የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

አይቶ አለማመን

“ነገር ግን አይታችሁኝ እንዳላመናችሁ አልኋችሁ ።” ዮሐ. 6 ፡ 37።
የታደሉ አምነው ያያሉ ፣ ያልታደሉ ደግሞ አይተውም አያምኑም ። አለመታደላቸው እግዚአብሔር ነሥቶአቸው አይደለም ፣ ራሳቸውን ከእውነት ባዕድ አድርገውት እንጂ ። አምነው የሚያዩ ደስታቸው ብዙ ነው ፣ አይተው የሚያምኑም የተሻሉ ናቸው ። የክርስቶስን መነሣት አይሁድ አምነዋል ፣ እንደ ተነሣ ብቻ ሳይሆን ቀድመው እንደሚነሣ አምነዋል ። ይህ እምነታቸው ግን አልጠቀማቸውም ። ክፋት ያለበት እምነት ጥቅም አይሰጥም ። ቶማስ ደግሞ አይቶ አምኗል ። ብፁዓን የተባሉት ግን ሳያዩ የሚያምኑ ናቸው ።ዮሐ. 20 ፡ 29 ። እነርሱ የታደሉ ፣ የተባረኩና ደስታ የሞላባቸው ናቸው ። አይተውም የማያምኑ አሉ ። እምነት በበጎ ፈቃድ የምንቀበለው እንጂ ጥሶን የሚገባ አይደለም ። እውነት ያስፈቅዳል እንጂ አያስገድድም ። ክርስቶስ ስለ ማንነቱ እንጂ ስለ ተአምራቱ መታመንን የሚፈልግ አይደለም ። ተአምር አይቶ ያመነ ተአምር ሲያጣ ይክዳል ።
ሦስት ዓይነት ግርዶሽ አለ ። መጨፈን ፣ አዚም ፣ ድንዛዜ ። መጨፈን ውጫዊው ዓይን ዐርፎ ውሳጣዊው ዓይን የሚነቃበት ነው ። አዚም የሚታየውን የግልጹን ትቶ ረቂቃን ፍጥረቶችን ማየት ነው ። አዚም ከርኩሳን መናፍስት የሚመጣ ክፉ ጥላ ነው ። አካልን ፣ መንፈስን ሳይቀር ያዝላል ። በጌታችን በኢየሱስ ክርስቶስ ስም ሊገሠጽ ይገባዋል ። ድንዛዜ ደግሞ ረቂቁንም ግዙፉንም ማየት አለመቻል ነው ። ይህ ከፈተና ፣ ችግርን ከመለማመድ የተነሣ የሚመጣ ነው ። አይሁድ የገጠማቸው የቱ ነው የሚለውን በጣም ሊጠና ይገባዋል ። እውነት ይሆንን ለማለት ዓይናቸውን አልጨፈኑም ። የክርስቶስን የባሕርይ አምላክነት ክደዋልና የአምላክነቱን ሥራ እየሠራ ሩቅ ብእሲ ፣ ወልደ ዮሴፍ ይሉታልና አዚም ይዟቸዋል ። ድንዛዜ እንደ ገጠማቸውም ሐዋርያው ተናግሯል ። ሮሜ. 11 ፡ 25 ።መደንዘዝ አንድ ቦታ ላይ ረጅም ሰዓት በመቀመጥ ምክንያት የሚመጣ ነው።በአንድ ዓይነት አስተሳሰብና ችግር ውስጥ በመኖራቸው ድንዛዜ ይዟቸዋል ። መጨፈን የዓለማውያን ተግባር ነው ። አይተው እንዳላየ ማለፍ ይፈልጋሉ ።አዚም አይተው እንዳላየ የሆኑ ወደኋላ የሚመለሱ አማንያን ነው ። ድንዛዜ የአይሁድ ነው ። ምክንያቱም ከአብርሃም ዘር የመጣውን ክርስቶስ ዓለሙ ሲያምነው እነርሱ ጥያቄ ሁኖባቸዋልና ።
ዓይንን መጨፈን ሁልጊዜ ክፉ አይደለም ። የሚሰሙትን ለማዳመጥ ፣ የሚያዳምጡትን ለማሰላሰል ፣ የአሳብ ወርቅ ለመፈለግ ዓይንን የሚጨፍኑ ደጋግ ሰዎች አሉ ። ዓይኑን ጨፍኖ የሚያየውን ከሚያስበው የሚያመዛዝን በጣም ጥቂት ይመስላል ። ሰዎች አትኩረው ለመስማት ዓይናቸውን ይጨፍናሉ ። በሥጋዊ ዓይን ብቻ ላለመወሰን ውስጣዊውን መብራት የሚያበሩት ዓይናቸውን በመጨፈን ነው ። በሚያዩትና በሚሰሙት ላለመፍረድ የሚፈልጉ ሰዎች ዓይናቸውን ይጨፍናሉ ። የወንድማቸውን ሐፍረት ፣ የአባታቸውን ራቁትነት ላለማየት ዓይናቸውን የሚጨፍኑ እንኳን ሊያሳዩ ራሳቸው