና ተስፋችን ይለመልማልና ምስጋና እንደ ገና መኖር ነው ።

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።