የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

ጸሎተ እግዝእትነ ማርያም

 

“ነፍሴ ጌታን ታከብረዋለች፥ መንፈሴም በአምላኬ በመድኃኒቴ ሐሴት ታደርጋለች፤” ሉቃ. 1 ፡ 47 ።

አባቶች የብሉይ ኪዳኗ ማርያም የንስብሖ ምስጋና ፣ ከእመቤታችን ታዐብዮ ውዳሴ ጋር ትይዩ እንደ ሆነ ያስተምራሉ ። የብሉይ ኪዳኗ ማርያም ባሕረ ኤርትራ ሲከፈል ንሴብሖ – ምስጉን ነው የተመሰገነ ብላ ከበሮ ነጥቃ ፣ ሰልፍ መርታ ፣ ከፊት ወጥታ ፣ ቀዳሚት ሁና አመስግናለች ። ዘጸ . 15፡21 ። እመቤታችንም በጌታ መፀነስ ባሕረ ሞት ሲከፈል ታዐብዮ ነፍስየ – ነፍሴ ጌታን ታከብረዋለች በማለት ቀዳሚት ሁና አመስግናለች  ። በማኅፀኗ አምላክ በሥጋ እንግድነት እንደመጣ ከምድራውያን ወገን የምታውቅ እርስዋ ነበረች ። ከሰማይ ቅዱስ ገብርኤል ከምድር ድንግል ማርያም የሥጋዌው ባለ ምሥጢር ሁነዋል ። በቅዱሳን መካከል ሽሽግ የለምና ኤልሳቤጥም በመንፈስ ቅዱስ ተረድታ ድንግል ማርያምን አመስግናለች ። አድንቃለች ። “አንቺ ከሴቶች መካከል የተባረክሽ ነሽ ፥ የማኅፀንሽም ፍሬ የተባረከ ነው” ብላለች ። /ሉቃ. 1፡42 ።/ ይህን ምስጋና መልአኩ ቅዱስ ገብርኤል አስቀድሞ ለድንግል ማርያም አቅርቦ ነበር ። /ሉቃ. 1፡28 ።/ መልአኩንና ቅድስት ኤልሳቤጥም ያስተባበራቸው መንፈስ ቅዱስ ነው ። መንፈስ ቅዱስ የሞላበት ሰው እግዚአብሔር ያከበረውን ያከብራል ። መንፈስ ቅዱስ የክብር መንፈስ ነውና ። አንድ ሰው መንፈስ ቅዱስ እንዳደረበት ምልክቱ ለእግዚአብሔር ክብር ሲሰጥ እንደ ድንገል ማርያም ፣ እግዚአብሔር ያከበራቸውን ሲያከብር እንደ ኤልሳቤጥ ነው ። 

ቅድስት ኤልሳቤጥ፡- “የጌታዬ እናት ወደ እኔ ትመጣ ዘንድ እንዴት ይሆንልኛል?” በማለት ጉጉቷን ገልጣለች ። /ሉቃ. 1 ፡ 43 ።/ የእግዚአብሔር ሰዎች የሆኑትን ኤልያስና ኤልሳዕን የተቀበሉ የሰራፕታዋ መበለትና የሱነም ሴት ታላቅ በረከት እንዳገኙ የምታውቀው ኤልሳቤጥ ከሁሉ በላይ የሆነውን አምላክ በማኅፀኗ የተሸከመች ድንግል ማርያምን መቀበል ትልቅ ዕድልና በረከት መሆኑን ተገንዝባለች ። ይህን ሰላምታ ሲለዋወጡ መንገድ ጠራጊው ዮሐንስ የስድስት ወር ጽንስ ሁኖ በኤልሳቤጥ ማኅፀን ፣ የዓለሙ አዳኝ ደግሞ የዕለት ጽንስ ሁኖ በድንግል ማርያም ማኅፀን ነበሩ ። መልአኩ ቅዱስ ገብርኤልና ቅድስት ኤልሳቤጥ ሳይገናኙና ሳይነጋገሩ አንድ ዓይነት አድናቆት አስተላለፉ ። የእግዚአብሔር ሰዎችን አንድ ልብና ቃል የሚያደርጋቸው የእግዚአብሔር መንፈስ ነው ። ዛሬ ቋንቋችን ሲደባለቅ ፣ የምድሩን ጨርሰን በሰማይ ያሉትን ቅዱሳን ስንሳደብ መንፈሰ እግዚአብሔር እየራቀ መሆኑን ያሳያል ። ቡራኬውም “የመንፈስ ቅዱስ ኅብረት ከሁላችን ጋር ይሁን” የሚል ነው ። 2ቆሮ. 13 ፡ 14 ። 

