የዲያቆን አሸናፊ መኰንን ገጽ

የዲያቆን አሸናፊ መኰንን ገጽ 

የምድሪቱ ሰንበት

እንኳን ለጾመ ነነዌ በሰላምና በጤና አደረሳችሁ !
 “እግዚአብሔርም ሙሴን በሲና ተራራ ላይ እንዲህ ብሎ ተናገረው ፡- ለእስራኤል ልጆች እንዲህ ብለህ ንገራቸው ። እኔ ወደምሰጣችሁ ምድር በገባችሁ ጊዜ ምድሪቱ ለእግዚአብሔር ሰንበት ታድርግ ። ስድስት ዓመት እርሻህን ዝራ ፥ ስድስት ዓመትም ወይንህን ቍረጥ ፍሬዋንም አግባ ። በሰባተኛው ዓመት ግን ለምድሪቱ የዕረፍት ሰንበት ፥ ለእግዚአብሔር ሰንበት ፥ ትሁን እርሻህን አትዝራ ፥ ወይንህንም አትቍረጥ ። የምድራችሁን የገቦ አትጨደው ፥ ያልተቈረጠውንም የወይንህን ፍሬ አታከማች ለምድሪቱ የዕረፍት ሰንበት ዓመት ይሁን ። የምድርም ሰንበት ለአንተ ፥ ለወንድ ባሪያህም ፥ ለሴት ባሪያህም ፥ ለምንደኛውም ፥ ከአንተ ጋር ለሚኖር ለመጻተኛም ምግብ ይሁን ። ለእንስሶችህም ፥ በምድርህም ላሉት አራዊት ፍሬዋ ሁሉ መኖ ይሁን ።”/ዘሌዋ. 25፥1-7/ ።
ዘሌዋውያን ምዕራፍ 25 ድንቅ ክፍል ነው ። ስለ ምድሪቱ ሰንበትና ስለ ዓመታት ሰንበት እንዲሁም ስለ መቤዠት የሚናገር ምዕራፍ ነው ። እግዚአብሔር አምላክ ይህን ዓለምና በውስጡ የሚኖሩትን የሰው ልጆች ሲፈጥር በማረፍ እንዲታደሱ አድርጎ ነው ። ሰውና በምድር ላይ የሚገኙ ፍጥረታት በማረፍ ለቀጣዩ ጊዜ አቅም ይሰበስባሉ ። ዳግመኛም ስለ ሌሎች ከርታቶች ለማሰብ ጊዜ ያገኛሉ ። የእግዚአብሔርንም በረከት ያውቃሉ ። እግዚአብሔር የሚያኖር አምላክ ነው ።እግዚአብሔር እንኳን ስለ ሰው ልጅ ስለ ምድሪቱም ግድ ይለዋል ። ጨርሰው እንዳይበሏት ያዝንላታል ። አዎ መሬት መርገጫ ቦታ ፣ ርስት ጉልት ሀብት ፣ መሮጫ ሜዳ ፣ መመገቢያ ገበታ ፣ መቀበሪያ ዓለም ናት ። ምድር ማለት ማኅደር ማለት ነውና ሁሉን ከድናለች ። ሁሉንም አሳድራለች ። ላሟ የደረቀ ጡቷን ሲመጠምጡት ጥጆቹን ዞር ያደርጓቸዋል ። እንዳይገድሏት ያዝኑላታል ። መሬትም ጨርሳ እንዳትሞት እግዚአብሔር አዘነላት ። ሰዎች መጥምጠው እንዳያጠፏት አዘዘ ።
ፍጥረት ተደጋግፎ የሚቆም በመሆኑ የአንዱ ማዝመም የሁሉም መውደቅ ሊሆን ይችላል ። ፍጥረት ሚዛናዊነትን ካልጠበቀ ሕይወት በምድር ላይ ቀጣይ አይሆንም ። ፍጥረት ተመጋጋቢ ነው ። አንዱ አንዱን ይጠብቃል ። እጽዋትን ስንጠብቅ ፣ ምድሪቱን ከብክለት ስንከላከል ካደረግነው እጥፍ በረከት እንቀበላለን ። ፍጥረት ለጋስ ነውና ከሰጠነው በላይ ይሰጠናል ። ፍቅር ስንሰጣቸው እንስሳቱ ከሰጠናቸው በላይ ይወዱናል ። ስንንከባከባቸው ከበሉት