ገራም

“እንግዲህ ኤጲስ ቆጶስ እንዲህ ሊሆን ይገባዋል፤…የማይጨቃጨቅ ነገር ግን ገር የሆነ” 1ጢሞ. 3፡2-3 ።

ማር ብቻ አትሁኑ ልሰው እንዳይጨርሷችሁ ፣ እሬትም አትሁኑ እንዳይተፏችሁ ይባላል ። ሚዛናዊ መሆን የምድር ኑሮን ቀላል ያደርጋል ። የሚጨቃጨቅ ሰው የሚኮሰኩስ ነው ። ማቅ ቢሞቅም ይኮሰኩሳልና ምቾት አይሰጥም ። ተጨቃጫቂም ሰው ቢያበላ ቢያጠጣ ያሳቅቃልና ዕረፍት አይሰጥም ። ተጨቃጫቂ ፋታ የማይሰጥ ነው ፣ ገራም ለጊዜና ለእግዚአብሔር እየተወ በሰው መለወጥ የሚያምን ነው ። ተጨቃጫቂ ትላንት ላይ የሚቆም ሲሆን ገራም ነገን የሚያይ ነው ። ተጨቃጫቂ ስህተትን ፈላጊ ሲሆን ገራም ስህተትን የሚሸፍን ፣ እግዜር በምድር ነው ። ተጨቃጫቂ እንደ ምዕራብ የፀሐይ መጥለቂያ ነውና ልብን ያሳዝናል ፣ ገራም እንደ ምሥራቅ የፀሐይ መውጫ ነውና ልብን ያስደስታል ።

መጨቃጨቅ አትኩሮ ማየት ነው ፣ ገራምነት ማለፍ ነው ። መጨቃጨቅ አለማለፍ ነው ፣ ገራምነት ይቅርታ መስጠት ነው ። መጨቃጨቅ ይቅርታ ሲባሉም አለማወቅ ነው ፣ ገራምነት ለሰው ሁሉ ይቅርታ ሰጥቶ መኖር ነው ።መጨቃጨቅ እኔ ብቻ ተጎዳሁ ባይነት ነው ፣ ገራምነት ላስቀይም እችላለሁ ማለት ነው ። ተጨቃጫቂነት ሕመምን አለመርሳት ነው ፣ ገራምነት የበለጠውን እያሰቡ ማመስገን ነው ። ተጨቃጫቂነት ሰው ሁሉ ችግር አለበት ብሎ ማሰብ የሚወልደው ነው ፣ ገራምነት ሰው ከነክፋቱ ጥሩ ነው ብሎ መቀበል ነው ። ተጨቃጫቂነት ነገር መቆርጠም ፣ ቃላት መሰንጠቅ ነው ፣ ገራምነት አርሞ መስማት ነው ። ተጨቃጫቂነት ወዶ መታወክ ነው ፣ ገራምነት የልብ ዕረፍት ነው ። ተጨቃጫቂነት የያዙትን አለመልቀቅ ነው ፣ ገራምነት መንገድ አጋምሶ መቀበል ፣ ሌሎችን ከነአስተሳሰባቸው ማስተናገድ መቻል ነው ። ተጨቃጫቂነት ሆዳምነት ነው ፣ ገራምነት በመጠን መኖር ነው ። ተጨቃጫቂነት በብዛት ማመን ነው ፣ ገራምነት በበረከት ማመን ነው ።

ተጨቃጫቂነት ሁሉን ነገር አጨልሞ ማየት ነው ፣ ገራምነት የተሻለ ቀን መጠበቅ ነው ። ተጨቃጫቂነት ማሩን አምርሮ ፣ ወተቱን አጥቁሮ ማየት ነው ። ገራምነት ነገርን በልኩ የሚያይ ነው ። ተጨቃጫቂነት ወንድሙ አጉረምራሚነት ነው ፣ የገራምነት ወንድሙ የዋህነት ነው ። ተጨቃጫቂነት ድንበሬ ተነካ ማለት ነው ፣ ገራምነት መነካካት ተፈጥሮ ነው ብሎ የሚያምን ነው ። ተጨቃጫቂነት አይረካምና አመንዝራነት አለው ፣ ገራምነት የከተማ መናኝ መሆን ነው ። ተጨቃጫቂነት ወርቅ አለመጥገብ ነው ፣ ገራምነት በመስጠት መደሰት ነው ። ተጨቃጫቂነት ወገናዊ ነው ፣ ገራምነት ግዛቱ ሰፊ ነው ። ተጨቃጫቂነት ነቃፊነትና ቊጣ የሚባሉ ሁለት ክንፎች አሉት ፣ ገራምነት አመስጋኝነትና ትዕግሥት የሚባሉ ሁለት እግሮች አሉት ። ተጨቃጨቂነት ለመብረር ይሻል ፣ ገራምነት ለመራመድ ይፈልጋል ። ተጨቃጫቂነት በራሱ ይናደዳል ፣ ገራምነት በእግዚአብሔር ይደሰታል ።

