“በወጣትነት የለቀሙትን እንጨት በስተርጅና ይሞቁታል ።” /ጃፓኖች/
ወጣትነት እኔ ከተናገርሁ ሁሉን አሳምናለሁ የሚል ሁሉን ያለ ማወቅ ጠባይ ነው ። ወጣትነት እኔ ከተነሣሁ ሁሉን ጸጥ አደርጋለሁ የሚል የኃያልነት ስሜት ነው ። ወጣትነት እኔ የደረስኩበት ምሥጢር አለና ሁሉ ይሰማኝ የሚል የአውቃለሁ ባይነት መድረክ ነው ። ወጣትነት የሕይወትን ሩጫ በዕለት እፈጽመዋለሁ የሚል እሽቅድድም ነው ። ወጣትነት እኔ ብቻ ልናገር የሚል ጆሮን ቆርጦ የጣለ ችኩልነት ነው ። ወጣትነት ትልልቆች ደካማ ስለሆኑ እንጂ ምንም ከባድ ነገር በዓለም ላይ የለም የሚል የሁሉን ቻይነት ትኩሳት ነው ። ሁሉም ወጣት እንዲህ ያስባል ማለት አይደለም ። ወጣትነት ግን ይህን ስሜት ያመጣል ። ወጣትነት ሁለተኛ ልደት ነው ። ሰው ራሱን በእውቀት የሚወልድበት ነው ። እኔ ማን ነኝ ? የሚለውን ጥያቄ ጠይቆ በመልሱ የሚደሰትበት ነው ። “ራስን ማወቅ ትልቅ መልስ ነው” እንዲሉ ። ወጣትነት ብዙ ተስፋ አለውና ደስ ይላል ። በአንድ አለመሳካት ግን ተስፋ ይቆርጣልና ሊታዘንለት ይገባል ። ወጣትነት ግለት አለው ። እንደ ፍም እሳት ሳይሆን እንደ ቅጠል እሳት የሚግለበለብ ነው ። ወጣትነት ኃይል ነው ። ኃይል መሪ ያስፈልገዋል ። መኪና ኃይል አለው ። ትልቁ ኃይል ግን ትንሽ መሪ ያስፈልገዋል ። ወጣትነትም መካሪና ዘካሪ/አስታዋሽ ያሻዋል ። ወጣትነት ውበት አለው ። ባይቀባቡ ፣ ሰው ሠራሽ ነገር ባይጠቀሙ ወጣትነት በራሱ ውበት ነው ። እንስሳም በወጣትነቱ ያምራል ። ወጣትነት ከለጋነት ያለፈ ከደረቅነት የመለሰ ነው ። ወጣትነት የሕጻንነትና የጎልማሳነት ድልድይ ነው ። ወጣትነት ሁለተኛው የዕድሜ እርከን “እሳታዊ ዘመን” ነው ።
እሳት በትክክል ከተጠቀሙበት ያበስላል ። በሥርዓት ካልተያዘ ያወድማል ። ወጣትነትም እሳት ነው ። የሚያሰለጥነው ከተገኘ አገርን የሚጠቅም ፣ ወገንን ቀና የሚያደርግ ነው ። ወጣትነት ልሂድ የሚል ጉልበት እንጂ ወዴት መሄድ እንዳለበት የሚያውቅ ላይሆን ይችላል ። ወጣቶች መናገር ስለቻሉ አገር መምራት ይችላሉ ማለት አይደለም ። መታዘዝን የማያውቅ ወደ ማዘዝ መምጣት የለበትም ። የዕድገት ደረጃውን ያልጠበቀ ከጥቅሙ ጉዳቱ ያመዝናል ። በየዕድሜው የሚደረስበት ደረጃ ቢኖር አገር ክብር ያገኛል ። ወጣቶች ገንዘብ አያያዝ ስለቻሉና ኪሳቸው ስለሞላ ቤት መምራት ይችላሉ ማለት አይደለም ። ወጣቶች ሰው አያያዝ ስለሚያውቁና ብልጦች ስለሆኑ ወላጆች ምሩን ብለው ቤቱን የሚለቁላቸው አይደሉም ። ወጣቶች እንግሊዝኛ ስለተናገሩ ዓለም አቀፍ እውቀት አዳበሩ ማለት አይደለም ። የትምህርት ምስክር ወረቀት ስለያዙ የሕይወት ብስለት አላቸው ማለት አይደለም ። በታላላቅ ተቋማት ስለሠሩ ታላቅ ሆኑ ማለትም አይደለም ። ወጣትነት የሚታረም እርሻ እንጂ ንጹሕ ማሳ ላይሆን ይችላል ።
