የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

… የውኃ በዓል

/ካለፈው የቀጠለ/
የዮሐንስ ወንጌል ስለ ውኃ በእያንዳንዱ ምዕራፍ ይናገራል ። ውኃ የእግዚአብሔር ስጦታን ፥ ጥልቅ ስሜትን ፥ ፍሬያማ ሕይወትን ያመለክታል ። ባለፈው ጽሑፋችን ዘጠኙን ለማየት ሞክረናል ። በዛሬውም መልእክታችን የቀሩትን የውኃ ትንታኔዎች እናያለን ።
10- የኀዘን ውኃ ፡-
ጌታ በአልዓዛር ሞት ላይ መገኘቱ ልቅሶ ሊደርስ መስሎአቸዋል ። እርሱ ግን ልቅሶን ይሽራል እንጂ ልቅሶን አይደርስም ። የአልዓዛር እህቶች መታመሙን ወደ ጌታ ልከው ነበር ። እስካሁን ያለው እምነታቸው ጌታ የታመመን እንደሚፈውስ ነው ። ጌታችን ግን የበለጠውን ሊያሳያቸው ዘገየ ። እርሱ ሙት አንሣ ነው ። አልዓዛር ከተቀበረ አራት ቀን ሆነው ። ዕለቱን ቢመጣና ቢያስነሣው ኖሮ ደንግጠን ጮህን እንጂ ሙቀቱ አልበረደም ነበር ይባል ነበር ። ጌታ ግን አስተዛዛኝ ሁሉ ከተበተነ በኋላ በአራተኛው ቀን መጣ ። ሰው ሲጨርስ እርሱ ይጀምራል ። አስተዛዛኝ ሲበተን እርሱ ይመጣል ። ጌታችን በመጣ ጊዜ የአልዓዛር እህቶች እንባቸውን ማፍሰስ ጀመሩ ። ጌታም ሩኅሩኅ ነውና እንደሚያስነሣው እያወቀ እንኳ አለቀሰ ። በሕይወቱ እንደ ሳቀ አልተጻፈም ። ሁለት ጊዜ ግን እንዳለቀሰ ተጽፏል ። የመጀመሪያው በአልዓዛር መቃብር ላይ ያፈሰሰው እንባ ነው ። ሁለተኛው ኢየሩሳሌምን ባየ ጊዜ የጥፋቷን ዘመን ተመልክቶ ያለቀሰው ልቅሶ ነው /ሉቃ. 19፥41/። ወንጌላዊው ስለዚህ ጥልቅ ውኃ ዘግቦልናል /ዮሐ. 11፥35/ ።
11- የሽቱ ውኃ ፡-
አልዓዛር ከሞት ከተነሣ በኋላ የጌታችን የሞት ጊዜ እየተፋጠነ መጣ። ሌሎች ሲነሡ የአገልጋዮች ሞት ግን እየተፋጠነ ይመጣል ። የአልዓዛር እህት ማርያም ዋጋው እጅግ የከበረ ጥሩ የናርዶስ ሽቱ ንጥር ወስዳ የኢየሱስን እግር ቀባችው ። የወሰደችው ሽቱ እጅግ ውድ ሲሆን ለአንገት እንኳ የሚሰስቱለት ነው ። ለጌታ ግን ለእግሩም አይበቃም ነበር ። እግሩ ላይ ካፈሰሰች በኋላ እንደገና አነሰባትና በጠጉሯ አበሰችው ። በትክክለኛው ጊዜ ትክክለኛውን ስጦታ አመጣች ። አይሁድ ሰው ከሞተ በኋላ መቃብሩ ላይ ሽቱ ይቀባሉ ። የተከበሩ ሴቶችም ጌታን ሊቀቡ ወደ መቃብሩ ገስግሰዋል /ማር. 16፥1/ ። እርሱ ግን እኩለ ሌሊት ተነሥቶ ስለነበር አላገኙትም ። እርሱ ለሙት የሚገባን ስጦታ ሳይቀበል ተነሣ ። ሕያው ነውና የማርያምን ሽቱ በሕያውነት ተቀበለ /ዮሐ. 12፥1-8/ ።
ሽቱ ያላቸው ብዙዎች ናቸው ። ብዙዎቹ ይህን ሽቱ የሚያስታውሱት ወዳጃቸው የሞተ ቀን ነው ። በሕይወቱ ሊቀቡት አልቻሉም ። ጊዜ ያልፍና አዝነው ይቀራሉ ። በቁም ማጽናናት ፥ በቁም መረዳዳት የማርያም ሽቱ ነው ።
