አንተ አንተ ነህ !

ያህዌ እኔ ፣ እኔ ነኝ በል ። አንተ ብቻ አንተ ነህና ። ሰውማ ፣ እርሱ እርሱ አይደለም ። ቀን ለሌሊት ሰውና አውሬ ሁኖ ይለዋወጣል ። የበጀን አለመተዋወቃችን ፣ ጠብን ያዘገየው ተሸፍነን መኖራችን ነው ። በተላጥን ቍጥር ብዙ ክፍል ያለን ሽንኩርት ነን ። ዕርቃንህን ተሰቅለህ የምታምር ኢየሱስ ሆይ አንተ ብቻ ነህ ። ካባ ለብሰን ፣ በሐር ደምቀን የምናስቀይም እኛ ነን ። አዎ እኔ ፣ እኔ ነኝ በል ። እርግጠኛ ነገር ባጣንበት ዓለም ላይ እርግጥ ሁንልን ። የብሱ እንደ ባሕር ፣ ቀኑ እንደ ሌሊት እንዳይሆንብን እኔ ነኝ በለን ። የሚያስፈራው እንዳስፈራን እንዳይቀር ፣ ቍስል ወደ ጥዝጣዜ ፣ ደሙም ወደ መመርቀዝ ፣ ሰንኮፉም ወደ ነቀርሳ እንዳይሄድብን እኔ ነኝ በለን ። እኛ እኛ ባንሆንም ፣ አንተ አንተ ነህና እንጽናናለን ። ሁላችን ስናብድ ታረጋጋናለህ ። እኔ ነኝ ባይነትህን ፣ ከሺህ ዘመን በፊት የተናገርህበት የድምፅህ ያውነት ይማርከናል ። ሸምግለህ የምትጦረን ፣ በዘመን አርጅተህ የምታድሰን አንተ ብቻ ነህ ። አዎ እኔ ነኝ በለንና ቃላባዮችን እንርሳቸው ። ፎክረው አለሁ ብለውን ፣ ምለው ሲክዱን በጸናው ጽናትህ አቁመን ።

“መንፈስን ሁሉ አትመኑ” ተብለናል ። አንድ መንፈስ የምናምንህ አንተ ነህ ። ጊዜ አይገድብህም ፣ መነሻ የለህምና ። ስፍራ አይወስንህም ፤ ሰማያት ባንተ ውስጥ ናቸውና ። ከስፋትህ የሰፋ ፣ ተርፎ የወጣ ማንም የለም ። ብርሃን ፣ ነፋስና ሙቀት ሁሉም ዓለምን ቢሞሉም አይገፋፉም ። ፍጹማን የሦስትነት አካላትህም ዓለምን ሞልተዋል ፣ መገፋፋት የለባቸውም ። አንተ አንተ ነህ ። ዕጣ አውጥተው ልብስህን የተካፈሉህ ፣ ዕጣ ሳታወጣ ግን ሁሉንም የወደድካቸው አንተ እንደ ራስህ ነህ ። የተደረገለት ያመሰግንሃል ። ትኩስ እንጀራ ከቆረስክላቸው የድሀ ልጆች ወገን ላንተ ምስጋና ይገባሃል ። ባለማወቅ ለጠፋው ዓለም ብርሃን ይሆኑ ዘንድ ሰባክያንን የላክህ እንዴት ድንቅ ነህ ! አንተ አንተ ነህ ፤ ለሚገድሉህም ምሕረት ትሰጣለህ ። ሞት አይለውጥህምና ሞትን ትቋቋማለህ ። እጆቻችን ሲያጥሩ እጅህ በሚያፈስሰው በረከት እንጠግባለን ።

አንተ ፣ አንተ ነህ ። እኛን ደስ ለማሰኘት ያለቀስህ ። ያስለቀስከው ምስኪን የሌለ ገዥ አንተ ብቻ ነህ ። የጠፋውን አዳም ወደ ቤቱ ልትመልሰው ቤት አልባ ሁነህ ኖርህ ። እኛ ቸግሮን እንቸገራለን ፣ አንተ ወደህ ፈቅደህ የባርያን መልክ ያዝህ ። እንደ ሰው መኖርና መሞት ብቻ አይደለም ፣ ላንተ ሰው መሆን በራሱ ድህነት ነው ። አንተ ካልወረድህ ወደ ላይ አንወጣምና ስለ እኛ ዝቅ አልህ ። መሪዎች ካልወረዱ ሕዝብን ከፍ አያደርጉትምና ፣ ዝቅ ብለው ድሀን ካላዳመጡ ዕንባ አይቆምምና ልታስተምራቸው ትሑት ሆንህ ። አዎ አንተ ፣ አንተ ስለ ሆንህ ዳንን ። ዋጋ እንዳትሰጠን ምን አለን ብለህ ነው ! ዋጋ የሆንከን እኛ እናመሰግንሃለን ። ማነው ጥፋተኛ እያልን የምንኰንነውን ተርበን እናስሳለን ። ጋዜጣው ፣ መርማሪው ፣ ዳኛው ፣ ሕዝቡ ጥፋተኛን ያነፈንፋሉ ። እገሌ በደለኛ ነው ካላሉ እንቅልፍ አያገኙም ። ቍስል ያለበት የሌላውን ቍስል ሲያይ ይደሰታል ። አንተ ግን አንተ ነህ ። አንተ ብቻ ቅዱስ ነህ ። የምቀድሰው ማነው እያልህ በር ታንኳኳለህ ። አዎ አንተ አንተ ነህ ቀን ሳያደክምህ ፣ ምሕረት ሳያልቅብህ ትኖራለህ ! ፍንጭ ፍለጋ የመጣውን ምንጭ ታወርሰዋለህ !

አንተ ፣ አንተ ነህ ። በሰው ቍስል ላይ እንጨት አትሰድድም ። ያሰቃየን ሕሊና አንተ ስትናገር ዐረፈ ። የተማጸኑንን የጨከነባቸው ያ ልብ ዛሬ በጎዳናው ሲያልፍ መራራት ጀመረ ። የልብ ፈዋሽ ሆይ ፈጥነህ አዳንከን ። አንተ አንተ ነህ ። የጋበዙህን እነ ማርታን ሙት ቀስቅሰህ ታስደስታለህ ። ያሳሰበን እኛ እኛ ስለሆንን ነው ። አንተ አንተ ነህና የሚያሳስበን ጭንቅ የለም ። የተሰቀልከው ንጉሥ ኢየሱስ ክርስቶስ ፣ ወላዴ አእላፍ ፣ ኃጥአንን ያጸደቅህ በግድ ሰማይና ምድር ይገዙልሃል ፣ እኛ በፈቃዳችን እንወድሃለን ። ልዕልናህን የሚያስጥል መንፈስ ከእኛ ይራቅ ። ቅርበትህን የሚንቅ ልቡና ከእኛ ይወገድ ። ለዘላለሙ አሜን ! የእኔ ዘመን እርሱ ነው የሚል እልልታ ይሠዋልህ !

ዲያቆን አሸናፊ መኰንን
ሐምሌ 13 ቀን 2016 ዓ.ም.

ይቀጥላል
ዲያቆን አሸናፊ መኰንን
ሐምሌ 12 ቀን 2016 ዓ.ም.