የእመቤታችን ምስጋና ወይም ጸሎተ ማርያም የምንለው በሉቃ. 1፡46-55 ያለው ነው ። ይህ ምስጋና ከነቢይት ሃና ምስጋና ጋር ተመሳሳይ ነው ። እመ ሳሙኤል – የሳሙኤል እናት ሃና ልጅ ባለመውለዷ ምክንያት እንደ ተረገመች ሴት ፣ ስካርና እብደት እንደ ተቀላቀለባት ወይዘሮ ተቆጥራ ሳለ እንደ ሰው በጉድለት የማይሳለቅ ፣ ጉድለት የተባለውን እንደ ችሎታው መጠን የሚሞላ እግዚአብሔር ሳሙኤልን ሰጣት ። የመሳፍንት መጨረሻ መስፍን ፣ የነቢያት መጀመሪያ ነቢይ ፣ የመጀመሪያዎቹን ሁለት ነገሥታት ሳኦልና ዳዊትን ቀብቶ ያነገሠው ሳሙኤል የሃና የጸሎትዋ መልስ ፣ የመናቅዋ ክብረት ነበረ ። ሃና ዘመኗን በሙሉ ያማጠች እንጂ አንድ ቀን ብቻ ያማጠች ሴት አልነበረችም ። የጸሎት ምጥ ሳሙኤልን ይወልዳል ። ሃናም፡- “ልቤ “በእግዚአብሔር ጸና ፥ ቀንዴ በእግዚአብሔር ከፍ ከፍ አለ አፌ በጠላቶቼ ላይ ተከፈተ በማዳንህ ደስ ብሎኛል” በማለት አመሰገነች ። 1ሳሙ. 2፡1 ። 

የእመቤታችን የድንግል ማርያም ምስጋና ወይም ጸሎተ እግዝእትነ ማርያም ከብሉይ ኪዳን ብዙ ጸሎቶች ፣ ምስጋናዎች ፣ ቃል ኪዳንና ትንቢቶች ጋር የተስማማ ነው ። በዚህም እመቤታችን የቃለ እግዚአብሔር እውቀቷ ከፍ ያለ መሆኑን ያሳየናል ። ጸሎተ ማርያም፡- 

እውነተኛ አክብሮት የልብ መሆኑን ፣

እግዚአብሔር ነገርን የሚለውጥ አምላክ መሆኑን ፣

ትውልድን በብሩህ ዓይን ማየትን ፣

ብርቱ አምላክ በደካማ ሰው እንደሚገለጥ ፣

ማዳን የእግዚአብሔር መለኮታዊ ግብር መሆኑን ፣

እግዚአብሔር የዘረጋውን የማያጥፍ ፣ የሰጠውን የማይነሣ መሆኑን ፣

በችሎታው እንጂ በችሮታ የማይኖር ኃያል መሆኑን ፣

የትሕትና አፍቃሪ እንደሆነ ፣

ዘመናትን የሚለዋውጥ መሆኑን ፣

ችግረኛን እንደሚያስብ ፣

ሲነሣ ወይም ሲነጥቅ የሚወቅሰው እንደሌለ ፣

ከጥንት ጀምሮ ሲናገር መኖሩን ወይም ነባቢ አምላክ መሆኑን፣

የቃል ኪዳን አምላክ እንደሆነ ፣

ምሕረቱ አስታዋሽ መሆኑን ፣

እስራኤልን በልጅ ወግ መቀበሉን ወይም የሕዝቡ አባት መሆኑን የሚገልጥ ነው ። 

የእመቤታችን ምስጋና ታላቅ የነገረ መለኮት ትምህርት ቤት ነው ። በዘመናት ሁሉ የተነሡ ደጋግ አባቶች ክፉውን ከይሲ የቀጠቀጡበት የምስጋና በትር ነው ። ዘወትርም የሚጸለይ ፣ ከጸሎተ ነቢያት ጋርም የሚደርስ ታላቅ ግዳጅ የሚፈጽም ጸሎት ነው ። ስለ ሣራ ፣ ስለ ርብቃ ፣ ስለ ራሔል ፣ ስለ ሃና ፣ ስለ ኤልሳቤጥ ስንናገር ብዙዎች ደስ ይላቸዋል ። ስለ ድንግል ማርያም ሲንናገር ግን ይከፋሉ ። ለምን ይሆን ? ቀዳማዊት እመቤት እየተባለ በሚጠራበት ዘመን እመቤታችን ብለን የአምላክን እናት ስንጠራ ይነቅፉናል ። ተገቢ አይደለም ።

በአማኑኤል ስሙ ፣ በተወጋ ጎኑ ፣ በእንተ ማርያም እሙ ምሬአለሁ ፣ ይቅር ብያለሁ ይበለን ። ዘመኑን በሰላም ያሻግረን !

ዲያቆን አሸናፊ መኰንን

ነሐሴ 2 ቀን 2012 ዓ.ም.

አስተያየት ይስጡ

Leave a Reply

Your email address will not be published. Required fields are marked *

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።