12- የእግር ውኃ ፡-
ጌታችን ኢየሱስ ክርስቶስ የመጨረሻውን እራት ከበሉ በኋላ የደቀ መዛሙርቱን እግር ለማጠብ ከማዕድ ተነሣ ። እግር ማጠብ በእስራኤል ልማድ የባሪያ ተግባር ነው ። ባሪያውም እግር ለማጠብ ስለሚጸየፍ ቀድሞ እራቱን ይበላ ነበር ። ባጠበ እጁ ላለመብላት ይጠነቀቃል ። እራቱን ሳይበላ ማጠብ ግድ ከሆነበት ግን ጦሙን ማደር ይመርጣል ። ጌታችን እግር ያጠበው ከማዕድ ተነሥቶ ሲሆን ካጠበ በኋላ ግን ወደ ማዕዱ ተመልሷል /ዮሐ. 13፥1-11/ ። ባሪያ እግር ቢያጥብ የጌታውን ነው ። ጌታችን ግን እግር ያጠበው የደቀ መዛሙርቱን ነው ። ታላቅ ትሕትናን ገለጠ ። ጴጥሮስ አታጥበኝም ብሎ ነበር ። ጌታ ግን ግድ መሆኑን ሲነግረው እጄንና ራሴንም እጠበኝ አለው ። እጁ ስቶ የማልኮስን ጆሮ ይቆርጣልና ራሱም ሰንፎ አላውቀውም ይላልና ይህን ለመነ ። ጌታችን ግን የታጠበ እግሩን ከመታጠብ ሌላ አያስፈልገውም አለ ። እግርን መታጠብ በዓላማ መጽናት ነው ። ጴጥሮስን እንደገና የመለሰው ያቀረበው ልመናና የታጠበው መታጠብ ነው ። የካቶሊኩ ፖፕ ፍራንሲስ በ2016 እ.አ.አ በፋሲካ በዓል ዋዜማ የስደተኞችን እግር ሲያጥቡ ታይተዋል ። ሲያጥቡ አንዷ ኢትዮጵያዊት ነበረች ። ስቅስቅ ብላ ስታለቅስ ለመመልከት ችለናል ። በሚበልጡን መታጠብ ምን ዓይነት ስሜት እንዳለው መረዳት ያስፈልጋል ። ደቀ መዛሙርቱ በሰማይና በምድር ጌታ እጅ ሲታጠቡ ምን ተሰምቶአቸው ይሆን ? ወንጌላዊው ስለ ውኃ መዘገብ ይወዳልና ይኸው ስለ እግር ውኃ ጻፈልን ።
ዛሬም እጃችን ከመስጠት መንጠቅ ፥ ከማንሣት መጣል ለምዶ ይሆን ? የእግዚአብሔርን ለእግዚአብሔር ለመስጠት ተቆልፎ ይሆን ? ራሴን የምንልበት ሕመም አለን ? መወላወል ፥ መፍራት ፥ ከስፍራ መናወጥ ገጥሞን ይሆን ? እንደ ጴጥሮስ እንለምን ። እጄንም ራሴንም እጠበኝ እንበለው ። ጌታ ግን የችግሩን ምንጭ እግራችንን ያጥባል ። ቶሎ ከሚቆሽሹ የሰውነት ክፍሎቻችን አንዱ እጃችን ቢሆንም እግራችን ግን ብዙ ቆሻሻዎችን ይዞ ይመጣል ። እግርን መታጠብ ሁለንተናን እንደ መታጠብ ነው ። የደከመ ሰውም እግሩን ሲታጠብ ሁለንተናው ይበረታል ። እንቅልፍ የሚያስቸግራቸው ተማሪዎችም እግራቸውን ውኃ ውስጥ ሲያደርጉት ነቅተው ማጥናት ይችላሉ ። ታማሚዎች እግራቸውን ሲታሹ የውስጥ ሕመማቸው ሳይቀር መወገድ ይጀምራል ። የሰው ሁለንተና እግሩ ላይ አለ ። እግራችንን መታጠብ በዓላማችን መጽናትን ያመለክታል ። በዓላማችን ከጸናን ሌሎች ነገሮች ቀላል ናቸው ።
እግዚአብሔር ያግዘን ።

ያጋሩ

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።