የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

የአርምሞ ትሩፋቶች

4   ትዕግሥት
 ትዕግሥት ዝምታ አይደለም ። እንደ ፍግ እሳት ውስጥ ውስጡን እየተቃጠሉ ከላይ ሰላም መምሰል ይህ ትዕግሥት አይደለም ። ትዕግሥት መቀመጥ ፥ የቀን ቸርነትን መጠበቅም አይደለም ። ትዕግሥት በጸሎት አደባባይ ሆኖ እግዚአብሔርን ተስፋ ማድረግ ነው ። በትዕግሥታቸው የተመሰከረላቸው ብዙ ሰዎች ቢኖሩም ትዕግሥት ግን ከእያንዳንዱ አማኝ የሚጠበቅ መንፈሳዊ ፍሬ ነው ። የታገሡ ሰዎች የትዕግሥታቸው ምሥጢር ምን ነበረ ? ስንል ፡-
1-  የአሁኑ ገጠመኝ የመጨረሻዬ ነው ብለው አልተቀበሉትም ።
2-  የሄደው ለምን ሄደ ? ለማለት የባለቤትነት ስሜት አልነበራቸውም ።
3-  የሚፈልጉትንም እንደ ፈቃዱ ይጠብቁ ነበር እንጂ ቀን ቆርጠው በዚህ ጊዜ ይሁን አይሉም ነበር ።
4-  ሁሉም ነገር ኃላፊ መሆኑን ሲረዱ እግዚአብሔር ብቻ ቋሚ መሆኑን ያምናሉ ።
5-  ስለ እግዚአብሔር ብለው የሚቀበሉትን ነገር እንደ ሙሉ ክብር ይቆጥሩት ነበር ። በዚህ ዓለም ላይ ያሉ ሰዎች ከትልቅ ሰው ጋር አብረው ሲከሰሱ በታላቅ ደስታ እንደሚቀበሉት ።
6-  በእግዚአብሔር እውቀት ስላረፉ እርሱ ባወቀው ነገር ዋስትና አለኝ ብለው ያምኑ ነበር ።
7-  ብርሃኑ ጨለማ እንደሆነ ጨለማውም ብርሃን ይሆናል ብለው ያምኑ ነበር ። ከሌሊት በኋላ ሌሊት አይመጣምና ።
 በዚሁ ተቃራኒ ትዕግሥት ማጣትን የሚወልደው ምንድነው ስንል?
1-  መሰናክሎችን እንደ መጨረሻ መቊጠር
2-  ይህ ለምን ሆነ ? በማለት አየር መጎሰም
3-  ፈቃደ እግዚአብሔርን አለመቀበል ማለት ጊዜን ፥ ቦታንና መንገድን ለእግዚአብሔር ማመልከት
4-  ያላለፈ ነገር እንደሌለ ላያልፍም የመጣ ነገር የለም ። ትዕግሥትን ያጡ ሰዎች ግን አምላካቸውን እንዳለፈ ታሪክ ፥ ችግራቸውን እንደ ሕያው አምላክ ይቆጥሩታል ።
5-  እውነተኛ መሆን ማለት እውነትን ባላወቁና በማይወዱ ሰዎች መገፋት መሆኑን አለመረዳት
6-  ለእግዚአብሔር በጸሎት ከነገሩ በኋላ ከማረፍ እንደገና እኔው ላብጀው በማለት በአሳብ መዋተት
7-  የደስታው ጊዜ እስኪረሳ እንዳለፈ ፥ የመከራውም ጊዜ እስኪረሳ ያልፋል ብለው አለመቀበል የትዕግሥት ማጣት ችግር ነው ። በርግጥ ዛሬን ዛሬ ያለነው ብዙ አልፎ ነው ። ዛሬ ያሳላፊው ጌታ በረከት ናት ።
 እመቤታችን ድንግል ማርያም የአርምሞ ሕይወት ብቻ ሳይሆን የትዕግሥት ሕይወትም ነበራት ። ስለዚህ ከላይ የጠቀስነው ጠባይ ይታይባታል ማለት ነው ። ስምዖን አረጋዊ የአራስ ጥሪ አድርጎ የሰጣት ሰይፍ ነበር ። ስምዖንም ባረካቸው እናቱን ማርያምንም ፡- እነሆ፥ የብዙዎች ልብ አሳብ ይገለጥ ዘንድ፥ ይህ በእስራኤል ላሉት ለብዙዎቹ ለመውደቃቸውና ለመነሣታቸው ለሚቃወሙትም ምልክት ተሾሞአል፥ በአንቺም ደግሞ በነፍስሽ ሰይፍ ያልፋል አላት” /ሉቃ. 2፥34-35/ ። ሰዎች የመጨረሻ ክፋታቸውን ያለ ይሉኝታ ይገልጡበታል ። የልባቸው አሳብ ያለ ከልካይ ይገለጣል ። በመጨረሻው ክፋታቸው ላይ እርሱ የመጨረሻውን ደግነት ያሳያል ። ለሚቃወሙትም ለምልክት