ማየታቸውን የሚክዱ ብዙ የሴም ልጆች አሉ ። ሸፋኙ ጌታ ያደረው በሸፋኙ በሴም ድንኳን ነው ። ዘፍ. 9 ፡ 27 ። ዓይናቸውን የሚጨፍኑ ሰዎች የበለው ዘመንን ለማለፍ የታደሉ ናቸው ። የሚያዩትን ደግመው የሚያዩ ድንጋይ ለመወርወር የማይቸኩሉ ናቸው ። የሚሰሙትን ደግመው የሚሰሙ ራሳቸውን ከጸጸት የሚጠብቁ ናቸው ። ስለ አንድ ሰው አንድ ምስጋና ቢነገር ያንን ደግሞ የሚናገር የለም ፣ ስድብ ቢነገር ግን የሚያስፋፉትና ከተሳዳቢው በላይ የሚያወሩት ብዙ ናቸው ። ይህ ዓይንን ጨፍኖ ማሰላሰል አለመቻል ነው ። ታላቅ ጽሞና የሚያደርጉ ሰዎች ዕረፍት ይፈልጋሉ ። ተፈጥሮውን እያዩ ጸጥ የሚሉ ዓይናቸው ያያል ፣ አፋቸው ግን ዝም ብሏል ። ዓይናቸውን ጨፍነው እውነትን የሚያሰላስሉ ደግሞ ወደ ሰማይ ማደሪያ ገብተው የሥላሴን ፍቅር ይቀምሳሉ ።
ሐዋርያው ፡- የማታስተውሉ የገላትያ ሰዎች ሆይ ፥ በዓይናችሁ ፊት ኢየሱስ ክርስቶስ እንደ ተሰቀለ ሆኖ ተሥሎ ነበር ፤ ለእውነት እንዳትታዘዙ አዚም ያደረገባችሁ ማን ነው ?” ይላል ። ገላ. 3 ፡1 ። በመንፈስ ጀምሮ በሥጋ ፣ በጸጋ ጀምሮ በሕግ ለመፈጸም የሚፈልግ አዚም ገጥሞታል ። አዚም ቀድሞ ያዩት የነበረውን አሁን በመጣ መንፈሳዊ መጋረጃ ማየት አለመቻል ነው ። የገላትያ ሰዎች ጨርሰው ያላዩ አይደሉም ። ያዩትን የተነጠቁ ናቸው።ይህ አዚም ይባላል ። በዓላማ ላይ የተሰቀለውን በዙፋን ላይ የተቀመጠውን በደመና የሚመጣውን ከፍ ያለ ጌታ ማየት አለመቻል አዚም ነው ። ከፍ ያለውን ከፍ አለማድረግ ፣ አቻ የሌለውን ማነጻጸር አዚም ነው ። የገላትያ ሰዎች ከጸጋ ወደ ሕግ እየሄዱ ነው ። የሚገርመው እነርሱ ከአሕዛብ የመጡ በመሆናቸው ሕጉ እንኳ ርስት አይሰጣቸውም ። እስራኤልን አድራሻ ያደረገ ነውና ። ክርስቶስን ማየት ካልቻልን ሕጉ እንኳ አያማጽነንም ። የገላትያ ሰዎች አዚም ውስጥ የገቡት በብሉይ ኪዳን ቀናተኞች ግፊትና ተጽእኖ ይመስላል ። እናምናለን የሚሉ ሰዎች የሚገፉአቸው ወደ አዚም ይገባሉ ። ከአረማውያን ሰይፍ የክርስቲያን ነን ባዮች ክፋት አደገኛ ነው ። በጣም መጠንቀቅና የጠራንን ጌታ ማየት አስፈላጊ ነው ።
ድንዛዜ አንድ ቦታ ላይ ረጅም ጊዜ ከመቀመጥ የተነሣ ለመነሣት አለመቻል ነው ። ይህን ያህል ዘመን የኖርኩለትን ነገር አሁን ከመተው መሞት ይሻለኛል የሚል አስተሳሰብ ነው ። ላለፈው ዘመን ዋጋ መስጠት ተገቢ ቢሆንም ላለፈው የኃጢአት ዘመን ግን ዋጋ መስጠትና በዚያ ለመቀጠል ማሰብ ተገቢ አይደለም ። ድንዛዜ ብዙ ከማየትና ከመስማት የተነሣ ስሜት አልባ መሆንም ነው ። ሁሉን ማየት መልካም ቢሆንም ለአንዳንድ ሰው ግን መኖርን እንዲያቆም ያደርገዋል ። አዲስ ነገር የለም በማለት ሁሉንም በሰለቸ ስሜት ለመቀበል ይዳርገዋል ። ድንዛዜ ከዚህ የባሰ ምን ይመጣል ብሎ በመከራ አለመደነቅና ሁሉን ለመቀበል መዘጋጀት ነው ። ድንዛዜ ክርስቶስን ሁሉ ሲያምነው ቀድመው የተሰበኩ አይሁድ ዕድልን ማሳለፋቸው ነው ። “ከሞኝ ደጃፍ ሞፈር ይቆረጣል” እንዲሉ ።

ያጋሩ

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።