በላይ ወተት ይሰጡናል ። ፍጥረት የያዘውን አይለቅም ። እንደ ሰው መዋዠቅ የለበትም ። ጌታው ማን እንደሆነ እንስሳው ካወቀ ፣ ደህና መሬት ላይ አበባው ካደገ እነዚህ ሁሉ የያዙትን አይለቁም ። ሁለት መቶ ዓመታት የሞላቸው ዛፎች አሉ ። ሁሉም በስፍራው አለ ። ሁሉም በክልሉ ይኖራል ። ወፎች በሰማይ ፣ ከብቶች በምድር ላይ ፣ ዓሦች በባሕር ላይ … ይኖራሉ ።
የእስራኤል ልጆች ገና የተስፋይቱን ምድር ሳይወርሱ እግዚአብሔር ስለ ተስፋይቱ ምድር ሕግጋት ይነግራቸዋል ። እግዚአብሔር ፍጻሜው ላይ ሁኖ ያዋራቸዋል ። የእግዚአብሔር ተስፋ የሕዝቡ ኃይል ነው ። የእስራኤል ልጆች በግብጽ 430 ዘመን በባርነት ኑረዋል ። እግዚአብሔር ያለ ዕረፍት የኖሩበትን ዘመን ፣ የሠሩበትን ዓመታት አሰበና 40 ዓመት በምድረ በዳ አሳረፋቸው ። ወደ ከነዓን ሲገቡ በቀጥታ ሥራ ይገጥማቸዋል ። እግዚአብሔር ግን የእፎይታ ጊዜ አደረገላቸው ። እርሱ በመዓቱ ውስጥ ምሕረት ፣ በቊጣው ውስጥ ትዕግሥት አለው ። አዎ ከግብጽ ሳይወጡ ደመወዛቸውን አሰጣቸው ። የግብጻውያንን ወርቅና ብር በዘበዙ ። እግዚአብሔር የሠራተኞች መብት አስከባሪ ነው ። አሁን ደግሞ የዓመት ፈቃድ ወጥተው አያውቁምና በምድረ በዳ 40 ዓመት እያበሰለ አሳረፋቸው ። እነርሱ እንዳረፉ ምድርን ያሳርፏት ዘንድ አዘዘ ። እግዚአብሔር በዚህ ምድረ በዳ ላይ የሚያዝዛቸው በተስፋይቱ ምድር ስለሚጠብቁት ሕግ ነውና ተስፋውን መውረሳቸው እርግጥ ነው ። እርሱ መጀመሪያው ላይ ስለ መጨረሻው ይናገራል ። ነገር ግን የጠላት ብዛት ከተስፋው ምድር አላስቀራቸውም  ። የራሳቸው አለማመን ግን አስቀራቸው ።
 የምድሪቱ ሰንበት ምንድነው ስንል ? ስድስት ዓመት ያርሱና በሰባተኛው ዓመት ምድሪቱን አያርሷትም ፣ ያሳርፏታል ። የምድሪቱን ሰንበት የሚያከብሩት በአራት ምክንያት ነው ፡-
1-  ምድሪቱ እንድታገግምና የበለጠ ፍሬ እንድትሰጥ ፤
2-  ለድሆችና ለጦም አዳሪዎች ምግብ እንዲሆን ፤
3-  የእግዚአብሔርን በረከት እንዲያዩና እንዲለማመዱ
4-  ባሮችና አሽከሮች የዓመት ፈቃድ እንዲያገኙ ነው ።
1- ምድሪቱ እንድታገግምና የበለጠ ፍሬ እንድትሰጥ ፤
ስድስት ዓመት ሙሉ የታረሰችው ምድር በሰባተኛው ዓመት ስታርፍ ራሷን ታድሳለች ። የዶማ ፣ የማረሻ ስለት ካልነካት በሚረግፉት ፍሬዎች እርሷ በተራዋ ተመጋቢ ትሆናለች ። አንድ ዓመት ዐርፋ ስትነሣ እንደገና ለስድስት ዓመት ታጠግባለች ። አሊያ ሰባተኛውን ዓመት ጨምረው ቢያርሱባት ለጊዜው እያጣጣረች ትመግባቸዋለች ። ቆይቶ ግን ትጨነግፋለች ። እግዚአብሔር ለእኛ ስለ ፈጠራት ምድር ግድ ካለው ለእኛማ ይበልጥ ግድ ይለዋል ። የምድሪቱ ሰንበት በሰባተኛው ዓመት ሲሆን የሰው ሰንበት ግን በሰባተኛው ቀን ነው ። ምክንያቱም ምድሪቱ ማረሻ የሚነካት በዓመት ሁለት ጊዜ በመሆኑ በሰባት ዓመት ማረፏ ተገቢ ነው ። በየቀኑ የኑሮ ማረሻ የሚነካው የሰው ልጅ ደግሞ በየዕለቱ ቃሉን ፣ በየሰንበቱ ኅብረት ማግኘት አለበት ። ምድሪቱ ሳይነኳት እንዲሁ ለራስዋ ሲተውአት ታገግማለች ። ለሌሎች የምትሰጠውን ኃይል ለራስዋ ታደርገዋለች ። እንዲሁም የሰጠችውን ፍሬ መልሳ ስትመገብ ብስባሹ እንደገና ያድሳታል ። በየዕለቱ የምትመግብ ምድር በሰባት ዓመት ልመገብ ትላለች ። ብዙ ሰጥታ ጥቂት ቢሰጧት ወጉ አይደለም ወይ ?
ሰው ከአፈር የተሠራ ነው ። ምድሪቱ እንደሚያስፈልጋት እርሱም ያስፈልገዋል ። አፈር ነውና ። አፈር ድንጋይ አለው ፣ ሰውም አጥንት አለው ። አፈር ሣር አለው ሰውም ፀጉር አለው ። አፈር ሥር አለው ሰውም ጅማት አለው ። አፈር ውኃ አለው ፣ ሰውም ደም አለው ። አፈር ወይም ምድር ሦስት አራተኛው ውኃ ነው ፣ ሰውም ሦስት አራተኛው ውኃ ነው ። ሰው ራሱን የሚያይበት ጊዜ ያስፈልገዋል ። ጽሞና ያሻዋል ። ምድሪቱ የሰጠችው ፍሬ መልሶ ሲረግፍባት እንደምትበረታ እንዲሁም ሰዎችም የሰጡንን ፍቅር ፣ የሰጡንን ማጽናኛ መልሰን ስንሰጣቸው ይበረታሉ ። ከእርሱ የሰማሁት አይደል መልሼ እንዴት እሰጠዋለሁ አትበሉ ። እውነት ዘወትር አዲስ ናት ። እውነት ደግሞ የማንም የግል ሀብት አይደለችም ። እውነት እንደ ምድር የጋራ ሀብት ናት ።
የከፍተኛ ትምህርት ተቋማት መምህራን በሰባተኛው ዓመት ላይ ሙሉ ዓመት ያርፋሉ ። ለዕረፍት ለምርምር እንዲውልላቸው ነው ። አሊያ አንዴ ያወቁትን ብቻ አውቀው ይኖራሉ ። ጊዜ ባገኝ ይህን እሠራ ነበር የሚሉትን ነገር እንዲሠሩም ይረዳቸዋል ። እግዚአብሔር ከሩጫችን ከወከባችን ወጥተን እንድናርፍ ይፈልጋል ። በዚያም እውቀታችን ይሰፋል ። ይህም ባደርግ ኑሮ እያልን ቅር የሚለንን ነገር ለማድረግ እንችላለን ።
እግዚአብሔርን ማገልገል መልካም ነው ። ትልቅም ተግባር ነው /1ጢሞ. 3፥1/ ። ሁልጊዜ እንድንሮጥ ግን አልተፈቀደም ። ራሳችንን የምናይበት ፣ ስንጎድል የምንሞላበት ጊዜ ያስፈልገናል ። ሐዋርያው ጳውሎስ ፡- “ነገር ግን ለሌሎች ከሰበክሁ በኋላ ራሴ የተጣልሁ እንዳልሆን ሥጋዬን እየጎሰምሁ አስገዛዋለሁ።”  