የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

ጀምበር ሳለ ሩጥ

  

ዩክሬናውያን፡- “የስኳርን ጣዕም የምታደንቀው ሎሚን ስትቀምስ ብቻ ነው” ይላሉ ። 

 

“ጅብ ከሄደ ውሻ ጮኸ” ይባላል ። ጅቡ አጥር ጥሶ ፣ በረት ሰብሮ ፣ ጠቦት ሰርቆ ከሄደ በኋላ ውሻ ይጮኻል ። ሁሉም ውሻ ሳይሆን ፈሪ ውሻ ይህን ያደርጋል ። መጀመሪያ ቢጮህ ረዳትም ምስጋናም ፣ ጉርሻም ያገኝ ነበር ። ካለቀ በኋላ በመጮኹ ግን ረዳትም ፣ ምስጋናም ፣ ጉርሻም አያገኝም ። በኩራት ከመንጎማለል በውሻነቱ ቅልስልስነት ለመኖር ይገደዳል ። በመጮኹና ባለመጮኹ መካከል ልዩነት የለም ። ሁሉም ነገር አልቋል ። ውሻው ጅቡ ሲመጣ ያልጮኸው ብቻዬን ብጋፈጥስ ? ብሎ ስለፈራ ነው ። ጅቡም ውሻውን ያልነካው ስለፈራ ነው ። ደግሞም ለጅቡ ረሀብ ከውሻው ጠቦቱ ይሻለዋል ። ጅቡ አጥር ጥሷል ፣ በረት ሰብሯል ፣ ንብረት ሰርቋል ። በጥንቱ የመጽሐፍ ቅዱስ ትርጉም “ገንዘብ አትውደዱ” የሚለውን “ከብት አትውደዱ” ይለዋል ። ከብት ጥንታዊ የሀብት መለኪያ ነው ። ውሻ ጅቡን ፈራ ፣ ጅቡም ውሻን ፈራ ። የላይ ፈሪና የታች ፈሪ ፣ ሁለቱም ፈሪዎች ፣ ሁለቱም ራሳቸውን የፈሩ ናቸው ። ውሻ ፈርቼ ነው ከማለት አንድ ቀን ባለቤቱ አርዶት የሚበላውን ከብት ዛሬ ጅብ በላው ብዬ ለምን ጠላት አተርፋለሁ? ሁለቱም ሞት ነው ብሎ ይሆናል ። ብቻ ውሻ የሚጮኸው ስለፈራም ነው ። 

 

የመጀመሪያ ጩኸት የፍርሃት ቢሆን እንኳ የድፍረት ያህል ነው ። ለንብረቱ አለሁ የሚል ባለቤቱ ይወጣለታልና ። መጀመሪያ የጮኸ ገላጋይ አያጣም ። ሁሉም ነገር ካለቀ በኋላ ጩኸት ከወቀሳና ከከሰሳ ለመዳን ይመስላል ። ውሻው አሁን ባይጮህም ሲነጋ ከብት እንደ ተሰረቀ ይታወቃል ። የመጀመሪያ ጩኸት የንቁ ሲሆን የመጨረሻ ጩኸት ግን ሪፖርት ነው ። ውሻ ግን ሥራውን አክብሮ ሳይሆን ሐሜት ፈርቶ መጨረሻ ላይ ይጮኻል ። ለመልካም ነገር አይረፍድም ቢባልም ላለፈ ሕይወት ግን ይረፍዳል ። አልረፈደም የሚባለው ከዚህ በኋላ ለውሻው ሳይሆን ለባለቤቱ ነው ። አጥሩን ማጥበቅ ፣ በረቱን መግጠም ፣ እረኛውን መሾም አለበት ። 

 

ውሻን ካነሣን ዘንድ ውሻ የሰውን ስሜት ይጋራል ። ከቅርብ ዘመናት ወዲህ ካንጀት የሚጮህ ውሻ እየጠፋ ነው ። የባለቤቱን ስሜት ይጋራልና ሰውዬው ምን ቸገረኝ ? ሲል ውሻውም ምን ቸገረኝ ? ይላል ። ጮኬ ነበር ለማለት መጮኽ እየበዛ ነው ። “ካንጀት ካለቀሱ እንባ አይገድም” ይባላል ። ካንጀት ቢሆን ብዙ ነገሮች በተስተካከሉ ነበር ። ምልክቱ እንጂ እውነቱ ጠፍቷል ። ምንደኛ እንጂ እረኛ ተሰውሯል ። ብዙ ያመለጡን ነገሮች አሉ ፣ ካለፉ በኋላ ግን ጩኸት አይጠቅምም ።

 

