“እነሆ ድንግል በድንግልና ትወልዳለች” (ኢሳ 7፥14) ።
ይህ ትንቢት የተፈጸመው በተነገረበት በአይሁድ መሐል ነው። ሆኖም ግን ትንቢት ሳይነገርልን ያመነው እኛ ነን። “እነሆ ድንግል በድንግልና ትወልዳለች” (ኢሳ 7፥14) የሚሉት ቃላት የምኩራብ ናቸው ። ነገር ግን ባለቤትነቱ የቤተ ክርስቲያን ነው ። ቤተ አይሁድ የድንጋይ ጽላት አገኙ ፣ ቤተ ክርስቲያን ግን ውድ የሆነውን ዕንቁ አገኘች ። ቤተ አይሁድ ጨርቁን አቀለሙት ፣ ቤተ ክርስቲያን ሐምራዊውን መጎናጸፊያ ለበሰች ። ይሁዳ ወለደችው ዓለም ተቀበለው ። ምኩራብ አጠባችው አሳደገችው ፣ ቤተ ክርስቲያን ተቀበለችው ። የአዝመራውንም ፍሬ ሐሤት አደረገችበት ። የወይን ሐረጉ ቅርንጫፍ ከቤተ አይሁድ ጋር ነው ፣ የወይኑ ዘለላ እውነት ግን ከእኔ ጋር ነው ። ቤተ አይሁድ የወይኑን ዘለላ ሰበሰቡት አሕዛብ ደግሞ የምሥጢራዊውን መጠጥ ጠጡት ። ቤተ አይሁድ የዘር ቅንጣት በይሁዳ ዘሩ አሕዛብም በእምነት ማጭድ የምርቱን አዝመራ ሰበሰቡ ። አሕዛብ በጽድቅና በሃይማኖት ጽጌሬዳውን ቆረጡ ። ያለ ማመን እሾህ ግን አይሁድ ጋር ቀረ ። ጎጆው በሮ ሄደ ፣ ወላጆቹ ከጎጆው ጎን አንቀላፉ ። አይሁድ የፊደሉን ቅጠል ተረጎሙት ፣ አሕዛብ የመንፈስን ፍሬ ሰበሰቡት ።
“እነሆ ድንግል በድንግልና ትጸንሳለች” (ኢሳ. 7፥14)አንተ አይሁድ ንገረኝ? በመጨረሻ ማንን እንደ ወለደች ንገረኝ? ሄሮድንስን እንዳመናችሁት እኔንም እመኑኝ ። ነገር ግን እኔን በሴራችሁና በድብቅ እቅዳችሁ ምክንያት እንደማታምኑኝ አውቃለሁ ። እናንተ እንዲገድለው ፈልጋችሁ ለእርሱ ነገራችሁት ። እኔ ግን እንዳመልከው አልነገራችሁኝም ። ድንግል ማንን ነው የወለደችው ? ማንን ነው ? የፍጥረትን ጌታ ። እናንተ ዝም ብትሉም ተፈጥሮ በኃይል ጮኾ ይናገራል ። እርሷ በፈቃዱ መወለድ የፈለገውን አስገኘችው ። ይህ ተአምር በተፈጥሮ ሕግ አይቻልም ። ነገር ግን እርሱ ምንም እንኳን ሰው ቢሆንም የተፈጥሮ ጌታ ስለሆነ እንደ ሰው ሳይሆን እንደ እግዚአብሔር ይወለደ ዘንድ አዲስና እንግዳ የሆነ ልደት አስታወቀን ። ተፈጥሮንና ጋብቻን ድል ያደረገው እርሱ ዛሬ ከድንግል ተወለደ ። የቅድስና ባለቤት ለሆነው ለእርሱ ንጹሕና ቅዱስ ከሆነ ምንጭ መገኘት ይስማማዋል ። አዳምን ከብዙ ጊዜ በፊት ከድንግል መሬት የፈጠረው እርሱ ነበር ፤ ሔዋንን ደግሞ ያለ ሚስት ከአዳም ሠራት ። አዳም ከጎኑ ሴት ለብቻው እንዳስገኘው ልክ እንደዚሁ ድንግልም ያለ ወንድ ፣ ወንድ ልጅ ወለደች ።
