የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

ያየኸው ይድናል

የልብን ጩኸት ፣ የነፍስን መቃተት ፣ የመንፈስን አሰሳ የምታስተውል ጌታ ፣ የለም ያሉህን እየሻርህ አንተ ግን በሚያበራ ሕልውና ትኖራለህ ። ከተድላ ርቆ ልቅሶን ለተዛመደው ፣ ከሕያዋን ሸሽቶ ከመቃብር መንደር ለሚኖረው ፣ እኔ ምልምል ዛፍ ነኝ ብሎ በረሃ ላይ ብቻውን ለቆመው አንተ በፍቅር ድምፅ ታነጋግረዋለህ ። ስንጥቅ ልቡንም ገጥመህ ትይዝለታለህ ። የሚያፈሰውን ብሶት ትገድብለታለህ ። ከልቡ የትካዜን ዙፋን ትሽራለህ ፣ ከፊቱ የእንባን ጅረት ታደርቃለህ ። የእጁን ሰንሰለት ቆርጠህ ፣ የጠሉትን ወዳጅ አድርገህ ፣ በተሰደደበት ቤት ሹመህ ፣ የገዛ ነፍሱን ምርኮ አድርገህ ሰጥተህ ታኖረዋለህ ። ዓለም ቤቴ አይደለም ላለው ዓለም ሁነህ ታኖረዋለህ ። ተስፋ ሁነህ ልቡን ታበራለታለህ ። የልቅሶ ዜማን በቅዳሴ ፣ የኀዘን እንጉርጉሮን በቅኔ ፣  ደረት መድቃትን በልብ ሐሤት ትለውጥለታለህ ። የተከደነውን ሳትከፍት ፣ የተጋረደውን ሳትገልጥ ታያለህ ። ለመርዳት እንጂ ለመታዘብ አታይም ። ለማቀፍ እንጂ ለመገፍተር አትጠጋም ። አንተ የልብስ ወዳጅ አይደለህም ፣ አንተ የሰው ወዳጅ ነህ ። አንተ የሽቱ ወዳጅ አይደለህም ፣ አንተ የነፍስ ወዳጅ ነህ ። ያንተ ኅብረት ከመቆም ከመነሣት ፣ ከጤና ከበሽታ ጋር አይደለም ፣ አንተ የምታከብረው ሕይወትን ነው ። ሕይወት በአልጋም  በጎዳናም ያው ሕይወት ናት ። እኔ ግን የቁመና ወዳጅ ነኝና ሲወድቁ የለሁም ። እኔ ግን የጤና ወዳጅ ነኝና ሲያቃስቱ እሸሻለሁ ።
ጌታ ሆይ በነቀፋና በወቀሳ የደነቆረውን በፍቅርህ ዜማ ታነቃዋለህ ። እኔ ላንተ አልሆንም ያለህን ይበልጥ ትወደዋለህ ። ሊርቅህ ምክንያት የሚያቀርበውን ያለ ምክንያት ታፈቅረዋለህ ። እንደ ባሪያው እንኳ በሆንሁ ለሚልህ የልጅነት ቀለበት ታስርለታለህ ። ተርቦ ለመጣው ፍሪዳ አርደህ ትቀበለዋለህ ። የእርያ ጓደኛ የነበረውን የመላእክት ማኅበረተኛ ታደርገዋለህ ። በሰማይ በምድር በደልሁህ ላለህ ፣ በሰማይ በምድር ርስት ትሰጠዋለህ ። በገዛ እልሁ የደከመውን ፣ የገዛ ጉልበቱ የከዳውን ፣ የልጅ ባላጋራ የገጠመውን ፣ ከራሱ የተሰደደውን ያንን ፈሪ ጨለማውን ታነጋለታለህ ። ቅድስናን አልብሰህ ጽልመታዊውን ድሪቶ ትገፍለታለህ ።
የደረቀ መሬትን የምታለመልም ፣ ፍሬ አልባዋን ዛፍ የምትባርክ ፣ ደረቅ ነኝ ያለውን ጃንደረባ በቤትህና በቅጥርህ የማይጠፋ መታሰቢያና ስም የምትሰጥ አንተ ነህ ። አንተን ላለ አንተ አለህ ። እጅግ እንወድህ ዘንድ እርዳን ። በተመረጠች ቀን እንዳንተኛ አንቃን ። ክፉ ሲመለስልንም ደግ መሆንን አስተምረን ። ያየኸው ይድንልሃል ፣ እባክህ እየንና እንዳን ። ለዘላለሙ አሜን ።
የነግህ ምስጋና /7
የካቲት 23 ቀን 2012 ዓ.ም
ዲያቆን አሸናፊ መኰንን

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።