ብሏል /1ቆሮ. 9፥27/ ። አሥራ አራት መልእክታትን የጻፈ ፣ እስከ ምድር ዳርቻ ድረስ ወንጌልን የሰበከ ፣ … ሰው ከሥጋ ጥድፊያ ተለይቶ መንፈሱን የሚመግብበት ጊዜ ነበረው ። መኪና ያለ ማቋረጥ ሊነዳ ይችላል ፣ ነገር ግን ዐረፍ ብሎ የማይጠገን ከሆነ አደጋ አለው ። በየአምስት ሺህ ኪሎ ሜትር ደኅንነቱ የማይመረመር ከሆነ ፣ የተጎዳ ቀን ወጪው ከፍ ያለ ነው ። ዕረፍት የሌላቸው የኑሮና የአገልግሎት መስኮች በግድ ማረፍ የመጣ ቀን ለማገገም አስቸጋሪ ናቸው ። “ካለቀ ቁጠባ ፣ ከከሱ ቅለባ” አይሆንም ። ንሥር በአርባ ዓመቱ ራሱን ያድሳል ። ራሱንም የሚያድሰው ጭው ባለ ሸለቆና ገደላማ ስፍራ ላይ ነው ። በዚያም ያረጀውን የአካል ክፍል በሙሉ ነቃቅሎ ይጥላል ። ንሥር ራሱን ባያድስ ዐሥር ዓመት በጉልበት መኖር ይችላል ። ራሱን ካደሰ ግን ዐርባ ዓመት መኖር ይችላል ። ለራሳችን የጽሞና ጊዜ ካልሰጠነው ኃይላችንን አሟጠን ትንሽ መሄድ እንችላለን ። ከቆምን ግን አደገኛ ነው ። ነዳጁ ያበራበት መኪና መጓዝ ይችላል ። የሚጓዘው ግን ጥቂት ርቀት ነው ። ነዳጁ ፍጹም አልቆ አየር ከሳበ ጉዳቱ ከፍተኛ ነው ። ሰው ሠራሽ ነገሮች ሁሉ ከሰው በመነሣት የተሠሩ ናቸው ። ሰው ሁለት ዓይን አለው ፣ መኪናም እንዲሁ አለው ። መኪና መስተዋቱን የሚያጸዳበት ውኃና መጥረጊያ አለው ፣ ሰውም ዓይኑን የሚያጥብ ጉም መሰል ነገር አለው ። መኪና ነዳጅ ይወስዳል ፣ ሰውም ይመገባል ። ሰው ሠራሽ ነገሮች በአብዛኛው ከተፈጥሮ የተኮረጁ ናቸው ።
የእስራኤል ልጆች የምድሪቱን ሰንበት ለተወሰኑ ዓመታት አከበሩና ከዚያ በኋላ ተዉት ። ለ490 ዓመታት ያህል ምድሪቱ ሰንበቷን አላከበረችም ነበር ። የ490 ዓመታት የምድሪቱ ሰንበት 70 ዓመት ይመጣል ። ሰባ ዓመት የፈጀው የባቢሎን ምርኮ ምድሪቱ ሰንበቷን እንድታከብር የተደረገ ሰማያዊ ፍርድ ነው ። “በኤርምያስም አፍ የተነገረው የእግዚአብሔር ቃል እንዲፈጸም ፥ ምድሪቱ ሰንበትን በማድረግዋ እስክታርፍ ድረስ በተፈታችበትም ዘመን ሁሉ ፥ ሰባ ዓመት እስኪፈጸም ድረስ ፥ ሰንበትን አገኘች ።” ይላል /2ዜና 36፥21/። የሕይወታችንን ሰንበት ካላከበርን እንዲህ ሊፈጸም ይችላል ። ብዙ አውታታዎች ፣ እግዚአብሔር ብዙ በረከት የሰጣቸው ከርታቶች ማረፍ ባለመቻላቸው ይኸው በአልጋ ላይ አርፈዋል።  ይኸው በእስር ቤት ተቀምጠዋል ። ስግብግቦች ያላቸውን ይወረሱና እንዲያርፉ ይደረጋል ።
2- ለድሆችና ለጦም አዳሪዎች ምግብ እንዲሆን ፤