እርሱ ሰው ሆኗልና ማን ያውቀዋል ? ማንስ ይለየዋል ? ሴቶች ለሰው ዘር ሁሉ ዕዳ ስለነበረባቸው አዳም ያለ ሚስት ሴት እንዳስገኘ በዚህ ምክንያት ዛሬ ድንግል ያለ ወንድ ወለደች ። በሔዋን ቦታ ሁናም ለወንዶች የነበረውን ዕዳ ከፈለች ። አዳም ያለ ሚስት ሴት በማስገኘቱ ትዕቢተኛ እንዳይሆን ድንግልም ያለ ወንድ ወለደች ። በዚህም ተመሳሳይ በሆነው ተአምር የሁለቱን ተፈጥሮ እኩልነት አሳየ ። ከአዳም የጎን አጥንት ሲወስድ አዳምን በምንም ዓይነት መልኩ እንዳላሳነሰው በዚህ መልኩ ማኅተመ ድንግልናዋን ሳይፈታ ለራሱ ድንግል ማኅፀን ውስጥ ሕያው የሆነ ማደሪያ ሠራ ። ከጎን አጥንቱ ከተወሰደ በኋላም አዳም ሙሉ እንደ ሆነ ነው የቀጠለው ። ልክ እንደዚሁ ድንግልም ልጅ ከወለደች በኋላ ማኅተመ ድንግልናዋ አልተፈታም ። በዚህ ምክንያት ለራሱ የሚሆን ማደሪያ ከሌላ ቦታ አላመጣም ሌላ አካል ፈጥሮም አልተዋሐደም ። የአዳምን አፈርነት የሚዘልፍ እንዳይመስል የአዳምን ሥጋ ተዋሐደ ።
ሰው በሰይጣን ከተታለለ በኋላ የሰይጣን መሳሪያ ሆኖ ነበር ። በዚህ ምክንያት ከፈጣሪው ጋር ባለው ግንኙነት መሠረት ከሰይጣን ቁራኝነት ይለየው ዘንድ ተጥሎ የነበረውን ሕያው ማደሪያ መለሰው ። ሆኖም ግን ሰው ቢሆንም የተወለደው እንደ እግዚአብሔር ነው ። እርሱ እንደ እኔ በተለመደ ጋብቻ ተወልዶ ቢሆን በብዙኃኑ ዘንድ እንደ ውሸት ይታሰብ ነበር ። ነገር ግን አሁን እንደሆነው በዚህ ምክንያት ነበር ከድንግል የተወለደው ። ይህ ተአምራዊ የሆነ ልደት ለእኔ የታላቅ እምነት ምንጭ ይሆንልኝ ዘንድ ማኅፀኗን አልለወጠውም ፣ ማኅተመ ድንግልናዋም እንዳይፈታ ጠበቀው ። ስለዚህ ግሪካዊ ወይም አይሁዳዊ በባሕርይው አምላክ የሆነው ክርስቶስ ከተፈጥሮ ሕግ በተቃራኒ ሰው ሆነ ወይ ? ብሎ ቢጠይቀኝ ያልተፈታውን ማኅተመ ድንግልናዋን ለክርክሬ ምስክርነት በመጥራት “አዎ” ብዬ እመልሳለሁ ። በዚህ መንገድ እግዚአብሔር ከተፈጥሮ ሕግ በላይ መሆኑን አሳይቷል ። በዚህ መንገድ የማኅፀን ፈጣሪ የድንግልናም ምንጭ ነው ። ምክንያቱም ልደቱንና የመወለዱን መንገድ ንጹሕ አድርጎታል ። ራሱ በወደደው መንገድም ሊገለጥ በማይችል መልኩም ለራሱ ማደሪያ አዘጋጀ ።
