“ታላቅ ተራራ ሆይ፥ አንተ ምንድር ነህ? በዘሩባቤል ፊት ደልዳላ ሜዳ ትሆናለህ” ዘካ. 4፡7 ።
የይሁዳና የብንያም ነገድ ከክርስቶስ ልደት በፊት በ586 ዓመት ወደ ባቢሎን ተማርከው ነበር ። በባቢሎንም ከተወለዱት ልጆች አንዱ ዘሩባቤል ነው ። ዘሩባቤል ማለትም የባቢሎን ዘር ማለት ነው ። ይህ ዘሩባቤል የዳዊት ዘር ሲሆን በክርስቶስ የዘር ሐረግም ውስጥም የተጠቀሰ ነው ። ማቴ. 1፡12 ። ታላቅ ክብር የነበረው የሰሎሞን መቅደስ በባቢሎናውያን ፈርሷል ። ሁለተኛው መቅደስ የተሠራው የሕዝቡ አለቃ በነበረው በዘሩባቤል ነው ። ይህንንም መቅደስ ሲሠራ በኃይሉ ሳይሆን በእግዚአብሔር መንፈስ እንደሆነ ተመስክሮለታል ። የእግዚአብሔር ሥራ ያለ እግዚአብሔር መንፈስ አይሠራምና ። ዘሩባቤል መቅደሱን የሠራው ብቻውን አልነበረም ። ካህኑ ዕዝራ ሕግን በማስተማር ፣ ነቢዩ ሐጌ ሕዝቡን በመቀስቀስ ፣ ነቢዩ ዘካርያስ የእግዚአብሔርን መልእክት በማምጣት ይሳተፉ ነበር ። ዘሩባቤልም ጠቢባንን ይዞ ከመሠረት እስከ ጉልላት ያለውን በልዩ ሙያ ያሳንጽ ነበር ።
የእግዚአብሔርን ቤት ለመሥራት ሰባኪ ፣ አስተማሪና መንገድ መሪ ነበሩ ። ሐጌ ሰባኪ ነበረ ፣ ካህኑ ዕዝራ አስተማሪ ነበረ ፣ ነቢዩ ዘካርያስ እንደ እረኛ መሪ ነበር ። በአዲስ ኪዳንም ለቤተ ክርስቲያን ሕንጸት የተሰጡ አምስት ክፍሎች አሉ ። ሐዋርያነት ፣ ነቢይነት ፣ ወንጌላዊነት ፣ አስተማሪነትና እረኝነት ናቸው ። ኤፌ. 4፡11 ። ሐዋርያትና ነቢያት መሠረት ናቸው ። ኤፌ. 2፡20 ። መሠረት ሁልጊዜ አይሠራም ፣ አንድ ጊዜ የሚሠራ ነውና ሐዋርያትና ነቢያት ሥራቸውን ፈጽመዋል ። ሕንፃው የሚያድገው በሦስቱ ጸጋዎች ነው ። በወንጌላውያን ወይም በሰባክያን ፣ በአስተማሪዎችና በእረኞች ነው ። ሰባክያን ያነቃቃሉ ፣ በሩቅ ያለውን ይጠራሉ ፣ አስተማሩዎችም የቀረበውን በእውቀት ያንጻሉ ፣ እረኞች ደግሞ የታነጸውን ይከታተላሉ ፣ ያሰማራሉ ። ዘሩባቤል ሁለተኛውን መቅደስ ሲሠራ እነዚህ የሕንጸት ሠራተኞች ነበሩ ። የአዲስ ኪዳን መንፈሳዊ መቅደስ ሲሠራም እነዚህ ሠራተኞች ይኖራሉ ። የዘሩባቤል መቅደስ ለአምስት መቶ ዓመታት ያህል አገልግሎ በ70 ዓ.ም በሮማውያን ፈርሷል ። እስከ አሁንም የመቅደሱ አንድ ግድግዳ እንደ ቆመ ቀርቷል እንጂ ሦስተኛው መቅደስ አልተሠራም ። የአዲስ ኪዳን መቅደስ የሆነው የሰው ልጅ ግን የማይፈርስ መቅደስ ነው ። የተመሠረተው በክርስቶስ ደም ሲሆን በመንፈስ ቅዱስም ወደ ፍጻሜ የሚሄድ በዘመናትና በታሪክ ውስጥ እየተሠራ ያለ ፣ ለዘላለም እግዚአብሔር የሚያድርበት የምእመናን አንድነት ነው ። ከሰሎሞን መቅደስ ይልቅ የሁለተኛው ቤተ መቅደስ ክብር እንደ በለጠ /ሐጌ. 2፡9/ ከዘሩባቤልም መቅደስም የአዲስ ኪዳን መቅደስ ክብሩ ይበልጣል ።
