አንቺ ሴት

“ኢየሱስም፦ አንቺ ሴት፥ ከአንቺ ጋር ምን አለኝ? ጊዜዬ ገና አልደረሰም አላት” /ዮሐ. 2፥4 / ።

“የወይን ጠጅም ባለቀ ጊዜ የኢየሱስ እናት፡- “የወይን ጠጅ እኮ የላቸውም አለችው” ወይን ጠጅ ገና እየታደለ ነው ። ግማሹ ይዞ ግማሹ ይጠብቃል ። በእስራኤላውያን ሰርግ ላይ ወይን ጠጅ ዋናው ነገር ነው ። አንድን ድግስ ልከኛ የሚያደርገው የወይን ጠጅ ግብዣ ነው ። ተጠሪው ገብቶ ሳያልቅ ወይን ጠጁ አለቀ ። ይህን ነገር ያውቁ የነበሩት የሚቀዱት አገልጋዮች ነበሩ ። ይህን ነገርም እመቤታችን አውቃለች ። እመቤታችን ላቀረበችው ጥያቄ ጌታ የሰጠው መልስ የንቀት ፥ የእምቢታ አይደለም ። ይህ የእርሱን የቅድስና ክብር ፥ የእስራኤላውያንን የአነጋገር ዘይቤ ፥ የቃሉንም ፍቺ አለመገንዘብ ነው ። እናቱን በሚመለከት የሚነሡ ሌሎች ጥቅሶችም አሉ። ወንጌላዊው ማቴዎስ የዘገበውን ቀጥሎ እንመልከት ።

“ገናም ለሕዝቡ ሲናገር፥ እነሆ፥ እናቱና ወንድሞቹ ሊነጋገሩት ፈልገው በውጭ ቆመው ነበር። አንዱም ፡- እነሆ፥ እናትህና ወንድሞችህ ሊነጋገሩህ ፈልገው በውጭ ቆመዋል አለው። እርሱ ግን ለነገረው መልሶ፦ እናቴ ማን ናት? ወንድሞቼስ እነማን ናቸው? አለው። እጁንም ወደ ደቀ መዛሙርቱ ዘርግቶ፡- እነሆ እናቴና ወንድሞቼ፤ በሰማያት ያለውን የአባቴን ፈቃድ የሚያደርግ ሁሉ፥ እርሱ ወንድሜ እኅቴም እናቴም ነውና አለ” /ማቴ . 12፥46-50/ ።

ይህን ጥቅስ በመጥቀስ ኢየሱስ ለእናቱ ምንም ክብር እንዳልነበረው የሚናገሩ ሰዎች አሉ ። ጥቅሱ ግን የሚያሳየን ምንድነው ?

ስለዚህ ይህ ክፍል እናቱን ለማቃለል ተናገረ ብለው የሚያስቡ ሰዎች ቅድስናውን እየካዱ ነው ። በዚህ ጠላቶችም አላሙትም ። የቃና ዘገሊላው ምላሽም ንቀት የመሰላቸው ወገኖች አሉ ። “ኢየሱስም፦ አንቺ ሴት፥ ከአንቺ ጋር ምን አለኝ? ጊዜዬ ገና አልደረሰም አላት” /ዮሐ. 2፥4 / ። ይህ ንግግር ንቀት የማይሆንበትን ምክንያት እናቅርብ ፡-

በቃና ዘገሊላም፡- “ኢየሱስም፦ አንቺ ሴት፥ ከአንቺ ጋር ምን አለኝ? ጊዜዬ ገና አልደረሰም” ማለቱ ለምንድነው ? /ዮሐ. 2፥4 / ። አንቺ ሴት የሚለው ንግግር ንቀትን የሚያሳይ ነው ወይ ? ሴት የጾታ ስም ብቻ ሳይሆን የሰብእና ስም ነው ። ሰው አንድ ነው ። የአንዱ ሰው ሁለት ክፍሎች ወንድና ሴት ናቸው ። “እግዚአብሔርም ሰውን በመልኩ ፈጠረ በእግዚአብሔር መልክ ፈጠረው ወንድና ሴት አድርጎ ፈጠራቸው” ይላል /ዘፍ. 1፥27/ ። ሴት የሚለውን ስያሜ ለሔዋን ያወጣው ቀዳማዊ አዳም ነው ። “አዳምም አለ፦ ይህች አጥንት ከአጥንቴ ናት፥ ሥጋም ከሥጋዬ ናት እርስዋ ከወንድ ተገኝታለችና ሴት ትባል” /ዘፍ. 2፥23/ ። ሴት የሚለው የተፈጥሮ መጠሪያ ምትክነትን አመልካች ነው ። ሴት የሚለው በየትኛውም ስፍራ የንቀት አጠራር አይደለም ። ጌታችን ግን እናቱን ከቃና ዘገሊላ በኋላ አንቺ ሴት እያለ ይጠራታል ። ይህ አጠራር በመስቀል ላይም ተደግሟል ። ለምን እናቴ አላላትም ? ብንል እርሷ በመሢሕነቱ ለዓለም ገለጠችው ። ከዚህ በኋላ የቤት ልጅ መሆኑ ያበቃ እንደሆነ መሰከረች ። እርሱም እርሷን የብቻው እናትነቷ ማብቃቱን ለዓለም በሚገልጥ ቋንቋ “አንቺ ሴት” አላት ። ዓለም ከዚህ በኋላ በኢየሱስ እናትነቷ ብቻ አያውቃትም ። የሁሉም እናት ትሆናለች ። ቀዳማዊ አዳም ሴት የሚለውን ስም አወጣ ። ዳግማዊ አዳም ክርስቶስም ሴት በማለት ዳግሚት ሔዋን መሆኗን መሰከረ ። የመጀመሪያው የተስፋ ቃል ይህን ሴት የሚለውን መጠሪያ ይይዛል ፡-