ምድሪቱ ሰንበቷን ማክበር ያለባት በሰባተኛው ዓመት የሚወድቀው ፍሬ ፣ የሚበቅለው እህል ለመጻተኞችና ለእንግዶች ምግብ እንዲሆን ነው ። መጻተኞች አገሬ እገባለሁ እያሉ ዘመን የተራዘመባቸውና ያልሞላላቸው ናቸው ። እንግዶች የኖሩበት አገር እንደ ጋለ ነሐስ አላስቀምጥ ብሏቸው ባርፍ ብለው ዞር ያሉ ናቸው ። ድሆች በአገር ውስጥ ያሉ ነገር ግን የገዛ አገራቸው ፊቱን ያዞረባቸው ናቸው ። ድሆች ሳይሰደዱ የተሰደዱ ናቸው ። እግዚአብሔር እነዚህ መጻተኞች ፣ እንግዶች ፣ የአገር ልጅ ድሆች አስቡ አለ ። ምክንያቱም እናንተም በግብጽ ስደተኞች ነበራችሁና ስደተኞችን ውደዱ በማለት ነው ። እግዚአብሔር ችግርን ፣ ስደትንና ረሀብን የሚያሳየን እንድናዝን እንጂ እኛ ካሳለፍነው ጋር እያነጻጸርን እንድንጨክን አይደለም ። አንድ አገር ላይ ሄደን መንገድ ሲጠፋብን ለማሰብ እንኳ የሚከብድ ግራ መጋባት ይገጥመናል ። እንግድነት የአንድ ዓመታቱን መከራ በአንድ ቀን ዕረፍት ለመካስ የሚደረግም ጥረት ነው ። ዕረፍት ላሻቸው ዕረፍት መስጠት ትልቅ ነገር ነው ። የምድሪቱ ሰንበት ያስፈለገው እነዚህን ምስኪኖች ለማሰብ ነው ።
ብዙ ምስኪኖችና ጦም አዳሪዎች ዛሬም አሉ ። ብዙ ሥርዓቶች የተለዋወጡት ድህነትን ከምድር ላይ እናጠፋለን ብለው ነው ። ማኅበረሰባዊው ርእዮተ ዓለም ፣ የዓለምን ሀብት በእኩል ማካፈል አልቻለም ። ሁሉንም ድሃ አድርጎ አስቀመጠው ። መዋዕለ ንዋይን አፍስሱ የሚለው ርእዮተ ዓለምም ጥቂቶችን የምድር ጌቶች አድርጎ ድሆችን ረመረማቸው ። ድህነትን ለማጥፋት የተጀመረው ርእዮተ ዓለም ሁሉ ድሃን በማጥፋት ተደመደመ ። ድህነት ቅነሳ ድሃ ቅነሳ ሆነ ። አስቀድሞ የዛሬ ሦስት ሺህ ዓመት እግዚአብሔር አምላካችን ፡- ድሆች ከምድሪቱ አያልቁምና ብሎ ተናግሮ ነበር ። ይኸው ዛሬም እየበዙ ነው ። ስለ ሰው መብት ያወሩ የነበሩ ስልጡን አገራትም በድሆች ላይ ሰማይ ጠቀስ አጥር ሠርተው አናስገባም አሉ ። ስለ ድሆች ማውራትና ማድረግ በጣም የተለያየ ነው ። ለድሆች ስለ ሠራን መስጠት በቂ አይደለም ፤ ለመስጠት መሥራት ያስፈልጋል ። የአንድ ዓመት ሥራዬ ለድሆች ነው ማለት ይጠይቃል ። የሰውን ረሀብ ሲሰሙ ቤታቸውን ሸጠው የሰጡ እንዴት የተባረኩ ነበሩ ። እኔ ተከራይቼ መኖር እችላለሁ ፣ እነርሱ ግን ከዛሬ በኋላ መኖር አይችሉም ያሉ ወገኖች በርግጥም የተባረኩ ናቸው ። በድሃ የሚጨክን ድሃ ነው ። ለዚህም ጭቁን የነበሩና ስለ ጭቆና ደከምን ያሉ የአፍሪካ ሰዎች መልሰው ድሃ አስጨናቂ ሲሆኑ ማየት ማመን ይከብዳል ። ሌላው ዓለም ከሌላው አገር እየሰረቀ አገሩን ይመግባል ፣ እነርሱ ግን የአፍሪካን ንብረት ወደ ባለጠጋ አገራት ያግዛሉ ። ንብ ማር የምትሠራው ለሰው ብላ አይደለም ። አንድ ቀን ዐርፌ እበላዋለሁ ብላ ነው ። ግን አትበላውም ። እነዚህም ወገኖች አይበሉትም ። ድሆችን የረሳች አገርና ቤተ ክርስቲያን ዕድሜአቸው እየተቀጨ ይሄዳል ።
