የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

ጢሞቴዎስ ነኝ ክፍል 9

ሕሊና ያጡ ሰዎች

የወጣት አገልጋይ ፈተና

ወደ ሐዋርያው ጳውሎስ እየተጓዝሁ ሳለ ለእኔ የነበረውን አባታዊ ፍቅር በልቤ አስብ ነበር ። እንደ ልጁ እያየ ይወደኝ ፣ ነገን በብሩህ ይመለከትልኝ ነበር ። እውነተኛ አባት ልጁን እየገሠጸ በልቡ የሚያመሰግን ፣ እየተቆጣ በልቡ የሚስቅ ነው ። አባትነት ከውስጥ የሚሰማ ስሜት ነው ። ልጁም ያ ስሜት ይሰማዋል ። አባት ብሎ ለመጥራት አያፍርም ። አይጥለኝም ብሎ ይተማመናል ። ከአባት ብርና ወርቅ ሳይሆን ፍቅር ፣ ምክርና ጥንካሬ ይወረሳል ። እንኳን የሚወደን ሰው አሁን መኖሩ አይደለም ፣ ይወዱን የነበሩ ሰዎች እንደ ነበሩ ማሰብ በራሱ ሕያውነትን ያላብሰናል ። አንድ ቀን ተወድጄ ነበር ብሎ ማሰብ የልብ ሙቀትን ይጨምራል ። ብርና ወርቅ ያልቃል ፣ የምክር ሀብት ግን አያልቅም ። ምክር ለትላንት ወይም ለዛሬ ሳይሆን የነገ ስንቅ ነው ። ነገ ላይ ስላልደረስን ምክር ቀላልና ተራ ነገር ይመስለናል ። የመከሩን ሰዎች ትዝ የሚሉን ካለፉ በኋላ ነው ። ለማመስገን አሁን ጊዜው አልፏል ። ሰው ማለት ትላንት የሚባል ኃላፊ ቀን ያለው ፣ ነገ የሚባል መጪ ቀንን በተስፋ የሚጠብቅ ነው ። እንስሳት የትላንት ትዝታ ፣ የነገ ተስፋ የላቸውም ። ሰው ግን ትላንትን በይቅርታ ፣ ነገን በራእይ ውብ ማድረግ የሚችል ፍጡር ነው ።

አባት ጠንካራ ነው ። በዚህ ዓለም ላይ ቅዱስ ጭካኔ አለ ። ግንቡን ጥሶ ለማለፍ ፣ በጦርነቱ መሐል በጀግንነት ለመመላለስ ፣ በሰው ሳይሆን በራስ ፍላጎት ላይ እንቢ ለማለት የሚያስችል ቅዱስ ጭካኔ ከአባቶች ይወረሳል ። ይህች ዓለም በርኅራኄና በጭካኔ ሚዛን ተደግፋ የምትኖር ናት ።

በአገልግሎት ውስጥ ሕሊና የሌላቸው ሰዎች ይገጥማሉ ። ሰው እምነትና በጎ ሕሊና እንዲኖረው ይመከራል ። እምነት ካለው በጎ ሕሊና አለው ። በጎ ሕሊና ካለውም እምነት እንዳለው ምስክር ነው (1ጢሞ. 1፡19) ። በአገልግሎት ላይ የሚቧደኑ ሁለት ሰዎች ይገጥሙናል ፣ አንደኛው ተንኮለኛ ፣ ሁለተኛው ጅል ናቸው ። ተንኮለኛው ረቂቅ መንገድን ሲጠቀም ፣ ጅሉን ግንብ መደርመሻ አድርጎ ይጠቀምበታል ። ተንኮሉን ተንኮለኛው ሲያረቅቅ ፣ ጅሉ ድምፅ ማጉያ ሁኖ ያገለግላል ። እኔም ሄሜኔዎስና እስክንድሮስ የሚባሉ የተመረገ ሕሊና የያዙ ሰዎች አስጨንቀውኝ ነበር ። በእምነት ቤት የተቀመጡ ነገር ግን እምነት የሌላቸው ፣ ፍላጎታቸውን እንደ ሕገ እግዚአብሔር የሚመለከቱ ደንዳና ሰዎች በእግዚአብሔር ይከሰታሉ ። እነዚህ ሰዎች የሃይማኖት እውቀትም መገዛትም የላቸውም ። ነገር ግን እውቀቱ መገዛቱ ካለው በላይ ቤተኛነት ይሰማቸዋል ። አይሰብኩም ፣ ሰባኪ ይተቻሉ ፤ መገዛት የላቸውም/አይገዙም የሚገዙትን ምእመናን ለራሳቸው የክፋት ሥራ ይመለምላሉ ። ስለ ሰዎች ሁሉ ያላቸው አመለካከት ክፉ ነው ። እንደ አፍኒንና ፊንሐስ ወደ እግዚአብሔር ቤት የሚመጡ ደናግልን የሚያስነውሩ ፣ ራሳቸውን ግን እንደ ቅዱስ የሚያዩ ናቸው ። ሕሊና ስለሌላቸው የሌላውን ሕሊና አይጠብቁም ። ምእመናንን በክፉ ወሬ ይበክላሉ ። አገልጋዮችን በማማት ሥራ ይጠመዳሉ ። በእግዚአብሔር አያምኑም ፣ ግን ለእግዚአብሔር ተቆርቋሪ መስለው ይታያሉ ።

