13. ንግግርህ ብቁ ይሁን (ተ)
21. የቤተሰብህን ምሥጢር አታውጣ
አንዳንድ ሰዎች ምን ዓይነት መንፈስ እንደ ተቆራኛቸው ባይታወቅም ትላንት ያልነበራቸውን ማንነት ፣ የሌላቸው ትልቅነት ሲያወሩ ይሰማሉ ። ሕይወት ግን ጓዳም አደባባይም ናትና የሚያውቃቸው ሲመጣ እነርሱም ይሸማቀቃሉ ፣ ሰምተው ያመኑአቸውም መሳቂያ ያደርጉአቸዋል ። ከነበራቸው ትልቅነት ቀንሰው ቢያወሩ ፣ ክብራቸውን ቢሰውሩ የሚያውቃቸው መጥቶ ስለ እነርሱ ከፍታ ሲናገር መጀመሪያ ያከበሩአቸው ይበልጥ እያከበሩአቸው ይመጣሉ ። ዝቅተኛውን ስፍራ የመረጠ ውረድ አይባልም ። ከፍተኛው ስፍራ የመረጠ ግን አዋቂ ሲመጣ ዝቅ በል ይባላል ። ሌላው ያክብር እንጂ ራስን አጋንኖ ማቅረብ ተገቢ አይደለም ። በዚህ ዓለም ላይ ገነኑም በነኑም ሁሉም ኃላፊ ነው ። ጸንቶ የሚኖረው መጨመርና መቀነስ የሌለበት የሥላሴ ክብር ብቻ ነው ። “ጅብ የማያውቁት አገር ሂዶ ቁርበት አንጥፉልኝ ይላል” ይባላል ። ዛሬ ቄስ ነበርሁ ፣ መነኩሴ ነበርሁ ፣ መሪጌታ ነበርሁ እያሉ የሚያወሩ ፣ የሄዱበትን ሰፈር ለማስደሰትና የመጡበትን ለማስጠላት ጠንቋይ ነበርሁ እያሉ የሚያወሩ አያሌ ናቸው ። ከኢየሱስ ይልቅ ስለ አጋንንት መስማት የሚወድዱት ወገኖች የእነዚህን ነበርሁ ባዮችን ወሬ እንደ ፊልም በተመስጦ ያዳምጣሉ ። እኔ ቆንጆ ነኝ ለማለት እገሌ አስቀያሚ ነው ማለት አያስፈልግም ። የራስን እምነት ከፍ ለማድረግ የሌላውን እምነት ማዋረድ አይጠበቅም ። አዎ ቄስ ነበርሁ አይባልም ። ቅስና ፣ ምርግትና ነበርሁ የለውም ።
አንዳንድ ሰዎች እንዲሁ ነው የኖርሁት ለማለት ይዳዳሉ ። እንዳለ የሚኖር ቋጥኝ ብቻ ነው ። ሰው ከፍና ዝቅ ይላል ። ይሞላል ፣ ይጎድላል ፤ ይሳሳታል ፣ ይመለሳል ፤ ያገኛል ያጣል ፤ ይወድቃል ፣ ይነሣል ። እንዲሁ ምሁር ሆኖ የኖረ ሰው የለም ። ከሌላው ያልተቀበለ ምሉዕ ሰውም አይገኝም ። በቀጥታ ከእግዚአብሔር ነው የተማርሁት ፣ የሰው መምህር አላስተማረኝም የሚሉ ደፋሮችም አሉ ። ግን በሰው የሚያስተምር እግዚአብሔር ነው ። ነቢያትና ሐዋርያት ሰዎች ነበሩ ። ሰው የእግዚአብሔር መሣሪያ ነው ። በፍጥነትም በኃይልም የበረቱ ቅዱሳን መላእክት ሳሉ ደካማዎቹ እነ ጴጥሮስ ለስብከተ ወንጌል የተላኩት እግዚአብሔር በሰው መሥራት ስለሚወድድ ነው ። ሰውዬውን ከማንነቱ ፣ ከአቅሙ ለይተን በእርሱ በኩል የተላከውን መልእክት መቀበል ብልህነት ነው ። እኔ ትልቅ ዘር ነኝ ። አያቶቼን የታሪክ መጽሐፍ ላይ አገኘኋቸው ። የእኛ ደም ልዩ ነው ማለት ሞኝነት ነው ። ይዞ መገኘት እንጂ ነበርሁ ጥጋብ አይሆንም ። ሲያልፍ የማያምን ፣ ማለፉን የማይቀበል የዓለምን መልክ የማያውቅ ነው ። “በሮም ሲኖሩ እንደ ሮማውያን” ይባላልና ባለንበት አገር እንደ አገሩ መኖር እንጂ በታሪክ መፎከር ፣ ሥራ ማማረጥ ጥቅም የለውም ።
አባቴ ትልቅ ነው ይላል የሰው ሞኝ ፣
ትንሹም ትልቅ ነው እንጀራ ሲያገኝ ፤
ራሳቸውን ከሆኑት በላይ የሚገልጡ የአእምሮ መቃወስ ያለባቸው ወገኖች እንዳሉ ሁሉ የቤተሰባቸውን ምሥጢር አደባባይ የሚያሰጡ ወገኖችም አያሌ ናቸው ። እኔ የድሀ ልጅ ነበርሁ ብሎ ማውራት ለዛሬ ድሆች ተስፋ የሚሰጥ ነው ። ታሪካችን ለሌሎች ተስፋና ትንሣኤ ሊሆን ይችላል ። ከዚያ ባለፈ ግን የቤተሰብን ምሥጢር ማውጣት አይገባም ። ሰው ገመና ያለው ፍጡር ነው ። እርሱና እግዚአብሔር ብቻ የሚያውቁት ማንነትም ያለው ምሥጢር የሆነ ፍጡር ነው ። ሁሉ አይነገርም ። አንደበት የተፈጠረው ለመናገር ቢሆንም ሁሉን ለመናገር አልተፈጠረም ። “ሁሉን ቢናገሩት ሆድ ባዶ ይቀራል” ይላሉ ። ይልቁንም የትዳርን ምሥጢር በፍቅርም በጠብም ጊዜ ማውጣት ተገቢ አይደለም ። ሁለት ሰዎች ያሳለፉት ነገር ለሦስተኛ ሰው አይወራም ። “የጨዋ ልጅ ሲፋታ የሚጋባ ይመስላል” ይባላል ። ደግ ደጉን ያወራል ማለት ነው ። ላለቀ ነገር መልካሙን ማውራት ይገባል ። ክፉ ንግግር ቢቀጥሉም ፣ ቢለያዩም ጠቃሚ አይደለም ።
አንተ ግን ንግግርህን ጠቃሚ ለማድረግ የቤተሰብህን ምሥጢር ፣ የትዳርህን ገመና አታውጣ ። ይልቁንም በቤት ውስጥ እንኳ ሊወራ የማይገባውን ነገር ዛሬ በተለያየ መገናኛ ብዙኃን ስንሰማ ምን ያህል ማኅበራዊ ቀውስ ውስጥ እንዳለን ማሳያ ነው ። ትዳር አደባባይ ሲወጣ እንደ መዝናኛ የሚታይ ሳይሆን የሚያስለቅስ ነው ! ትዳር ከአማካሪ እንኳ ደግ አማካሪ የሚፈልግ ስስ ርእስ ነው!
ይቀጥላል
ዲያቆን አሸናፊ መኰንን
ግንቦት 20 ቀን 2016 ዓ.ም.
