ጉድጓዱ ጥልቅ ነው

“ሴቲቱ፡- ጌታ ሆይ፥ መቅጃ የለህም ጕድጓዱም ጥልቅ ነው፤ እንግዲህ የሕይወት ውኃ ከወዴት ታገኛለህ? …አለችው” /ዮሐ. 4፥11/ ።

ጌታችን የሳምራዊቷን ሴት ሕሊናዋን ጠበቀ ። እውቀቷንም ቀስ በቀስ አሳደገ ። እርሱ ሥጋ በለበሰ ጊዜ ቀስ ቀስ አደገ እንጂ አምላክ ነኝ ብሎ ዕለቱን ልደግ አላለም ። ቀስ በቀስ ማደግ እርሱ የዘረጋው የውበትና የጥንካሬ ምንጭ ነውና ። ከቀናቸው በፊት የሚያድጉ ነገሮች ብዛት እንጂ ጣዕም ፣ ሆድ መሙላት እንጂ በሽታ መከላከል ፣ ርካሽነት እንጂ ውበት እንደሌላቸው ከምንመገበው ምግብ እያየን ነው ። እነዚህ ምግቦች በጊዜ ማደግ ቢችሉ ተፈጥሮአቸውንና ገጸ በረከታቸውን በጠበቁ ነበር ። ስለዚህም ለማይድኑ በሽታዎች እየተዳረግን ፣ የምንበላውን ምግብ ሳይቀር እየሰጋን ነው ። ቀስ ብሎ ማደግ በመንፈሳዊ ዓለምም ብዙ ጤና አለው ። መሬት እየያዙ ፣ ሥር እየቆነጠጡ ፣ ቅጠል እያወጡ ፣ ግንድ እያጸኑ ፣ ቅርንጫፍ እየዘረዘሩ ማደግ ለብዙ ፍሬ ያበቃል ። ተራሮች ለሺህ ዘመናት ጸንተው የሚታዩበት ምሥጢር መሠረታቸውን ሰፋ ስላደረጉ ነው ። ከመሠረታቸው ሰፋ ብለው ከጫፉ ጠበብ ይላሉ ። የግብጽ ፒራሚዶች ሦስት ሺህ ዓመታትን ያስቆጠሩት ከመሠረታቸው ሰፋ ብለው ወደ ላይ ጠበብ ስላሉ ነው ። ፒራሚድን ብንገለብጠው እንኳን ሦስት ሺህ ዓመት ሦስት ደቂቃ መቆየት አይችልም ። ሁሉን ነገር አውቀን ማደር የለብንም ። የምንኖረው የማናውቀውን አዲስ ነገርም ለማወቅ ነውና ሕይወት ነገም ትቀጥላለች ። ግሪኮች፡- “እስክንሞት ለዘላለም የምንማር ነን” ብለዋል ። ትምህርት እስከ ሞት ብቻ ሳይሆን እስከ ዘላለምም ነው ። ወደ ሰማይ የምንሄደውም ዘላለም የማይጠገበውን የእግዚአብሔርን አዲስነት ለማመስገን ነው ።