ተሹሟል ። በዚህ ጊዜ የመከረኛ እናት መከረኛ ናትና ፡- “በአንቺም ደግሞ በነፍስሽ ሰይፍ ያልፋል” አላት ። ስምዖን አረጋዊ ይህን ቃል ሲናገር ጌታችን የዐርባ ቀን ሕጻን ነበረ ። ልጅዋን ይህች ዓለም የምትቀበለው አበባ ይዛ ሳይሆን አፈር ይዛ መሆኑን ነገራት ። ስለ ውድ ልጅዋ ይህን መስማት በራሱ መከራ ነው ። በነፍስ ላይ የሚያልፍ ሰይፍ ብርቱ ኀዘን ነው ። ክርስቶስ መከራ በተቀበለ ዘመን ሁሉ እርስዋም ትሰቀቅ ፥ በኀዘንም ትወጋጋ ነበር ። እንደ ስምዖን ትንቢት እንዲሁ ሆነ ። ዘመኗ በሙሉ የኀዘንና የመከራ ነበር ። የቃና ጉድለት እንዲሞላ የለመነችው ይህ የመከራ ኑሮዋ እንዲለወጥ ግን አልለመነችም ። ይህ ሁሉ መሆን እንዳለበት አምናለች ። በታላቅ ትዕግሥትም በታላቅ ዝምታም ዘመኗን አሳልፋለች ። በነፍሷ ላይ ያለፈው ሰይፍ ምን ነበር ?
1- በፀነሰች ጊዜ ፡-
 አንዲት ሴት ያለ ጋብቻ ፀንሳ ብትገኝ እንድትሞት ኦሪት ታዛለች ። ያለ ወንድ ዘር የፀነሰች ድንግል ማርያምም ፅንሷ አሳሳቢ እንደሆነ ይታያል ። አሳሳቢነቱ ይህን ምሥጢር በማያውቀው በዮሴፍ ዘንድና በአይሁድ ዘንድ ነው። ምንም እንኳ ጠባቂዋ ዮሴፍ ጉዳዩ ግራ ስለ ገባው በስውር ሊተዋት ቢያስብም አሁንም በትዕግሥት ትጠብቅ ነበር ። የምሥጢር ማኅደር ነበረች። ለሰዎች ሊያስረዱት ከምክንያት በላይ የሆነ ነገር ሲገጥም ፥ አጠገብ ያለ ሰው ራሱን ገሸሽ ማድረግ ሲጀምር ምን ያህል ጭንቀት እንዳለው በውስጡ የሚያልፉ ያውቁታል ። በፀነሰችው ጌታ የአይሁድ ውግረት ፥ የዮሴፍ መሸሽ እየመጣ ይመስላል ። ይህን ሰይፍ ግን በትዕግሥት ተቀበለችው ።
እግዚአብሔር ያደረገልን ትልቅ ተአምር እንዴት እንደሆነ በሰዎች ቢታወቅ ምን አልባት ጠላት ሊያበዛ ይችላል ። ጠላትን በማጣት ብቻ አይደለም ፥ በተአምራትም እናመርታለን ። ይረዱናል የምንላቸው ያውም ደግሞ ጻድቅ የሆኑት ሊሸሹን ቢሰናዱ ሁሉም ነገር ጭልም ሊልብን ይችላል። ማሰብ ግን ያለብን እግዚአብሔር የተናገረንን ነው ። እመቤታችን ድንግል ማርያም በመልአኩ በኩል የተነገራትን አሰበች ። ያ ብቻ አይደለም ተአምራዊውን ፅንስ ተሸክማለች ። ወልድን ለመሸከም ያጸናት አሁንም ጽናት ሲሆናት እናያለን ። ዝርዝሩን ለመናገር አስቸጋሪ የሆኑ ተአምራቶችን በልብ ይዞ ማመስገን ትዕግሥት ይጠይቃል ። ለእኛ መልስ የሆነን ዝርዝር ሌሎች ቢሰሙት ጥያቄ ይሆንባቸዋል ። የድንግል ማርያም ድንግልናዊ ጽንስም በእውቀት ሳይሆን በእምነት የተቀበልነው ነው ። ዛሬም እንኳ ይህን መቀበል የሚቸገሩ አሉ ። ድንግል ማርያም ግን ይህ ሰይፍ በትዕግሥት ተቀበለች ። የአርምሞ ሕይወቷም ሰዎች እንዲረዱላት ከመድከም ጠብቋታል ። እግዚአብሔር ለሁሉም ራሱን የሚገልጥበት መንገድ ፥ የሚያነጋግርበት ቋንቋ እንዳለው ታምናለች ። ይህ ትዕግሥት ሲኖረን እወቁኝ ከሚል ጭንቀት ፥ ተረዱኝ ከሚል ልፍለፋ ፥ ሰው ላጣ ነው ከሚል መዋተት እንድናለን ። ትዕግሥት በሌሎች አለማወቅና ስህተት ተስፋ አለመቊረጥ ነው ። አርምሞ የትዕግሥት እናት ናት ።

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።