ወጣቶች ሆይ እናንተ ያወቃችሁት በዓለም ላይ ያለው ብቸኛ እውቀት አይደለምና እውቀትም በየዘመኑ ያድጋልና ሌሎችን ለመስማት ፈቃደኛ ሁኑ ። እስከ ዘላለም የምንማር ነንና በሃያና በሠላሳ ዓመት እውቀትን ጠነቀቅናት ብላችሁ አታስቡ ። ዓለምን የሚገዛው ሥልጣን እንጂ ኃይል አይደለምና በጉልበት ሁሉን እቀይራለሁ ከሚል አስተሳሰብ ውጡ ። ይህች ዓለም የወጣቶች ብቻ ሳትሆን የሕጻናትም ፣ የጎልማሶችም ፣ የአረጋውያንም ዓለም ናትና ለሌላው ዕድል ስጡ ። ሁሉን ከያዛችሁ ሁሉን ታጣላችሁ ። ምኞት ካበዛችሁ በስካር ደንዝዛችሁ ትቀራላችሁ ። ሁሉንም ነገር በተራ ማድረግ ካልቻላችሁ በጭንቀት አእምሮአችሁን ታበላሻላችሁ ። እናንተ የደረሳችሁበት እውቀት አሳባዊ እንጂ ተግባራዊ ላይሆን ይችላል ። መሰልጠን ማለትም የራስን ይዞ የሌላውን መልካም መቀበል ነው ። የሌላውን ጨርቅ ለመልበስ ቆዳችሁ መላጥ አያስፈልጋችሁም ። ሕይወት ረጅም መንገድ እንጂ በአንድ ትንፋሽ የምትጠናቀቅ አይደለችምና እያረፋችሁ መጓዝን አትርሱ ። የሃይማኖት ትምህርት በኮርስ አያልቅምና ዘላለም የምትማሩትን እግዚአብሔር ጠንቅቄዋለሁ ብላችሁ አታስቡ ። እናንተ በወሬ የሰማችሁትን እውቀት አረጋውያን በሕይወት በማለፍ ያውቁታልና የተግባር ድሀ እንደ ሆናችሁ እመኑ ።
በወጣትነት የዘራችሁትን በሽምግልና ታጭዳላችሁ ። በወጣትነት ስርቆት ከጀመራችሁ እስከ ሽምግልና ስማችሁ አይጠፋም ። አመንዝራ ከሆናችሁም ወደ ማታ ላይ ለማኝ ትሆናላችሁ ። ሱስ ውስጥ ከገባችሁ በየቀኑ ከርታታ ትሆናላችሁ ። በወጣትነት ገንዘብን በአግባቡ ከተጠቀማችሁ በሽምግልና መልካም ማረፊያ ታገኛላችሁ ። ትልልቅ ሰዎችን ካከበራችሁ ለትልቅ ቦታ ትታጫላችሁ ። ሹሙኝ ብላችሁ ማመልከቻ ካስገባችሁ በጣም ትናቃላችሁ ። እውቅና ሳይሆን እውቀትን ከፈለጋችሁ በመብራት ትታሰሳላችሁ ። የሙያ አባቶቻችሁ ቢመቱአችሁ ዝቅ ብላችሁ ዱላ ከተቀበላችሁ እንጀራችሁ ይሰፋላችኋል ። ወላጆቻችሁን መውቀስ ካቆማችሁ ምርቃት ይተርፋችኋል ። አገራችሁን ስትወዱ የሌላው አገር መዝናኛችሁ ይሆናል ። ታማኝነትን ስታዳብሩ ዋጋችሁ ከፍ እያለ ይመጣል ። ብዙ ገንዘብን ሳይሆን ብዙ ፍቅርን ስታተርፉ ለክፉ ቀን ገላጋይ ትሆናላችሁ ። በአጭር ቃል እንጨቱ የሚሰበሰበው በወጣትነት ሲሆን እሳቱን የምትሞቁት በሽምግልና ነው ። ቀዳማዊ ኃይለ ሥላሴ፡- “ሽምግልናችንን ያልናቀች ወጣትነታችን የተባረከች ናት” ብለዋል ።
የኢትዮጵያ ወጣቶች ማታችሁ ያማረ ይሁን ። ሳቃችሁን ያስመሽላችሁ ። አሜን
የብርሃን ጠብታ 24
ዲያቆን አሸናፊ መኰንን
ኅዳር 18 ቀን 2014 ዓ.ም.
