“ወንድሞች በኅብረት ቢቀመጡ፥ እነሆ፥ መልካም ነው፥ እነሆም፥ ያማረ ነው።” መዝ. 132 ፡ 1።
አንድነት በአንድ አዳራሽ መቀመጥ ሳይሆን በአንድ አሳብ መስማማት ነው ። በአንድ ላይ ተቀምጠው ኅብረት የሌላቸው አያሌ ናቸው ። የአገራት መሪዎች ፣ የአገር አስተዳዳሪዎች ፣ የቤተ ክርስቲያን አለቆች ፣ የክርስቲያን ማኅበሮች በአንድ አዳራሽ ይቀመጡ ይሆናል ። በዲፕሎማሲ መሸነጋገል ፣ በፖለቲካ ስልት ፣ ባለመተማመን ፣ እንደ ጠላት በመተያየት በአንድ አዳራሽ መቀመጥ ለዛሬ ዘመን ቀላል ተግባር ሁኗል ። ነቢዩ ያለውን እናስተውል “በኅብረት ቢቀመጡ” ይላል ። ውስጥ ልብሱ በተገለጠበት ፣ አንዱ የአንዱን ዕራቁት ለማውራት በሚቸኩልበት ፣ “እገሌን ሲያወራ ቀዳሁት” እየተባለ ወንድም ወንድሙን በሚሰልልበት ፣ በደግ ዘመን ለክፉ ቀን ይሆነኛል ተብሎ ነውር እንደ መረጃ የሚያዝበት በዚህ ዘመን አንድነት የሚናፈቅ ነው ።
ሰዎች ለመገናኘት ሳይሆን ላለመገናኘት በሚመኙበት ፣ “ላለመስማማት እንስማማ” የሚል ፈሊጥ በጠነከረበት ፣ ሰው ጎረቤቱን አኩርፎ ሩቅ አገር ካለ ሰው ጋር በማኅበራዊ መገናኛ በሚያወራበት የሕልም ዘመን አንድነት እየተሸኘ ይመስላል ። በማኅበራዊ መገናኛ 5ሺህ ጓደኛ ሊኖረን ይችላል ። አንዱም ስንጨነቅ አይደርስልንም ። “ከሩቅ ዘመድ የቅርብ ጎረቤት” የሚባለው እውነት ነው ። ቤትህ በእሳት ቢነድድ ጎረቤትህ እንጂ ዘመድህ አያጠፋውም ። አካላዊም አሳባዊም መቀራረብ እርሱ ኅብረት ይባላል ። በቅርብ ዘመን የተከሰተው ወረርሽኝ ዓለምን በመከራ አንድ ያደረገ ነበር ። ተራርቆ መቆም ፣ አለመጨባበጥ ፣ “የምንራራቀው ስለምንዋደድ ነው የሚል መፈክር በዝቶ ነበር ። በሽታዎች ባሕል ጥለው ይሄዳሉና ዛሬም መጨባበጥ ፣ መቀራረብ ይረብሸናል ። የሰው ልጅ የጀመረውን ነገር ለመጀመር ይቸገራል ፣ ከጀመረ በኋላ ለማቆም አቅም ያጣል ። ለመጀመር አቅም ያጣው ፣ ለማቆም አቅም ያጣል ። ሰው የተሰጠውን የሚያሳድግ ነው ። ተራርቆ መቆምን ፣ ተራርቆ በመኖር ፣ መዋደድን ባለመጣላት እየተካው ነው ። ከዚህም ከባሰ ለጭንቀት እንዳረጋለንና ኅብረት ያስፈልጋል ።
ሰዎች ተሰብስበው ሲታዩ “እዚያ ጋ ችግር አለ ወይ?” ይላል ። መሰብሰብን የሚፈጥር ችግር ነው ። ኅብረት ካለም ችግር አለ ። ግን ቅዱስ ችግር ነው ። ሰዎች ሲሰባሰቡ የጸጥታ አካላት በንቃት ይከታተላሉ ። ኅብረት ሲኖር አስፈሪ እንሆናለን ። መሣሪያ የያዙ መሣሪያ ያልያዙትን ይሰጋሉ ። ነቢዩ ዳዊት የገዛ ልጆቹን በማሰብ ያስተላለፈው ምክር ሊሆን ይችላል ። ኅብረት በማጣት የገዛ ልጆቹ አንዱ አንዱን አስነውሯል ። አንዱ አንዱን ገድሏል ። በመጨረሻም የልጆች የመለያየት ጦስ ወደ ዳዊት መጥቶ አቤሴሎም አባቱን ከዙፋን አባሯል ። ልጆች ኅብረት ሲያጡ ወላጆች ትልቅ ኀዘንና ስጋት ውስጥ ይገባሉ ። ለውርደትም ይዳረጋሉ ። ደግ ደግ አይወልድምና የዳዊት ልጆች ክፉዎች ነበሩ ።
መልካም የሚለው ቃል የልብ ችሎት የሚሰጠው የመጨረሻው ዳኝነት ነው ። መልካም ለጠባይ የሚጠቀስ ቃል ነው ። ያማረ የሚለው ደግሞ ለውበት የሚጠቀስ አድናቆት ነው ። የመልካም ሰው መገለጫው ኅብረት መውደዱ ነው ። ከአበቦች ፣ በብዙ ምሰሶ ከቆሙ ሕንፃዎች ይልቅ ኅብረት ውበት አለው። ኅብረት እግዚአብሔርን የሚያስደስተውን ያህል ሰይጣንን ያበሳጨዋል ። ሰይጣን ከደከመ ምእመን ይልቅ የተበተነ ኅብረትን ማየት ደስ ይለዋል ። የእያንዳንዱ ምእመን ድካም ሙሉውን ኅብረት ይጎዳዋል ። የምንበረታው ለዚያ ሰው ስንልም ነው ። እኔ የእኔ ብቻ አይደለሁም ማለት ይገባናል ። ዛሬ እግዚአብሔር ወደ አገራችሁ እመጣለሁ ቢለን ምን እናዘጋጅልህ ? ማለታችን አይቀርም። እርሱም፡- “እኔ የምበላው ድግስ ፣ የምቀበለው መልካም ስጦታ ፣ ያማረው አበባ ኅብረታችሁ ነው” ይለናል ። ኅብረት በአንድ ባንዲራ ማጌጥ ብቻ ሳይሆን እውነተኛ መቀባበል ነው።
ይቀጥላል ዕለተ ብርሃን 13
ዲያቆን አሸናፊ መኰንን
መስከረም 24 ቀን 2016 ዓ.ም.