ምግቦች ብቻ ሳይሆን ሥልጣንም ፣ እውቀትም ፣ ሀብትም የዕድገት ሕግን እያፈረሱ እንደሆነ እያየን ነው ። ሰዎች ከመጨረሻው ከጀመሩ ወደ መጀመሪያው ይሄዳሉ ። ይህ ሕግ ነው ። ገና ከኮሌጅ ወጥቶ የሥራ ማስታወቂያ የሚያየው ወጣት የሚያስበው ስለሚሊየነርነት ነው ። የአንድ ወር ደመወዝን ሳይበላ ስለሚሊየን ማሰብ በራሱ ጤንነት አይደለም ። በሕዝብ አገልግሎቶችና በወታደራዊ ተቋማት መዐርጎች በተራ መሰጠት አለባቸው ። አሊያ ይረክሳል ። መዐርግ ደረጃን መውጣት ነው ። አንደኛውን ደረጃ በትክክል ስንረግጥ ሁለተኛውን መርገጥ እንችላለን ። አሁን ግን የምናየው ደረጃው ቀርቶ በሊፍት መውጣት ነው ። ያለ ደረጃ የወጣ ያለ ደረጃ ይወርዳል ። ተኝተው ሲነቁ ሚሊየነር ከሆኑ ቀኑን ተስፋ ቆርጠው ይውላሉ። አንድን ነገር ለማግኘት የሚደረግ ትግልና ያንን ነገር ካገኙ በኋላ ያለው ደስታ በሕይወት ውስጥ ቅዱስ ሕመምና ቅዱስ ደስታ ነው ። በዛሬው ዘመን ሰዎች በአንድ ቀን ተዋውቀው “እገልዬ” ይባባላሉ ። ካወቁት አንድ ሰዓት ያልሞላውን ሰው ለሌላ ሰው በደንብ ያስተዋውቁታል ። ቅልጥፍ ያለ ዘመን ቢመስልም እውነተኛነትና ዘላቂነት ግን የለውም ። በዚህ ምክንያት ተረኛ ወዳጅ እንጂ ዘላቂ ወዳጅ እየጠፋ ነው ። ሁሉም ነገር እፍፍ ነው ። ለማቀጣጠል እፍ ፣ ለማጥፋትም እፍ ተገቢ አይደለም ። የድግስ ዕቃው ተሟልቶ ሳይመለስ ብዙ ትዳሮች አደጋ ገጥሟቸዋል ። በፌስ ቡክ የተጀመረ ግንኙነት መሬት ላይ ሲወርድ መቆም ያቅተዋል ። በረቂቅ ቴክኖሎጂ የጀመረ ፍቅር አካላዊ ሲሆን መጸያየፍ ይመጣል ። በፎቶ የጀመረ መደናነቅ በአካል ያለውን መልክ ሲያይ አልወደድኩም ያሰኛል ። ቅዱስ ለማለትም ርኩስ ለማለትም ወረፋ ማጣት ተገቢ አይደለም ። ሳናውቀው ይህን አኗኗር እየተላመድነው ነው ። የሚያሰጋው መሳሳታችን ሳይሆን መልመዳችን ነው ። ምንጣፍ እያነጠፍን ፣ ከከተማው ወጥተን የተቀበልናቸውን አገልጋዮች አቧሯ እያጨስን ይጥፉ ማለት የተለመደ ነው ። እንደውም የተፈቀደ ይመስላል ። ስንገናኝ ያዙኝ ልቀቁን ማለት ስንለያይ ወዲያው መረሳሳት ፣ በስልክ እንኳ ለመገናኘት መጸያየፍ የለመድነው ነው ። የናፈቁንን ቤተሰቦች ለማግኘት ከሩቅ መጓዝ ካገኘናቸውና ከተደሰትን በኋላ ወደ መጣንበት ስንመለስ ባወጣነው ወጪ ብስጭት ውስጥ መግባት የብዙ ስደተኛ ጠባይ ነው ።

ሁሉም ነገር የዕድገት ሕጉን ቢጠብቅ ኑሮ ዛሬ የምናያቸው ቀውሶች ባልመጡ ነበር ። መዐርገ ክህነቱም ከአናጕንስጢስ ወይም ከአንባቢ ጀምሮ ወደ ዲቁና እያለ ቢያድግ ጳጳስነት ትልቅ መሆኑ አደራም መሆኑ እየታየን ይመጣል ። ደረጃ የሌላቸው አገልግሎቶች በቤተ ክርስቲያን ይህን ሁሉ ትርምስ አምጥተዋል ። በዓለም የክብር ዶክትሬት ይሰጣል ። የክብር ቅስና ግን ሊኖር አይችልም ። ምክንያቱም ራሱን የቻለ ጥሪና አገልግሎት ነው ። ዛሬ ግን ይህ አልሆነም ብለን አንዋሽም ። ተምሮ መያዝ ቢያቅተን ይዘን መማርም መልካም ነበር ። ካልሆነም የያዙትን ይጥፉ ባይባል መልካም ነበር።