ተጨቃጫቂነት አምባገነን ነው ፣ ገራምነት ትሕትና ነው ። ተጨቃጫቂነት ራሱ ወድቆ የልጆቹን መቀደስ የሚሻ ነው ፣ ገራምነት ምሳሌ መሆን ነው ። ተጨቃጫቂነት ያለፈውን ስህተት የሚቆጥር ነው ፣ ገራምነት ያለፈውን ጥሩ ጊዜ የሚያስብ ነው ። ተጨቃጫቂነት የሚያስበው ያጣውን ነው ፣ ገራምነት ያገኘውን የሚቆጥር ነው ።

ገራምነት ስሜት አልባ ሁኖ ስድብና ነቀፋን አይሰማኝም ማለት አይደለም ።ገራምነት እንደ ሞኝ ተቆጥሮ ሞፈር ከደጁ ሲቆረጥ ማየት አይደለም ። ገራምነት እግሬ ላይ ቆማችኋል ብሎ ለመናገር እየታመሙ ዝም ማለት አይደለም ። ገራምነት ልብሱን ጨርሰው ቆዳውን ሲገሸልጡት አይበርደኝም የሚል አይደለም ። ገራምነት ሁልጊዜ ይቅርታ ጠይቅ ተብሎ ያለ ጥፋቱ የሚረገጥ አይደለም ። ገራምነት ሌሎች ያሻቸውን ሲያደርጉ ድንበራቸውን የማያሳውቅ አይደለም ። ገራምነት ስለ እርሱ ሌሎች እንዲናገሩለት የሚፈልግ የውክልና ኑሮ ፈላጊ አይደለም ። ገራምነት እርሱ ተበድሎ ይቅርታ የሚጠይቅ አይደለም ። ገራምነት ሰዎችን ካጣሁ ምን እሆናለሁ ብሎ ቢጭኑበት አህያ ፣ ቢለጉሙት ፈረስ መሆን አይደለም ። ገራምነት ውሻውም ዶሮውም ሲነክሰው የሚስቅ አይደለም ።

መጨቃጨቅን ብቻ መተዉ በቂ አይደለም ፣ ገራም መሆን ይገባል ። ገራምነት ቀጥሎ ያለው ነው፡-

1- ሰውን ዕድሜ እንደሚያስተምረው ፣ እግዚአብሔር እንደሚለውጠው ያምናል ።

2- ነገ የተሻለ እንደሆነ ይቀበላል ።

3- ያየውን ለማሳየት ፣ የሰማውን ለማሰማት የማይሻ ነው ።

4- የጨለመውን ልብ በፈገግታና በመልካም ቃል የሚያበራ ነው ።

5- በሁለት ዓይን ሰዎችን የማያይ ፣ በሁለት ጆሮ ሰዎችን የማይሰማ ነው።

6- ሲበድል ማሩኝ ፣ ሲበደል ይቅርታ ለማለት የማይቸገር ነው ።

7- ይቅርታ ለማድረግ የሚታገል ሳይሆን የይቅርታ ሰው ለመሆን የሚሻ ነው ።

8- ልበድል እችላለሁ ብሎ የሚያስብ ነው ።

9- የደረሰብኝ ሌሎች ከደረሰባቸው ትንሽ ነው ብሎ የሚያመሰግን ነው ።

10- ሰው መልካም ነው የሚያስብ ነው ።

11- የሰዎችን ግድፈት አትኩሮ አለማየትና አጥብቆ አለመስማት ነው።