ድንበር ጠብቆ መኖር
የወጣት አገልጋይ ፈተና
ነገሥታት የቤተ ክርስቲያን ጠላት በነበሩበት ጊዜ ሰማዕታትን አበዙላት ። የቤተ ክርስቲያን ወዳጅ በሆኑ ጊዜ መናፍቃንን አበዙባት ። ቤተ ክርስቲያን ንጉሠ ነገሥት ክርስቶስ የሚያዝዛት በምድርና በሰማይ ያለች ናት ። እርሱ እንደ ራስ ሆኖ በፍቅርና በክብር ያዝዛታል ። ቤተ ክርስቲያንም ራስዋን አክብራ ፣ የአካልነት ግዳጅዋን ትወጣለች ። ቤተ ክርስቲያን የክርስቶስ የሥልጣኑ ጠባቂ ሳትሆን የቤተ ክርስቲያን የሥልጣን መሠረት እርሱ ነው ። ሠራዊቱን የሚጠብቅ ድንቅ ንጉሥ ነው ፤ የተሸከሙትን ኪሩቤል የተሸከመ ታላቁ ባለ አልጋ ነው ። እሾም አይል ንጉሥ ፣ አገኝ አይል ባለጠጋ ነው ። ምድራውያን ነገሥታት ግን ለሥልጣናቸው ዘብ ሊያደርጓት ቤተ ክርስቲያንን ይፈልጉታል ። ከትልቁ ንጉሥ አፋትተው የራሳቸው የቤት አሽከር ሊያደርጓት ይመኛሉ ። ከቤተ ክርስቲያን እየበሉ ወደ ነገሥታት የሚውጡ ምንደኞች ረጅም እጅ ሆነው ያስደፍሯታል ። የቤተ ክርስቲያን መሪም ከውስጥ የነገሥታት ወኪልና ወሬ አቀባዮች ፣ ከደጅ ሰይፍና ጎመድ የያዙ ጭፍሮች ያስጨንቁታል ። የቤተ ክርስቲያን ኃይል የምእመናን ቍጥር አይደለም ፣ ተረትቶ የማይገባው ኢየሱስ ክርስቶስ ነው ። መሪው ይህን ዓለም የሚያሸንፈው በእምነት ብቻ ነው ። የከበቡትን ሳይሆን የከበቡትን የከበበውን አቅም ያያል ። ቢታሰር ይፈታል ፣ ቢሞት ይቀበራል ፣ አንድ ቀንም ይነሣል ።
ቤተ ክርስቲያንን የሚደፍር ውስጥ አዋቂ ነው ። የሚያውቅ የሚመስለው ግን የማያውቀው ሰው እርሱ ቤተ ክርስቲያንን ደፍሮ ያስደፍራታል ። ምድራዊ ገዥዎችን ክንድ አድርገው ቤተ ክርስቲያንን የሚታገሉ የሳጥናኤል የውስጥ ካድሬዎች ፣ ለመጣ ለሄደ ሲዘፍኑ የሚኖሩ ፣ ይሉኝታ የሌላቸው ፣ የተዛመዳቸው ሲያፍርላቸው እነርሱ ግን ምንም እፍረት የሌላቸው የጉድ ሙዳይ ናቸው ። ንጉሥ ዕጣን ዕጣን ከሸተተ ፣ ካህን ፖለቲካ ፖለቲካ ከሸተተ ነገር ተበላሸ ። በቤተ ክርስቲያን ውስጥ የሚነሡ የሥልጣንና የሀብት ጥያቄዎች ቤተ ክርስቲያንን በዓለማውያን እንድትዳኝ ያደርጓታል ። ቤተ ክርስቲያን የሕግና የፍትሕ መገኛ የሆነው የክርስቶስ አካል ናትና ፍትሕ መንፈሳዊን ማስፈን ፣ ወደ ምድራውያን ፍርድ ቤቶች ጉዳዮች እንዳይሄዱ መከልከል አለባት ። እውነተኛ አባትም ቤተ ክርስቲያን በዓለም ችሎት ፊት ከምትቆም እኔ ሁሉን ጥቅሜን እተዋለሁ ማለት አለበት ። ዛሬም ክርስቶስን በአደባባይ የምናራቁተው በምድራውያን ፍርድ ቤቶች ስንካሰስ ነው ። ይህ ምስክርነታችንን ያበላሻል ። ተአማኒነታችንን ያሳጣል ። ለመካድ በቋፍ የሆነው ሰውም የሩጫ ተኩስ ይሆንለታል ።
ነገሥታትንና ከሃይማኖቱ ውጭ ያሉትን ወገኖች በሚመለከት መሪው መያዝ የሚገባውን አቋም ሐዋርያው እንዲህ ጽፎልኝ ነበር ። “እንግዲህ እግዚአብሔርን በመምሰልና በጭምትነት ሁሉ ጸጥና ዝግ ብለን እንድንኖር፥ ልመናና ጸሎት ምልጃም ምስጋናም ስለ ሰዎች ሁሉ ስለ ነገሥታትና ስለ መኳንንትም ሁሉ እንዲደረጉ ከሁሉ በፊት እመክራለሁ።” (1ጢሞ. 2፡1)። ስለ ሰው ሁሉ ፣ ስለ ነገሥታት በአምልኮ መጽናት ይገባል ። አሊያ ወገን ይዘን ፣ የበለው ጡሩምባ ከነፋን ጸጥና ዝግ ብለን መኖር እንቸገራለን ። የምናገለግላቸው ምእመናንን አደጋ ላይ እንጥላለን ። ስለ ሰው ሁሉ ስንጸልይ ሰዎች ይወዱናል ። መማለድ ትልቅ የፍቅር መግለጫ ነውና ። ነገሥታትም ስማቸውን ጠርተን በቅዳሴው ፣ በመሥዋዕቱ ፣ በአስተብቍዖቱ ስናስባቸው የሚትጸልይላቸውን ቤተ ክርስቲያን ለመጉዳት ይቸገራሉ ። ቢሆንም የቤተ ክርስቲያን መንገድ የመስቀል መንገድ ነውና ሁልጊዜ የመከራ አጀብ አለው ። ዓለም ከምታሳጣን ክርስቶስ የሰጠን ይበልጣል ።
ይህ ሁሉ አሳብ በውስጤ እየተመላለሰ የባሕሩን የየብሱን መንገድ ፈጸምሁ ። አሁን ከጳውሎስ ደጃፍ ላይ “ጢሞቴዎስ ነኝ” ስል ራሴን አገኘሁት ።
ይቀጥላል
ጢሞቴዎስ ነኝ ክፍል 10
ዲያቆን አሸናፊ መኰንን
መጋቢት 14 ቀን 2016 ዓ.ም.