ዘሩባቤል መቅደሱን ሲሠራ ብዙ ፈታኝ ነገሮች ገጥመውታል ። ሥራውን እንዳያቆምም የእግዚአብሔር ቃል መጥቶለታል፡- “ታላቅ ተራራ ሆይ፥ አንተ ምንድር ነህ? በዘሩባቤል ፊት ደልዳላ ሜዳ ትሆናለህ” በማለት አጽናንቶታል ። ዘሩባቤል በፊቱ የቆመ ትልቅ ተራራ ነበር ። በዚህ ተራራ ፊትም መናገር የቻለ አይመስልም ። አንዳንድ እንቅፋቶች ቋንቋም ያስጠፋሉ ፣ ፍጹም ዲዳ ያደርጋሉ ። ስለዚህ እግዚአብሔር ተራራውን ተናገረው ። ሦስት ወገኖችን እናያለን ። እግዚአብሔር ፣ ዘሩባቤልና ተራራው ። ተራራው ዘሩባቤልን ዝም አሰኝቶታል ። ምክንያቱም በእግዚአብሔር ሥራ ውስጥ የሚመጡ ፈተናዎች ከራሳቸው የእግዚአብሔር ሰዎች ነን ከሚሉ ነውና ለመናገርም ያሳፍራል ። እግዚአብሔርም የተከዘውን ዘሩባቤልን አላናገረውም ። ለዘሩባቤል አንደበት ሁኖ ተራራውን አናገረው ። ተራራው ጆሮ ያለው ባይመስልም እግዚአብሔር ሲናገር ግን ድንጋይም ያደምጣል ።
ተራራ እንኳን ወጥተውት አይተውት የሚያደክም ነው ። ተራራ ትልቅ ችግር መሆኑን ጌታችን ተናግሯል ፡- “የሰናፍጭ ቅንጣት የሚያህል እምነት ቢኖራችሁ፥ ይህን ተራራ። ከዚህ ወደዚያ እለፍ ብትሉት ያልፋል፤ የሚሳናችሁም ነገር የለም።” ማቴ. 17፡20 ። በጌታችን አገላለጽ በትንሽ እምነት ፊት ትልቅ ችግር መቆም አይችልም ። ዘሩባቤል ሲወጣው ብቻ ሳይሆን ሲያስበው ያደከመው ተራራ አለ ። አንዳንድ ተራራዎች የሰማይ ጎረቤት ናቸው ። ሰማይን እየቧጠጡ የቆሙ ይመስላሉ ፣ አንዳንድ ችግርም እግዚአብሔር የተወን እስኪመስለን ድረስ የሚያስደነግጥ ነው ። ተራራ ጫካ ሊኖረው ይችላል ፣ ስለዚህ ጨለማ ነው ። ችግርም ቀጣዩን እንዳናይ እንቅፋት ይሆናል ፣ በዚህ ምክንያት ተስፋ መቁረጥ ይመጣል ። ተራራ የአራዊት መፈንጫ ነው ፣ ችግርም ክፉዎች በላያችን ላይ እንዲሳለቁብን የሚያደርግ ነው ።
ዘሩባቤል በገጠመው ነገር ዝም አለ ። እግዚአብሔር ግን አንደበት ሆነለት ።ዘሩባቤልን አይዞህ አላለውም ፣ ተራራውን ንዶ ደልዳላ ሜዳ አደረገለት ። ተራራው ጋርዶት የነበረው መስክ ሁሉ ተገለጠለት ። ብዙ ኃይል ያስፈልገኛል ያለው ነገር ወደፊት የሚሮጥበት መሰማሪያ ሆነለት ። ተራራውን እግዚአብሔር ደለደለለት ።
ዛሬም የእግዚአብሔርን ሥራ ለመሥራት ስንነሣ አላሳልፍ የሚል ተራራ ይገጥመናል ። ተራራው ግን መጨረሻችን አይደለም ። መጨረሻችን ሰማይ ነው ። ዘሩባቤል መስፍን ቢሆንም ፈተና ግን አልቀረለትም ። የእግዚአብሔር ሥራ ትግል አለው ። ትግል ከሌለውም ምናልባት የእግዚአብሔርን ሳይሆን የራሳችንንና የሰዎችን አጀንዳ እያስፈጸምን ይሆናል ። ከተራራው ጋር ግብግብ መግጠም ጥቅም የለውም ፤ እግዚአብሔር ተራራውን እንዲያናግረው መጸለይ በቂ ነው ። እኛስ ተራራ የገጠመን ለኑሮ ስንሮጥ ነው ወይም ለእግዚአብሔር ቤት ?
አምላኬ ሆይ በዘመናት ታማኝ ፣ በዓመታትም ያው ነህ ። ይህ ማጽናናትህ ይድረሰኝ ። ስለ ብዙ ፈተና አወራለሁ ፣ ትልቁ ችግሬ አለማመን ነውና አምንህ ዘንድ እርዳኝ ። በአንድ ፊደል ጀምሬ ይህን ሁሉ ቃል የምናገር የትላንቱ ሕፃን የዛሬ ተናጋሪ ነኝ ። ትንሹ ብዙ እንደሚሆን አስተምረኝ ። አንዴት አልፈዋለሁ የምለውን ችግር ደልዳላ ሜዳ አድርግልኝ ። እኔ ስናገር ተራራው ያፈጣል ፣ አንተ ስትናገር ደልዳላ ሜዳ ይሆናል ። የወገኖቼንም ተራራ በቃልህ ናደው ፣ በጥበብህ ደልድለው ፣ በእረኝነትህ መረማመጃ አድርገው ። ዘለላለሙ አሜን ።
የዕለቱ መና/5/
ግንቦት 4 ቀን 2011 ዓ.ም.
ዲአመ ተጻፈ አዲስ አበባ