በእግዚአብሔር ቤት በይገባኛል ስሜት የሚኖሩ ፣ ራሳቸውን የቀቡ ፣ ሌላውን እያባረሩና እያስመረሩ ለመኖር ጥሪ እንዳላቸው የሚቆጥሩ በየዘመናቱ አሉ ። እነዚህ ሰዎች የተንኮል ሊቃውንት ናቸው ። ግን የተንኮል ሊቅነት ሰይጣንን ፣ ሰይጣን እንጂ ሌላ ስም እንዲያገኝ አላደረገውም ። ዕድሜአቸውን በሙሉ በተንኮል ቢኖሩም የምስክር ወረቀት ግን አልተሰጣቸውም። ክፋት እውቅና አግኝቶ አያውቅም ። ሁልጊዜ የሚያወሩት መነኵሴው ረከሰ ፣ የቤተ ክርስቲያን ገንዘብ ተሰረቀ እያሉ ነው ። ሰው ረከሰ እያለ የሚያወራ ራሱ እየረከሰ መሆኑን አያውቅም ። በቤተ እግዚአብሔር ከእውቀቱም ፣ ከመዋቅሩም ፣ ከአገልግሎቱም የሌሉ ግን አዋቂዎችን ፣ መዋቅሩን ፣ አገልግሎቱን የሚያውኩ ሰዎች አሉ ። እነዚህ ሰዎች ቤታቸውን/ትዳራቸውን ትተው በቤተ ክርስቲያን ድንኳን ተክለው የሚኖሩ ፣ እገሌ ገባ እገሌ ወጣ እያሉ ሪፖርት የሚያዘጋጁ ናቸው ። ራሳቸውን የሚያረጋጉት ደመወዝተኛ አይደለሁም ብለው ነው ። የእነርሱ ደመወዛቸው ግን ርኵስ ዋጋ የሆነው ሰውን ማሳደድ ነው ። በምእመኑና በእረኛው መካከል ገደል ይፈጥራሉ ። ለሚናገሩት ልጓም ስለሌላቸው ያመነው እንዲክድ ምክንያት ይሆናሉ ።

መነሻና መድረሻ የሌላቸው ግብ አልባ ሰዎች አገልጋዩን ፣ ወጣቱን ጳጳስ በብርቱ ያውኩታል ። ከእነዚህ ሰዎች ጋር መጋጨት የብዙ ምእመናንን ሕሊና ያውካል ተብሎ ስለሚታሰብ አይነኩም ። “ስለ ምጣዱ አይጧ ትለፍ” በሚለው ርኅራኄ ተጠቃሚ ሆነው ይኖራሉ ። ሁልጊዜ ከመታመም አንድ ጊዜ መወሰን የአገልጋዩ የአመራር ጥበብ ነው ። በቆዩ ቍጥር ካንሰር የመሆን ዕድላቸው ሰፊ ስለሆነ በዕጢነታቸው መሸኘት ያስፈልጋቸዋል ። እነዚህ ሰዎች ለንስሐ ማብቃት ከባድ ነው ። ስለ ስህተታቸው ሲነገራቸው የያዙትን የአገልጋዮች የክስ ፋይል መዘርጋት ይጀምራሉ ። በእግዚአብሔር ምሕረት ሳይሆን በድለዋል በሚሏቸው ሰዎች ስህተት የሚጽናኑ ናቸው ። ከተሸኙ በኋላ ብዙ የበቀል መንገድ ይጀምራሉ ። ስም የለኝም ስሜ ራሱ ክርስቶስ ነው ብሎ የሚያምን ይንቃቸዋል ። ቀላል ማንነት ያላቸውን ሰዎች ሊያነሣሡ ይችላሉ ። ርስታቸውን ስላጡ ብዙ ይተኩሳሉ ። በመጨረሻው ግን የሚያሸንፈው ጸጋ ነው ። ።

ሐዋርያው ጳውሎስም እነዚህ ሰዎች በሚመለከት እንዲህ አለ፡- “እምነትና በጎ ሕሊና ይኑርህ፥ አንዳንዶች ሕሊናን ጥለው፥ መርከብ አለ መሪ እንደሚጠፋ፥ በእምነት ነገር ጠፍተዋልና፤ ከእነዚያም፥ እንዳይሳደቡ ይማሩ ዘንድ ለሰይጣን አሳልፌ የሰጠኋቸው፥ ሄሜኔዎስና እስክንድሮስ ናቸው።” (1ጢሞ. 1፡19-20።)

ለሰይጣን አሳልፎ መስጠት ከቤተ ክርስቲያን እንዲለዩ ማድረግ ነው ። በቤተ ክርስቲያን መኖር ከመላእክት ጋር መዘመር ነው ። ከቤተ ክርስቲያን መውጣትም ከድኅነት መውጣት ነው ። ሐዋርያው ይህን ያደረገው ተቀጥተው እንዲመለሱ ነው ።

ይህን እያሰብሁ “ጢሞቴዎስ ነኝ” ብዬ መልስ ስሰጥ ራሴን አገኘሁት ። የጳውሎስ ቤት በሩ ሊከፈት ተቃርቧል ።

የማያገለግሉ ሰዎች የሚያገለግለውን ሰው እንዴት ያውካሉ?

ይቀጥላል

ጢሞቴዎስ ነኝ ክፍል 9

ዲያቆን አሸናፊ መኰንን
መጋቢት 9 ቀን 2016 ዓ.ም.

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።