በኑሮህ ተመርረህ ለማን ልተንፍሰው ብለህ ይሆናል ። ዓለመ ሰብእን ሳይሆን ዓለመ መላእክትን ጠብቀህ አጉረምራሚ ሆነሃል ። አንደኛውን ቤት ጀምረህ ሁለተኛውን መሬት ስላልገዛህ ፈተና በዛ እያልህ ይሆናል ። ኑሮህ ከበቂ በላይ መሆኑ የሚገባህ ጤናህ የታወከ ቀን ነው ። አሁን ጤናን ስጠኝ ለማለት ስለ ጤናህ ያላመሰገንህበት ዘመን ፊትህ ድቅን ይልብሃል ። የራስህን ጫና ልጆችህ ላይ እየጫንህ በረባ ባልረባ ታስጨንቃቸው ይሆናል ። እነርሱም እኛን ካየ ይበልጥ ይበሳጭብናል ብለው ቶሎ ከፊትህ እልም ይሉ ይሆናል ። የሚያጭበረብሩህን ወጣቶች ፣ የሚያዋርዱህን የመንደር ልጆች ስታይ የልጆችህ ቡሩክነት ይታይሃል ። የእግዚአብሔር ትእዛዝ ልጆች ወላጆቻቸውን እንዲያከብሩ ብቻ ሳይሆን ወላጆችም በረባ ባልረባ ነገር ልጆቻቸውን እያንዳይቆጡም ይከለክላል ።  ኤፌ. 5 ፡ 4 ፤ ቈላ . 3 ፡ 21 ። በሥራ የሚራዱህ ላያረኩህ ይችላሉ ። ምክንያቱም ሥራው ላንተ ግማሽ ኑሮህ ነው ። ለእነርሱ ግን እንጀራቸው ብቻ ነው ። ያከራዩት ሙያቸውን ነው ፣ የተሻለ ሲያገኙ ለመሄድ ዝግጁ ናቸው ። አጠገብህ ለነበሩት ሙሉእነትን ፈልገህ ስትሸኛቸው ቀጥለው የሚመጡት እነዚያን የሚያስመሰግኑ ናቸው ። ከዚያ “ትሻልን ትቼ ትብስን አገባሁ” ትላለህ ።

 

ዝቅ ብሎ እግር የሚያጥቡህን አባቶች ፣ በትሕትና የሚቀርቡህን አገልጋዮች እንደ ተራ ሰው ታያቸው ይሆናል ። እነርሱ ግን ሁሉን አይተው ሁሉን ንቀውት ትሑት የሆኑ ናቸው ። በጎነታቸው ላይታይህ ፣ ላንተ መንፈሳዊ ጤንነት የሚጨነቁት ሚዛን ላይደፋልህ ይችላል ። ሥጋህን ለጥጋብ በልተው ፣ ለጥርሳችን ጥንካሬ ደግሞ አጥንቱን እንስበረው የሚሉ ፣ በሥርዓቱ ቆዳህን መግፈፍ ሳይሆን ልገሽልጠው ብለው የሚጨክኑ ሲመጡብህ ያን ጊዜ የገፋሃቸው አባቶችህ ትዝ ይሉሃል ። ዕድል ነውና ዳግም ላታገኛቸው ትችላለህ ። ፍቅርን የሚሰጡህ ቤተሰቦችህ ፣ ወጥተህ እስክትገባ የማያምኑህ ፣ ምነው ሰላም በለን እንጂ እያሉ ድምፅህን የሚናፍቁትን እንደ ዕዳ ታያቸው ይሆናል ። መንገድ ስትወድቅ ልጄን ብለው የሚጮኹ እናቶች ፣ ከብበው አየር እንድታገኝ የሚያራግቡልህ የአገርህ ልጆች ድሮም አበሻ ብለህ ታረክሳቸው ይሆናል ። ገባህ ወጣህ ፣ ተኛህ ሞትህ ትዝ የማይላቸው ፣ ካንተ ይልቅ ለውሻ ክብር የሚሰጡ ፣ አደናቅፎህ ስትወድቅ በሩቅ የሚሸሹ ወገኖች ያሉበት አገር ስትሄድ ወይ አገሬ ብለህ ታመሰግናለህ ። 

 

“ቢመታኝም አልፈታውም ፣ ቃል የገባሁት እስከ ሞት ላልተወዉ ነው” ብላ የቻለችህ ሚስትህ ትሄዳለች ። አንተ ለጉድ ትቀመጣለህ ። ያን ጊዜ “የሞትኩት እርስዋ የሞተች ቀን ነው” እያልህ በኀዘን ትቀመጣለህ ። ልጆችህን እንኳን ለመምታት በሙሉ ዓይንህ ለማየት ትፈራለህ ። መጨረሻህ እንደ ውሻ መባረር መስሎ ይሰማሃል ። የሚስትህን ደግነት ሞት ከነገረህ መካስ አትችልም ። ቃሉ ይንገርህ እንጂ የደጎችን ደግነት ሞት አይንገርህ ። የከፉ ክፉዎችን ስታይ የተሻሉ ክፉዎችን ትናፍቃለህ ። ከክፉም ክፉ ይመረጣል እንዲሉ ። 

 

ብቻ የገጠሙህ መራራ ሰዎችና ነገሮች ያላጣጣምከውን ደግነትና ፍቅር ያስታውሱሃል ። እንደ ቀላል የቆጠርካቸውን እነዚያን ፍቅሮችና ክብሮች የሰጡህ በሕይወት ካሉ ዛሬ አመስግናቸው ። ከሌሉ እነርሱን የሚወክል ጌታ አለና ይቅርታ ጠይቀው ። አሁን ከቀደሙት ቢያንሱም ያሉትን መልካም ሰዎችና ዕድሎች ተንከባከባቸው ። ፀሐይ ብርሃንዋ እየቀነሰ እንደሚሄድ ዕድሜ ሲገፋም ወዳጆችና ዕድሎች እየቀነሱ ይመጣሉ ። ያሉትን መንከባከብ ብልህነት ነው ። 

 

እባክህ ወዳጄ የስኳርን ጣዕም የሚነግርህ የሎሚ ምሬት አይሁን !

 

በደስታ ዋሉ ! 

 

የብርሃን ጠብታ 3 

 

 

ዲያቆን አሸናፊ መኰንን

 

ነሐሴ 29 ቀን 2013 ዓ.ም.

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።