ስለዚህ አይሁዳዊ ሆይ ንገረኝ ድንግል ወለደች ወይስ አልወለደችም ? ከወለደች ልዩ የሆነውን ልደት መስክር ። ካልወለደች ግን ለምን ሄሮድስን አታለልከው ? ሄሮድስ ክርስቶስ የት እንደሚወለድ ሲጠይቅ በይሁዳ ቤተ ልሔም እንደ ነበረ ነገረኸዋል ። እኔ መንደሩን ወይም ቦታውን አውቃለሁን ? እኔ የተወለደውን የእርሱን ጥቅም/ዋጋ አውቃለሁ ? ኢሳይያስ እንደ እግዚአብሔር አልጠቀሰውምን ? እሱ እንዲህ ይላልና፡- “ወንድ ልጅም ትወልዳለች፥ ስሙንም አማኑኤል ብላ ትጠራዋለች” (ኢሳ 7፥14) ። እናንተ የማትረቡ ጠላቶች እውነትን አታገናዝቡምን ? እናንተ ሕጉን አጥብቃችሁ የምትከተሉ ፀሐፍትና ፈሪሳውያን ስለ እርሱ የሚነገሩትን ሁሉንም ነገሮች አትነግሩንምን ? እኛ ዕብራይስጥኛ እናውቃለንን ? መጻሕፍትን አትተረጉሙምን ? ድንግል ከወለደች በኋላ እና ከመውለዷ በፊት ስለ እግዚአብሔር የተነገረውን ሄሮድስ ሲጠይቃችሁ የተናገራችሁት ቃል እንዲያምናችሁ ነቢዩ ሚክያስን እንደ ምስክር አላመጣችሁምን ? እርሱ እንዲህ ይላልና፡- “አንቺም ቤተ ልሔም ኤፍራታ ሆይ፥ አንቺ በይሁዳ አእላፋት መካከል ትሆኚ ዘንድ ታናሽ ነሽ፤ ከአንቺ ግን አወጣጡ ከቀድሞ ጀምሮ ከዘላለም የሆነ፥ በእስራኤልም ላይ ገዥ የሚሆን ይወጣልኛል” (ሚክ 5፥2) ። ነቢዩ ከእናንተ በተሻለ በደንብ አድርጎ ይናገራል ።
እርሱ ከእናንተ መሐል ወደ ዓለም መጣ ። ጥንት የነበረው አካላዊ ቃል ሲመጣ ከዚህ ቀደም ያልነበረው ሥጋ ተፈጠረ ህልውም ሆነ ። ነገር ግን ዛሬ በአንድ በኩል ሰው እንደ መሆኑ ሕዝቡን እረኛ ሆኖ እየጠበቀ እንደ አምላክነቱ ደግሞ ዓለምን ለማዳን ዛሬ ተወለደ ። ኦ መልካም ጠላቶች! ኦ በጎ አድራጊ ከሳሾች! ሳታውቁ እግዚአብሔር በቤተ ልሔም እንደሚወለድ ያሳወቃችሁ ፣ በረት ውስጥ የተሰወረውን ጌታ የጠቆማችሁ፤ ዋሻ ውስጥ የተኛውን ሳትፈቅዱ የገለጣችሁት፤ ሳታውቁ የደገፋችሁን፤ እርሱን ለመደበቅ እየፈልጋችሁ የገለጣችሁት (እናንተ መልካም ጠላቶች! በጎ አድራጊ ከሳሾች!)። አላዋቂ የሆኑ አስተማሪዎቻችሁን አያችኋቸው? የሚያስተምሩትን አይረዱትም ። የተራቡ ሲሆኑ ምግብ ይሰጣሉ ፣ የተጠሙ ሲሆኑ ውኃ ያጠጣሉ ። ድሃ ሆነው ሳለ ሌሎችን ባለ ጸጋ ያደርጋሉ ።
የመወለዱ ነገር ድንቅ ነውና ፡ የበዓሉ ምሥጢር እንግዳ ነውና ስለዚህ ኑ በዓል እናድርግ። ኑ እናክብር ። ዛሬ ጊዜያዊው የባርነት ቀንበር ተሰብሯል ። ሰይጣን አፍሯል ፣ አጋንንት ሸሽተዋል ፣ ሞት ተሸንፏል ፣ ገነት ተከፍቷል ፣ እርግማን ጠፍቷል ፣ ኃጢአት ከመንገዳችን ተወግዷል ፤ ስህተት ከእኛ ርቋል ፤ እውነት ተመልሷል ፤ የሃይማኖት ቃል ሁሉም ቦታ ተስፋፍቷል ።
ይቀጥላል