እናንተ የቤተ ክርስቲያን መሪዎች ድሆች አስፈላጊ ናቸው ። ባለጠጎች የእናንተን ስብከት ለመስማት ጊዜ የላቸውም ። ከቃለ እግዚአብሔር ይልቅ አጫዋች ሰው ይፈልጋሉ ። እናንተ የምድር ነገሥታት ቤተ መንግሥቶቻችሁን የሚጠብቁ ወታደሮች ድሆች ናቸው ። እናንተ ባለጠጎች የድሆች አንድ ብር በባንክ ተጠራቅሞ ነው እናንተ የምትበደሩት ፣ ሀብታም የምትባሉት ። ድሆች በረከቶቻችን ናቸው ። ዝቅ ብለው የሚያጸዱልን ፣ ድንጋይ ተሸክመው ቤታችንን የሚሠሩልን ድሆች ናቸው ። ስንሞት የሚያለቅሱልን ፣ ሬሳችንን የሚሸከሙልን ድሆች ናቸው ። ለድሆች ይህ አይገባቸውም ። አዎ የምድሪቱ ሰንበት ተራ ትእዛዝ አይደለም ፣ ለድሆች ስለ ማሰብ የሚናገርም ነው ።  የእስራኤል ልጆች ይህን የምድሪቱን ሰንበት ስላላከበሩ አራት መቶ ዘጠና ዓመት ድሆችን ጨቆኑ ። በግብጽ ምድር 430 ዓመት ባሪያ ነበሩ ። ያንን በድሆች ደገሙት ።
3-የእግዚአብሔርን በረከት እንዲያዩና እንዲለማመዱ ነው
እግዚአብሔር በስድስተኛው ዓመት በረከት እንደሚያኖር የሚያውቁበት ነው ። ሁልጊዜ የሚኖሩት ስለ ሠሩ ይመስላቸዋል ። መሥራት መልካም ነው ። ነገር ግን የሚያኖር እግዚአብሔር ነው ። ስለዚህ ስድስቱን ዓመታት በዓመቱ በረከት ይኖሩና በሰባተኛው ዓመት በእግዚአብሔር እንደሚኖሩ ያምናሉ ። የዓመቱ ለሁለት ዓመት ይበቃቸዋል ማለት ነው ። እግዚአብሔር የእኛን እምነት የሚጨምረው እኛን በማቆምም ነው ። ተኝተን በአልጋ ፣ ታስረን በወኅኒ ባሳለፍነው ዘመን እግዚአብሔር ቤተሰባችንና እኛን ሲያኖር አይተናል ። እኛ ከቆምን የሚቆም የመሰለን ነገር ሁሉ ሲቀጥል ራሳችንን እንታዘባለን ፣ እምነትን እንለማመዳለን ። ከሥራ ከወጣሁ ቤተሰቤ ምን ይሆናል ? እንላለን ። እኔ ከሞትሁ ልጆቼ እንዴት ያድጋሉ ? እንላለን ። እግዚአብሔር እንዲህ ያለውን አለማመን አይወደውም ። ከእኛ ይልቅ ለፈጠረው ያዝናል ።
4-ባሮችና አሽከሮች የዓመት ፈቃድ እንዲያገኙ ነው
በሰባተኛው ዓመት ምድሪቱ ታርፋለችና የሚያርሱ ፣ የሚቆፍሩ ፣ የሚያርሙ ፣ የሚኮተኩቱ ዕረፍት ያገኛሉ ። በምድሪቱ ላይ የቀረው በረከትም የእነርሱ ይሆናልና የጥጋብ ዓመታቸው ነው ። እግዚአብሔር ያለ ዕረፍት ስለሚሠሩ ሠራተኞች ግድ ይለዋል ። መቼ ነው ባለጠጎች ዓመት ሙሉ ያስተናገዱአቸውን ሠራተኞች አንድ ቀን ቆመው የሚያበሏቸው ? ይህ ዓመት የዕረፍት ዓመት ነውና ከዘመዳቸው ርቀው ያሉ ሠራተኞች አንድ ዓመት መገናኘት ይችላሉ ።