ሳምራዊቷ ሴት ስለ መንፈሳዊ ነገር ያላት እውቀት አሁን ገና ነው ። ስለ ጌታ ያላት እምነት ግን አድጓል ። ጌታን በአለባበሱ ብቻ የይሁዳ ሰው ብላው ነበር ። ስለ ዘላለም ሕይወት ሲነግራት ግን “ጌታ ሆይ” አለችው ። የይሁዳ ሰው ከሚለው አጠራሯ ወደ ጌትነቱ አደገች ። ትሕትና ፣ አድራሻ ያደረገ የፍቅር መልእክት ፣ ነቀፋ የሌለው ትምህርት ይለውጣል ። እሳት የማያበስለው ድንጋይን ብቻ ነው ። ትምህርት የማይለውጠው ሊቅ ነኝ ብሎ የተቀመጠውን ብቻ ነው ። አፍሪካ አሜሪካውያን፡- “ስለ እሳት ማውራት ድስቱን አያበስለውም” ይላሉ ። መለኮስ ያስፈልጋል ማለት ነው ። ትምህርት አካላዊ ለውጥን አይሰጥም ። ልባዊ ለውጥን ግን ያመጣል ። የዚያን ጊዜ አካላዊ ለውጥም እየፈካ ይመጣል። ትምህርት ማነሣሣት እንጂ በራሱ ኃይል የለውም ። ትምህርት ኃይልን ተፈላጊው ቦታ የሚያደርስ መሪ ነው ።

“ሴቲቱ፡- ጌታ ሆይ፥ መቅጃ የለህም ጕድጓዱም ጥልቅ ነው፤ እንግዲህ የሕይወት ውኃ ከወዴት ታገኛለህ?” አለችው /ዮሐ. 4፥11/ ። ጌታችን ምንም እንኳ የራሱ ቤት በምድር ላይ ባይኖረውም ውኃ መጠጫ መንቀል እንኳ በእጁ አልነበረም ። ሁሉ ቤቱ እንደነበር ስለሚያስብ ነው ። ይህ ትልቅ ብርታትን የሚያመጣ አስተሳሰብ ነው ። በልጅነታችን ስናድግ ማንም ሰው እቤት ሲመጣ ይህ አጎትህ ነው ፣ ይህች አክስትህ ናት ፣ ሂድ ሳማቸው እየተባልን ነው ። ይህን ያህል አጎትና አክስት እንዳለው ያወቀ ልጅ ልቡ በፍቅር ይሞላል ። ዓለም ከቤቱ ይልቅ ሰፊ ፣ የምትጠብቀውም ጎጆው እንደሆነች ይሰማዋል ። አንድ ዘመዴን አስታውሳለሁ ። የምትሠራበት ቦታ በልጅነቴ ስሄድ ሠራተኞቹን በሙሉ ዘመድህ ነው ሳመው እያለች ከመላው ኢትዮጵያ እንደምንወለድ ትነግረኛለች ። እየሸነገለች ሳይሆን ከእውነቷን ነበር ። ሁሉንም ሰው መጋበዝ ፣ መጫወት ትፈልጋለች ።

ጉድጓዱ ጥልቅ ነው ። የጉድጓድ ውኃዎች ጥንቃቄ ይፈልጋሉ ። ተጠቃሚው ብዙ በሆነ ቊጥር በጥልቀት እየተቆፈሩ መምጣት አለባቸው ። ደለል ሊሞላቸው ስለሚችልም መጠረግ ያስፈልጋቸዋል ። ያ ጉድጓድ ጥልቅነቱ በየዕለቱ አድክሟታል ። ጌታችንን እንኳ አትችለውም ማለቷ ምን ያህል ጥልቅ እንደ ነበር መረዳት ይቻላል ። ዛሬ እንኳ ይህ ጉድጓድ 32 ሜትር ጥልቀት አለው ። እርስዋን ግን ጠንካራ ሴት አደረጋት ። ጉድጓዱ በጠለቀ ቊጥር የእርስዋ ትዕግሥትና ጥንካሬ እየሰፋ መጣ ። ሰው የቆፈረው ጉድጓድ ነውና ጥልቅ ነው ። “የወፍ ወንዱ ፣ የሰው ልቡ አይታወቅም” እንደሚባለው ሰዎችም ጥልቅ ናቸው ። ከሰው ጋር መኖራችን ፈቃድ ብቻ ሳይሆን ግድም ነው ። ከጥልቅ ሰዎች ጋር በኖርን ቊጥር ትዕግሥትና ጥንካሬን እንይዛለን ። “ኖላዊ” በሚለው መጽሐፋችን ላይ “ጉድጓዱ ጥልቅ ነው” የሚል ጽሑፍ አለ ፡-