 “በአንተና በሴቲቱ መካከል፥ በዘርህና በዘርዋም መካከል ጠላትነትን አደርጋለሁ እርሱ ራስህን ይቀጠቅጣል፥ አንተም ሰኰናውን ትቀጠቅጣለህ” /ዘፍ . 3፥15/ ።

–    ተናጋሪው ማነው ? እግዚአብሔር ።

–    ቀጥተኛ ሰሚው ማነው ? ሰይጣን ።

–    ተስፋነቱ ለማነው ? ለአዳምና ለሔዋን ።

–    የሴቲቱ ዘር የተባለው ማነው ? ክርስቶስ ።

–    ክርስቶስ ለምን በሴት ዘር በኩል መጣ ? ከአዳም ኃጢአት ንጹሕ መሆኑን ለመግለጥና የሴትን ዓለም ለመካስ ነው ።

–    ሴትን እንዲህ ሲያከብር አዳምን አላከበረውም ወይ ? በወንድ ጾታ ተገለጠ።

–    የሰይጣን ዘር የተባሉት እነማን ናቸው ? በክርስቶስ የማያመኑ ሁሉ ።

–    የሴቲቱ ዘር የተባለው ክርስቶስ ብቻ ነው ? በእርሱ የሚያምኑ ሁሉም።

–   ጠላትነቱ እስከ መቼ ነው ? እስከ ዘላለም ነው ። የክርስቶስ ሞትም ሰውና እግዚአብሔርን እንጂ ሰውና ሰይጣንን ያስታረቀ አይደለም ።

–    ራሱን የሚቀጠቅጠው ማነው ? ክርስቶስ ነው።

–    ራስን መቀጥቀጥ ማለት ምን ማለት ነው ? እባብ ራሱን ከተመታ ተስፋ የለውም ። ሰይጣንም በክርስቶስ ሞት አልሞተም ተስፋ የለሽ ግን ሁኗል ።

–    ሰኰናን የሚቀጠቅጠው ማነው ? ሰይጣን ነው ።

–    ሰኰናን መቀጥቀጥ ማለት ምንድነው ? ሰኰናው የተቀጠቀጠ መራመድ አይችልም ። እስኪድን ያነክሳል ። ሰይጣንም በአይሁድ ልብ አድሮ የክርስቶስን ሞት አሰናድቷል ። ሰኰናው ለሦስት ቀን ታሞ ከሞት ተነሥቷል ። በሚድን ቊስል የማይድን ቊስል ለጠላት ከፍሎታል ።

–    ይህን ተስፋ ለሰይጣን ለምን ነገረው ? አዳምና ሔዋንን በመጣሉ ፈጽሞ ደስ እንዳይለው ደስታውን ለማቋረጥ ነው ። የሴቲቱ ዘርም ደም መላሽ መሆኑን ለማሳወቅ ነው ። ስለዚህ ሰይጣን ከዚያች ቅጽበት ጀምሮ ሥጋት ገባው ። የሴቲቱን ዘር ለማጥፋትም ማሰስ ጀመረ ።

–    የተስፋውን ቃል ሲሰሙ አዳምና ሔዋን ምን ይሉ ይሆን ? ፍርዳቸውን ሳይሰሙ መዳናቸውን ሰሙ ። እግዚአብሔርም በመዓቱ ውስጥ ምሕረት እንዳለው ተገነዘቡ ።

 አንቺ ሴት የሚለው ንግግር ብዙ ትንቢቶችን የሚገልጥ ነው ። “ስለዚህ ጌታ ራሱ ምልክት ይሰጣችኋል እነሆ፥ ድንግል ትፀንሳለች፥ ወንድ ልጅም ትወልዳለች፥ ስሙንም አማኑኤል ብላ ትጠራዋለች” ይላል /ኢሳ. 7፥14/ ። ድንግል በማለቱ ክርስቶስ ፍጹም የሴት ዘር መሆኑን ያስረዳል ። ሐዋርያው ጳውሎስም ፡- “ነገር ግን የዘመኑ ፍጻሜ በደረሰ ጊዜ እግዚአብሔር ከሴት የተወለደውን ከሕግም በታች የተወለደውን ልጁን ላከ” ይላል /ገላ. 4፥4/ ። ክርስቶስም አንቺ ሴት በማለቱ ይህን ሁሉ ምሥጢር ለማስተጋባት ነው ።