አዎ የምድሪቱ ሰንበት ዛሬም ሊከበር ያስፈልገዋል ። ዛሬም አሳሳቢ ነገር አለ ፡-
·       ጥቂቶች ብቻ እየደከሙ በዚያው እያለቁ ነው ። ዓለም መቅረዟ ሊጠፋ ጥቂት እየቀራት ይመስላል ። ሰንበት ይከበር ። የመገቡን ይመገቡ ፣ ያጽናኑን ክብር ይሰጣቸው ።
·       ድሆች የባለጠጎች ዒላማ ከሆኑ ሰንብተዋል ። የድሆችን ጣራ አናይም ፣ አርቁልን የሚሉ አዲስ ግልብጦች ፣ የሀብት አብሾ ናላቸው ላይ የወጣ ዛሬም አልበረዱም ። የድሆችና የባለጠጎች ከተማና መንደር እየተከፋፈለ ነው ። ይህችን ዓለም ያለ ጊዜዋ የሚያጠፋት ይህ ድንበር ነው ። ባለጠጎችና ድሆች ተመጋጋቢዎች ናቸው ። ይፈላለጋሉ ። የመንግሥትም ዓላማ የባለጠጎችን ሀብት መጠበቅ ሳይሆን ድሆችንና ባለጠጎችን ማቀራረብ ነው ።
·       የብዙ ሰው እምነቱ እየላላ ነው ። ከስግብግብነት ባቡር ተሳፍሮ መቆም ያቃተው አያሌ ነው ። መውረጃ ፌርማታውን አጥቶ በሠራው ቤት ማረፍ ፣ የወለዳቸውን ልጆች መልክ መለየት ያቃተው እየበዛ ነው ። እምነት ስለ ጠፋ ነው ሌብነት የበዛው ።
·       የድሆች መከራ ዕለት ዕለት እየጨመረ ነው ። ብዙ ዕንባ እየፈሰሰ ነው ። እግዚአብሔር መስፈሪያውን ይዞ የሰፈረልን ቀን ይከብደናል ።
 አዎ የምድሪቱን ሰንበት እናክብር ። ጾመ ነነዌን ስንጾምም ብሔራዊ ንስሐ እያደረግን ፣ እርስ በርስ እየታረቅንና እየተዛዘንን ይሁን ።

ያጋሩ

ያግኙን

ዲያቆን አሸናፊ መኰንን
ስልክ ፡ +251930006086                             +251911699907

ኢሜል፡ ashumekon@gmail.com

የገጹ ዓላማ

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን በእግዚአብሔር ቃል ማነጽና የተሻለ ዘመንን መናፈቅ ነው።

አሸናፊ መኮንን
Ashenafi Mekonnen
የኢትዮጵያ ንግድ ባንክ
Commercial Bank of Ethiopia
1000165078482

አቢሲኒያ ባንክ
Bank of Abyssinia
23202573

ሕብረት ባንክ
Hibret Bank
1030416569497017

ወጋገን ባንክ
Wegagen Bank
0870286030101

አዋሽ ባንክ
Awash Bank
01320034656200

በማህበራዊ ሚዲያ ይወዳጁን።

copyright @ 2021 ዲያቆን አሸናፊ መኰንን

የዚህ ገጽ ዓላማ ኦርቶዶክሳዊ ትምህርቶችን ማስተላለፍ፣ ትውልድን 
በእግዚአብሔር ቃል ማነጽና የተሻለ ዘመንን መናፈቅ ነው።